२ साप्मुःन्धुम् 14 - लिम्बु1 अबियान् खुने़ॽ कुम्बा कुन्धे़बासिनु सोरिक् तङ्सिङ्से़ पे हे़क्क्याङ् खुने़ॽ दाउदरे़ कुये़क्यक्को मे़जिक्खु॥ खुने़ॽ कुएगाङ् कुस्सा आसान् हाङ्युक्नाओ युङ्सिङ्॥ खुने़ॽ कुये़म्मो तङ्बे थिबोङ् थारिक् यहुदा लाजेॽओ सनारुङ् पोःक्खे़रो॥ आसान् यहुदाबा हाङ् पोःक्खे़ 2 आसाःल्ले़ यहवे दाङ्बा कुनिङ्वाॽफुमाङ्ङिल्ले़ कुनिमो आत्तिन् पाःन्निन् नुबा नु कुदोःप्मा चोगे़ खुने़ॽ हाबा खे़न्ने चोगु॥ 3 खुने़ॽ वेॽ लाजेॽबा ले़त्ति तोःम्मादे़न्हाॽ नु कोःक्मा फाङ्जङ् नु थे़गु माङ्वाहाॽओबा माङ्धाःन्हाॽ इःक्खुदेसु, सेसे लुङ्हाॽ लुःन्दुदेसु, हे़क्क्याङ् असेरा माङ् नावाइत्लाहाॽ सोःन्दुदेसु॥ 4 यहवे दाङ्बा खुन्छिॽ पाधे़बाहाॽरे़ खुनिॽ निङ्वाॽफुमाङ्ङिन् कोःप्मा हे़क्क्याङ् खुने़ॽ कुधिम्हाॽ नु कुइङ्जाङ्हाॽ इःप्मा नाःप्मारे़ लागि खुने़ॽ यहुदाबा मनाहाॽ इङ्जाङ् पिरुसि॥ 5 खुने़ॽ यहुदाबा के़रे़क् ये़क्यक्हाॽओ के़युङ्बा माङ्धाःन्हाॽ नु सुक्पा हाःम्मा ले़त्ति तोःम्मादे़न्हाॽआङ् खे़त्तुदेसु॥ खुने़ॽ कुहाङ्युक् ये़म्मो लाजेॽओ सनारुङ् पोःक्खे़आङ् ने़स्से़॥ 6 लाजेॽओ सनारुङ् पोःक्खे़बाल्ले़ चोगुल्ले़ खुने़ॽ यहुदाओ हाङ्यक् के़ने़बा ये़क्यक्हाॽआङ् आधेःक्थेःक्पा चोगु॥ खे़न् ये़म्मो खुने़ॽ आत्तिन् थङ्ङाङ् थक्मा मे़बोःक्खे़न्, थेआङ्भे़ल्ले़ यहवे दाङ्बे़ल्ले़ खुने़ॽ नाःम्सिङ्मा पिरुआङ् वये़॥ 7 खुने़ॽ यहुदाबा मनाहाॽ मे़त्तुसि, “कन् ये़क्यक्हाॽ आनिॽ से़त्तुम् चोगुम्॥ खे़ङ्हाॽ कब्रिङ् लुङ्धाक् से़त्तुम्, चङ्हिम्हाॽ चोगुम्, हे़क्क्याङ् लाम्धेःत्हाॽओ कुए़प्माहाॽ याक्तुम्॥ लाजेन् आल्लसाङ् आनिॽइन्ने पोःक्खे़आङ् ने़, थेआङ्भे़ल्ले़ यहवे दाङ्बा आनिॽ निङ्वाॽफुमाङ्ङिन् आगोःत्तुम्माङ् वाॽ॥ खुने़ॽ आसेगुम् हे़क्क्याङ् खुने़ॽ के़रे़क् पिसाङ् कम्ब्राङ् आमे़त्ते़आङ् वाॽ॥” कल्ले़चोगुल्ले़ खे़ङ्हाॽरे़ खे़न् ये़क्यक्हाॽ मे़जोगुआङ् खे़ङ्हाॽ मे़नुरे़ मे़दासे़॥ 8 यहुदालाम् यम्बा खोहाॽ नु लाःक्हाॽरे़ काप्तुसिबा ३,००,००० मनाहाॽ हे़क्क्याङ् बेन्यामिनलाम् २,८०,००० चुक्पा खोहाॽ के़बङ्बा नु तोङ् लि के़आप्पा थक्सुबाहाॽ आसाःल्ले़ कत्तुसि॥ खे़ङ्हाॽ के़रे़क् मुक्के़गुबा थङ्गे़जोःक्पा मे़वये़॥ 9 कुसि जेरहन् खे़ङ्हाॽरे़ खुन्छिॽ तक्ले़ङ्वाओ १०,००,००० मनाहाॽरे़न् आत्तातान्ने यरिक् थक्सुबा सुम् नु ३०० अन्लाधाहाॽ फे़त्तुसिआङ् मारेसा थारिक्के फे़रे़॥ 10 खुने़ॽ फे़रे़ल्ले़ खुने़ॽनु थक्मारे़ लागि आसान् लःन्दे़भे़रे़, हे़क्क्याङ् मारेसा कुबेसाङ्बा सपता ने़ने़बादे़न्नो खे़ङ्हाॽ थक्मारे़ लागि ना नु कत्ना मे़सोःक्सिङ्॥ 11 खे़ब्याङ् आसाःल्ले़ यहवे दाङ्बा खुने़ॽ कुनिङ्वाॽफुमाङ्ङिन् पेलि फाक्तुआङ् मे़त्तु, “यहवे दाङ्बाए, के़धुम्बे़न्नु थक्मारे़ लागि मे़न्धुम्मनाबा आक्तङ्बा मनाहाॽसाङ् के़भाॽबाग आदाङ्बा हे़क्तङ्बा वेॽ हाःत्ताङ् होप्॥ यहवे दाङ्बा आनिगे निङ्वाॽफुमाङ्ङे, आनिगे आभाॽरे़, थेआङ्भे़ल्ले़ आनिगे आदाङ्बारे़ के़लाम् ओमे़त्तुम्बे़आङ् वयिगे़ॽ॥ आनिगे आदाङ्बारे़ए के़मिङ्ङो कन् यरिक् थक्सुबाहाॽनु थक्से़ फे़रिगे़आङ् वयिगे़॥ यहवे दाङ्बाए, आदाङ्बा आनिगे निङ्वाॽफुमाङ्ने़रो, कल्ले़चोगुल्ले़ आत्तिन् मनाःन्नाङ् आदाङ्बारे़ के़दक्ले़ङ्वाओ मे़ये़प्ने़न्लरो॥” 12 यहवे दाङ्बे़ल्ले़ आसान् नु यहुदाबा मनाहाॽ कुसिहाॽ के़नाःम्बा चोगुसि हे़क्क्याङ् कुसिहाॽ मे़घे़त्छिङ् मे़घे़रे़॥ 13 आसान् नु खुने़ॽ कुधक्सुबाहाॽरे़ खे़ङ्हाॽ गरार थारिक् मे़नाःत्तुसि॥ यहवे दाङ्बे़न् नु खुने़ॽ कुधक्सुबाहाॽरे़ खुन्छिॽ तगि कुसिहाॽ हारिमे़द्ये़आङ् खे़ङ्हाॽरे़ खुन्छिॽ यरिक् मनाहाॽ मे़स्ये़॥ खम्भ्याङ् यहुदाबाहाॽरे़ मे़नाप्तुसिबा यरिक् चिगक्वा सामाहाॽ मे़देॽरु 14 खे़ङ्हाॽरे़ गरारबा के़रे़क् पिसाङ्बा खक्पे़त् ये़क्यक्हाॽ खाप्पुथ्यःङ् मे़जोगु, थेआङ्भे़ल्ले़ यहवे दाङ्बे़ल्ले़ खे़प्मोबा मनाहाॽ किमा यङ्माओ थासुसिआङ् मे़वये़॥ खे़ङ्हाॽरे़ खे़न् ये़क्यक्हाॽओ मे़नाप्तुसिआङ् खे़ङ्हाॽ के़रे़क्लाम्बा कुमे़न् के़घिःक्पा के़घिःक्पा सामाहाॽ मे़घोसु॥ 15 खे़ङ्हाॽरे़ यरिक् मे़ल्लुक्कम्बाहाॽआङ् मे़भत्तुसि, हे़क्क्याङ् खे़ङ्हाॽरे़ खुन्छिॽ यरिक् मे़ल्लुक्हाॽ, मे़ःन्दाहाॽ नु उमेहाॽ मे़दे़म्सु मे़देॽरुसि॥ खे़न् एगाङ् खे़ङ्हाॽ यरुसले़म मे़नुःक्खे़ मे़भे़रे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.