१ हाङ् 22 - लिम्बुमिकायाःल्ले़ आहाबे़न् पाःन्मे़त्तु ( २ साप्मु १८:२-२७ ) 1 तङ्बे सुम्सि थारिक् अराम नु इस्राइल लुम्मो थङ् मे़बोःक्खे़न्॥ 2 कर सुम्सिगेक्पा तङ्बेओ यहुदाबा हाङ् यहोसापाते़न् इस्राइलबा हाङ् आहाबरे़ कुदुम्से़ यो ये़॥ 3 इस्राइलबा हाङ् आहाबरे़ कुसुहाङ्युक्पाहाॽ अक्खे मे़त्तुसिआङ् वये़, “रामोत-गिलादे़न् आनिॽइन् फाॽआङ् थे खिनिॽ के़न्निसुम्मिन्बि? हे़क्केसाङ् अरामबा हाङ्ङिन्लाम् खे़न् नुःक्मारे़ लागि आनिॽ थेआङ् आन्जोगुम्मिन्बि?” 4 कल्ले़चोगुल्ले़ खुने़ॽ यहोसापाते़न् सेःन्दोसु, “रामोद-गिलादरे़ कुदक्ले़ङ्वाओ थङ् चोःक्से़ थे आदाङ्बा आङ्गाॽनु के़बेःक्पि?” यहोसापातरे़ इस्राइलबा हाङ्ङिन् मे़त्तु, “आङ्गाॽ आदाङ्बा हे़क्तङ्बाएआ, आङ्गाॽ आमनाहाॽ आदाङ्बारे़ के़मनाहाॽ हे़क्तङ्बासि, आङ्गाॽ आअन्हाॽ आदाङ्बारे़ए के़अन्हाॽ हे़क्तङ्बासि॥” 5 कर यहोसापातरे़ इस्राइलबा हाङ्ङिन् अक्खेआङ् मे़त्तु, “तगि यहवे दाङ्बे़न् सुजा नाःक्ते़ॽ॥” 6 कल्ले़चोगुल्ले़ इस्राइलबा हाङ् आहाबरे़ किप् लिसि यारिक् माङ्निङ्वाॽपान् के़बाःप्पाहाॽ सुप्सुसिआङ् खे़ङ्हाॽ सेःन्दोसुसि, “आङ्गाॽ रामोत-गिलादरे़ कुदक्ले़ङ्वाओ थङ् चोःक्से़ पेःक्काबि मे़बेःक्कान्बि?” खे़ङ्हाॽरे़ खुने़ॽ मे़मे़त्तु, “पेगे़ॽ, थेआङ्भे़ल्ले़ यहवे दाङ्बे़ल्ले़ हाङ्ङिन् खे़न् हुक्सुप्तुॽ॥” 7 कर यहोसापातरे़ सेःन्दोसुसि, “थे यहवे दाङ्बे़ल्ले़ कुमाङ्निङ्वाॽपान् के़बाःप्पा कप्मो हाःत्ताङ् होःप्पि? आनिॽ खे़ङ्हाॽ सेःन्दोमा आसुक्तुम्सिम्ॽ॥” 8 इस्राइलबा हाङ् आहाबरे़ यहोसापाते़न् नुगप् पिरु, “यहवे दाङ्बालाम् सेःन्दोमारे़ लागि मना थिक्क वाॽ, कर आङ्गाॽ खे़न् चिःत्तुङ्ॽ, थेआङ्भे़ल्ले़ खे़ल्ले़ आङ्गाॽ आलागि नुबा माङ्निङ्वाॽपान् मे़बाःत्तुन्ॽ, कर आभे़ल्ले़साङ् ताप्फे़ःम्बारक् पाःत्तु॥ खे़ङ्ग यिम्लारे़ कुस्सा मिकायान्लो॥” यहोसापातरे़ नुगप् पिरु, “हाङ्ङिल्ले़ हे़क्के पाःप्मा मे़नुॽने़न्॥” 9 खे़ब्याङ् इस्राइलबा हाङ्ङिल्ले़ कुसुहाङ्युक्पाहाॽओबा थिक्पा उःत्तुआङ् मे़त्तु, “यिम्लारे़ कुस्सा मिकायान् आल्लो तारे़ॽओ॥” 10 इस्राइलबा हाङ्ङिन् नु यहुदाबा हाङ् यहोसापाते़न् हाङ्जाङ् चाक्खे़सुआङ् सामरियाबा यम्बा लाम्धेःत्तिल्ले़ कुबेसाङ् चाधाम्मादे़न्नो खुन्छिॽ आप्फेक् आप्फेक् हाङ्युङ्नाहाॽओ युङे़गरे़सि, हे़क्क्याङ् के़रे़क् माङ्निङ्वाॽपान् के़बाःप्पाहाॽरे़ग खुन्छिॽ तगि माङ्निङ्वाॽपान् मे़बाःत्तुर मे़यागे़॥ 11 केनानरे़ कुस्सा सिदकियाहःल्ले़ग फे़न्जेॽ ताङ्हाॽ थगुआङ् कत्तु, हे़क्क्याङ् खुने़ॽ अक्खे पाःत्तुआङ् उवा चोगु, “यहवे दाङ्बे़ल्ले़ अक्खे पाःत्तुॽ—‘अरामिहाॽ मे़म्मे़क्ने़न्ल थारिक्के कन् ताङ्हाॽरे़ आदाङ्बारे़ खे़ङ्हाॽ चिधक् चिधक् के़धगुसिॽ॥’” 12 वेॽ के़रे़क् माङ्निङ्वाॽपान् के़बाःप्पाहाॽरे़ हे़क्केलॽरिक्के माङ्निङ्वाॽपान् मे़बाःत्तुर मे़यागे़॥ खे़ङ्हाॽरे़ मे़बाःत्तु, “रामोत-गिलादे़न् थङ्ङो फत्ते़ॽआङ् नाःन्दे़ॽ॥ थेआङ्भे़ल्ले़ यहवे दाङ्बे़ल्ले़ हाङ्ङिन् खे़न् हुक्सुप्तुॽ॥” 13 मिकायान् उःप्मा ताःप्मारे़ लागि के़बेःक्पा इङ्घङ्साबे़ल्ले़ खुने़ॽ मे़त्तु, “ओमे़त्ते़ॽ, माङ्निङ्वाॽपान् के़बाःप्पा वेॽहाॽरे़ग थिक्हुप् मे़बोःक्खे़आङ् हाङ्ङिन् नुॽताबा माङ्निङ्वाॽपान् मे़बाःत्तुर मे़याक्॥ खे़ने़ॽ के़बाःत्तुबा पाःन्जाःक्किन्नाङ् खे़ङ्हाॽरे़ खुन्छिॽ पाःन्जाःक्किन्नुए तङ्ल, नुबा पान् पाःत्ते़ॽओ॥” 14 कर मिकायाःल्ले़ मे़त्तु, “से़क्खाए यहवे दाङ्बे़न् कुहिङ्वे़त् वाॽबा कुइसिक् आङ्गाॽ माङ्हे़क्सिङ्ङाआङ् पाःत्तुङ्ॽ, यहवे दाङ्बे़ल्ले़ आङ्गाॽ च्या मे़त्ता, हाबा खे़न्लक् आङ्गाॽ पाःत्तुङ्ॽ॥” 15 आल्ल खुने़ॽ के़रे़द्ये़ खे़ब्याङ् आहाब हाङ्ङिल्ले़ खुने़ॽ सेःन्लाप्तु, “मिकायाए, रामोत-गिलादरे़ कुदक्ले़ङ्वाओ थङ् चोःक्से़ आनिगे पेगिगे़बि, इ मे़बेगिगे़न्बि?” मिकायाःल्ले़ नुगप् पिरु, “थङ्ङो फत्ते़म्मे़ॽआङ् नाःन्दे़म्मे़ॽ॥ थेआङ्भे़ल्ले़ यहवे दाङ्बे़ल्ले़ हाङ्ङिन् खे़न् हुक्सुप्तुॽ॥” 16 हाङ्ङिल्ले़ खुने़ॽ मे़त्तु, “यहवे दाङ्बे़ल्ले़ कुमिङ्ङो खे़ने़ॽ से़क्खाबा पाःन्लक् मे़त्ताङ्ङे़ॽ, वेॽ पान् मे़बाःत्ते़न्ने़ॽ फाॽआङ् आङ्गाॽ आक्खे़न्ले़ङ् खे़ने़ॽ माङ्हे़क्सिङ्मा पाङ्ने़बे?” 17 खे़ब्याङ् मिकायाःल्ले़ नुगप् पिरु, “आङ्गाॽग के़रे़क् इस्राइलिहाॽ मे़ल्लुक्कम्बा मेःन्नेबा मे़ल्लुक्हाॽ कोःक्माहाॽओ फुत्छिङ्ज्याङ् मे़से़रे़आङ् मे़वये़बा हे़क्के निसुङ्सिङ्, हे़क्क्याङ् यहवे दाङ्बे़ल्ले़ अक्खे पाःत्तु—‘कन् मनाहाॽरे़ खुन्छिॽ दाङ्बा होप्॥ के़रे़क् सनारुङ्ङाङ् हिम्मो मे़बेःक्लरो॥’” 18 इस्राइलबा हाङ् आहाबरे़ यहोसापाते़न् मे़त्तु, “खे़ल्ले़ आङ्गाॽ आलागि ताप्फे़ःम्बारक् पाःत्तुॽ नुबा माङ्निङ्वाॽपान् मे़बाःत्तुन्ॽ फाॽआङ् थे खे़ने़ॽ मे़त्ने़आङ् मे़वये़ने़म्बि?” 19 मिकायाःल्ले़ आल्लसाङ् पाःत्तु, “कल्ले़चोगुल्ले़ यहवे दाङ्बे़ल्ले़ कन् कुबाःन्जाक्किन् खे़प्से़ॽ—यहवे दाङ्बे़न् साङ्ग्राम्पेदाङ्ङोबा के़रे़क् कुधक्सुबाहाॽ चुप्साङ् ले़प्माङ् नु फे़न्छाङ् ले़प्माङ् ये़प्सुसिआङ् खुने़ॽ कुहाङ्युक्नाओ युङे़बा आङ्गाॽ निसुङ्॥ 20 हे़क्क्याङ् यहवे दाङ्बे़ल्ले़ पाःत्तु, ‘रामोत-गिलादे़न् थङ्ङो फप्माआङ् खे़प्मो सिमारे़ लागि हाःत्ले़ आहाबे़न् हुसुबे?’ “थिक्ले़ अक्तङ्बा सुजा नु वेॽइल्ले़ वेॽ सुजा पिरु॥ 21 पिप्मिरि कुसोःन्दिओ याम्साम् थिक् तगि त्ये़ हे़क्क्याङ् यहवे दाङ्बे़ल्ले़ कुदगाङ् ये़म्सिङ्ङाङ् अक्खे पाःत्तु, ‘आङ्गाॽ खे़न् हुसुङ्ॽ॥’ 22 “यहवे दाङ्बे़ल्ले़ सेःन्दोसु, ‘आक्खेआङ्बे?’ “खे़ल्ले़ पाःत्तु, ‘आङ्गाॽ पेःक्काआङ् आहाबरे़ के़रे़क् कुमाङ्निङ्वाॽपान् के़बाःप्पाहाॽरे़ खुन्छिॽ मुराओ इङ्ले़क् के़बाःप्पा लत्छा याम्साम् पोङ्ङा॥’ “यहवे दाङ्बे़ल्ले़ मे़त्तु, ‘खुने़ॽ हुमारे़ लागि खे़ने़ॽ कुलिङ्दो के़गे़प्पा के़बोङ्ॽ॥ पेगे़ॽ, पेगे़ॽआङ् हे़क्केए चोगे़ॽ॥’” 23 “कल्ले़चोगुल्ले़ आल्ल यहवे दाङ्बे़ल्ले़ आदाङ्बारे़ कन् के़रे़क् के़माङ्निङ्वाॽपान् के़बाःप्पाहाॽरे़ खुन्छिॽ मुराओ इङ्ले़क् के़बाःप्पा याम्साम् केतु पिरुसिआङ् वाॽ॥ यहवे दाङ्बे़ल्ले़ आदाङ्बारे़ के़मे़क्मे़न् उवा चोगु सुरुआङ् वाॽ॥” 24 खे़ब्याङ् केनानारे़ कुस्सा सिदकियाहःन् थो थाङे़आङ् मिकायाहरे़ कुन्दे़ङ्बे़न् फक्खु पिरु हे़क्क्याङ् खे़न् मे़त्तु, “आल्ल यहवे दाङ्बे़ल्ले़ कुयाम्साम्मिन् आत्तिलाम् पोःक्खे़आङ् आङ्गाॽलाम् खे़ने़ॽनु पाःत्छे़ पेबे?” 25 मिकायाःल्ले़ नुगप् पिरु, “कङ्ग खे़ने़ॽ आप्फेक् सिगाङ्बा याक्फाङ्ङो चिङ्सिङ्से़ के़बेःक्पा ये़न्नो खे़ने़ॽ निङ्वाॽ के़घोसुॽ॥” 26 खे़ब्याङ् इस्राइलबा हाङ्ङिल्ले़ सुहाङ्युक्पा थिक् इङ्जाङ् पिरु, “मिकायान् ते़म्से़ॽ, हे़क्क्याङ् ये़क्यक्कोबा युक्साबा अमोने़न् नु हाङ्सा योआसे़न् हुक्सुप्ते़से़ॽ, 27 हे़क्क्याङ् अक्खे मे़त्ते़से़ॽ, ‘हाङ्ङिल्ले़ अक्खे पाःत्तुॽ—कन् मनान् पुङ्लाहिम्मो साक्ते़से़ॽ हे़क्क्याङ् आङ्गाॽ नुरिक् तारिक् मे़ःन्नुङ् मे़म्भे़न्ने थारिक् खुने़ॽ खरे़ःङ् नु च्वाःत्लक् पिरे़से़ॽ वेॽ थे़माआङ् मे़बिरे़से़न्ने़ॽ॥’” 28 मिकायाःल्ले़ उवा चोगुआङ् मे़त्तु, “खे़ने़ॽ नुरिक् तारिक्काङ् के़नुःङ् के़भे़न्ने़भग्र यहवे दाङ्बे़न् आङ्गाॽलाम् पारे़बा मे़ःन्लत्छ॥” खुने़ॽ आल्लसाङ् योॽरुआङ् पाःत्तु, “के़रे़क् मनाहाॽरे़ आङ्गाॽ आबाःन्नो निङ्वाॽ पिरे़म्मे़ॽओ!” आहाबे़न् मासिङ् ( २ साप्मु १८:२८-३४ ) 29 खे़ब्याङ् इस्राइलबा हाङ् आहाबे़न् यहुदाबा हाङ् यहोसापाते़न् रामोत-गिलादओ थोःक्ने़सि पेसि॥ 30 इस्राइलबा हाङ्ङिल्ले़ यहोसापाते़न् मे़त्तु, “आङ्गाॽ कुसिङ् मे़न्निःप्मनाबा चाङ् चाक्खुङ्ङाङ् थङ्ङो लाःत्ता, कर खे़ने़ॽग हाङ्जाङ्ङे चाक्खे़ॽ॥” हे़क्क्याङ् इस्राइलबा हाङ्ङिन् कुसेःन् निमे़म्दे़प्मनाबा चाङ् चाक्खुआङ् थङ्ङो पे॥ 31 आरामबा हाङ्ङिल्ले़ खुने़ॽ कुअन्लाहाॽओबा सुम्बोङ्ङाङ् ने़त्छि थक्मोबाहाॽ अक्तङ्बा इङ्जाङ् पिरुसिआङ् वये़, “हाङ्हाॽनुरक् थाक्ते़म्मे़ॽ वेॽ चुक्पा यम्बा हाःत्नुआङ् मे़धक्ते़म्मिन्ने़ॽ॥” 32 आल्ल अन्लाधाहाॽओबा थक्मोबाहाॽरे़ यहोसापाते़न् मे़निसुआङ् खुन्छिॽ अक्खे मे़इःत्तु, “से़क्खासाङ् कन्ने इस्राइलबा हाङ्लो॥” खे़ङ्हाॽ खुने़ॽ फप्मारे़ लागि हिल्लिक् मे़हिसिङ्, कर आल्ल यहोसापाते़न् यम्बा इक्लाओ अःक्ते़, 33 खे़ब्याङ् खे़न् अन्लाधाहाॽओबा थक्मोबाहाॽरे़ खुने़ॽग इस्राइलबा हाङ् मे़ःन्लत्छ फाॽआङ् मे़निसु, हे़क्क्याङ् खे़ङ्हाॽरे़ खुने़ॽ नाःप्मा मे़नाॽरु॥ 34 कर कुभा थिक्ले़ कुलिन् ले़ॽरुआङ् इमे़न्नि खामे़न्नि तोःङ्ङिन् आबुदेसु, हे़क्क्याङ् खे़न् तोःङ्ङिल्ले़ इस्राइलबा हाङ्ङिन् कुसाःङ्बे से़ःप्जाङ्ङिल्ले़ कुदुम्बेओ याङ्घु॥ हाङ्ङिल्ले़ खुने़ॽ कुअन्लाधा के़लोङ्बे़न् मे़त्तु, “अन्लाधान् हिसे़ॽआङ् आङ्गाॽ थङ्ङोलाम् लाःक्कात् तेॽराङ्ङे़ॽ॥ आङ्गाॽ काःन्दाङ्ङाङ् पत्॥” 35 ले़न्दिक् नाम्धाधा थङ् पोःक्खे़आङ् पत्छे़ हे़क्क्याङ् हाङ्ङिन् कुअन्लाधाओ तक्सिङ्ङाङ् अरामिहाॽ तक्मे़त्तुसिआङ् पत्छे़॥ खुने़ॽ काःन्दे़बादे़न्नोलाम् के़लःम्बा माक्खिन् अन्लाधाओनु सिगाङ्ङे वगुसे़र पत्छे़, हे़क्क्याङ् हाबा खे़न् युःन्धो खुने़ॽ स्ये़॥ 36 नाम्ध्ये़र पत्छे़ल्ले़ थक्सुबाहाॽओ अक्तङ्बा इक्ला के़रे़, “के़रे़क् मनाहाॽ खिनिॽ आप्फेक् आप्फेक् पाङ्जुम्हाॽओ नु लाजेॽओ पेगे़म्मे़ॽओ!” 37 कम्भलॽरिक् आहाब हाङ्ङिन् स्ये़, हे़क्क्याङ् खुने़ॽ सामरिया मे़युरुआङ् खे़ङ्हाॽरे़ खुने़ॽ आम्भा खे़प्मो मे़जिक्खु॥ 38 खे़ङ्हाॽरे़ खे़न् अन्लाधान् सामरियाबा लत्छा वरक्को वामे़हप्तु, के़त्निमाहाॽरे़ खे़न् खुन्छिॽ वरुःम्सिङ्मा वाहप्सिङ्मादे़न् ने़स्से़, हे़क्क्याङ् यहवे दाङ्बे़ल्ले़ कुबाःन्जाक्किन् उवा पोःक्खे़बा कुइसिक् ख्याबाहाॽरे़ खुने़ॽ कुमाक्खिन् मे़लागु मे़ज॥ 39 आहाबरे़ कुहाङ्युक् ये़म्मो के़बोङ्बा वेॽ हिन्दोक् पाःन्हाॽ नु खुने़ॽ चोगुबा के़रे़क् याःम्बक्हाॽ, हे़क्क्याङ् खुने़ॽ चोगुबा तक्मिबा केःङ्ङिल्ले़ सुःप्तुआङ् के़घे़म्सिङ्बा चोगुबा हाङ्हिम्मिन् नु खुने़ॽ हाङ्यक्किल्ले़ कप्मा पाङ्घुसिबा ये़क्यक्हाॽ थे खे़न् इस्राइलबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़न्नाङ्बि? 40 आहाबे़न् खुने़ॽ कुसुधे़बा कुदाक्थे़बाहाॽनु तङ्सिङ्से़ पे, हे़क्क्याङ् खे़न् एगाङ् खुने़ॽ कुस्सा अहज्याहन् हाङ् पोःक्खे़रो॥ यहुदाबा हाङ् यहोसापात ( २ साप्मु २०:३१–२१:१ ) 41 इस्राइलबा हाङ् आहाबरे़ हाङ्युक् चोगुबा लिसिगेक्पा तङ्बेओ आसारे़ कुस्सा यहोसापाते़न् यहुदाबा हाङ् पोःक्खे़॥ 42 आल्ल यहोसापाते़न् हाङ् पोःक्खे़ल्ले़ खुने़ॽ सुम्बोङ्ङाङ् ङासि तङ्बे योरे़, हे़क्क्याङ् यरुसले़ःम्मो खुने़ॽ निबोङ्ङाङ् ङासि तङ्बे हाङ्युक् चोगु॥ खुने़ॽ कुम्मारे़ कुमिङ् अजुबा वये़, हे़क्क्याङ् खुने़ॽ सिल्हिरे़ कुस्सा मे़न्छुमा वये़॥ 43 के़रे़क् पाःन्नो यहोसापाते़न् खुने़ॽ कुम्बारे़ कुलाम्मो लाङ्घेगे़, हे़क्क्याङ् खे़न्लाम् चबे़ःत्छिक्काङ् नाहाङ् कत्नाहाङ् मे़लॽरे़न्॥ यहवे दाङ्बे़ल्ले़ कुनिमो आत्तिन् पाःन्निन् नुबा चोगे़ हाबा खे़न्ने खुने़ॽ चोगु॥ हे़क्केसाङ् कोःक्माहाॽओबा से़वा चोःक्मा माङ्धाःन्हाॽ खुने़ॽ मे़घे़त्तुन्, हे़क्क्याङ् मनाहाॽरे़ खे़प्मो आल्लसाङ् सिदुङ्जभा मे़दोन्दुर हे़क्क्याङ् सुक्पा मे़हाःन्दुर मे़वये़॥ 44 यहोसापाते़न् इस्राइलबा हाङ्ङिन्नुआङ् तङे़आङ् वये़॥ 45 यहोसापातरे़ कुहाङ्युक् ये़म्मोबा हिन्दोक् पाःन्हाॽ नु खुने़ॽ चोगुबा थोबो पाःन्हाॽ हे़क्क्याङ् खुने़ॽ कुधक्सुबाहाॽरे़ कुलिङ्दो मे़गे़त्तुबा पाःन्हाॽ थे खे़न् यहुदाबा हाङ्हाॽरे़ खुन्छिॽ साप्मुःन्धुम् साप्पन्नो साप्ते़आङ् मे़बत्ने़ङ्नाङ्बि? 46 खुने़ॽ कुम्बा आसारे़ कुहाङ्युक् ये़म् एगाङ् खे़प्मो आल्लसाङ् के़वाॽबा के़याःक्पा मे़न्छुमारे़ मे़भत्छुसिबा फे़त्के़लाॽबा माङ्धाःन्नोबा ये़म्बित्छाहाॽ खुने़ॽ लःत्तुदेसुसि॥ 47 खे़न् ये़म्मो ए़दोम लाजेॽओ हाःत्ताङ् हाङ् होःप्ते़॥ युक् के़घोबा कुभा कुभाॽबाङ् थिक्ले़ युक् चोगु॥ 48 ओपिरलाम् साम्म्याङ् थाक्मारे़ लागि यहोसापातरे़ के़जाप्पा ले़ङ्हङ्बा वालाधाहाॽ चोगुसि॥ कर एस्योन-गेबेरओ खे़न् वालाधाहाॽ यर्गे़क् वर्गे़क् मे़यरे़बाल्ले़ चोगुल्ले़ खे़ङ्हाॽ वरःङ्ङोए पेःक्मा मे़न्छुक्ते़न्॥ 49 खे़न् ये़म्मो आहाबरे़ कुस्सा अहज्याहःल्ले़ यहोसापाते़न् मे़त्तु, “खे़ने़ॽ के़मनाहाॽनु सोरिक् आङ्गाॽ आमनाहाॽ वालाधाओ मे़बेःक्ल॥” कर यहोसापाते़न् मे़दे़न्दे़न्॥ 50 खे़न् एगाङ् यहोसापाते़न् खुने़ॽ कुसुधे़बा कुदाक्थे़बाहाॽनु तङ्सिङ्से़ पे, हे़क्क्याङ् खुने़ॽ कुम्बा दाउदरे़ कुये़क्यक्को खुन्छिॽनु सोरिक् मे़ने़स्सु॥ हे़क्क्याङ् खुने़ॽ कुस्सा यहोरामे़न् खुने़ॽ कुएगाङ् हाङ् पोःक्खे़रो॥ इस्राइलबा हाङ् अहज्याह 51 यहुदाबा हाङ् यहोसापातरे़ कुहाङ्युक् ये़म् थिबोङ्ङाङ् नुसिगेक्पा तङ्बेओ आहाबरे़ कुस्सा अहज्याहन् सामरियाओ इस्राइलबा हाङ् पोःक्खे़, हे़क्क्याङ् खुने़ॽ इस्राइलओ तङ्बे ने़त्छि हाङ्युक् चोगु॥ 52 खुने़ॽ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ हाबा खे़न्ने चोगु, थेआङ्भे़ल्ले़ खुने़ॽ कुम्बा नु कुम्मा हे़क्क्याङ् इस्राइले़न् लायो चोःक्मा के़बाङ्बा नाबातरे़ कुस्सा यारोबामरे़ कुलाम्मो खुने़ॽ लाङ्घेगे़॥ 53 खुने़ॽ बाल माङ्ङिन् से़वा मे़त्तुआङ् खे़न् माङ्से़वा मे़त्तु, हे़क्क्याङ् खुने़ॽ कुम्बारे़ चोगुबा हे़क्केए यहवे दाङ्बा इस्राइलबा निङ्वाॽफुमाङ्ङिल्ले़ कुसिक् फोःक्खुरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.