१ हाङ् 5 - लिम्बुसोलोमनरे़ माङ्हिम् चोःक्मा यारिप् चोगु ( २ साप्मु २:१-१८ ) 1 सोलोमने़न् खुने़ॽ कुम्बारे़ कुले़क्वाओ हाङ् माङ्थोःक्ना पोःक्खे़आङ् वाॽ फाॽआङ् आल्ल तुरोसबा हाङ् हेरामे़ल्ले़ खे़प्सु, खे़ब्याङ् खुने़ॽ हाङ्लाइङ्बाहाॽ सोलोमनरो पाङ्घु युसुसि, थेआङ्भे़ल्ले़ खुने़ॽ आभे़ल्ले़साङ् दाउद हाङ्ङिन्नु चुम् पोःक्खे़आङ् वये़॥ 2 सोलोमनरे़ हे़रामओ कन् इङ्घङ्ङिन् हाङुदेसुरो— 3 “आङ्गाॽ आम्बा दाउदरे़ कुदक्ले़ङ्वाओ के़रे़क् पिसाङ्लाम् थङ्हाॽ पोःक्खे़बाल्ले़ चोगुल्ले़, यहवे दाङ्बे़ल्ले़ खुने़ॽ कुनिङ्मिहाॽ कुलाङ्भो सिगाङ् मे़न्जोःक्सिङ्ङे थारिक् यहवे दाङ्बा खुने़ॽ कुनिङ्वाॽफुमाङ्ङिल्ले़ कुमिङ्ङिल्ले़ लागि लत्छा माङ्हिम् चोःक्मा मे़सुक्तुन् फाॽआङ् खे़ने़ॽ के़निसुआङ् वाॽ॥ 4 कर आल्ल यहवे दाङ्बा आङ्गाॽ आनिङ्वाॽफुमाङ्ङिल्ले़ के़रे़क् पिसाङ् नाःम्सिङ्मा पिराङ्ङाङ् वाॽ, हे़क्क्याङ् आनिङ्मि मे़होप् इग्र आदुक्खे आलाक्खे होप्॥ 5 कल्ले़चोगुल्ले़ यहवे दाङ्बे़ल्ले़ आङ्गाॽ आम्बा दाउदे़न् मे़त्तुबा कुइसिक् यहवे दाङ्बे़ल्ले़ कुमिङ्ले़ लागि लत्छा माङ्हिम् चोःक्मा निङ्वाॽ निःन्धो चोगुङ्ङाङ् वाॽआ॥ यहवे दाङ्बे़ल्ले़ दाउदे़न् अक्खे मे़त्तुआङ् वये़ ‘खे़ने़ॽ के़ले़क्वाओ, आङ्गाॽ खे़ने़ॽ के़स्सान् हाङ्युक्नाओ युक्खुङ्ॽ, खुने़ॽए आङ्गाॽ आमिङ्ङिल्ले़ लागि खे़न् माङ्हिम्मिन् चोगुॽ॥’ 6 “कल्ले़चोगुल्ले़ आङ्गाॽ आलागि ले़बनानलाम् साम्माङ्सिङ्हाॽ ताङ्मा इङ्जाङ् पिरे़से़ॽ॥ आङ्गाॽ आमनाहाॽ खे़ने़ॽ के़मनाहाॽनु मे़दङ्सिङ्ङाङ् याःम्बक् मे़जोगुॽ, हे़क्क्याङ् खे़ने़ॽ आक्ख्यारिक् नाम्याक् पिमासि निःन्धो के़जोगुॽ आङ्गाॽ खे़ने़ॽ के़मनाहाॽ पिरुङ्सिङ्ॽ॥ खिनिॽ सिदोनिहाॽ कुइसिक् सिङ्बुङ्हाॽ ताङ्मा कुहुक्वा के़नुॽबा आनिगे मना मे़होप् फाॽआङ् खे़ने़ॽ के़निसुरो॥” 7 आल्ल हे़रामरे़ सोलोमनरे़ कुइङ्घङ्ङिन् खे़प्सु, खे़ब्याङ् साॽरिक् कुनिङ्वाॽ त्ये़आङ् पाःत्तु, “आइन् यहवे दाङ्बे़ल्ले़ कुनारा पोररो, थेआङ्भे़ल्ले़ कन् यरिक् मनाहाॽओ युक् चोःक्मारे़ लागि खुने़ॽ दाउदे़न् लत्छा सिक्कुम्साबा साधिक् पिरुआङ् वाॽ॥” 8 खुने़ॽ कन् इङ्घङ्ङिन् सोलोमने़न् हाक्तुरो— “खे़ने़ॽ के़हाङुबा इङ्घङ्ङिन् आङ्गाॽ खे़प्सुङ्॥ साम्माङ्सिङ् नु आःङ् सिङ्हाॽरे़ कुयाःम्बेओ खे़ने़ॽ के़नाःक्तुबा कुइसिक् आङ्गाॽ के़रे़क् हिसुङ् तङ्घुङ् पिने़रो॥ 9 आङ्गाॽ आमनाहाॽरे़ ले़बनानलाम् वरःङ्ङो थारिक् सिङ्लःङ्साहाॽ मे़धासुॽ, हे़क्क्याङ् खे़ङ्हाॽ इमे़घेःक्खुआङ् खे़ने़ॽ के़बाःत्तुबादे़न्नो वामे़देःन्दु मे़युसुर याःन्दुङ्सिङ्ॽ॥ खे़ङ्हाॽ खे़प्मो मे़भाःक्खुर याःन्दुङ्सिङ्ॽ, हे़क्क्याङ् खे़न् सिङ्हाॽ खे़ने़ॽ तेॽमा के़सुक्तुॽ॥ खे़ब्याङ् आङ्गाॽ आहाङ् हिम्सयङ्ले़ लागि खे़ने़ॽ चामा कुजा हिसे़ तङ्घे़आङ् निङ्वाॽ चोगुङ्बा पाःन्निन् के़त्ताङ् पिराङ्ङे़ॽओ॥” 10 कम्भलॽरिक् सोलोमनरे़ निङ्वाॽ चोगुबा के़रे़क् साम्माङ्सिङ् नु आःङ् सिङ्लःङ्साहाॽ हे़रामरे़ हाङुयुसु, 11 हे़क्क्याङ् सोलोमनरे़ हे़रामरे़ कुहिम्सयङ्हाॽरे़ खुन्छिॽ चामा कुजारे़ लागि ५०,००० मुरि मासि नु ४,५०० लितर युमनाबा चैतुन निःङ्गेॽ खुने़ॽ हाक्तुदेसु॥ सोलोमनरे़ कन् तङ्बे थक्मा हेरामे़न् हाक्तु॥ 12 यहवे दाङ्बे़ल्ले़ माङ्हुप् चोगुबा कुइसिक् खुने़ॽ सोलोमने़न् सिक्कुम् निङ्वाॽ पिरु॥ हेराम नु सोलोमनरे़ खुन्छिॽ लुम्मो तङ्माआङ् वाॽमा काॽइ वये़, हे़क्क्याङ् खुन्छिॽ ने़प्माङ्ले़ खे़न् नादङ् चोगे़त्छु॥ 13 सोलोमन हाङ्ङिल्ले़ के़रे़क् इस्राइललाम् सुम्बोङ् हे़न्छिङ् स्याङ्मे़न्दाङ् याःम्बक्को मे़भत्छुसिबा मनाहाॽ सुप्सुसि॥ 14 खुने़ॽ खे़ङ्हाॽ ला थक्मा थिबोङ् थिबोङ् हे़न्छिङ् ले़क्तुसिर लेबनान पाङ्घुसि, हे़क्क्याङ् कम्भलॽरिक् मनाहाॽ लत्छा ला लेबनान नु ला ने़त्छि हिम्मो मे़वये़॥ याःम्बक् के़जोःक्पा मनाहाॽ मुरा के़मे़प्पा लक्पे़न्साबा अदोनिरामे़न् वये़॥ 15 सोलोमनरे़ ७०,००० कक् के़गुबा नु कोःक्मा फाङ्जङ्ङो ८०,००० लुङ् के़घक्पा मनाहाॽ कत्तुसि॥ 16 याःम्बक् के़जोःक्पाहाॽरे़ मे़जोगुबा याःम्बक् ओगे़मे़प्पा नु मुरा मे़प्मासिरे़ लागि मे़भत्छुसिबा मनाहाॽ ३,३०० लाम्लोबाहाॽ मे़वये़॥ 17 हाङ्ङिल्ले़ कुइङ्जाङ् कुइसिक् खे़ङ्हाॽरे़ यहवे दाङ्बे़ल्ले़ कुहिम्मिल्ले़ लागि यम्बा केःम्बा मे़घक्तुआङ् वरे़ङ्ले़ङ् मे़जोगुबा लुङ्ङिल्ले़ कुबुङ् युङ्मारे़ लागि के़रे़क्नुःल्ले़ नुबा लुङ्हाॽ लुङ्बुन्नाओलाम् मे़हे़रु मे़लःत्तु॥ 18 सोलोमन नु हे़रामरे़ खुन्छिॽ सिङ्गाम्बा लुङ्गाम्बाहाॽ हे़क्क्याङ् गबालबा मनाहाॽरे़ माङ्हिम् चोःक्मारे़ लागि सिङ्हाॽ नु लुङ्हाॽ मे़घक्तुआङ् यारिप् मे़जोगुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.