२ साप्मुःन्धुम् 12 - लिम्बुमिस्रिहाॽरे़ यहुदिहाॽ मे़भत्तुसिॽ ( १ हाङ् १४:२५-२८ ) 1 रहबामरे़ कुहाङ्जुम्मिन् थधप् मे़ल्लॽमनाबा पोःक्खे़ हे़क्क्याङ् खुने़ॽ मुक्के़गुबा पोःक्खे़आङ् एगाङ् खुने़ॽनु खुने़ॽ कुयुक्को के़वाॽबा के़रे़क् इस्राइलिहाॽरे़ यहवे दाङ्बे़ल्ले़ कुसाम्योथिम्मिन् इःप्मा नाःप्मा मे़नाॽरु॥ 2 रहबामरे़ युक् चोगुबा ङासिगेक्पा तङ्बेओ यहवे दाङ्बे़ल्ले़ कुदक्ले़ङ्वाओ खे़ङ्हाॽ नसान् के़ले़ङ्बा मे़बोःक्खे़बाल्ले़ चोगुल्ले़ मिस्रबा सिसक हाङ्ङिल्ले़ यरुसले़ःम्मिन् थङ्ङो फत्तु॥ 3 मिस्र लाजेॽबा हाङ् सिसक्के़ल्ले़ थिबोङ्ङाङ् ने़त्छि किप् अन्लाधाहाॽ नु तुक्पोङ् हे़न्छिङ् अन्गे़लोङ्बाहाॽ थाक्तुसि॥ हे़क्क्याङ् खुने़ॽनु सोरिक् आत्तातान्ने यरिक् मिस्रलाम् के़धाङ्बा लिबियाबा, सुक्किया नु कुसिहाॽ मे़वये़॥ 4 यहुदाओ के़ने़बा कम्ब्राङ्बा ये़क्यक्हाॽ नाःन्दुसिर खुने़ॽ यरुसले़म थे़म्बा के़रे़ थाङे़॥ 5 खे़ब्याङ् रहबाम नु सिसकरे़ खुन्छिॽ ते़न्धङ्लाम् हिङ्मारे़ लागि यरुसले़ःम्मो के़जुम्बा यहुदाबा थाःक्लाम्लोबाहाॽ माङ्निङ्वाॽपान् के़बाःप्पा समायाहःल्ले़ मे़त्तुसि, “यहवे दाङ्बे़ल्ले़ अक्खे पाःत्तुॽ—‘खिनिॽ आङ्गाॽ आग्नाॽरे़आङ् वाॽ, कल्ले़चोगुल्ले़ आल्ल आङ्गाॽ सिसकरे़ कुहुक्को खिनिॽ हुक्सुःप्निङ्ॽ॥’” 6 खम्भ्याङ् थाःक्लाम्लोबाहाॽ नु हाङ्ङिन् नःम्नाःम्बा मे़बोःक्खे़आङ् मे़बाःत्तु, “यहवे दाङ्बे़ल्ले़ कुदोःप्मा खासे़न् लोःन्दुॽ॥” 7 यहवे दाङ्बे़ल्ले़ खे़ङ्हाॽ नःम्नःम्बा मे़बोःक्खे़बा निसुसिआङ् खुने़ॽलाम् कन् इङ्घङ्ङिन् समायाहओ के़रे़—“खे़ङ्हाॽ आप्फेक् नःम्नःम्बा मे़जोःक्सिङ्बाल्ले़ चोगुल्ले़ आङ्गाॽ खे़ङ्हाॽ मे़मे़क्खुङ्सिङ्ङिन्, कर आङ्गाॽ खे़ङ्हाॽ खे़त्छिङ्मा फाःक्तुङ्सिङ्ॽ॥ सिसेक्के़न् लाम्बा आङ्गाॽ आसाक्के़न्निन् यरुसले़ःम्मो मे़धाआन्॥ 8 हे़क्केसाङ् खे़ङ्हाॽ खुने़ॽ कुयुक्को मे़धाआङ् खे़ङ्हाॽरे़ आङ्गाॽ माङ्से़वा मे़प्मा नु वेॽ लाजेॽबा हाङ्हाॽ से़वा मे़प्मासिओ थे़मा पाःन्निन् वेॽ परिक्पा चोक् खे़न् खे़ङ्हाॽरे़ निङ्वाॽ मे़घोसुॽ॥” 9 मिस्र लाजेॽबा सिसक हाङ्ङिल्ले़ यरुसले़ःम्मिन् थङ्ङो फत्तुआङ् खुने़ॽ यहवे दाङ्बे़ल्ले़ कुहिम्मो नु हाङ्हिम्मोबा थाःङ्हाॽओबा इमे़ल्लुङ्बा सामाहाॽ खक्पे़त् नाप्तुसि, हे़क्क्याङ् सोलोमनरे़ चोगुबा साम्म्याङ् खोहाॽआङ् खुने़ॽ हुक्काप् चोगु॥ 10 कल्ले़चोगुल्ले़ रहबाम हाङ्ङिल्ले़ खे़न् साम्म्याङ् खोहाॽरे़ कुले़क्वाओ कासा खोहाॽ चोगु हे़क्क्याङ् हाङ्हिम्मो लाःप्मा लाम्धेत् कम्ब्राङ् के़मे़प्पा कम्ब्राङ्बाहाॽरे़ खुन्छिॽ सुहाङ्युक्पाहाॽरे़ खुन्छिॽ लक्पे़न्नो पिरुसि॥ 11 आभे़ल्ले़साङ् हाङ्ङिन् यहवे दाङ्बे़ल्ले़ कुहिम्मो पेःल्ले़ कम्ब्राङ्बाहाॽरे़ खे़न् खोहाॽ मे़बक्खुआङ् खुने़ॽनु सोरिक् मे़बे॥ खे़न् एगाङ् खे़ङ्हाॽरे़ कम्ब्राङ्बा युङ्मा याक्फाङ्ङो खे़ङ्हाॽ याम्मो मे़ने़स्सु॥ 12 रहबामे़न् खुने़ॽ आप्फेक् नःम्नःम्बा चोःक्सिङ्बे़ल्ले़ चोगुल्ले़ यहवे दाङ्बे़ल्ले़ कुसाक्के़न्निन् खुने़ॽलाम् इःङ्सिङ्, हे़क्क्याङ् खुने़ॽ खाप्पुथ्यःङ् मे़मे़गे़न्॥ हे़क्क्याङ् यहुदाओ नुॽमादामाआङ् पोःक्खे़आङ् पत्छे़रो॥ रहबामरे़ कुयुक्किल्ले़ कुयाःम्बेओ ताङ्बसा पोधक् 13 रहबाम हाङ्ङिन् यरुसले़ःम्मो युङ्सिङ्ङाङ् चक्मे़ल्लॽए खुने़ॽ मुक्साम्साबा पोःक्खे़र पे॥ खुने़ॽ हाङ्युक्नाओ युङ्सिङ्ङिल्ले़ लिबोङ्ङाङ् थिक् तङ्बे योरे़, हे़क्क्याङ् यहवे दाङ्बे़ल्ले़ इस्राइलबा के़रे़क् थाःक्हाॽओलाम् खुने़ॽ कुमिङ् युङ्मारे़ लागि सेगुबा ये़क्यक् यरुसले़ःम्मो रहबामरे़ थिबोङ्ङाङ् नुसि तङ्बे हाङ्युक् चोगु॥ खुने़ॽ कुम्मारे़ कुमिङ् नामा वये़, खुने़ॽ अम्मोन के़युङ्मा वये़॥ 14 रहबामरे़ आत्तिन् पाःन्निन् ताप्फे़ःम्बा चोगे़ हाबा खे़न्ने चोगु, थेआङ्भे़ल्ले़ खुने़ॽ यहवे दाङ्बे़ल्ले़ कुलाम्लोमा लाम्मिन् कोःप्मा ताम्सिङ् मे़जोगुन्॥ 15 रहबामरे़ कुहाङ्युक् ये़म्मोबा हिन्दोक्हाॽ कुहेःक्सिङ्माआङ्धो कुनुप्मा थारिक् मिङ्स्रा कुइसिक् माङ्निङ्वाॽपान् के़बाःप्पा समायाह नु थुम्या के़इबा इद्दोरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़न्नाङ्बि? रहबाम नु यारोबामरे़ खुन्छिॽ लुम्मो आभे़ल्ले़साङ् चक्मे़ल्लॽए थङ् पोःक्खे़आङ् पत्छे़॥ 16 रहबामे़न् खुने़ॽ कुसुधे़बा कुदाक्थे़बाहाॽनु तङ्सिङ्से़ पेआङ् खुने़ॽ दाउदरे़ कुये़क्यक्को मे़जिक्खु॥ खुने़ॽ कुएगाङ् कुस्सा अबियान् हाङ् पाःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.