१ हाङ् 6 - लिम्बुसोलोमनरे़ माङ्हिम् चोगु 1 इस्राइलिहाॽ मिस्र लाजेॽलाम् मे़लःन्दे़ मे़भे़रे़बा ४८० तङ्बेओ, सोलोमनरे़ इस्राइलिहाॽओ हाङ्युक् चोगुबा लिसिगेक्पा तङ्बेओबा जिभ, इग्र निसिगेक्पा लाओ खुने़ॽ यहवे दाङ्बे़ल्ले़ कुहिम्मिन् चोःक्मा हेःक्तु॥ 2 यहवे दाङ्बे़ल्ले़ कुलागि सोलोमन हाङ्ङिल्ले़ चोगुबा माङ्हिम्मे़ल्ले़ कुलाम्ति तुक्पोङ् हुक्सिक्, कुभे़रे़ निबोङ् हुक्सिक् ने़स्से़ हे़क्क्याङ् सुम्बोङ् हुक्सिक् कुलिङ्गे़न् पत्छे़॥ 3 माङ्हिम् लुम्मोबा यम्बा चुम्लुङ् चोःक्मा याक्फाङ् तगाङ्बा लक्खुम्मिन् माङ्हिम्मिल्ले़ कुभे़रे़ खाराक् पोरे़आङ् ने़स्से़, निबोङ् हुक्सिक् कुभे़रे़ ने़स्से़॥ माङ्हिम् तगाङ् ले़प्माङ् खे़न् थिबोङ् हुक्सिक् थे़म्बा लःन्दे़आङ् ने़स्से़॥ 4 खुने़ॽ माङ्हिम्मोबा खाम्बु सिगाङ् चिभिःप्फिःप्बा पेधाःप्हाॽ चाङ्जाङ् फत्छु॥ 5 कुलुम्मोबा यम्बा याक्फाङ् नु सिगाङ् सेसेदे़न्निल्ले़ कुएगाङ् ले़प्माङ् खे़न् हिम्मोबा के़रे़क् पिसाङ् लुङ्धाक्किन्नु सोरिक् चक्मनाबा याक्फाङ्हाॽ चोगु॥ 6 के़रे़क्नुःल्ले़ कुसिःक्तोबा कुदाःत्लाःल्ले़ कुभे़रे़न् हुक्सिक् ङासि ने़स्से़॥ कुलुम्मोबा कुदाःत्लाःल्ले़ कुभे़रे़न् हुक्सिक् तुक्सि नु सुम्सिगेक्पा कुदाःत्लान् हुक्सिक् नुसि ने़स्से़॥ खुने़ॽ माङ्हिम् के़रे़क् पिसाङ् पे़रे़म्सिङ्हाॽ ताॽरुआङ् लाःक्कात् ले़प्माङ् माङ्हिम्मोबा लुङ्धाक्को थेआङ् मे़न्होःम्मे याक्फाङ्हाॽ चक्तुआङ् लःत्तु॥ 7 माङ्हिम् मे़जोगुल्ले़ लुङ् पुन्नाओए यारिप् मे़जोगु मे़घक्तुबा लुङ्हाॽरक् मे़से़त्तु॥ थवा इग्र लुङ्घे़ःप्मा इग्र आत्तिन् परिक्पा फे़न्जेॽ सामाहाॽरे़ लोःक्खुबे़न्नाङ् माङ्हिम् चोःक्मादे़न्नो खे़म्मे़दे़त्ते़न्॥ 8 के़रे़क्नुःल्ले़ मुःसमा कुदाःत्लाओबा लाम्धेःत्तिन् माङ्हिम् योहाङ् लाङ्गे़त् पिसाङ् पत्छे़॥ खे़प्मोलाम् कुलुम्मो नु थोसमा कुदाःत्लाओ पेःक्मारे़ लागि नाहाङ्सेक् पत्छे़॥ 9 कम्भलॽरिक् पे़रे़म्सिङ् नु साम्माङ्सिङ् सिङ्भे़ल्ले़क्हाॽलाम् खे़ल्ले़ कुघाप्मा खाम्बु चोगुआङ् खुने़ॽ माङ्हिम् चोःक्मा सुरु॥ 10 खुने़ॽ माङ्हिम् के़रे़क् पिसाङ् चुजुक्सा याक्फाङ्हाॽ चोगु॥ के़रे़क् याक्फाङ्हाॽ हुक्सिक् ङासि केःम्बा कुलिङ्गे़न् चोगे़, हे़क्क्याङ् माङ्हिम्मिन्नु सोरिक् साम्माङ्सिङ् सिङ्भे़ल्ले़क्हाॽ चक्सिङ्ङाङ् पत्छे़॥ 11 खे़ब्याङ् यहवे दाङ्बे़ल्ले़ कन् कुबाःन्जाक्किन् सोलोमनओ ये़रो— 12 “खे़ने़ॽ के़जोगुर के़याक्पा कन् माङ्हिम्मिल्ले़ कुयाःम्बेओग अक्खे पोङ्ॽ, आङ्गाॽ के़रे़क् आइङ्जाङ्हाॽ खे़ने़ॽ के़इःत्तु के़नाःत्तुॽ हे़क्क्याङ् आङ्गाॽ के़रे़क् आधिम्हाॽ कुइसिक् खे़ने़ॽ के़जोगुॽ, खम्भ्याङ् आङ्गाॽ के़रे़क् आइङ्जाङ्हाॽ के़दिम्दु के़नाःत्तुने़भग्र आङ्गाॽ खे़ने़ॽ के़म्बानु चोगुङ्ङाङ् वये़बा खे़न् आमाङ्हुप्पिन् खे़ने़ॽलाम् आङ्गाॽ के़त्तुङ्ॽ॥ 13 हे़क्क्याङ् इस्राइलिहाॽरे़ खुन्छिॽ लुम्मो आङ्गाॽ वाॽआ, खे़ब्याङ् आङ्गाॽ आमना इस्राइलिहाॽ लाप्मे़भुसुङ्सिङ्ङिन्लो॥” माङ्हिम्मोबा सामा चिगक्वाहाॽ ( २ साप्मु ३:८-१४ ) 14 कम्भलॽरिक् सोलोमनरे़ यहवे दाङ्बे़ल्ले़ कुहिम्मिन् चोगु सुरु॥ 15 खुने़ॽ माङ्हिम्मोबा लुङ्धाक्किन् सिगाङ् ले़प्माङ् खाम्बाङ्ङोलाम् पे़रे़म्सिङ्हाॽ थारिक् साम्माङ्सिङ् सिङ्भे़ल्ले़क्हाॽ तङ्घुआङ् खिप्सु हे़क्क्याङ् आःङ् सिङ्भे़ल्ले़क्हाॽरे़ खाम्बाङ्ङिन् ते़प्तु॥ 16 माङ्हिम् सिगाङ् एगाङ् ले़प्माङ् खुने़ॽ खाम्बाङ्ङोलाम् पे़रे़म्सिङ्ङो थारिक् साम्माङ्सिङ् सिङ्भे़ल्ले़क्हाॽ तङ्घुआङ् निबोङ् हुक्सिक् केःम्बा सिगाङ् सेसेदे़न्, इग्र के़रे़क्नुःल्ले़आङ् साॽरिक् सेसेदे़न् चोगु॥ 17 खे़ल्ले़ कुदगि ले़प्माङ् कुलुम्मोबा चुम्लुङ् याक्फाङ्ङिन् लिबोङ् हुक्सिक् केःम्बा ने़स्से़॥ 18 माङ्हिम्मोबा सिगाङ् ले़प्माङ्बा साम्माङ्सिङ् सिङ्भे़ल्ले़क्कोग के़भे़क्पा फुङ्हाॽ नु वसोॽ फुङ्वाःत्हाॽरे़ कुभुङ् मे़लक्तुआङ् पत्छे़॥ खे़ङ्हाॽ के़रे़क् साम्माङ्सिङ्ले़न् पत्छे़॥ लुङ् लत्छाआङ् निमे़धाबे़न्॥ 19 माङ्हिम्मोबा सिगाङ् ले़प्माङ् यहवे दाङ्बे़ल्ले़ कुमाङ्हुप् सन्दोक्किन् युङ्मारो लागि खुने़ॽ सिगाङ् सेसेदे़न् यारिप् चोगु॥ 20 कन् सिगाङ् सेसेदे़न्निन् निबोङ् हुक्सिक् केःम्बा कुलाम्ति, निबोङ् हुक्सिक् कुभे़रे़ नु निबोङ् हुक्सिक् कुलिङ्गे़न् केःम्बा चोगे़॥ खुने़ॽ खे़न् इसेःङ्बा साम्म्याङ्ङिल्ले़ सुःप्तु हे़क्क्याङ् साम्माङ्सिङ् ले़त्ति तोःम्मादे़न्निन्नाङ् सुःप्तु॥ 21 सोलोमनरे़ माङ्हिम्मोबा सिगाङ् कुलक्किन् इसेःङ्बा साम्म्याङ्ङिल्ले़ सुःप्तु, हे़क्क्याङ् साम्म्याङ्ङिल्ले़ सुःप्मनाबा सिगाङ् सेसेदे़न्निल्ले़ कुदगि खुने़ॽ साम्म्याङ् सिक्क्रिहाॽ फोःन्दुआङ् फोसु॥ 22 कम्भलॽरिक् खुने़ॽ सिगाङ्बा कुलक्किन् के़रे़क् साम्म्याङ्ङिल्ले़ सुःप्तु॥ सिगाङ् सेसेदे़न्नो के़युङ्बा ले़त्ति तोःम्मादे़न्निन्नाङ् खुने़ॽ साम्म्याङ्ङिल्ले़ सुःप्तु॥ 23 सिगाङ् के़रे़क्नुःल्ले़ सेसेबादे़न्नो खुने़ॽ चैतुन सिङ्लाम् ने़त्छि करुब चोगुसि॥ करुब ने़प्माङ् थिबोङ् हुक्सिक् कुलिङ्गे़न् केःम्बा चोगे़सि॥ 24 थिक्सिगेक्पा करुबरे़ लत्छा कुलाप्पिन् हुक्सिक् ङासि केःम्बा पत्छे़ हे़क्क्याङ् वेॽइल्ले़न्नाङ् हुक्सिक् ङासि केःम्बा पत्छे़॥ लत्छा कुलाप्पिल्ले़ कुसम्मोलाम् वेॽसमा कुलाप्पिल्ले़ कुसम्मो थारिक् थिबोङ् हुक्सिक् पत्छे़॥ 25 निसिगेक्पा करुबरे़ कुसिःक्मे़न्नाङ् थिबोङ् हुक्सिक् पत्छे़, थेआङ्भे़ल्ले़ खे़न् ने़त्छि करुबहाॽरे़ खुन्छिॽ थक् नु फे़रे़ लाम्तिहाॽ लत्छा परिक्पा चोगे़॥ 26 करुब ने़प्माङ्ले़ खुन्छिॽ लिङ्गे़न्निन् थिबोङ् हुक्सिक् पत्छे़॥ 27 खुने़ॽ खे़न् करुबहाॽ माङ्हिम्मोबा सिगाङ् याक्फाङ्ङो युक्खुसि॥ खे़ङ्हाॽरे़ खुन्छिॽ लाप्हाॽग लाःक्कात् ले़प्माङ् हप्फे़ लॽरे़आङ् पत्छे़॥ लत्छा करुबरे़ कुलाप् थिक्ले़ वेॽ ले़प्माङ्बा लुङ्धाक्किन् नु वेॽ करुबरे़ कुलाप् थिक्ले़ वेॽ ले़प्माङ्बा लुङ्धाक्किन् सुसुआङ् पत्छे़, हे़क्क्याङ् खे़ङ्हाॽरे़ खुन्छिॽ वेॽ लाप्हाॽरे़ग याक्फाङ्ङिल्ले़ कुलुम्मो सुसुआङ् पत्छे़॥ 28 खुने़ॽ खे़न् ने़प्फु करुबहाॽ साम्म्याङ्ङिल्ले़ सुःप्तुसि॥ 29 माङ्हिम्मोबा के़रे़क् पिसाङ्बा सिगाङ् नु लाःक्कात् याक्फाङ्हाॽओबा के़रे़क् लुङ्धाक्हाॽओ खुने़ॽ करुबहाॽ, खे़बक्सिङ्ङिल्ले़ कुबुङ्हाॽ नु के़भे़क्पा फुङ्हाॽ कुभुङ् लक्तुआङ् चोगु॥ 30 खुने़ॽ माङ्हिम्मोबा सिगाङ् नु लाःक्कात् ने़प्माङ् याक्फाङ्हाॽओबा खाम्बाङ्ङिन्नाङ् साम्म्याङ्ङिल्ले़ पन्छु॥ 31 सिगाङ्बा सेसेदे़न्नो लाःप्मा लाम्धेत् खे़ल्ले़क्हाॽ चैतुन सिङ्ङिल्ले़न् चोगु हे़क्क्याङ् खुने़ॽ ङासि कुधाॽकुधाॽ लक्मनाबा कुदक्मा लाम्धेत् सित्लाङ्हाॽ चोगु॥ 32 हे़क्क्याङ् लाम्धेःत्हाॽओ खुने़ॽ करुबहाॽ, खे़बक्सिङ्ङिल्ले़ कुबुङ्हाॽ नु के़भे़क्पा फुङ्हाॽरे़ कुभुङ् लक्तुआङ् चोगु, हे़क्क्याङ् करुबहाॽ नु खे़बक्सिङ्ङिल्ले़ कुबुङ्ङिन् फे़मनाबा साम्म्याङ्ङिल्ले़ सुःप्तु॥ 33 हे़क्केलॽरिक्के खुने़ॽ माङ्हिम् लुम्मोबा चुम्लुङ् चोःक्मा याक्फाङ्ङो लाःप्मा लाम्धेःत्तिल्ले़ लिसि कुधाॽकुधाॽ लक्मनाबा चैतुन सिङ्ङिल्ले़न् सित्लाङ्हाॽ चोगु॥ 34 कुहङ्ङो के़इबा कुभे़ल्ले़क् ने़त्छि के़बप्पा आःङ्ङिल्ले़न् ने़त्छि लाम्धेत् चोगु॥ 35 खुने़ॽ खे़प्मो करुबहाॽ, खे़बक्सिङ्हाॽरे़ कुबुङ्हाॽ नु के़भे़क्पा फुङ्हाॽ कुभुङ् लक्तुआङ् चोगु, हे़क्क्याङ् खे़न् कुभुङ्हाॽ साम्म्याङ्ङिल्ले़ कुदङ्बा सुःप्तु॥ 36 हे़क्क्याङ् खुने़ॽ सिगाङ् लक्खुम्मोबा लुङ्धाक्किन् खक्मनाबा लुङ्ङिल्ले़न् थे़ःक्पे़त् कुदिःक्ला सुम्सि नु साम्माङ्सिङ् सिङ्भे़ल्ले़क्मे़ल्ले़न् लत्छा कुदिःक्ला ये़प्सुआङ् चोगु॥ 37 सोलोमनरे़ हाङ्युक् चोगुबा लिसिगेक्पा तङ्बेओबा जिभ मे़प्मनाबा निसिगेक्पा लाओ यहवे दाङ्बे़ल्ले़ कुहिम्मिल्ले़ कुबुङ् मे़युक्खु॥ 38 थिबोङ्ङाङ् थिक्सिगेक्पा तङ्बेओबा बुल ला, इग्र ये़त्छिगेक्पा लाओ खुने़ॽ कुइङ्जाङ् हे़क्के के़रे़क् कुसिःक्मा कुजोःक्मा कुइसिक् माङ्हिम्मिन् मे़जोगु मे़सुरु॥ खे़न् चोःक्मारे़ लागि खुने़ॽ नुसि तङ्बे थरुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.