१ हाङ् 4 - लिम्बुसोलोमनरे़ कुसुहाङ्युक्पाहाॽ 1 कम्भलॽरिक् सोलोमन हाङ्ङिल्ले़ के़रे़क् इस्राइलओ हाङ्युक् चोगु॥ 2 खुने़ॽ यम्बयम्बा कुसुहाङ्युक्पाहाॽ हाबा कन्हाॽएरो— सादोकरे़ कुस्सा अजर्याह निङ्वाॽफुसाम्बा वये़, 3 सिसारे़ कुस्सा, एलिहोरेफ नु अहियाह—सुहाङ्मिबाहाॽ वये़सि, अहिलुदरे़ कुस्सा यहोसापात—साप्ला के़साप्पा वये़, 4 यहोयादारे़ कुस्सा बनायाह—मा थक्मोबा, सादोक नु अबियाथार—निङ्वाॽफुसाम्बा वये़सि, 5 नातानरे़ कुस्सा अजर्याहन्—थुम् थुम्मोबा सुहाङ्युक्पाहाॽरे़ खुन्छिॽ लक्पे़न्साबा वये़, नातानरे़ कुस्सा जाबुदे़न्—निङ्वाॽफुसाम्बा नु हाङ्ङिल्ले़ कुआप्फेक्पा सुजासाबा वये़, 6 अहिसारे़न्—हाङ्हिम्मोबा लक्पे़न्साबा वये़, अब्दारे़ कुस्सा अदोनिरामे़न्—स्याङ्मे़न्दाङ् याःम्बक्को मे़भत्छुसिबाहाॽरे़ खुन्छिॽ लक्पे़न्साबा वये़रो॥ 7 के़रे़क् इस्राइलओ सोलोमनरे़ थुम् थुम्मोबा थिबोङ्ङाङ् ने़त्छि कुयुक्साबाहाॽ मे़वये़, खे़ङ्हाॽरे़ हाङ्ङिन् नु हाङ् हिम्सयङ्ले़ लागि चामा कुजा मे़दारु॥ खे़ङ्हाॽ के़रे़क्ले़ तङ्बेरे़ लाधिक् थिक्पा चामा कुजा ताःप्मा के़बोङ्बा वये़॥ 8 खे़ङ्हाॽरे़ खुन्छिॽ मिङ् आम्भा कन्हाॽएरो— एफ्राइमबा कोःक्माबा लाजेॽओ—बेन-हुर॥ 9 माकाज, साल्बिम, बेथ-सेमेस, एलोन-बेथहानानओ—बेन-देकेर, 10 अरुब्बोतओ—बेन-हेसेद (खे़ल्ले़ कुलक्पे़न्नो सोको नु हेपेरबा के़रे़क् लाजेॽहाॽ ने़स्से़॥), 11 दोरबा थुम्मो—बेन-अबिनादाब, (सोलोमनरे़ कुस्सा मे़न्छुमा ताफाते़न् खे़ल्ले़ मेःक्खिम् मे़त्तुआङ् वये़), 12 अहिलुदरे़ कुस्सा बानाःन् तानाक, मगिद्दो नु बासानओ लक्पे़न्साबा वये़॥ (बेथ-साने़न् सार्तानरे़ कुबेसाङ् यिजरेल कुसिङ्गाङ् ने़स्से़) के़रे़क् हाबिल-महोला हे़क्क्याङ् योक्माम थारिक्॥ 13 रामोत-गिलादओ बेन-गेबेरे़न् लक्पे़न्साबा वये़ गिलादओ के़ने़बा याइररे़ कुबाङ्भेॽहाॽ (मनस्सेरे़ कुस्सा याइर) हे़क्क्याङ् बासानओ के़ने़बा अर्गोबरे़ कुधुम्मिन् नु कासाःल्ले़ मे़भाङुबा यम्बा लाम्धेःत्हाॽ लुङ्धाक्किल्ले़ कब्रिङ् कबुबा तुक्पोङ् यम्बयम्बा ये़क्यक्हाॽआङ् ने़स्से़, 14 महनोमओ—इद्दोरे़ कुस्सा अहिनादाबे़न् वये़॥ 15 नप्तालिओ—अहिमासे़न् वये़॥ (खे़ल्ले़ सोलोमनरे़ कुस्सा मे़न्छुमा बासमते़न् मेःक्खिम् मे़त्तुआङ् वये़), 16 आसेर नु आलोतओ—हुस्सैरे़ कुस्सा बानाःन् वये़, 17 इस्साखारओ—पारुहरे़ कुस्सा यहोसापाते़न् वये़, 18 बेन्यामिनओ—एलारे़ कुस्सा सिमिन् वये़, 19 गिलादओ—उरिरे़ कुस्सा गेबेरे़न् वये़ (खे़न् एमोरिहाॽरे़ खुन्छिॽ हाङ् सिहोननु बासानबा हाङ् ओगरे़ कुलाजेॽ ने़स्से़)॥ खुने़ॽ खे़न् थुम्मोबा लत्छारक् थुम् युक्साबा वये़रो॥ सोलोमनरे़ कुलिङ्दो के़गे़प्पा कुहाङ्युक् ये़म् 20 यहुदा नु इस्राइलबा मनाहाॽ वरःङ्ङोबा ये़ःङ्घा कुइसिक् निःप्मे़न्दे़त् यरिक् मे़वये़॥ खे़ङ्हाॽरे़ मे़ज मे़धुङुआङ् मे़नुरे़ मे़दासे़आङ् मे़वये़॥ 21 युफ्रेतिस वहःङ्लाम् पलिस्तिहाॽरे़ खुन्छिॽ लाजेॽ नु मिस्रबा इःन्दो थारिक्पा के़रे़क् हाङ्जुम्हाॽओ सोलोमनरे़ युक् चोगुआङ् ने़स्से़॥ खे़न् लाजेॽहाॽरे़ खुने़ॽओ एःङ्याङ् मे़हुङु हे़क्क्याङ् खुने़ॽ कुहिङ्हिङ् थे़म्बाए खे़ङ्हाॽ खुने़ॽ कुमना मे़बोःक्खे़आङ् मे़युङे़॥ 22 सोलोमनरे़ थिक्याःन्धक्पा कुजामा चाःन् ७,५०० मुरि चुन्जुम्बा फेॽदुम् नु १५० मुरि फे़ःङ्मनाबा कुजा, 23 पित्थाःङ्ङो हिङ्मनासिबा थिबोङ् पित्थक्साहाॽ, चाराम्मादे़न्नो हिङ्मनासिबा निबोङ् पित्हाॽ, किप् थिक् मे़ल्लुक् नु मे़ःन्दा, हे़क्क्याङ् पे़ःङ्वा, स्याःक्पा, साम्मे़ःन्दा, इक्सा नु वाहाॽ मे़वये़॥ 24 थेआङ्भे़ल्ले़ खुने़ॽ युफ्रेतिस वहःङ्ङिल्ले़ नाम्धा ले़प्माङ्बा के़रे़क् लाजेॽ, इग्र तिफसालाम् गाजा थारिक् हाङ्युक् चोगुआङ् ने़स्से़, हे़क्क्याङ् के़रे़क् पिसाङ् सनारुङ् पोःक्खे़आङ् ने़स्से़॥ 25 सोलोमनरे़ कुहिङ्हिङ् थे़म्बाए दानलाम् बेर्सेबा थारिक्के यहुदा नु इस्राइले़न् चिजि ये़म्ये़म् ने़स्से़, के़रे़क् मनाहाॽ खुन्छिॽ आप्फेक् आप्फेक् चे़ल्ले़क्सेॽ नु पःत्छेॽबुङ् सिगाङ् थाप्थेःक् याम्धेक् मे़युङे़॥ 26 सोलोमनरे़ कुअन्लाधा के़लोङ्बा अन्हाॽरे़ लागि हे़न्छिङ् लिसि अन्ये़प्नाहाॽ नु थिबोङ्ङाङ् ने़त्छि हे़न्छिङ् अन्गे़लोङ्बाहाॽ कत्तुसि॥ 27 थुम् थुम्मोबा सुहाङ्सुक्पाहाॽरे़ ला थक्मा मे़ले़क्सिङ्ल सोलोमन नु खुने़ॽ कुजा चामादे़न्नो के़युङ्बाआङ् के़जाबाहाॽ के़रे़क्ले़ लागि चामा कुजाहाॽ मे़दारु॥ कम्भलॽरिक् मे़दारुल्ले़ चामा कुजा थे़माःन्नाङ् मे़सुःन्ने़न्ल फाॽआङ् खे़ङ्हाॽरे़ मे़साॽरु ओमे़मे़त्तु॥ 28 अन्लाधा के़लोङ्बा अन्हाॽ नु वेॽ अन्हाॽरे़ लागिआङ् खे़ङ्हाॽरे़ ताःप्मा के़बोङ्बा हःक्सि नु हःक्सिलाङ्हाॽ मे़दारु॥ 29 निङ्वाॽफुमाङ्ङिल्ले़ सोलोमने़न् सिक्कुम्दिङ् निङ्वाॽ, इःत्छिङ्साम् नु वरःङ्ङोबा ये़ःङ्घा यारिक्के निःत्मे़न्दे़त् खासिङ्निःप्मा ने़हिनिङ्वाॽ पिरु॥ 30 नाङ्गे़न् पिसाङ्बा के़रे़क् मनाहाॽ हे़क्क्याङ् मिस्र लाजेॽबा के़रे़क् मनाहाॽनुःल्ले़ सोलोमने़न् साॽरिक् सिक्कुम्साबा चोगे़॥ 31 खुने़ॽ वेॽ के़रे़क् मनाहाॽनुःल्ले़ सिक्कुम्साबा चोगे़—एतान, एज्रि नु माहोलरे़ कुस्सा हेमान, कलकोल हे़क्क्याङ् दर्दाःन्नुःल्ले़आङ् खुने़ॽ साॽरिक् सिक्कुम्साबा चोगे़॥ हे़क्क्याङ् खुने़ॽ कुमिङ्ङिन् कब्रिङ् पिसाङ्बा के़रे़क् मे़न्छाम् सुवाङ्हाॽरे़ खुन्छिॽ लुम्मो इङे़॥ 32 खुने़ॽ हे़न्छिङ् सुम्सि खाहुन्हाॽ साप्तु हे़क्क्याङ् खुने़ॽ कुसाम्लोहाॽरे़ खानिःत्तिन् हे़न्छिङ् थिक्काङ् किप् ङासि वये़॥ 33 खुने़ॽ थाबु सिङ्सेॽहाॽरे़ कुयाःम्बेओ, ले़बनानबा साम्माङ्सिङ्हाॽ हे़क्क्याङ् खे़न्नु सोसोरिक् थुप्थाॽओ के़लिङ्बा हिसप याःन्हाॽरे़ कुयाःम्बेओ थारिक् पोधक् चोगु॥ खुने़ॽ थक्साहाॽ, पुसाहाॽ, के़उःङ्सिङ्बा के़सःन्छिङ्बा थक्साहाॽ नु ङाहाॽरे़ कुयाःम्बेओआङ् हुॽरुसि॥ 34 सोलोमनरे़ कुसिक्कुम्दिङ् निङ्वाःल्ले़ कुयाःम्बेओ निङ्वाॽ के़घोबा इक्सादिङ् खाम्बेःक्कोबा के़रे़क् हाङ्हाॽलाम् मे़बाङ्घुसिबा के़रे़क् मे़न्छाम् सुवाङ्हाॽ खुने़ॽ कुसिक्कुम्दिङ् निङ्वाॽ खे़म्से़ खुने़ॽओ मे़द्ये़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.