२ साप्मुःन्धुम् 15 - लिम्बुआसाःल्ले़ तोःन्दु चोगुबा याःम्बक्हाॽ 1 निङ्वाॽफुमाङ्ङिल्ले़ कुयाम्साम्मिन् ओदेदरे़ कुस्सा अजर्याहओ थासिङ् ये़॥ 2 खे़न् आसाःल्ले़ कुदुम्से़ ये़आङ् मे़त्तु, “आसाए, के़रे़क् यहुदाबा नु बेन्यामिन मनासे आङ्गाॽ आबाःन्निन् खे़प्से़म्मे़ॽओ॥ आल्ल यहवे दाङ्बे़न्नु खिनिॽ के़वयिल्ले़ खुने़ॽआङ् खिनिॽनु वाॽरो॥ खुने़ॽ के़गोःत्तुम् के़हक्सुम्मिल्ले़ खुने़ॽ के़घोसुम्ॽ॥ खुने़ॽ के़नाॽरुम्ने़भग्र खुने़ॽआङ् खिनिॽ के़नाॽरिॽ॥ 3 यरिक् तङ्बे थारिक्क इस्राइले़न् से़क्खाबा निङ्वाॽफुमाङ् मेःन्ने, के़हुॽबा निङ्वाॽफुसाम्बा मेःन्ने नु साम्योथिम् मेःन्ने वये़॥ 4 कर खुन्छिॽ तुक्खेलाक्खेओ खे़ङ्हाॽ यहवे दाङ्बा इस्राइलबा निङ्वाॽफुमाङ् ले़प्माङ् मे़नुःक्खुआङ् मे़गोःत्तु हे़क्क्याङ् खे़ङ्हाॽरे़ मे़घोसु॥ 5 खे़न् ये़न्हाॽओ मनाहाॽ खुन्छिॽ आप्फेक् याःम्बक्को लाङ्मे़घेआङ् मे़द्ये़ मे़बेःल्ले़ खे़ङ्हाॽ ताप्थेक् याम्धेक् मे़म्बोःक्खे़न्॥ के़रे़क् लाजेॽबा यक्युङ्बाहाॽरे़ मे़न्दुम्मा तुक्खे लाक्खे मे़दुमु॥ 6 थिक् लाजेःल्ले़ वेॽ लाजेन् युःत्तुर वये़, थिक् ये़क्यक्किल्ले़ वेॽ ये़क्यक्किन् युःत्तुर वये़ थेआङ्भे़ल्ले़ निङ्वाॽफुमाङ्ङिल्ले़ खे़ङ्हाॽ के़रे़क् परिक्पा तुक्खेओ थासुसिआङ् खुम्सुसिआङ् वये़॥ 7 कर आल्ल खिनिॽ मुक्के़गुबा पोःक्खे़म्मे़ॽ, हे़क्क्याङ् खिनिॽ निङ्साङ् मे़बुगे़म्मिन्ने़ॽ॥ थेआङ्भे़ल्ले़ खिनिॽ के़जोगुम्बा याःक्बक्किल्ले़ कुले़क्वा के़घोसुम्ॽ॥” 8 आल्ल कन् पाःन्हाॽ नु माङ्निङ्वाॽपान् के़बाःप्पा ओदेदरे़ कुस्सा अजर्याहरे़ पाःत्तुबा माङ्निङ्वाॽपान्निन् आसाःल्ले़ खे़प्सुआङ् खुने़ॽ हाङ्हाङ् लॽरे़॥ खुने़ॽ के़रे़क् यहुदा नु बेन्यामिन लाजेॽओ के़युङ्बा सिक्के़ले़ःङ्बा नावाइत्लाहाॽ हे़क्क्याङ् खुने़ॽ हुक्काप् चोगुबा एफ्राइमबा कोःक्मा लाजेॽओबा ये़क्यक्हाॽलाम् सिक्के़ले़ःङ्बा नावाइत्लाहाॽ खक्पे़त् खे़त्तुदेसुसि॥ खुने़ॽ यहवे दाङ्बे़ल्ले़ कुहिम्मोबा आःम्भोॽ तगाङ् के़युङ्बा ले़त्ति तोःम्मादे़न्निन्नाङ् चाःङ्वा मे़त्तु॥ 9 खे़न् एगाङ् के़रे़क् यहुदा, बेन्यामिन हे़क्क्याङ् एफ्राइम मनस्से नु सिमियोनलाम् के़दाबा मनाहाॽ खुन्छिॽनु युङ्से़ सुप्सुसि॥ थेआङ्भे़ल्ले़ यहवे दाङ्बा खुने़ॽ कुनिङ्वाॽफुमाङ्ङिन् खुने़ॽनु वये़बा मे़निसुआङ् इस्राइललाम् यरिक् मनाहाॽ खुने़ॽ ले़प्माङ् मे़द्ये़आङ् मे़वये़॥ 10 आसाःल्ले़ हाङ्युक् चोगुबा ये़म् थिबोङ्ङाङ् ङासिगेक्पा तङ्बेबा सुम्सिगेक्पा लाओ खे़ङ्हाॽ यरुसले़ःम्मो मे़जुप्से़॥ 11 हे़क्क्याङ् खे़न् ये़म्मो खे़ङ्हाॽरे़ मे़नाप्तु मे़दारुसिबा सामा चिगक्वाहाॽलाम् किप् नुसि से़गम्बा पित्हाॽ नु हे़न्छिङ् नुसि मे़ल्लुक् मे़ःन्दाहाॽ वयागे़न् सिदुङ्जभा मे़दोन्दुसि॥ 12 खे़ङ्हाॽरे़ खुन्छिॽ के़रे़क् ने़रे़त् नु सिक्लुङ्मारे़ यहवे दाङ्बा खुन्छिॽ पाधे़बाहाॽरे़ खुनिॽ निङ्वाॽफुमाङ्ङिन् कोःप्मारे़ लागि माङ्हुप् मे़जोगु॥ 13 हम्भ्याङ् यहवे दाङ्बा इस्राइलबा निङ्वाॽफुमाङ्ङिन् मे़ङ्गोःप्मना मे़न्हङ्मनाबा के़रे़क् चुक्पा यम्बा, मे़न्छुमा नु ये़म्बित्छाहाॽ से़प्मासि खे़ङ्हाॽरे़ निङ्वाॽ निःन्धो मे़जोगु॥ 14 यम्बा इक्लाओ मे़भिःक्ते़आङ् सादाङ्हाॽ नु थुत्थुरिःप्पाहाॽ मे़मुक्खुर खे़ङ्हाॽ यहवे दाङ्बाओ माङ्हुप् मे़जोगुआङ् माङ्मे़हे़क्सिङ्॥ 15 कन् माङ्हे़क्किन् मे़जोगुबाल्ले़ चोगुल्ले़ यहुदाबाहाॽ के़रे़क् खुन्छिॽ निङ्वाॽ त्ये़॥ थेआङ्भे़ल्ले़ खे़ङ्हाॽरे़ खुनिॽ के़रे़क् निङ्वाॽ इगेःक्काङ् यहवे दाङ्बे़न् मे़गोःत्तुआङ् वये़॥ खे़ब्याङ् खुने़ॽआङ् खे़ङ्हाॽरे़ मे़घोआर फाॽआङ् आबाङे ओसेःन्धाङ् चोःक्सिङ्॥ कल्ले़चोगुल्ले़ यहवे दाङ्बे़ल्ले़ के़रे़क् पिसाङ्लाम् कम्ब्राङ् मे़त्तुसिआङ् खे़ङ्हाॽ ताप्थेक् याम्धेक् मे़वये़॥ 16 आसा हाङ्ङिल्ले़ कुयुमा माकान्नाङ् हाङ्मा मा ताःक्फाओलाम् लःत्तुदेसु, थेआङ्भे़ल्ले़ असेरा माङ्ङिल्ले़न् याम्गे़सिङ्बा नावाइत्लान् खे़ल्ले़ युक्खुआङ् युङे़॥ आसाःल्ले़ खे़न् नावाइत्लान् च्ये़प्तुआङ् सोःन्दु, हे़क्क्याङ् खे़न् कुम्जिक्मा चोगुआङ् किद्रोन हःङ्गुओ मिधिक्खुदेसु॥ 17 कोःक्मा फाङ्जङ् थे़गुहाॽओ के़युङ्बा माङ्धाःन्हाॽ इस्राइलओ ने़मा फाःक्तुसाङ् आसान् खुने़ॽ कुहिङ्हिङ्ङे यहवे दाङ्बे़ल्ले़ कुलागि नसाःन्साबा पोःक्खे़आङ् वये़॥ 18 खुने़ॽ कुम्बा नु खुने़ॽ आप्फेक् तोःन्दुबा साम्म्याङ्, युप्पा नु सेसे खप्प्या सामाहाॽ यहवे दाङ्बे़ल्ले़ कुहिम्मो तारुसि॥ 19 आसाःल्ले़ हाङ्युक् चोगुबा सुम्बोङ्ङाङ् ङासिगेक्पा तङ्बे थारिक् थे़माआङ् ते़न्धङ् मे़बोःक्से़न्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.