१ हाङ् 21 - लिम्बुनाबोतरे़ कुजे़ल्ले़क्सेॽ इक्ताप् 1 कुभा ये़म् एगाङ् यिजरेलि नाबोतरे़ लत्छा कुजे़ल्ले़क्सेॽ इक्ताप्पिल्ले़ कुयाःम्बेओ हिन्दोक् थिक् पोःक्खे़॥ खे़न् चे़ल्ले़क्सेॽ इक्ताप्पिन् यिजरेलओ सामरियाबा हाङ् आहाबरे़ कुहाङ्हिम् पेसाङ् ने़स्से़॥ 2 आहाबरे़ नाबाते़न् मे़त्तु, “खे़ने़ॽ के़जे़ल्ले़क्सेॽ इक्ताप्पिन् आङ्गाॽ नुधिसाक्चिॽ लेःप्मारे़ लागि पिराङ्ङे़ॽ, थेआङ्भे़ल्ले़ खे़न् आङ्गाॽ आहाङ्हिम्मिल्ले़ कुबेसाङ्ङे ने़॥ खे़ल्ले़ कुले़क्वाओ खे़न्नुःल्ले़आङ् नुबा वेॽ चे़ल्ले़क्सेॽ इक्ताप् थिक् आङ्गाॽ खे़ने़ॽ पिने़, इग्र खे़ने़ॽ निङ्वाॽ के़जोगुने़भग्र आक्ख्यारिक् कुमे़ल्लुङ् याङ्घुॽ आङ्गाॽ खे़न् पिने़॥” 3 कर नाबोतरे़ नुगप् पिरु, “यहवे दाङ्बे़ल्ले़ आङ्गाॽ आम्बारे़ कुलक्खोमान् खे़ने़ॽ पिमा मे़म्बोङ्मनाबा चोगुररो॥” 4 कल्ले़चोगुल्ले़ आहाबे़न् सित्छिङ्ङाङ् कुयाःक्ले़ॽरे़र हिम्मो पे, थेआङ्भे़ल्ले़ यिजरेलि नाबोतरे़ अक्खे मे़त्तुआङ् वये़, “आम्बा लाम्बाबा लक्खोमान् आङ्गाॽ खे़ने़ॽ मे़बिने़न्॥” खुने़ॽ कुने़त्नाओ सित्छिङ्ङाङ् हाबा इप्से़आङ् ने़स्से़ हे़क्क्याङ् कुजा चामा मे़दे़न्दे़न्॥ 5 खुने़ॽ कुमेत् इजेबेले़न् त्ये़आङ् सेःन्दोसु, “खे़ने़ॽ थेआङ् अक्खेलॽरिक् के़सित्छिङ्बाबे? खे़ने़ॽ थेआङ् थे़माआङ् के़न्जने़म्बाबे?” 6 खुने़ॽ इजेबेले़न् मे़त्तु, “आङ्गाॽ यिजेरेलि नाबोते़न् मे़त्तुङ्, ‘खे़ने़ॽ के़जे़ल्ले़क्सेॽ इक्ताप्पिन् आङ्गाॽ इङ्मा पिराङ्ङे़ॽ, इग्र खे़ल्ले़ कुले़क्वा खे़ने़ॽ के़सिराॽ के़धाङ्बा वेॽ चे़ल्ले़क्सेॽ इक्ताप् आङ्गाॽ खे़ने़ॽ पिने़॥’ कर खुने़ॽ मे़त्ताङ्, ‘आङ्गाॽ आजे़ल्ले़क्सेॽ इक्ताप्पिन् खे़ने़ॽ मे़बिने़न्॥’” 7 खुने़ॽ कुमेत् इजेबेलरे़ मे़त्तु, “इस्राइलिहाॽओ हाङ् के़बोङ्बा आदाङ्बारे़ अक्खेलॽरिक् याःम्बक् के़जोगुबि? पोगे़ॽआङ् कुजा चे़ॽ थुङे़ॽ हे़क्क्याङ् ये़ये़ लॽरे़ॽ॥ यिजरेलि नाबोतरे़ कुजे़ल्ले़क्सेॽ इक्ताप्पिन् आङ्गाॽ खे़ने़ॽ हिसुङ् पिने़॥” 8 खे़ब्याङ् इजेबेलरे़ आहाबरे़ कुमिङ्ङो सक्इङ्घङ् साप्पेःत्ताहाॽ साप्तु, खे़प्मो हाङ्ङिल्ले़ कुएःप्साप्पिन् युक्तु, हे़क्क्याङ् नाबातरे़ कुये़क्यक्को खुने़ॽनु के़युङ्बा लाम्लोबाहाॽ नु तुम्म्याङ्हाङ्हाॽओ हाङुदेसु॥ 9 कन् सक्इङ्घङ् साप्पेःत्ताहाॽओ खुने़ॽ अक्तङ्बा साप्तु—“तःक्ने़त् युङ्मारे़ लागि खे़ने़ॽ थिक्यान् उवा चोगे़ॽ, हे़क्क्याङ् मनाहाॽरे़ खुन्छिॽ लुम्मो नाबोते़न् मिङ्सो इङ्धाङ्बा युक्नाओ युक्खे़ॽ॥ 10 कर कुसुम् मे़न्दम्मनाबा मना ने़त्छि खुने़ॽ कुदगि युक्खे़से़ॽ हे़क्क्याङ् नाबोतरे़ निङ्वाॽफुमाङ्ङिन् नु हाङ्ङिन् माङ्दे साङ्ग्रा मे़त्तुसिआङ् वाॽ फाॽआङ् तसि पिमा पाङ्घे़से़ॽ॥ खे़न् एगाङ् खुने़ॽ लाःक्कात् लःत्ते़आङ् लुङ्ङिल्ले़ ले़प्ते़से़रे़ॽ॥” 11 खे़ब्याङ् इजेबेलरे़ सक्इङ्घङ् साप्पे़ःप्ताहाॽओ साप्तुआङ् खे़ङ्हाॽ हाक्तुसिबा इङ्जाङ् कुइसिक् नाबोतरे़ कुये़क्यक्को के़युङ्बा लाम्लोबाहाॽ नु तुम्म्याङ्हाॽरे़ मे़जोगु॥ 12 खे़ङ्हाॽरे़ तःक्ने़त् युङ्मा उवा मे़जोगु, हे़क्क्याङ् नाबोते़न् मनाहाॽरे़ खुन्छिॽ लुम्मो मिङ्सो इङ्धाङ् युक्नाओ मे़युक्खु॥ 13 खे़ब्याङ् खे़न् ने़प्फु कुसुम् मे़न्दम्मनाबा मनाहाॽ त्ये़सिआङ् खुने़ॽ कुदोःप्मा युङ्ने़सि, हे़क्क्याङ् निङ्वाॽफुमाङ्ङिन् नु हाङ्ङिन् खुने़ॽ माङ्देसुसिआङ् वाॽ फाॽआङ् मनाहाॽरे़ खुन्छिॽ तगि खे़न् नादुम्दुम्बा आप्तिक् कुःत्ते़सु॥ कल्ले़चोगुल्ले़ खे़ङ्हाॽरे़ नाबोते़न् ये़क्यक् लाःक्कात् मे़लःत्तुआङ् लुङ्ङिल्ले़ मे़ले़प्तु मे़से़रु॥ 14 खे़ब्याङ् खे़ङ्हाॽरे़ कन् इङ्घङ्ङिन् इजेबेले़न् मे़हाक्तु, “नाबोते़न् लुङ्ङिल्ले़ ले़प्मना से़प्मनारो॥” 15 नाबोते़न् लुङ्ङिल्ले़ मे़ले़प्तु मे़से़रु के़लॽबा पाःन्निन् इजेबेलरे़ खे़प्सुनुमे़ःन्ने खुने़ॽ आहाबे़न् मे़त्तु, “पोगे़ॽआङ् यिजरेलि नाबोतरे़ खे़ने़ॽ इङ्मा के़म्बिरे़म्बा चे़ल्ले़क्सेॽ इक्ताप्पिन् मे़त्छिङ्ङे़ॽ॥ खुने़ॽ आल्ल कुहिङ्वे़त् होप्, खुने़ॽ स्ये़॥” 16 आल्ल नाबोते़न् स्ये़ के़लॽबा आहाबरे़ खे़प्सुआङ् खुने़ॽ पोगे़ हे़क्क्याङ् ये़आङ् नाबोतरे़ कुजे़ल्ले़क्सेॽ इक्ताप्पिन् खुने़ॽ मे़त्छिङ्॥ 17 खे़ब्याङ् यहवे दाङ्बे़ल्ले़ कन् कुबाःन्जाक्किन् तिस्बिबा एलियाओ के़रे़— 18 “सामयारियाओ युक् के़जोःक्पा इस्राइलबा आहाब हाङ्ङिल्ले़ कुदुम्से़ खे़ने़ॽ यो पेगे़ॽ॥ नाबोतरे़ कुजे़ल्ले़क्सेॽ इक्ताप्पिन् मे़त्छिङ्मारे़ लागि खुने़ॽ खे़प्मो पेआङ् याक्॥ 19 खे़ने़ॽ खे़न् मे़त्ते़ॽ, ‘यहवे दाङ्बे़ल्ले़ अक्खे पाःत्तुॽ—थे खे़ने़ॽ लत्छा मना के़से़रुआङ् खे़ल्ले़ कुयाङ्साकुन्धेन् हुक्काप् के़जोगुआङ् मे़वाॽने़म्बि?’ खे़ब्याङ् खे़न् मे़त्ते़ॽ, ‘यहवे दाङ्बे़ल्ले़ अक्खे पाःत्तुॽ—नाबोतरे़ कुमाक्खिन् कोःत्चोहाॽरे़ मे़लागुबादे़न्नोए खे़ने़ॽआङ् के़माक्खिन् ख्याबाहाॽरे़ मे़लागु, ओवा, के़माक्खिन्ने मे़लागुरो!’” 20 आहाबरे़ एलियान् मे़त्तु, “आनिङ्मिए, खे़ने़ॽ आङ्गाॽ के़दुम्माङ्ङाङ् वाॽबि?” एलियारे़ मे़त्तु, “ओवा, आङ्गाॽ खे़ने़ॽ तुम्ने़आङ् वाॽ, थेआङ्भे़ल्ले़ खे़ने़ॽ यहवे दाङ्बे़ल्ले़ कुनिमो आत्तिन् पाःन्निन् ताप्फे़ःम्बा चोगे़ खे़न् चोःक्मारे़ लागि आप्फेक् के़सङ्सिङ्॥ 21 कल्ले़चोगुल्ले़ यहवे दाङ्बे़ल्ले़ अक्खे पाःत्तुॽ, ‘आल्ल आङ्गाॽ खे़ने़ॽ के़सम्धाङ् मे़क्मासिमे़न् तारुङ्ॽ॥ आङ्गाॽ खे़ने़ॽ के़धिन्दाङ् सायोबोराहाॽ खाप्पुथ्यःङ् मे़क्खुङ्सिङ्ॽ हे़क्क्याङ् इस्राइलओ आहाबरे़ कुहिम्सयङ्ङोबा ये़म्बित्छाहाॽ योःग्बासाङ्, योग्बा मेःन्छाङ् के़रे़क् मे़क्खुङ्सिङ्ॽ॥ 22 खे़ने़ॽ आङ्गाॽ आसिक् के़भोःक्खुबा नु इस्राइले़न् लायो चोःक्मा के़बाङ्घुबाल्ले़ चोगुल्ले़ नाबातरे़ कुस्सा यारोबामे़न् नु अहियाहरे़ कुस्सा बासान कुइसिक् आङ्गाॽ खे़ने़ॽ के़हिम्सयङ्हाॽ मे़त्तुङ्सिङ्ॽ॥’ 23 “हे़क्क्याङ् इजेबेलरे़ कुयाःम्बेओ यहवे दाङ्बे़ल्ले़ पाःत्तुॽ—‘यिजरेलबा लुङ्धाक्किल्ले़ कुयाओ इजेबेले़न् कोःत्चोहाॽरे़ मे़जरो॥’ 24 “आहाबरे़ कुहिम्सयङ्हाॽरे़ खुन्छिॽ ये़क्यक्को के़सिबाहाॽग कोःत्चोहाॽरे़ मे़जसिॽ, हे़क्क्याङ् ताम्भुङ्ङो के़सिबाहाॽ ताङ्साङ्बोबा पुहाॽरे़ मे़जसिरो॥” 25 (आहाबे़न् कुमेत् इजेबेलरे़ हुसुबाल्ले़ चोगुल्ले़ यहवे दाङ्बे़ल्ले़ कुनिमो फे़न्याःम्बक् चोःक्मारे़ लागि आप्फेक् के़सङ्सिङ्बा खुने़ॽ हे़क्तङ्बा आत्तिन् मनाःन्नाङ् आप्फाल्ले़आङ् मे़बोःक्खे़न्॥ 26 नावाइत्लाहाॽ मे़दिम्दुसिआङ् यहवे दाङ्बे़ल्ले़ इस्राइललाम् नाःत्तुदेसुसिबा एमोरिहाॽ कुइसिक् आहाबरे़ के़रे़क्नुःल्ले़ याम्गे़सिङ्बा याःम्बक् चोगु॥) 27 आल्ल आहाबरे़ कन् पाःन्हाॽ खे़प्सुआङ् खुने़ॽ कुजाङ्ङिन् थे़ःक्खु, खे़ब्याङ् सागिदेःत् चाक्सिङ्ङाङ् तःक्ने़त् युङे़॥ खुने़ॽ सागिदेःत् चाक्खुआङ्ङे इप्से़, हे़क्क्याङ् नःम्नःम्बा पोःक्खे़आङ् लाङ्घेगे़॥ 28 खे़ब्याङ् यहवे दाङ्बे़ल्ले़ कन् कुबाःन्जाक्किन् तिस्बिबा एलियाओ के़रे़— 29 “आङ्गाॽ आदगि आहाबे़न् नःम्नःम्बा चोःक्सिङ्बान् थे खे़ने़ॽ निङ्वाॽ के़घोसुबि? खुने़ॽ आप्फेक् नःम्नःम्बा चोःक्सिङ्बाल्ले़ चोगुल्ले़ आङ्गाॽ खुने़ॽ कुये़म्मो मे़क्मासिमा मे़दाःत्तान्, कर खुने़ॽ कुस्साःल्ले़ कुये़म्मो खुने़ॽ कुहिम्सयङ्ङो खे़न् मे़क्मासिमे़न् तारुङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.