२ साप्मुःन्धुम् 13 - लिम्बुअबियान् नु यारोबामरे़ खुन्छिॽ लुम्मो ते़न्धङ् ( १ हाङ् १५:१-८ ) 1 इस्राइलबा हाङ् यारोबामरे़ हाङ्युक् चोगुबा थिबोङ्ङाङ् ये़त्छिगेक्पा तङ्बेओ अबियान् यहुदाबा हाङ् पोःक्खे़॥ 2 अबियाःल्ले़ यरुसले़ःम्मो तङ्बे सुम्सि हाङ्युक् चोगु॥ खुने़ॽ कुम्मारे़ कुमिङ् माका वये़, खुने़ॽ गिबाबा उरिएलरे़ कुस्सा मे़न्छुमा वये़॥ अबियान् नु यारोबामरे़ खुन्छिॽ लुम्मो आम्भा थङ् पोःक्खे़आङ् पत्छे़॥ 3 अबियाःल्ले़ थङ् चोःक्मारे़ लागि ४,००,००० मुक्के़गुबा थङ्गे़जोःक्पाहाॽ फुक्खुसि, हे़क्क्याङ् खे़ल्ले़ कुदक्ले़ङ्वाओ यारोबामरे़ ८,००,००० थक्लिहाङ्हाॽरे़न् तुरा यारिप् चोगुसि॥ 4 अबियान् एफ्राइमबा कोःक्माओ के़ने़बा समारैम कोःक्माओ ये़म्सिङ्ङाङ् अक्खेलॽरिक् अःक्ते़, “यारोबाम नु के़रे़क् इस्राइलिसे, आङ्गाॽ आबाःन्निन् खे़प्से़म्मे़ॽ! 5 यहवे दाङ्बा इस्राइलबा निङ्वाॽफुमाङ्ङिल्ले़ आभे़ल्ले़आङ् चक्मे़ल्लॽमनाबा माङ्हुप्लाम् सदादिङ्ले़ लागि दाउदे़न् नु खुने़ॽ कुमुॽइदाङ्साहाॽ इस्राइलओ युक् चोःक्मारे़ लागि हाङ्जुम्मिन् पिरुसिबा फाॽआङ् थे खिनिॽ के़न्निसुम्मिन्बि? 6 हम्भसाङ् दाउदरे़ कुस्सा सोलोमनरे़ कुसुहाङ्युक्पा नाबातरे़ कुस्सा यारोबामे़न् खुने़ॽ कुन्दाङ्बे़ल्ले़ कुदक्ले़ङ्वाओ पिफ्युङ्बा पोःक्खे़॥ 7 कुभा थेनाधे कुसुम् मे़न्दम्मनाबा खार्मे़न्दक् के़जोःक्पाहाॽ खुने़ॽनु सोरिक् तेॽरुसि हे़क्क्याङ् खे़ङ्हाॽरे़ सोलोमनरे़ कुस्सा रहबामे़न् सेःप्फा के़वाॽबा नु थेआङ् मे़न्दुम्मे मे़न्निए के़वाॽबा मे़निसु हे़क्क्याङ् हादिङ् थक्नु खुने़ॽ कुदक्ले़ङ्वाओ मे़बोगे़॥ खे़न् ये़म्मो रहबामे़न् खे़ङ्हाॽ अप्मासि के़सुक्पा मे़जोगे़न्॥ 8 “आल्ल दाउदरे़ कुमुॽइदाङ्साहाॽरे़ खुन्छिॽ हुक्को के़ने़बा यहवे दाङ्बे़ल्ले़ कुहाङ्जुम्मिल्ले़ कुदक्ले़ङ्वाओ पोःक्मारे़ लागि खिनिॽ निङ्वाॽ के़इःत्तुम्ॽ॥ खिनिॽ से़क्खा आत्तातान्ने यरिक् थक्सुबा के़वयिॽ, हे़क्क्याङ् खिनिॽ माङ् पोङ्मारे़ लागि यारोबामरे़ चोगुबा कन् साम्म्याङ् पित्सात्हाॽ खिनिॽ के़गत्तुम्सिम्ॽ॥ 9 कर थे हारुने़ल्ले़ कुधाःक्कोबा यहवे दाङ्बे़ल्ले़ कुनिङ्वाॽफुसाम्बाहाॽ नु ले़बिहाॽ खिनिॽ के़लःत्तुम् के़देसुम्सिम्माङ् वेॽ लाजेॽबा थिम् कुइसिक् खिनिॽ आप्फेक् निङ्वाॽफुसाम्बाहाॽ युक्तिङ् के़जोगुम्सिम्माङ् मे़न्वाॽने़म्बि? कुभा मनाधिक् खुने़ॽ तोःन्छिङ्मारे़ लागि पित्सात् थिक् नु नुसि थुःम्बाहाॽ तारुसिआङ् ताःल्ले़ थे खे़न् माङ् मेःम्बान् माङ्ङिल्ले़ कुनिङ्वाॽफुसाम्बा फाॽआङ् खिनिॽ के़दाःक्तुम्बि? 10 “कर आनिगे लागिग यहवे दाङ्बे़न्ने आनिगे निङ्वाॽफुमाङ्लो, हे़क्क्याङ् आनिगे खुने़ॽ मे़ल्ले़त्ते वयिगे़॥ यहवे दाङ्बे़न् माङ्से़वा के़मे़प्पा निङ्वाॽफुसाम्बाहाॽग हारुनरे़ कुस्साहाॽरो, खे़ब्याङ् ले़बिहाॽरे़ खे़ङ्हाॽ मे़भाॽरुसिॽ॥ 11 खे़ङ्हाॽरे़ तानाम् नु युःन्धो थक्मा सिदुङ्जभाहाॽ हे़क्क्याङ् कुनाम्गे़नुॽबा सुक्पाहाॽ यहवे दाङ्बे़ल्ले़ कुलागि मे़दोन्दुॽ॥ खे़ङ्हाॽरे़ सिदुङ्जभाओबा खरे़ःङ्ङिन् थिम् कुइसिक् सेसे चोःक्मनाबा चप्ते़न्नो कुदिःक्ला कुदिःक्ला मे़बे़न्छु मे़ने़स्सुॽ॥ खे़ङ्हाॽरे़ युःन्छिक् थक्मा साम्म्याङ् सेमियुङ्दे़न्नो के़युङ्बा सेमिहाॽ मे़हाःन्दुॽ॥ कम्भलॽरिक् यहवे दाङ्बा आनिगे निङ्वाॽफुमाङ्ङिल्ले़ इङ्जाङ् पिरिगे़बा पाःन्हाॽ आनिगे इःत्तुम्बे़ चोगुम्बे़॥ कर खिनिॽग खुने़ॽ के़ले़रुम् के़देसुम्माङ् के़वयिॽ॥ 12 निङ्वाॽफुमाङ्ङिन् आनिगे लाम्लोबा पोःक्खे़आङ् आनिगे़नु वाॽ॥ खुने़ॽ कुनिङ्वाॽफुसाम्बाहाॽ खिनिॽ तक्ले़ङ्वाओ ते़न्धङ् इक्ला मिक्सेन् पिमारे़ लागि सादाङ्हाॽ मे़याङ्सिङ्ङाङ् मे़ये़म्सिङ्ॽ॥ इस्राइलिसे, यहवे दाङ्बा खिनिॽ सुधे़बा ताक्थे़बाहाॽरे़ खुन्छिॽ निङ्वाॽफुमाङ्ङिल्ले़ कुदक्ले़ङ्वाओ थङ् मे़न्जोःक्काम्मे़ॽ, थेआङ्भे़ल्ले़ खिनिॽ कुसाङ् के़ल्लसुम्मिन्ॽ!” 13 यारोबामरे़ खुने़ॽ कुधक्सुबाहाॽओबा कुलुप् थिक् एगाङ् ले़प्माङ् पेःक्माआङ् सुक्मासिआङ् युङ्मारे़ लागि पाङ्घुसिआङ् मे़वये़, हे़क्केलॽरिक् एगाङ् ले़प्माङ्लाम् मे़सुगुसिल्ले़ खुने़ॽनु के़वाॽबा के़याःक्पा थक्सुबाहाॽरे़ यहुदान् तगाङ्लाम् चिभत् मे़भत्तु॥ 14 आल्ल यहुदाबा मनाहाॽ मे़हिसिङ्ङाङ् ओमे़मये़ल्ले़ खुन्छिॽ तगाङ् नु एगाङ् ने़प्माङ् पिसाङ् थङ्ङो मे़भुत्तुसिबा मे़निसु॥ खे़ब्याङ् खे़ङ्हाॽरे़ कुभाॽरे़ लागि यहवे दाङ्बे़न् पेलि मे़भाक्तु॥ निङ्वाॽफुसाम्बाहाॽरे़ सादाङ्हाॽ मे़मुःत्तु, हे़क्क्याङ् यहुदाबा मनाहाॽ मे़भिःक्ते़आङ् मे़अःक्ते़॥ 15 खे़ङ्हाॽरे़ अक्खे मे़जोगुल्ले़ निङ्वाॽफुमाङ्ङिल्ले़ अबियान् नु यहुदाःल्ले़ खुन्छिॽ तगि यारोबामे़न् नु के़रे़क् इस्राइलिहाॽ हारिजाःत्तुसि॥ 16 इस्राइलिहाॽ यहुदाबा मनाहाॽरे़ खुन्छिॽ तगिलाम् मे़घे़त्छिङ् मे़घे़रे़, हे़क्क्याङ् निङ्वाॽफुमाङ्ङिल्ले़ इस्राइलिहाॽ यहुदाबा मनाहाॽरे़ खुन्छिॽ हुक्को थासुसि॥ 17 कम्भलॽरिक् अबियान् नु खुने़ॽ कुमनाहाॽरे़ इस्राइलिहाॽ साॽरिक् ताप्फे़ःल्लिक्काङ् मे़नाःन्दुसि, हे़क्क्याङ् इस्राइलबा ५,००,००० मुक्के़गुबा थक्लिहाङ्हाॽ थङ्ङो मे़स्ये़रुसि॥ 18 खे़न् ये़म्मो इस्राइलिहाॽ हारिमे़द्ये़आङ् यहुदाबा मनाहाॽरे़ मे़नाःन्दुसि, थेआङ्भे़ल्ले़ खे़ङ्हाॽरे़ यहवे दाङ्बा खुन्छिॽ पाधे़बा सुधे़बाहाॽरे़ खुन्छिॽ निङ्वाॽफुमाङ्ङो ताःक्पो मे़जोगुआङ् वये़॥ 19 अबियाःल्ले़ यारोबामे़न् नाःत्तुदेसु, हे़क्क्याङ् खुने़ॽलाम् बेथेल, येसना खे़ब्याङ् एप्रोनबा ये़क्यक्हाॽनु सोसोरिक् खिरिबा पाङ्भेॽहाॽआङ् अबियाःल्ले़ हुक्काप् चोगु॥ 20 अबियाःल्ले़ कुये़म्मो यारोबामे़ल्ले़ खुने़ॽ कुमुक्के़न् याम्मो खोमा मे़सुक्तुन्॥ पिप्मिरि कुसोःन्दिओ यहवे दाङ्बे़ल्ले़ खुने़ॽ थिङ्घु, हे़क्क्याङ् खे़न् स्ये़॥ 21 कर अबियान् मुक्के़गुबा पोःक्खे़॥ खुने़ॽ थिबोङ्ङाङ् लिसि मेःत्हाॽ तारुसिआङ् खुने़ॽ निबोङ्ङाङ् ने़त्छि ये़म्बित्छा नु थिबोङ् तुक्सि मे़न्छुमासाहाॽरे़ खुन्छिॽ पानुदिङ् पा पोःक्खे़॥ 22 अबियाःल्ले़ हाङ्युक् चोगुबा ये़म्मोबा वेॽ हिन्दोक् पाःन्हाॽ, खुने़ॽ चोगुबा याःम्बक्हाॽ नु खुने़ॽ पाःत्तुबा पाःन्जाःक्हाॽ माङ्निङ्वाॽपान् के़बाःप्पा इद्दोरे़ कुसाप्पन्नो साप्ते़आङ् पत्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.