१ सामुए़ल 31 - लिम्बुसावल नु कुस्साहाॽ मे़स्ये़बा ( १ साप्मु १०:१-१२ ) 1 आल्ल पलिस्तिहाॽ इस्राइलिहाॽरे़ खुन्छिॽ तक्ले़ङ्वाओ थङ् मे़जोगे़, हे़क्क्याङ् इस्राइलबा मनाहाॽ हारिमे़द्ये़आङ् मे़घे़त्छिङ्, हे़क्क्याङ् गिल्बो कोःक्माओ यरिक् मे़से़रुसि॥ 2 हे़क्क्याङ् पलिस्तिहाॽरे़ साउले़न् नु कुस्साहाॽ पुबेलाप्सा मे़नाःत्तुसि, खे़ब्याङ् पलिस्तिहाॽरे़ सावलरे़ कुस्सा सुम्सि जोनाथाने़न्, अबिनादाबे़न् नु मल्किसुअःन् मे़से़रुसि॥ 3 सावलरे़ कुदक्ले़ङ्वाओ के़रे़क् पिसाङ् यम्बा थङ् पोःक्खे़, हे़क्क्याङ् लि नु तोङ् के़गप्पाहाॽरे़ खुने़ॽ मे़याङ्घु, खे़म्ब्याङ् खे़ङ्हाॽरे़ सावले़न् साॽरिक् मे़घाःन्दु॥ 4 हे़क्केःल्ले़ सावलरे़ कुभे़जुम् कुभे़या के़बङ्बा मनान् मे़त्तु, “के़दाभेःन् तरप् फिःक्खे़ॽआङ् आङ्गाॽ थुबाङ्ङे़ॽआङ् से़राङ्ङे़ॽ, मेःन्ने फग्र खे़न् थिम्मे़न्दङ् सुवाङ्हाॽ मे़दाआङ् आङ्गाॽ मे़धुप्पा, हे़क्क्याङ् खे़ङ्हाॽरे़ ताप्फे़ःल्लिक् मे़मे़त्ताआङ् मे़से़त्ताॽ॥” कर खुने़ॽ कुभे़जुम् कुभे़या के़बङ्बाल्ले़ मे़से़रुन्, थेआङ्भे़ल्ले़ खुने़ॽ किसे़॥ खे़ल्ले़चोगुल्ले़ सावलरे़ आबाङे कुदाभेन् लःत्तु, खे़ब्याङ् खे़न् सम्धाङ् हार्भत् फन्छिङ्ङाङ् से़त्छिङ्॥ 5 हे़क्क्याङ् खे़न् फे़जुम्भे़या के़बङ्बे़ल्ले़ साउले़न् स्ये़बा निसु, खे़म्ब्याङ् खुने़ॽआङ् आप्फेक् कुदाभेओ तिःङ्सिङ् से़त्छिङ्ङाङ् खुने़ॽनुए स्ये़॥ 6 सावले़न् नु खुने़ॽ कुस्सा सुम्सि, हे़क्क्याङ् खुने़ॽ कुभे़जा कुभे़युम् के़गुबान् खे़ब्याङ् खुने़ॽ के़रे़क् कुमनाहाॽ आम्भा खे़न् ये़न्नो सोरिक् मे़स्ये़॥ 7 हे़क्क्याङ् ने़ने़बादे़न्निल्ले़ नाधाःम्बि नु यर्दन यङ्घङ्ङिल्ले़ नाधाःम्बि के़वाॽबा इस्राइलिहाॽरे़ इस्राइलबा थक्सुबाहाॽ मे़घे़त्छिङ्बा हे़क्क्याङ् सावले़न् नु खुने़ॽ कुस्साहाॽआङ् मे़स्ये़रुसिबा मे़निसुसि, खे़ब्याङ् खे़ङ्हाॽरे़ आबाङे खुन्छिॽ ये़क्यक्हाॽ मे़ले़रुआङ् मे़घे़त्छिङ् मे़बे॥ खे़ब्याङ् पलिस्तिहाॽ खे़प्मो मे़बेआङ् खे़न् ये़क्यक्हाॽ हुक्काप् मे़मे़त्छिङ्॥ 8 कुदाःन्दिक्मा, पलिस्तिहाॽ के़सिबाहाॽरे़ खुन्छिॽ चिगक्वा सामा तेॽसे़ मे़द्ये़ःल्ले़ खे़ङ्हाॽरे़ सावले़न् नु कुस्साहाॽ गिल्बो कोःक्माओ मे़स्ये़आङ् मे़ने़स्से़बा मे़निसुसि॥ 9 हे़क्केःल्ले़ खे़ङ्हाॽरे़ सावलरे़ कुधेगेःक्पे़न् मे़घक्तु हे़क्क्याङ् कुभे़जुम् कुभे़याहाॽ मे़भे़न्दुआङ् मे़देॽरु॥ खे़ब्याङ् पलिस्तिहाॽरे़ खुन्छिॽ लाजेॽहाॽओ इङ्घङ् के़साबाहाॽ मे़बाङ्घुसि, खुन्छिॽ मनाहाॽ नु नावाइत्ला के़युङ्बा माङ्हिम्हाॽओ थारिक् कन् इङ्घङ्ङिन् मे़गे़त्तु॥ 10 खे़ङ्हाॽरे़ सावलरे़ कुभे़जुम् कुभे़याहाॽ अस्तोरेत माङ्हिम्मो मे़ने़स्सु, हे़क्क्याङ् खे़ङ्हाॽरे़ बेथ-सान्बा लुङ्धाक्को कुधक्किन् मे़दिःक्सुआङ् ते़ल्ले़म् मे़भोन्दु॥ 11 पलिस्तिहाॽरे़ साउले़न् खुन्छिॽ पाःप्पाःत् मे़मे़त्तुबा पाःन्निन् गिलाद-याबेसओ के़युङ्बाहाॽरे़ मे़घे़प्सु॥ 12 के़रे़क् थङ् चोःक्मा के़धुम्बा मनाहाॽ से़न्दिक् नाम्दाःत्तात् मे़बेआङ् सावले़न् नु कुस्साहाॽरे़ खुन्छिॽ थक्किन् बेथ-सान्बा लुङ्धाक्लाम् मे़लःत्तुसिआङ् खे़ङ्हाॽ याबेस मे़युरुसि, खे़ब्याङ् खे़न् थक्हाॽ मे़ओॽरु मे़देसु॥ 13 हे़क्क्याङ् खे़ङ्हाॽरे़ खुन्छिॽ ये़त्हाॽ मे़देॽरुआङ् याबेसओ कुभे़क्वा स्योःङ्स्योःङ् के़बप्पा सिङ्बुङ्ङिल्ले़ कुसिगाङ् मे़लुप्तु, हे़क्क्याङ् खे़ङ्हाॽ नुसि ये़न् थारिक् मे़रिङ्ङो ने़त् मे़युङे़॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.