२ साप्मुःन्धुम् 18 - लिम्बुमिकायाःल्ले़ आहाबरे़ कुदक्ले़ङ्वाओ पाःत्तु 1 यहोसापाते़न् साॽरिक् याङ्साकुन्धेसाबा नु कुमिङ् के़इङ्बा पोःक्खे़, हे़क्क्याङ् खुने़ॽ इस्राइलबा हाङ् आहाबे़न्नु इत्छाबा चोःक्मालाम् के़सु॥ 2 कुभा तङ्बे एगाङ् खुने़ॽ सामरियाओ आहाबरे़ कुदुम्से़ पे॥ आहाबरे़ यहोसापाते़न् हे़क्क्याङ् खुने़ॽनु थे़ःक्पे़त् के़धाङ्बाहाॽ कुजा मे़प्मासिरे़ लागि यरिक् मे़ल्लुक्हाॽ नु पित्हाॽ स्ये़रुसि हे़क्क्याङ् रामोत-गिलादे़न् थङ्ङो फप्मारे़ लागि खुने़ॽ हुसु॥ 3 इस्राइलबा हाङ् आहाबरे़ यहुदाबा हाङ् यहोसापाते़न् मे़त्तु, “रामोत-गिलादे़न् थङ्ङो फप्मारे़ लागि थे आदाङ्बारे़ आङ्गाॽ के़भाॽबाआबि?” यहोसापातरे़ नुगप् पिरु, “आङ्गाॽ आदाङ्बा हे़क्तङ्बाएसाबा, खे़ब्याङ् आङ्गाॽ आमनाहाॽ आदाङ्बारे़ए के़मना कुसिङ्बासि॥ कन् थङ्ङो आनिगे आदाङ्बा फाॽआसिगे़ॽ॥” 4 कर यहोसापातरे़ इस्राइलबा हाङ्ङिन् अक्खेआङ् मे़त्तु, “यहवे दाङ्बे़न् तगि सुजा नाःक्ते़ॽओ॥” 5 खे़ब्याङ् इस्राइलबा हाङ् आहाबरे़ किप् लिसि यारिक् माङ्निङ्वाॽपान् के़बाःप्पाहाॽ फुक्खुसिआङ् खे़ङ्हाॽ सेःन्दोसुसि, “थे आङ्गाॽ रामोत-गिलादे़न् थङ्ङो फत्तुङ्बि इ मे़भत्तान्बि?” खे़ङ्हाॽरे़ नुगप् मे़बिरु, “थङ्ङो फत्ते़ॽ, थेआङ्भे़ल्ले़ यहवे दाङ्बे़ल्ले़ खे़न् आदाङ्बारे़ के़हुक्को थासु के़बिरो॥” 6 कर यहोसापातरे़ सेःन्दोसु, “सुजा नाःक्मारे़ लागि थे कप्मो यहवे दाङ्बे़ल्ले़ कुमाङ्निङ्वाॽपान् के़बाःप्पा हाःत्ताङ् होःप्पाङ्बि?” 7 इस्राइलबा हाङ्ङिल्ले़ यहोसापाते़न् नुगप् पिरु, “यहवे दाङ्बे़न् लाम्बा सुजा नाःक्मारे़ लागि आल्लसाङ् लत्छा मनाग वाॽआ, कर खे़न् मनान् आङ्गाॽ चिःत्तुङ्ॽ, थेआङ्भे़ल्ले़ खे़ल्ले़ आङ्गाॽ आलागि नुबा माङ्निङ्वाॽपान् मे़बाःत्तुन्ॽ॥ खे़ल्ले़ ताप्फे़ःम्बारक् पाःत्तुॽ॥ खे़ङ्ग यिम्लारे़ कुस्सा मिकायान्लो॥” यहोसापातरे़ नुगप् पिरु, “आदाङ्बा हाङ्ङिल्ले़ अक्खे पाःप्मा मे़नुॽने़न्!” 8 खे़ब्याङ् इस्राइलबा हाङ्ङिल्ले़ खुने़ॽ कुसुहाङ्युक्पाहाॽओ थिक्पा उःत्तुआङ् मे़त्तु, “यिम्लारे़ कुस्सा मिकायान् खिमो तारे़ॽ॥” 9 इस्राइलबा हाङ्ङिन् नु यहुदाबा हाङ् यहोसापाते़न् हाङ्जाङ्ङो सामरियाबा यम्बा लाम्धेःत्तिल्ले़ कुदगि चाधाम्मादे़न् निःत्ताङ् खुन्छिॽ आप्फेक् आप्फेक् हाङ्युक्नाहाॽओ युङे़गरे़सि, हे़क्क्याङ् के़रे़क् माङ्निङ्वाॽपान् के़बाःप्पाहाॽरे़ खे़न् ने़प्फुरे़ खुन्छिॽ तगि माङ्निङ्वाॽपान् मे़बाःत्तुर मे़यागे़॥ 10 केनानरे़ कुस्सा सिदकियाहःल्ले़ फे़न्जेॽ ताङ्हाॽ चोगुआङ् युङे़, हे़क्क्याङ् खुने़ॽ अक्खे पाःत्तुआङ् उवा चोगु, “यहवे दाङ्बे़ल्ले़ हाबा कन् पाःत्तुरो—‘आदाङ्बासिरे़ अरामिहाॽ हर्गुप् के़म्मे़ङ्सुसिन्ल थारिक् खे़ङ्हाॽ कन् ताङ्हाॽरे़ लम्माङ् लम् के़लःम्सुसिॽ॥’” 11 वेॽ के़रे़क् माङ्निङ्वाॽपान् के़बाःप्पाहाॽरे़ आम्भा कम्भलॽरिक्के माङ्निङ्वाॽपान् मे़बाःत्तुर मे़यागे़॥ खे़ङ्हाॽरे़ मे़बाःत्तु, “रामोत-गिलादे़न् थङ्ङो फत्ते़ॽआङ् नाःन्दे़ॽ॥ थेआङ्भे़ल्ले़ यहवे दाङ्बे़ल्ले़ रामोत-गिलादे़न् हाङ्ङिल्ले़ कुहुक्को थासुॽ॥” 12 मिकायान् के़उःप्पा के़दाःप्पा इङ्घङ्साबे़ल्ले़ खे़न् मे़त्तु, “ओमे़त्ते़ॽ, माङ्निङ्वाॽपान् के़बाःप्पा वेॽहाॽरे़ग थिक्हुप् मे़बोःक्खे़आङ् हाङ्ङिल्ले़ कुलिङ्दो के़प्मा माङ्निङ्वाॽपान् मे़बाःत्तुर मे़बत्॥ आदाङ्बारे़ के़बाःन्निन्नाङ् खे़ङ्हाॽरे़ खुन्छिॽ पाःन्निन्नु के़दङ्बा पोङ्ल, निङ्वाॽ के़दाबा पान् पाःत्ते़ॽ॥” 13 कर मिकायाःल्ले़ पाःत्तु, “से़क्खाए यहवे दाङ्बे़न् कुहिङ्वे़त् वाॽबा कुइसिक् नु खे़ने़ॽ कुहिङ्वे़त् के़वाॽबा कुइसिक् आङ्गाॽ माङ्हे़क्सिङ्ङाआङ् पाःत्तुङ्ॽ, आनिङ्वाॽफुमाङ्ङिल्ले़ आङ्गाॽ च्या मे़त्ता, खे़न्लक् आङ्गाॽ पाःत्तुङ्ॽ!” 14 आल्ल खुने़ॽ के़रे़द्ये़ःल्ले़ आहाब हाङ्ङिल्ले़ खे़न् सेःन्दोसु, “मिकायाए, रामोत-गिलादरे़ कुदक्ले़ङ्वाओ आनिगे ते़न्धङ् चोःक्से़ पेगिगे़इ, इ मे़बेगिगे़न्नि?” मिकायाःल्ले़ मे़त्तु, “थङ्ङो फत्ते़ॽआङ् खे़न् नाःन्दे़ॽ, थेआङ्भे़ल्ले़ खे़न् आदाङ्बारे़ के़हुक्को थारो॥” 15 हाङ्ङिल्ले़ खुने़ॽ मे़त्तु, “यहवे दाङ्बे़ल्ले़ कुमिङ्ङो कुजे़क्पा पाःन्लक् पाःत्ते़ॽ, वेॽ पान् मे़बाःत्ते़न्ने़ॽ फाॽआङ् आङ्गाॽ आक्खे़न्ले़ङ् खे़ने़ॽ माङ्गे़हे़क्सिङ्ल याःन्ने़बाबे?” 16 खे़ब्याङ् मिकायाःल्ले़ मे़त्तु, “आङ्गाॽग के़रे़क् इस्राइलिहाॽ मे़ल्लुक्कम्बा मेःन्नेबा मे़ल्लुक्हाॽ हे़क्के कोःक्माहाॽओ फुत्छिङ्ज्याङ् मे़बोःक्खे़बा निसुङ्सिङ्, हे़क्क्याङ् यहवे दाङ्बे़ल्ले़ पाःत्तु, ‘कन् मनाहाॽरे़ खुन्छिॽ कुन्दाङ्बा होप्॥ खे़ङ्हाॽ के़रे़क् नुरिक्काङ् खुन्छिॽ आप्फेक् हिम्हिम् मे़बेःक्ल॥’” 17 इस्राइलबा हाङ्ङिल्ले़ यहोसापाते़न् मे़त्तु, “खे़ल्ले़ आङ्गाॽ आलागि ताप्फे़ःम्बारक् पाःत्तुॽ नुबा माङ्निङ्वाॽपान् मे़बाःत्तुन् फाॽआङ् थे आङ्गाॽ आदाङ्बा मे़त्ने़आङ् मे़वये़ने़म्बि?” 18 मिकायाःल्ले़ आल्लसाङ् पाःत्तु, “कल्ले़चोगुल्ले़ यहवे दाङ्बे़ल्ले़ कुबाःन्निन् खे़प्से़ॽ—यहवे दाङ्बे़न् साङ्ग्राम्पेदाङ्बा के़रे़क् कुधक्सुबाहाॽ खुने़ॽ कुजुक्वा नु कुभे़ङ्वा ले़प्माङ् मे़ये़बे़आङ् खुने़ॽ कुहाङ्युक्नाओ युङे़बा आङ्गाॽ निसुङ्॥ 19 हे़क्क्याङ् यहवे दाङ्बे़ल्ले़ पाःत्तु, ‘रामोत-गिलादे़न् थङ्ङो फप्माआङ् खे़प्मो से़प्मारे़ लागि हाःत्ले़ आहाबे़न् हुसुबाबे?’ “थिक्ले़ कम्भदाङ्बा सुजा नु वेॽइल्ले़ वेॽ सुजा मे़बिरु॥ 20 पिप्मिरि कुसोःन्दिओ लत्छा याम्साम्धिक् तगि फे़रे़आङ् यहवे दाङ्बे़ल्ले़ कुदगि ये़म्सिङ्ङाङ् पाःत्तु, ‘आङ्गाॽ खे़न् हुसुङ्ॽ॥’ “यहवे दाङ्बे़ल्ले़ सेःन्दोसु, ‘आक्ख्याङ्बे?’ 21 “खे़ल्ले़ पाःत्तु, ‘आङ्गाॽ पेःक्काआङ् खे़ल्ले़ कुमाङ्निङ्वाॽपान् के़बाःप्पाहाॽरे़ खुन्छिॽ मुराओ इङ्ले़क् के़बाःप्पा याम्साम्धिक् पोङ्ङा॥’ “यहवे दाङ्बे़ल्ले़ मे़त्तु, ‘खे़ने़ॽ खे़न् हुमारे़ लागि कुलिङ्दो के़गे़प्पा के़बोङ्ॽ॥ पेगे़ॽआङ् हुसे़ॽ॥’ 22 “खे़ल्ले़चोगुल्ले़ आल्ल यहवे दाङ्बे़ल्ले़ आदाङ्बारे़ कन् के़रे़क् के़माङ्निङ्वाॽपान् के़बाःप्पाहाॽरे़ खुन्छिॽ मुराओ इङ्ले़क् के़बाःप्पा याम्साम्मिन् केःत्तु पिरुसिआङ् याक्॥ आदाङ्बारे़ के़मे़क्मे़न् यहवे दाङ्बे़ल्ले़ इङ्जाङ् चोगुसुरुआङ् वाॽ॥” 23 खे़ब्याङ् केनानरे़ कुस्सा सिदकियाहःन् थाःङ् थाङे़आङ् मिकायाःल्ले़ कुनाराओ थाप्प्राःल्ले़ ले़ङ् मे़त्तु, हे़क्क्याङ् खे़न् मे़त्तु, “आल्ल आत्तिलाम् पोःक्खे़आङ् यहवे दाङ्बे़ल्ले़ कुयाम्साम्मिन् आङ्गाॽलाम् खे़ने़ॽनु पाःप्मारे़ लागि पेबे?” 24 मिकायाःल्ले़ नुगप् पिरु, “खे़ङ्ग खे़ने़ॽ आप्फेक् याक्फाङ्ङो सिगाङ् चिङ्सिङ्से़ के़बेःक्पा ये़न्निल्ले़ याःन्दिक् खे़ने़ॽ निङ्वाॽ के़घोसुॽ॥” 25 खे़ब्याङ् इस्राइलबा हाङ् आहाबरे़ इङ्जाङ् पिरु, “मिकायान् ते़म्से़ॽआङ् ये़क्यक्कोबा युक्साबा आमोन नु हाङ्सा योआसरे़ खुन्छिॽ लक्पे़न्नो हुक्सुप्ते़से़ॽ, खम्भ्याङ् मे़त्ते़से़ॽ, 26 ‘हाङ्ङिल्ले़ अक्खे पाःत्तुॽ—कन् मनान् पुङ्लाहिम्मो साक्ते़म्मे़ॽ, हे़क्क्याङ् नुरिक् तारिक्काङ् आङ्गाॽ मे़न्नुःङ् मे़न्दाए थारिक् खुने़ॽ खरे़ःङ् नु च्वाःत्लक् पिरे़म्मे़ॽ वेॽ थेआङ् मे़बिरे़म्मिन्ने़ॽ॥’” 27 मिकायाःल्ले़ उवा चोगुआङ् पाःत्तु, “आदाङ्बा नुरिक् तारिक्काङ् के़नुःङ् के़दाने़भग्र यहवे दाङ्बे़न् आङ्गाॽनु पारे़बा मे़ःन्लत्छ॥” खुने़ॽ आल्लसाङ् योॽरुआङ् पाःत्तु, “के़रे़क् मनाहाॽरे़ आङ्गाॽ आबाःन्निन् सिङ्सिङ् ये़क्ये़क्काङ् खे़प्से़म्मे़ॽओ!” आहाबे़न् रामोत-गिलादओ मे़स्ये़रु 28 खे़ब्याङ् इस्राइलबा हाङ् आहाबे़न् नु यहुदाबा हाङ् यहोसापाते़न् रामोत-गिलादओ थोःक्ने़सि पेसि॥ 29 इस्राइलबा हाङ्ङिल्ले़ यहोसापाते़न् मे़त्तु, “आङ्गाॽ कुसेःन् मे़न्निःमनाबा चाङ् चाक्खुङ्ङाङ् थङ्ङो पेःक्का, कर आदाङ्बारे़ के़हाङ्जाङ्ङिन्ने चाक्खे़ॽ॥” हे़क्क्याङ् इस्राइलबा हाङ्ङिन् कुसेःन् मे़न्निःमनाबा चाङ् चाक्खुआङ् थङ्ङो पे॥ 30 इस्राइलबा हाङ्ङिन्नुःल्ले़ वेॽ चुक्सा इग्र यम्बानु थङ् मे़जोगे़म्मिन्ने़ॽ फाॽआङ् आरामबा हाङ्ङिल्ले़ खुने़ॽ कुअन्लाहाॽओबा सुम्बोङ्ङाङ् ने़त्छि थक्मोबाहाॽ अक्तङ्बा इङ्जाङ् पिरुसिआङ् वये़॥ 31 आल्ल अन्लाधाहाॽओबा थक्मोबाहाॽरे़ यहोसापाते़न् मे़निसुल्ले़ खे़ङ्हाॽरे़ “खुने़ॽए इस्राइलबा हाङ्” मे़लेःत्तु॥ खे़ल्ले़चोगुल्ले़ खुने़ॽ कुभत्छे़ हिल्लिक् मे़हिसिङ्, कर यहोसापाते़न् यम्बा इक्लाओ अःक्ते़॥ हे़क्क्याङ् यहवे दाङ्बे़ल्ले़ खुने़ॽ फाॽरु, खम्भ्याङ् निङ्वाॽफुमाङ्ङिल्ले़ खे़न् अन्लाधाहाॽओबा थक्मोबाहाॽ खुने़ॽलाम् थिक्नाहाङ् हिसुदेसुसि॥ 32 थेआङ्भे़ल्ले़ थक्मोबाहाॽरे़ खुने़ॽग इस्राइलबा हाङ् मे़ःन्लत्छ के़लॽबा निङ्वाॽ मे़घोसुआङ् खे़ङ्हाॽरे़ खुने़ॽ फप्मा मे़नाॽरु॥ 33 कर कुभा थिक्ले़ कुलिन् ले़ॽरुआङ् कुदोःङ्ङिन् इमे़न्नि खामे़न्नि आबुदेसु, हे़क्क्याङ् खे़न् तोःङ्ङिल्ले़ इस्राइलबा हाङ्ङिन् कुसाःङ्बे सेःप्चाङ्ङिल्ले़ कुदुम्बेओ याङ्घु॥ हाङ्ङिल्ले़ खुने़ॽ कुअन्लाधा के़लोङ्बे़न् मे़त्तु, “अन्लाधान् हिसे़ॽआङ् आङ्गाॽ ते़न्धङ् के़बोङ्बालाम् लाःक्कात् लःत्ताङ्ङे़ॽ॥ आङ्गाॽ काःन्दाङ्ङाङ् वाॽ॥” 34 नाम्धाधाए ते़न्धङ् पोःक्खे़आङ् पत्छे़ हे़क्क्याङ् हाङ्ङिन् कुअन्लाधाओ खे़ःम्सिङ्ङाङ् अरामिहाॽ ले़प्माङ् हिसिङ्ङाङ् पत्छे़॥ खुने़ॽ युःन्छिक् आम्भा हे़क्केलॽरिक्के पत्छे़, खे़ब्याङ् नाम्ध्ये़ःल्ले़ खुने़ॽ स्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.