२ साप्मुःन्धुम् 11 - लिम्बुसमायाहरे़ पाःत्तुबा माङ्निङ्वाॽपान् ( १ हाङ् १२:२१-२४ ) 1 आल्ल रहबाम हाङ्ङिन् यरुसले़ःम्मो ये़ःल्ले़ खुने़ॽ कुहाङ्जुम्मिन् नुःक्मारे़ लागि इस्राइलरे़ कुदक्ले़ङ्वाओ थङ् चोःक्मा फाॽआङ् यहुदा नु बेन्यामिन हिम्सयङ्लाम् १,८०,००० थक्लिहाङ्हाॽ फुक्खुसि॥ 2 कर यहवे दाङ्बे़ल्ले़ कन् कुबाःन्जाक्किन् निङ्वाॽफुमाङ्ङिल्ले़ कुमना समायाहरे़ओ के़रे़रो— 3 “सोलोमनरे़ कुस्सा यहुदाबा हाङ् रहबामे़न् नु बिन्यामिनओ के़वाॽबा के़रे़क् इस्राइलिहाॽ मे़त्ते़से़ॽ, 4 ‘यहवे दाङ्बे़ल्ले़ अक्खे पाःत्तुॽ—आबाङे फुॽनुसाॽसाहाॽरे़ खुन्छिॽ तक्ले़ङ्वाओ ते़न्धङ् चोःक्मारे़ लागि थो मे़धोःक्कासिम्मिन्ने़आङ् मे़बेगे़म्मिन्ने़ॽ॥ खिनिॽ के़रे़क् आप्फेक् आप्फेक् हिम्मो पेगे़म्मे़ॽ, थेआङ्भे़ल्ले़ कन् याःम्बक्किन् आङ्गाॽ चोगुङ्बारो॥’” कल्ले़चोगुल्ले़ खे़ङ्हाॽरे़ यहवे दाङ्बे़ल्ले़ कुबाःन्निन् मे़घे़प्सु, हे़क्क्याङ् खे़ङ्हाॽ यारोबामे़न्नु मे़न्धक्के मे़नुःक्खे़ मे़घे़रे़रो॥ रहबामरे़ यहुदान् से़ःप्तु 5 रहबामे़न् यरुसले़ःम्मो युङे़आङ् खुने़ॽ यहुदाबा कुभा ये़क्यक्कोबा यक्हाॽ से़ःप्सिङ्मादे़न् चोगु॥ 6 खुने़ॽ से़ःप्सिङ्मादे़न् चोगुबा यहुदा नु बेन्यामिनओ के़ने़बा ये़क्यक्हाॽ हाबा कन्हाॽए ने़स्से़रो— 7 बेथले़हे़म, एताम, तको, 8 बेथ-सर, सोखो, अदुल्लाम, गात, मारेसा, जिप, 9 अदोरेम, लाकिस, आजेका, 10 सोरा, अय्यालोन नु हेब्रोन॥ 11 खुने़ॽ खे़न् ये़क्यक्कोबा यक्हाॽ थधप् मे़ल्लॽमनाबा चोगु, हे़क्क्याङ् खे़ङ्हाॽओ थक्मोबाहाॽ युक्खुसि, खम्भ्याङ् चामा कुजा, निःङ्गेॽ नु चे़ल्ले़क्सेॽ थि के़दुम्बाआङ् खे़प्मो युक्खु पिरुसिरो॥ 12 खुने़ॽ ये़क्यक् के़रे़क् खो नु लाःक्हाॽ सुप्सुआङ् ने़स्सु, हे़क्क्याङ् खे़प्मोबा यक्हाॽ थधप् मे़ल्लॽमनाबा चोगु॥ कम्भलॽरिक् खुने़ॽ यहुदा नु बेन्यामिनओ खुने़ॽ युक् चोगुरो॥ निङ्वाॽफुसाम्बाहाॽ नु ले़बिहाॽ यहुदा मे़ये़ 13 के़रे़क् इस्राइलबा के़रे़क् पिसाङ्लाम् निङ्वाॽफुसाम्बाहाॽ नु ले़बिहाॽ खुन्छिॽ आप्फेक् आप्फेक् ते़ङ्गप्हाॽओलाम् रहबामरे़ओ मे़ये़॥ 14 ले़बिहाॽरे़ खुन्छिॽ के़रे़क् थक्सा चाराम्दे़न्हाॽ नु खुनिॽ पालाम्बाबा लाजेॽ सिङ्बुङ्हाॽ मे़ले़रुआङ् यहुदा नु यरुसले़ःम्मो युङ्से़ मे़ये़, थेआङ्भे़ल्ले़ यारोबाम नु खुने़ॽ कुमुॽइदाङ्साहाॽरे़ यहवे दाङ्बाओबा निङ्वाॽफुसाम्बा ताक्फालाम् खे़ङ्हाॽ मे़नाॽरुसिआङ् मे़वये़॥ 15 उःक्चम्जम्बादे़न्हाॽओ के़ने़बा से़वा चोःक्मादे़न्हाॽ नु खुने़ॽ चोगुबा मे़ःन्दा हे़क्क्याङ् पित्सात् नावाइत्लाहाॽ माङ्से़वा मे़प्मासिरे़ लागि यारोबामरे़ खुने़ॽ आप्फेक् कुनिङ्वाॽफुसाम्बाहाॽ युक्तिङ् चोगुसि॥ 16 यहवे दाङ्बा इस्राइलबा निङ्वाॽफुमाङ्ङिन् निङ्वाॽ इगेःक्काङ् कोःप्मा निङ्वाॽ के़जोःक्पा इस्राइलबा के़रे़क् थाःक्हाॽलाम् के़युबाहाॽ यहवे दाङ्बा खे़ङ्हाॽरे़ खुन्छिॽ पाधे़बाहाॽरे़ खुनिॽ निङ्वाॽफुमाङ्ङो सिदुङ्जभा तोःन्छे़ यरुसले़ःम्मो के़युबा ले़बिहाॽरे़ खुन्छिॽ एगाङ् मे़धासिङ् मे़ये़॥ 17 खे़ङ्हाॽरे़ यहुदाबा हाङ्जुम्मिन् योधो मे़ल्लॽमनाबा मे़जोगुआङ् तङ्बे सुम्सि थारिक् सोलोमनरे़ कुस्सा रहबामे़न् मे़भाॽरु, हे़क्क्याङ् खे़न् ये़म्मो खे़ङ्हाॽ दाउद नु सोलोमनरे़ खुन्छिॽ ये़प्ले़क् कुइसिक् लाङ्मे़घेगे़रो॥ रहबामरे़ कुहिम्सयङ् 18 रहबामरे़ महलते़न् ते़न्धाम् मेःक्खिम् लिःक्खु॥ खे़न् मे़न्छुमाःल्ले़ कुम्बाग दाउदरे़ कुस्सा यरिमोते़न् वये़ हे़क्क्याङ् कुम्मान् यिसैरे़ कुस्सा एलिआबरे़ कुस्सा मे़न्छुमा अबिहेले़न् वये़॥ 19 खे़न् कुमेःत्तिन् लाम्बा रहबामरे़ कन् कुस्सा ये़म्बित्छाहाॽ मे़वये़—येउस, समरयाह नु साहम॥ 20 खे़न् एगाङ् खुने़ॽ अब्सालोमरे़ कुस्सा मे़न्छुमा माकान् ते़न्धाम् मेःक्खिम् लिःक्खु॥ खे़न् मे़न्छुमान् लाम्बा अबिया, अत्तै, जिजा नु सलोमित कुमुॽइदाङ्साहाॽ मे़वये़॥ 21 रहबामरे़ खुने़ॽ के़रे़क् कुमेःत्हाॽ नु कुजक्मेःत्हाॽओ माकान् साॽरिक् कुसिराॽ थाङे़आङ् वये़॥ खुने़ॽ के़रे़क्ले़ थिबोङ्ङाङ् ये़त्छि कुमेत् नु तुक्पोङ् कुजक्मेःत् मे़वये़॥ खुने़ॽ निबोङ्ङाङ् ये़त्छि ये़म्बित्छासाहाॽ नु तुक्पोङ् मे़न्छुमासाहाॽरे़ खुन्छिॽ पानुदिङ् पा वये़॥ 22 रहबामरे़ माकारे़ कुस्सा अबियान् हाङ्सा चोगु हे़क्क्याङ् खुने़ॽ कुएगाङ् हाङ्युक्नाओ युङ्मा निङ्वाॽ चोगुआङ् अबियान् कुम्भुॽ कुन्साॽहाॽओ के़रे़क्नुःल्ले़ यम्बा लाम्लोबा चोगु॥ 23 यहुदा नु बेन्यामिन के़रे़क् ते़ङ्गप्हाॽ हे़क्क्याङ् के़रे़क् से़ःप्सिङ्मादे़न् ये़क्यक्हाॽ ओमे़प्मा लक्पे़न्निन् खुने़ॽ कुभा कुस्साहाॽ पिरुसिआङ् खुने़ॽ सिक्कुम्साबा पोःक्खे़बा ओसेःन्धाङ् चोगु॥ खुने़ॽ खे़ङ्हाॽरे़ खुन्छिॽ लागि पयो के़योबा चामा कुजाहाॽ सुप्सु पिरुसि, हे़क्क्याङ् खे़ङ्हाॽ यरिक् मेःत्हाॽआङ् तारु पिरुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.