१ साप्मुःन्धुम् 29 - लिम्बुमाङ्हिम् चोःक्से़ मे़दारुबा हुक्वा कुभाॽहाॽ 1 खे़न् एगाङ् दाउद हाङ्ङिल्ले़ के़रे़क् सङ्जुम्भोबा मनाहाॽ मे़त्तुसि, “चुःक्पा सेःप्मा के़वाॽबा आङ्गाॽ आस्सा सोलोमने़न्ने निङ्वाॽफुमाङ्ङिल्ले़ सेगुआङ् वाॽ॥ कन् याःम्बक्किन् पयम् यम्बा चोक्, थेआङ्भे़ल्ले़ कन् हिम्मिङ्ग मनाहाॽरे़ खुन्छिॽ लागि मेःन् कर यहवे दाङ्बा निङ्वाॽफुमाङ्ङिल्ले़ कुलागिरो॥ 2 आङ्गाॽ आसुक्सुक् थारिक् आनिङ्वाॽफुमाङ्ङिल्ले़ कुहिम्मिल्ले़ लागि साम्म्याङ् याःम्बक्ले़ लागि साम्म्याङ्, युप्पा याःम्बक्ले़ लागि युप्पा, कासाःल्ले़ लागि कासा, फे़न्जेल्ले़ लागि फे़न्जेॽ, सिङ्ले़ लागि सिङ्, हे़क्क्याङ् हिम्ले़ लागि मुधिङ्लुङ्, हिःक्कोःम्कोःम्बा मुधिङ्, साॽरिक् यरिक् लुङ्हाॽ नु के़रे़क् परिक्पा कुमे़न् के़घिःक्पा लुङ्हाॽ नु माङ्लुङ्हाॽ वे़त्ते़सरे़ लुप्सुङ्ङाङ् ने़रो॥ 3 खे़न्नुःल्ले़ वेॽ आङ्गाॽ आनिङ्वाॽफुमाङ्ङिल्ले़ कुहिम्मिन् आसिराॽथाङे़बाल्ले़ चोगुल्ले़ आनिङ्वाॽफुमाङ्ङिल्ले़ कुहिम्मिल्ले़ लागि आङ्गाॽ आप्फेक् आधाःङ्ङोलाम् साम्म्याङ् नु युप्पा लःत्तुङ्ल पत्ता॥ कङ्ग सेसे माङ्हिम्मे़ल्ले़ लागि आङ्गाॽ फुक्खुङ्बा के़रे़क् चिगक्वा सामाहाॽनुःल्ले़ वेॽ पाःन्लो॥ 4 हे़न्छिङ् सुम्सि तेलेन्त साम्म्याङ् (ओपिरबा साम्म्याङ्) नु माङ्हिम्मोबा लुङ्धाक्किन् पम्मारे़ लागि हे़न्छिङ् नुसि तेलेन्त युप्पा इसेःङ्, 5 साम्म्याङ् याःम्बक्ले़ लागि नु युप्पा याःम्बक्ले़ लागि हे़क्क्याङ् कुहुक्वा के़नुॽबा चोबेगुहाॽरे़ चोःक्मा के़बोङ्बा के़रे़क् याःम्बक्ले़ लागि पिरुङ्सिङ्ल पत्ता॥ आल्ल आइन् यहवे दाङ्बाओ हुक्वाहाॽ तोःम्मारे़ लागि आत्तिन्हाॽ यारिप् मे़वाॽबे?” 6 खे़ब्याङ् हिम्सयङ् हिम्सयङ्बा लाम्लोबाहाॽ, इस्राइल थाःक्कोबा सुहाङ्युक्पाहाॽ, हे़न्छिङ् नु किप् थिक्कोबा थक्मोबाहाॽ नु हाङ्ङिल्ले़ कुयाःम्बक्कोबा लक्पे़न्नो के़वाॽबा सुहाङ्युक्पाहाॽरे़ आप्फेक् निङ्वाॽओलाम् मे़दोन्दु॥ 7 यहवे दाङ्बे़ल्ले़ कुहिम् चोःक्मारे़ लागि हे़न्छिङ् ङासि तालेन्त नु १०,००० साम्म्याङ् दारिक हे़क्क्याङ् ५,००० तालेन्त युप्पा, १८,००० कासा तालेन्त नु १,००,००० फे़न्जेॽ तालेन्त मे़लःत्तु॥ 8 खे़न्नुःल्ले़ वेॽ आत्तिन् आत्तिन्हाॽरे़ कुमे़न् के़घिःक्पा इमे़ल्लुङ्बा मुधिङ्लुङ्हाॽ मे़गत्तु, खे़ङ्हाॽरे़ खे़न् गेर्सोनि यहिएलरे़ कुलक्पे़न्नो यहवे दाङ्बे़ल्ले़ कुहिम्मोबा चाधाःङ्ङिल्ले़ लागि मे़बिरुसिरो॥ 9 मनाहाॽरे़ खुन्छिॽ लाम्लोबाहाॽरे़ कम्भलॽरिक् आप्फेक् निङ्वाॽओलाम् मे़बिरुसिबा पाःन्नो निङ्वाॽ ये़ये़ लॽरिक् मे़सःत्ते़, थेआङ्भे़ल्ले़ खे़ङ्हाॽरे़ खुन्छिॽ आप्फेक् निङ्वाॽओलाम् नु के़रे़क् सिक्लुङ्माल्ले़ माङ्से़वानु सोसोरिक् आप्फेक् खे़न् पाःन्हाॽ मे़बिरुसिआङ् वये़॥ दाउद हाङ्ङिन्नाङ् साॽरिक् कुनिङ्वाॽ त्ये़॥ दाउदे़ल्ले़ निङ्वाॽफुमाङ्ङिल्ले़ कुनारा फोसुॽ 10 दाउदरे़ के़रे़क् सङ्जुम्भोबा मनाहाॽरे़ खुन्छिॽ तगि अक्खे पाःत्तुआङ् यहवे दाङ्बे़ल्ले़ कुनारा फोसुरो— “यहवे दाङ्बा आनिगे सुधे़बा ताक्थे़बा इस्राइलरे़ कुनिङ्वाॽफुमाङ्ङे, सदादिङ् सदादिङ् थारिक् के़नारा पोररो॥ 11 यहवे दाङ्बाए, पयम् यम्बा नु मुक्साम्मिन् आदाङ्बारे़न्नेरो, मिमिदिङ् नु हाङ्वा माङ्वान् आदाङ्बारे़न्नेरो, साङ्ग्राम्पेदाङ् नु इक्सादिङ् खाम्बेःक्मो के़वाॽबा के़रे़क् पाःन्हाॽ आदाङ्बारे़न्नेरो॥ हाङ्जुम्मिन्नाङ् आदाङ्बारे़न्नेरो, यहवे दाङ्बाए, के़रे़क् पाःन्हाॽ सम्धाङ् के़युङ्बा आदाङ्बा हाङ्ने़रो॥ 12 याङ्साकुन्धे नु मिङ्सो इङ्धाङ् आदाङ्बा लाम्मे तारो, आदाङ्बाए के़रे़क् सम्धाङ् युक् के़जोःक्लो, मुक्कुम् नु मुक्साम् आदाङ्बारे़ए के़हुक्को वाॽरो, आत्तिन्हाॽसाङ् थाःङ् फोङ्मासि नु मुक्साम् पिमासि के़हुक्को वाॽरो॥ आत्तिन्हाॽसाङ् थाःङ् चोःक्मासि नु के़धुम्बा चोःक्मा के़सुक्तुसिरो॥ 13 आल्ल आनिगे निङ्वाॽफुमाङ्ङे, आनिगे नुगे़न् पिआसिगे़रो, हे़क्क्याङ् आदाङ्बारे़ के़मिमिदिङ्गे़न् मिङ्ङो के़नारा फोसुम्बे़रो॥ 14 “कर आङ्गाॽ हाःत्ताबे, हे़क्क्याङ् आङ्गाॽ आमनाहाॽ हाःत्छिआङ् आनिगे हे़क्केलॽरिक् आप्फेक् निङ्वाॽओलाम् कम्भलॽरिक् पिमा सुक्तुम्सिम्बे़बे? के़रे़क् पाःन्हाॽ खे़ने़ॽ लाम्बाए तारो, हे़क्क्याङ् आदाङ्बारे़ के़हुक्कोलाम् के़दाबन्लक् आनिगे पिआसिगे़रो॥ 15 आनिगे सुधे़बा थाःक्थे़बाहाॽ हे़क्केए आनिगे़ग आदाङ्बारे़ के़निमो वेॽ लाजेॽबा नु वे़प्मिबासिगे़॥ आनिगे ये़न्निन् कन् इक्सादिङ् खाम्बेःक्मो साम्मिःक्खुङ्बा हे़क्तङ्बारक् चोक् हे़क्क्याङ् आनिगे लागि निङ्साङ् चोःक्मालाम् होप्॥ 16 यहवे दाङ्बा आनिगे निङ्वाॽफुमाङ्ङे, आदाङ्बारे़ के़सेसे मिङ्ङिल्ले़न् इङ्धाङ्ले़ लागि हिम् चोःक्से़ आनिगे फुक्खुम्बे़आङ् के़युङ्बा कन् के़रे़क् याङ्साकुन्धेहाॽ आदाङ्बारे़ के़हुक् लाम्बाए तारो, हे़क्क्याङ् कन्हाॽ के़रे़क् आदाङ्बारे़न्नेरो॥ 17 आङ्गाॽ आनिङ्वाॽफुमाङ्ङे, आदाङ्बारे़ सिक्कुम् निङ्वाॽ के़साॽरु फाॽआङ् आङ्गाॽ निसुङ्ॽ, हे़क्क्याङ् कुदोःप्मा निङ्वाॽ के़गप्पालाम् आदाङ्बारे़ के़निङ्वाॽ तारो॥ से़क्खाबा निङ्वाःल्ले़ आङ्गाॽ आप्फेक् आनिङ्वाॽओलाम् कन् के़रे़क् हुक्वाहाॽ आङ्गाॽ आसिक्लुङ्मोलाम् आदाङ्बारे़ॽओ तोःन्दुङ्ङाङ् वाॽ॥ हे़क्क्याङ् आल्ल कप्मो के़वाॽबा आदाङ्बारे़ के़मनाहाॽरे़ खुन्छिॽ आप्फेक् निङ्वाॽओलाम् हुक्वा मे़दोन्दुबा निसुङ्ङिल्ले़ आङ्गाॽ आनिङ्वाॽओ सःत्तारो॥ 18 आनिगे सुधे़बा ताक्थे़बा अब्राहाम, इसहाक नु इस्राइलबा यहवे दाङ्बा निङ्वाॽफुमाङ्ङे, आदाङ्बारे़ के़मनाहाॽरे़ खुन्छिॽ कन् माङ्से़वा याःम्बक्किन् सदादिङ्ले़ लागि चक्मे़ल्लॽए पोङ्ङाङ् पत्ल चोगे़ॽ, खम्भ्याङ् खे़ङ्हाॽरे़ खुन्छिॽ निङ्वान् आदाङ्बा ले़प्माङ् पत्ल चोगे़ॽओ॥ 19 आङ्गाॽ आस्सा सोलोमनरे़ आदाङ्बारे़ के़इङ्जाङ्हाॽ, आदाङ्बारे़ के़साम्यो थिम्हाॽ नु आदाङ्बारे़ के़धिम्हाॽ से़वा चोःक्नु इःप्मा नाःप्मारे़ लागि यम्बा निङ्वाॽ पिरे़ॽओ हे़क्क्याङ् खुने़ॽ खे़न् थिम्हाॽ के़रे़क् के़प्मा सुक्तुररो, हे़क्क्याङ् खुने़ॽ खे़न् हिम्मिन् चोःक्मा सुक्तुररो, खे़ल्ले़ लागि आङ्गाॽ यारिप् चोगुङ्ङाङ् वाॽरो॥” 20 खे़ब्याङ् के़रे़क् सङ्जुम्भोबा मनाहाॽ ले़प्माङ् हिसिङ्ङाङ् दाउदरे़ मे़त्तुसि, “आल्ल यहवे दाङ्बा खिनिॽ निङ्वाॽफुमाङ्ङिल्ले़ कुनारा फोसे़म्मे़ॽओ॥” कल्ले़चोगुल्ले़ के़रे़क् सङ्जुम्भोहाॽरे़ खुन्छिॽ सुधे़बा ताक्थे़बाहाॽरे़न् निङ्वाॽफुमाङ्ङिन् कुनारा मे़भोसु॥ खे़ङ्हाॽ यहवे दाङ्बान् नु हाङ्ङिल्ले़ कुदगि साबन् हप्पे़त् मे़भन्छिङ्ङाङ् से़वा मे़जोगे़रो॥ सोलोमने़न् हाङ्चोःक्मा मे़दे़न् 21 कुदाःन्दिक्मा खे़ङ्हाॽरे़ यहवे दाङ्बे़ल्ले़ कुलागि सिदुङ्जभा मे़दोन्दु, हे़क्क्याङ् खुने़ॽओ मिधिङ्मनादेमनाबा वयागे़न् सिदुङ्जभा मे़दोन्दुआङ् १,००० से़गम्बा पित्, १,००० थुःम्बा, १,००० कुम्बाबा मे़ल्लुक्, हे़क्क्याङ् खे़न्नु सोसोरिक् चोःक्मा के़बोङ्बा चे़ल्ले़क्सेॽ सेजःङ्वा सिदुङ्जभानु सोरिक् के़रे़क् इस्राइलरे़ लागि वेॽ यरिक् सिदुङ्जभाहाॽ मे़दोन्दु॥ 22 कम्भलॽरिक् साॽरिक् निङ्वाॽ सःप्मानु सोरिक् यहवे दाङ्बे़ल्ले़ कुदगि खे़ङ्हाॽरे़ खे़ल्ले़ याःन्दिक् कुजा मे़ज मे़धुङु॥ खे़न् एगाङ् खे़ङ्हाॽरे़ याम्मो दाउदरे़ कुस्सा सोलोमने़न् हाङ्चोःक्मा मे़दे़न्दे़, हे़क्क्याङ् यहवे दाङ्बे़ल्ले़ कुदगि खुने़ॽ हाङ् माङ्थोःक्ना मे़जोगु हे़क्क्याङ् सादोके़न् निङ्वाॽफुसाम्बा माङ्थोःक्ना मे़जोगु॥ 23 कम्भलॽरिक् सोलोमने़न् खुने़ॽ कुम्बा दाउदरे़ कुले़क्वा यहवे दाङ्बे़ल्ले़ कुहाङ्युक्नाओ हाङ् पोःक्खे़आङ् युङ्सिङ्॥ खुने़ॽ नुरे़ तासे़ हे़क्क्याङ् के़रे़क् इस्राइलिहाॽरे़ खुने़ॽ कुइङ्जाङ्हाॽ मे़इःत्तु मे़नाःत्तु॥ 24 के़रे़क् सुहाङ्युक्पाहाॽ नु थक्लिहाङ्हाॽ हे़क्क्याङ् दाउद हाङ्ङिल्ले़ के़रे़क् कुस्साहाॽरे़आङ् सोलोमन हाङ्ङिन् ले़प्माङ् खुन्छिॽ हाङ्से़वा चोःक्मा पाःन्निन् माङ्हुप् मे़जोगु॥ 25 के़रे़क् इस्राइलिहाॽरे़ खुन्छिॽ मिक्साओ यहवे दाङ्बे़ल्ले़ सोलोमने़न् साॽरिक् थोधोक्पा चोगु, हे़क्क्याङ् इस्राइलओ आत्तिन् हाङ्ङिन्नाङ् मे़म्बिए के़वाॽबा हाङ्वा माङ्वान् खुने़ॽ सोलोमने़न् पिरुरो॥ दाउदरे़ हाङ्युक् चोगुबा कुनुप्मा पाःन्हाॽ 26 यिसैरे़ कुस्सा दाउदे़ल्ले़ काक् इस्राइलओ हाङ्युक् चोगुआङ् ने़स्से़, हे़क्क्याङ् खुने़ॽ इस्राइलओ लिबोङ् तङ्बे हाङ्युक् चोगु॥ 27 हेब्रोनओ तङ्बे नुसि नु यरुसले़ःम्मो सुम्बोङ्ङाङ् सुम्सि तङ्बे थारिक् खुने़ॽ हाङ्युक् चोगु॥ 28 खुने़ॽ यरिक् तङ्बे थारिक् हिङे़ हे़क्क्याङ् खुने़ॽ याङ्साकुन्धे नु मिङ्सो थाःङ्सोरे़ काप्तुआङ् काप्पोबा तुम्से़आङ् मासिङ्॥ खुने़ॽ कुएगाङ् कुस्सा सोलोमने़न् हाङ् पोःक्खे़॥ 29 दाउद हाङ्ङिल्ले़ कुसाप्मुःन्धुम्मिन् कुहेःक्सिङ्माआङ्धो कुनुप्मा थारिक् माङ्निङ्वाॽपान् के़बाःप्पा सामुए़लरे़ कुसाप्पन्नो, माङ्निङ्वाॽपान् के़बाःप्पा नातानरे़ कुसाप्पन्नो नु खागे़इक्पा गादरे़ कुसाप्पन्नो साप्ते़आङ् पत्॥ 30 खे़न् साप्ते़आङ् के़बप्पा पाःन्हाॽओ खुने़ॽ आक्खेलॽरिक् हाङ्युक् चोगु, खुने़ॽ आक्ख्यारिक् मुक्साम्साबा चोगे़ हे़क्क्याङ् खुने़ॽ नु इस्राइलि सुवाङ्हाॽ हे़क्क्याङ् के़रे़क् पिसाङ्बा हाङ्जुम्हाॽनु थे़मा थे़मा हिन्दोक्हाॽ पोःक्खे़आङ् वये़, खे़ङ्हाॽ के़रे़क् पोधक् पोःक्खे़आङ् पत्लो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.