२ साप्मुःन्धुम् 17 - लिम्बुयहोसापाते़न् हाङ् पोङ्ॽ 1 आसाःल्ले़ कुएगाङ् खुने़ॽ कुस्सा यहोसापाते़न् यहुदाबा हाङ् पोःक्खे़॥ खुने़ॽ इस्राइललाम् थेःक्सिङ्मारे़ लागि के़धुम्बा चोःक्सिङ्॥ 2 खुने़ॽ यहुदाबा हाङ्यक् के़ने़बा के़रे़क् ये़क्यक्हाॽओ थक्सुबा ने़स्सुसि॥ हे़क्क्याङ् यहुदा के़रे़क् नु खुने़ॽ कुम्बा आसाःल्ले़ हुक्काप् चोगुबा एफ्राइमबा ये़क्यक्हाॽओ कम्ब्राङ्ले़ लागि थक्सुबाहाॽ ने़स्सुसि॥ 3 यहवे दाङ्बे़न् यहोसापाते़न्नु वये़ थेआङ्भे़ल्ले़ खुने़ॽ कुम्बारे़ ओःन्धाक्तुबा कुहेःक्सिङ्मोबा कुबिहाॽ कुइसिक् लाङ्घेगे़॥ खुने़ॽ बाल माङ्हाॽ मे़नाःत्तुसिन् मे़दिम्दुसिन्, 4 कर खुने़ॽ कुम्बारे़ कुनिङ्वाॽफुमाङ्ङिन् कोःत्तु, हे़क्क्याङ् खुने़ॽ कुइजाःङ्हाॽ इःत्तु नाःत्तु॥ खुने़ॽ इस्राइलबा ये़प्ले़क्हाॽओ मे़वने़न्॥ 5 यहवे दाङ्बे़ल्ले़ खे़ल्ले़ कुयुक्को खुने़ॽ कुहाङ्जुम्मिन् थधप् मे़ल्लॽमनाबा चोगु, हे़क्क्याङ् यहुदाबा के़रे़क्ले़ खुने़ॽओ हुक्वाहाॽ मे़दोन्दु॥ खुने़ॽ साॽरिक् याङ्साकुन्धेसाबा नु कुमिङ्सो कुधाःङ्सो के़इङ्बा पोःक्खे़॥ 6 यहवे दाङ्बे़ल्ले़ कुलाम्मो लाङ्घेःक्मारे़ लागि खुने़ॽ साॽरिक् निङ्वाॽ पिरु॥ कन्नुःल्ले़आङ् यरिक् खुने़ॽ यहुदाबा माङ्धाःन्हाॽ नु असेरा माङ्ङिल्ले़न् नावाइत्लाहाॽ खे़त्तुदेसु॥ 7 खुने़ॽ हाङ्युक् चोगुबा ये़म् सुम्सिगेक्पा तङ्बेओ यहुदाबा ये़क्यक्हाॽओ निसाम् हुॽमासिरे़ लागि खुने़ॽ कुसुहाङ्युक्पा बेन-हेल, ओबदिया, जकरिया, नतनेल नु मिकायान् पाङ्घुदेसुसि॥ 8 खे़ङ्हाॽनु सोसोरिक् के़वाॽबा फाङ्सि ले़बिहाॽ—समायाह, नतन्याह, जबदियाह, असाहेल, समिरामोत, यहोनातान, अदोनियाह, तोबियाह नु तोब-अदोनियाह मे़वये़॥ हे़क्क्याङ् निङ्वाॽफुसाम्बा एलिसामा नु यहोराम वये़सि॥ 9 यहवे दाङ्बे़ल्ले़ कुसाम्योथिम् इङ्जाङ्ङिन् मे़याङ्सिङ्ङाङ् खे़ङ्हाॽरे़ यहुदाबा के़रे़क् पिसाङ् मे़हुॽरुसि॥ मनाहाॽ मे़हुॽरुसिर खे़ङ्हाॽ यहुदाबा के़रे़क् ये़क्यक्हाॽओ मे़बेरो॥ यहोसापातरे़ पयम् यम्बा कुयाःम्बक् 10 यहुदा कब्रिङ् पिसाङ् के़ने़बा हाङ्जुम्हाॽ यहवे दाङ्बे़न्नु मे़गिसे़, हे़क्क्याङ् खे़ङ्हाॽ यहोसापातरे़ कुदक्ले़ङ्वाओ थङ् मे़न्जोगे़न्॥ 11 कुभा पलिस्तिहाॽरे़ग यहोसापातरे़ओ मिक्तोःक्हाॽ नु युप्पा थोःक्ला मे़धाक्तु॥ अरबिहाॽरे़आङ् ७,७०० थुःम्बाहाॽ नु ७,७०० मे़ःन्दबःक्काहाॽ मे़धाक्तुसि॥ 12 यहोसापाते़न् आल्लसाङ् साॽरिक् मुक्के़गुबा पोःक्खे़॥ खुने़ॽ यहुदाओ यक्हाॽ नु थाःङ् युङ्मा ये़क्यक्हाॽ चोगुसि॥ 13 यहुदाबा ये़क्यक्हाॽओ खुने़ॽ वे़त्ते़सरे़ चामा के़योबा कुजाहाॽ फुक्खुयुक्खु॥ यरुसले़ःम्मो चाॽरिक् सधासिङ्मा के़घोबा खुने़ॽ कुधक्लिहाङ्हाॽ मे़वये़॥ 14 खे़ङ्हाॽ खुन्छिॽ आप्फेक् आप्फेक् हिम्सयङ् कुइसिक् कम्भलॽरिक् थक्सुबा याःम्बक्को मे़धे़क्तुसिआङ् मे़वये़रो— यहुदालाम्, १,००० लुप्पोबा थक्मोबाहाॽ— थक्मोबा अदनाह नु सोरिक् ३,००,००० थक्सुबाहाॽ॥ 15 खुने़ॽ कुएगाङ् थक्मोबा येहोहानान नु सोरिक् २,८०,००० थक्सुबाहाॽ मे़वये़॥ 16 खुने़ॽ कुएगाङ् जिक्रिरे़ कुस्सा अमसिया, खे़ङ्हाॽ यहवे दाङ्बे़ल्ले़ कुमाङ्सेवा याःम्बक्ले़ लागि आप्फेक् निङ्वाॽलाम् याःम्बक् मे़जोगे़॥ खुने़ॽनु सोरिक् २,००,००० थक्सुबा मे़वये़॥ 17 बेन्यामिनलाम्— लत्छा मुक्के़गुबा थक्ले़ङ् एल्यादा नु खुने़ॽनु सोरिक् लिहाॽ नु खोहाॽरे़ काप्तुसिबा २,००,००० थक्सुबा मे़वये़॥ 18 खुने़ॽ एगाङ् यहोजाबाद हे़क्क्याङ् खुने़ॽनु सोरिक् खजुम्घया फे़जुम्भे़यारे़ काप्तुसिबा १,८०,००० थक्सुबा मे़वये़॥ 19 यहुदाओबा यक् के़ने़बा ये़क्यक्हाॽओ हाङ्ङिल्ले़ ने़स्सुसिबाहाॽनुःल्ले़ वेॽ कन् मनाहाॽ हाङ्ङिल्ले़ कुयाःम्बक् चोःक्मो मे़लासे़आङ् मे़वये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.