२ साप्मुःन्धुम् 10 - लिम्बुरहबामरे़ कुदक्ले़ङ्वाओ पिफ्युङ् 1 रहबामे़न् सकेमओ पे, थेआङ्भे़ल्ले़ खुने़ॽ हाङ् चोःक्मारे़ लागि के़रे़क् इस्राइलिहाॽ खे़प्मो मे़बेआङ् मे़वये़॥ 2 आल्ल नाबातरे़ कुस्सा यारोबामरे़ कन् पाःन्निन् खे़प्सुआङ् खुने़ॽ मिस्रलाम् नुःक्खे़ थाङे़, थेआङ्भे़ल्ले़ खुने़ॽ सोलोमन हाङ्ङिन्लाम् खे़त्छिङ्ङाङ् मिस्र लाजेॽओ पेआङ् वये़॥ 3 कल्ले़चोगुल्ले़ मनाहाॽरे़ यारोबामे़न् उःप्मा ताःप्मा मे़बाङ्घुसि, हे़क्क्याङ् खुने़ॽ नु के़रे़क् इस्राइलिहाॽ रहबामओ मे़बेआङ् मे़मे़त्तु, 4 “आदाङ्बारे़ के़म्बारे़ आनिगे के़लिःप्पा खे़ःप्सिङ् कुःत्तिगे़आङ् वाॽ, कर खुने़ॽ आनिगे कुःत्तिगे़बा कन् के़साक्पा नु के़लिःप्पा खे़ःप्सिङ्ङिन् आदाङ्बारे़ याङ्याङ्बा चोगे़ आबिरे़ॽओ, खम्भ्याङ् आनिगे आदाङ्बा के़से़वा याःम्बक् चोगुम् पिआसिगे़रो॥” 5 रहबामरे़ खे़ङ्हाॽ मे़त्तुसि, “सुम्ये़न् थारिक् ये़म् आबिरे़ॽ हे़क्क्याङ् याम्मो त्ये़म्मे़ॽ॥ कल्ले़चोगुल्ले़ खे़न् मनासुम्हाॽ खिमो मे़नुःक्खे़ मे़बे॥” 6 खे़ब्याङ् रहबाम हाङ्ङिल्ले़ कुम्बा सोलोमने़न् हिङे़आङ् वये़ल्ले़बा कुम्बारे़ कुसे़वारोबा लाम्लोबाहाॽ खुने़ॽ अक्खे मे़त्तुसिआङ् सुजा नाःक्तुसि, “आङ्गाॽ कन् मनाहाॽ आक्तङ्बा नुगप् पिरुङ्सिङ्बाबे आदाङ्बासिरे़ आङ्गाॽ थे़मा सुजा आग्बिबे?” 7 खे़ङ्हाॽरे़ नुगप् मे़बिरु, “आदाङ्बारे़ कन् मनाहाॽ आल्लो नुरिक् के़मे़त्तुसिॽ, हे़क्क्याङ् खे़ङ्हाॽ लुङ्माॽ तुक्मासि पान् के़बाःत्तुआङ् खे़ङ्हाॽरे़ खुन्छिॽ निङ्वाॽ के़दासुने़भग्र, ताःन्दि खे़ङ्हाॽ सदादिङ्ले़ लागि आदाङ्बारे़ के़से़वारोबा मे़बोङ्लो॥” 8 कर खे़न् लाम्लोबाहाॽरे़ मे़मे़त्तुबा सुजान् खुने़ॽ खे़म्मा मे़दे़न्दे़न्, हे़क्क्याङ् खुने़ॽनु सोरिक् के़बोबा कुबे़रे़ कुदाङ्ला नु खुने़ॽ कुसे़वा के़जोःक्पा थाङ्बे़न् मनाहाॽरे़ खुन्छिॽ सुजान् खे़प्सुआङ् खे़ङ्हाॽ सेःन्दोसुसि, 9 “आङ्गाॽ पानुदिङ् आम्बारे़ खे़ङ्हाॽ कुःत्तुसिबा खे़ःप्सिङ्ङिन् याङ्याङ्बा चोःक्मा पिमासिरे़ लागि कन् मनाहाॽरे़ पेलि मे़भाक्ताङ्बा पाःन्नो नुगप् पिमासिरे़ लागि खिनिॽ आङ्गाॽ थे सुजा आग्बिबे?” 10 खुने़ॽनु सोरिक् के़बोबा खे़न् कुबे़रे़ कुदाङ्ला थाङ्बे़न् मनाहाॽरे़ नुगप् मे़बिरु, “आदाङ्बारे़ के़म्बारे़ आनिगे के़लिःप्पा खे़ःप्सिङ् कुःत्तिगे़आङ् वये़, खे़न् याङ्याङ्बा चोगे़ आबिरे़ॽ फाॽआङ् आदाङ्बा के़मे़प्पा कन् मनाहाॽ कन् नुगप्पिन् पिरे़से़ॽआङ् खे़ङ्हाॽ मे़त्ते़से़ॽ, ‘आङ्गाॽ के़रे़क्नुःल्ले़ चुःक्सा आहुक्चोन् आम्बारे़ कुगे़ङ्ङिन्नुःल्ले़ के़धुङ्बा चोक्॥ 11 आङ्गाॽ पानुदिङ् आम्बारे़ खिनिॽ के़लिःप्पा खे़ःप्सिङ् के़गुःत्तिआङ् वये़, कर आङ्गाॽ खे़न्नुःल्ले़ आल्लसाङ् पलिःप् के़लिःप्पाॽ चोगुङ् पिनिङ्ॽ॥ आङ्गाॽ पानुदिङ् आम्बारे़ तिःल्ले़ खिनिॽ के़म्हिप्तिर के़याःन्दिआङ् वये़, कर आङ्गाॽ ताङ्साङ् खे़बक्पाहाॽरे़ खिनिॽ के़म्सिक्तिर याःन्निङ्ॽ॥’” 12 रहबाम हाङ्ङिल्ले़ इङ्जाङ् पिरुसिबा कुइसिक् यारोबाम नु खे़न् के़रे़क् मनाहाॽ सुम्ये़न् एगाङ् खुने़ॽओ मे़नुःक्खे़ मे़ये़॥ 13 हे़क्क्याङ् हाङ्ङिल्ले़ खे़ङ्हाॽ कुजागे़भे़म्बा नुगप् पिरुसि॥ खे़न् लाम्लोबाहाॽरे़ मे़मे़त्तुबा सुजान् खुने़ॽ खे़म्मा मे़दे़न्दे़न्॥ 14 खे़न् थाङ्बे़न् मनाहाॽरे़ मे़मे़त्तुबा सुजा पाःन्निन् कुइसिक् खुने़ॽ खे़न् मनाहाॽ मे़त्तुसि, “आङ्गाॽ पानुदिङ् आम्बारे़ग खिनिॽ के़लिःप्पा खे़ःप्सिङ् के़गुःत्तिआङ् वये़, कर आङ्गाॽ खे़न्नुःल्ले़ आल्लसाङ् पलिःप् के़लिःप्पाॽ चोगुङ् पिनिङ्ॽ॥ आङ्गाॽ पानुदिङ् आम्बारे़ तिःल्ले़ खिनिॽ के़म्हिप्तिर के़याःन्दिआङ् वये़, कर आङ्गाॽ ताङ्साङ् खे़बक्पाहाॽरे़ खिनिॽ के़म्सिक्तिर याःन्निङ्ॽ॥” 15 कम्भलॽरिक् हाङ्ङिल्ले़ खे़न् मनाहाॽरे़ खुन्छिॽ पाःन्निन् मे़घे़प्सुन्, थेआङ्भे़ल्ले़ सिलोबा अहियाहन् लाम्बा यहवे दाङ्बे़ल्ले़ नाबातरे़ कुस्सा यारोबामे़न् मे़त्तुबा पाःन्निन् के़प्मारे़ लागि यहवे दाङ्बे़ल्ले़ अक्तङ्बा याक्नाम् तारुआङ् वये़॥ 16 आल्ल हाङ्ङिल्ले़ खे़ङ्हाॽरे़ खुन्छिॽ पाःन्निन् खे़म्मा मे़दे़न्दे़म्बा के़रे़क् इस्राइलिहाॽरे़ निङ्वाॽ मे़घोसु, खम्भ्याङ् खे़ङ्हाॽरे़ खुने़ॽ अक्तङ्बा नुगप् मे़बिरुरो— “दाउदे़न्नु आनिगे लक्खोमा थे़मा वाॽआङ्बे? यिसैःल्ले़ कुस्साओ आनिगे लक् थे़मा वाॽआङ्बे? इस्राइलिसे, खिनिॽ आप्फेक् साःङ्गाहिम्मो पेगे़म्मे़ॽओ! दाउदए, खे़ने़ॽ आप्फेक् के़हिम् के़धाःङ् तक्ते़ॽओ!” हे़क्केलॽरिक् के़रे़क् इस्राइलिहाॽ हिम्हिम् मे़बेरो॥ 17 कर रहबामरे़ग यहुदाबा ये़क्यक्हाॽओ के़युङ्बा इस्राइलिहाॽ सम्धाङ् आल्लसाङ् युक् चोगु॥ 18 खे़ब्याङ् रहबाम हाङ्ङिल्ले़ नाम्याक् मेःन्ने याःम्बक्को के़बप्पा मनाहाॽ ओगे़मे़प्पा अदोनिरामे़न् इस्राइलिहाॽओ पाङ्घुदेसु॥ कर इस्राइलिहाॽरे़ खुने़ॽ लुङ्ङिल्ले़ मे़ले़प्तु मे़से़रु॥ हे़क्केसाङ् रहबाम हाङ्ङिन् कुअन्लाधान् युक्माआङ् यरुसले़म खे़त्छिङ्मा पेःक्मा खोसे़॥ 19 हे़क्क्याङ् खे़न् ये़न्नाङ्धो आइन् थारिक्के थाङ्गे़त् पिसाङ्बा थाःक्, इस्राइले़न् दाउदरे़ कुहिम्सयङ्ङिल्ले़ कुदक्ले़ङ्वाओ पिफ्युङ्बा पोःक्खे़आङ् वाॽरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.