२ साप्मुःन्धुम् 16 - लिम्बुइस्राइलओ तुक्खे लाक्खे ( १ हाङ् १५:१७-२२ ) 1 आसाःल्ले़ हाङ्युक् चोगुबा सुम्बोङ्ङाङ् तुक्सिगेक्पा तङ्बेओ इस्राइलबा हाङ् बासाःल्ले़ यहुदान् थङ्ङो फत्तु॥ यहुदाबा हाङ् आसाःल्ले़ कुलाजेॽओ लाःप्मादे़न्हाॽ के़रे़क् थेःक्मारे़ लागि बासा हाङ्ङिल्ले़ रामा ये़क्यक्किन् कब्रिङ् लुङ्धाक् से़त्तु॥ 2 आसाःल्ले़ यहवे दाङ्बे़ल्ले़ कुहिम्मो नु हाङ्हिम्मोबा थाःङ्ङो के़युङ्बा साम्म्याङ् हे़क्क्याङ् युप्पाहाॽ लःत्तुआङ् दमस्कसओ हाङ्युक् के़जोःक्पा आरामबा हाङ् बेन-हददे़न् अक्खे मे़त्तुआङ् इङ्घङ् हाक्तुदेसु, 3 “आन्छिॽ पाधे़बाहाॽरे़ खुन्छिॽ लुम्मो वये़बा कुइसिःक्के आन्छिॽ लुम्मो लत्छा नादङ् पोङ्ल॥ आल्ल आङ्गाॽ कन् साम्म्याङ्ङिन् नु युप्पा थोःक्लाःन् हाङुङ्ल पत्ता॥ कल्ले़चोगुल्ले़ इस्राइलबा हाङ् बासाःन्नु के़वाॽबा नादङ्ङिन् आदाङ्बारे़ ले़रे़देसे़ॽ हे़क्क्याङ् आङ्गाॽ आदक्ले़ङ्वाओ खे़ल्ले़ चोगुबा मे़न्वाॽमनाबा पाःन्निन् खुने़ॽ ले़रुदेसुर॥” 4 बेन-हददे़न् आसा हाङ्ङिल्ले़ कुबाःन्निन् खे़म्मा ते़न्दे़॥ इस्राइलबा ये़क्यक्हाॽरे़ कुदक्ले़ङ्वाओ थङ् थक्मारे़ लागि खुने़ॽ कुधक्मोबाहाॽ इङ्जाङ् पिरुसि, हे़क्क्याङ् खे़ङ्हाॽरे़ इयोन, दान, हाबिल-मैम नु नप्तालिबा चायुङ्मा थाःङ्हाॽ के़रे़क् ये़क्यक्हाॽ हुक्काप् मे़जोगु॥ 5 आल्ल बासाःल्ले़ कन् पाःन्निन् खे़प्सुआङ् रामाओ लुङ्धाक् से़प्मा नाॽरु, खम्भ्याङ् खे़प्मो चोगुर यागे़बा के़रे़क् याःम्बक्हाॽ चोःक्मा ले़रु॥ 6 खे़न् एगाङ् आसा हाङ्ङिल्ले़ यहुदाबा के़रे़क् मनाहाॽ खुने़ॽनु सोरिक् तेॽरुसिआङ् बासाःल्ले़ से़त्तु चोगुर यागे़बा रामा ये़क्यक्कोबा लुङ् सिङ्हाॽ फोःक्खुआङ् तेॽरु॥ हे़क्क्याङ् गेबा नु मिस्पाओ कब्रिङ् लुङ्धाक् से़प्मारे़ लागि खे़न् लुङ् सिङ्हाॽ खे़प्मो थे़क्तुरो॥ खागे़इक्पा हनानि 7 खे़न् ये़म्मो खागे़इक्पा हनानिन् यहुदाबा हाङ् आसाओ त्ये़आङ् मे़त्तु, “आदाङ्बारे़ यहवे दाङ्बा के़निङ्वाॽफुमाङ्ङिन् मेःन् कर आरामबा हाङ्ङिन् नागे़साॽरुबाल्ले़ चोगुल्ले़ आरामबा हाङ्ङिल्ले़ कुधक्सुबाहाॽ आदाङ्बारे़ के़हुक्कोलाम् मे़बिन्दे़ मे़बेआङ् मे़वाॽ॥ 8 थे निःत्मे़न्दे़त् अन्लाधाहाॽ नु अन्हाॽ के़गप्पा आत्तातान्ने यरिक् कुसि नु लिबियालि थक्सुबाहाॽ मे़होःप्ते़आङ्बि? हे़क्केसाङ् आल्ल आदाङ्बारे़ यहवे दाङ्बे़न् नागे़साॽरुआङ् खुने़ॽ खे़ङ्हाॽ आदाङ्बारे़ के़हुक्को थासुसि के़बिरे़॥ 9 थेआङ्भे़ल्ले़ आत्तिन्हाॽरे़ खुन्छि निङ्वान् खुने़ॽ ले़प्माङ् माङ्से़वा के़जोःक्पा चोक्, खे़ङ्हाॽ फाॽमासिरे़ लागि के़रे़क् इक्सादिङ् खाम्बेःक्कोए यहवे दाङ्बे़ल्ले़ ओमे़त्तुसिआङ् वाॽ॥ कन् पाःन्नो आदाङ्बारे़ मे़न्वाॽमना याःम्बक् के़जोगु॥ आल्लआङ्धो आदाङ्बारे़ थङ् चोःक्माआङ् पप्मा के़बोङ्बा पोङ्ॽ॥” 10 कन् पाःन्निल्ले़ चोगुल्ले़ पुङ्लाहिम्मो खे़न् साक्तु युक्खुर यारिक् आसान् खे़न् खागे़इक्पे़न्नु कुयाःक्ले़ॽरे़॥ खे़न् ये़म्मो आसाःल्ले़ कुभा मनाहाॽ साॽरिक् ताप्फे़ःल्लिक् मे़त्तुसिआङ् युःत्तुसिरो॥ आसा हाङ्ङिल्ले़ कुयुक्किन् नुप् ( १ हाङ् १५:२३-२४ ) 11 आसाःल्ले़ कुहाङ्युक् ये़म्मोबा वेॽ हिन्दोक् पाःन्हाॽ कुहेःक्सिङ्माआङ्धो कुनुप्मा थे़म्बाए यहुदा नु इस्राइलबा हाङ्हाॽरे़ खुन्छिॽ साप्पन्नो साप्ते़आङ् पत्॥ 12 खुने़ॽ हाङ्युक् चोगुबा सुम्बोङ्ङाङ् फाङ्सिगेक्पा तङ्बेओ खुने़ॽ लाङ् के़गिबा तुक्मे़ल्ले़ तरु॥ खे़न् तुक्मे़न् साॽरिक् साक्ते़साङ् खुने़ॽ यहवे दाङ्बे़न् कुभाॽ मे़नाःक्तुन्, कर सिदाॽपाङ्दाॽ के़जोःक्पाहाॽरक् सुजा नाःक्तुसि॥ 13 खे़ब्याङ् खुने़ॽ हाङ्युक् चोगुबा ये़म् लिबोङ्ङाङ् थिक्सिगेक्पा तङ्बेओ खुने़ॽ कुसुधे़बा कुधाक्थे़बाहाॽनु सोरिक् तङ्सिङ्से़ पे॥ 14 खुने़ॽ आप्फेक् कुलागि दाउदरे़ कुये़क्यक्को चोगुआङ् ने़स्से़बा इपुङ्ङो मे़ने़स्सु॥ खे़प्मो साॽरिक् हुक्वा नुरे़र मे़भःन्दुआङ् मे़जोगुबा के़रे़क् परिक्पा कुनाम् के़नुॽबा मारुक्हाॽ इपुङ्ङो मे़दङ्घुआङ् यागे़॥ हे़क्क्याङ् मनाहाॽरे़ खुने़ॽ कुमिङ्सोओ लत्छा मि मे़दुप्तुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.