१ साप्मुःन्धुम् 28 - लिम्बुदाउदरे़ माङ्हिम् चोःक्मा इङ्जाङ् पिरुसि 1 दाउदरे़ यरुले़ःम्मो इस्राइलबा के़रे़क् सुहाङ्युक्पाहाॽ, थाःक्हाॽओबा सुहाङ्युक्पाहाॽ, हाङ्ङिल्ले़ कुयाःम्बक्को के़भाॽबा कुलुप् कुलुप्पोबा थक्मोबाहाॽ, हे़न्छिङ् नु किप् थिक्कोबा थक्मोबाहाॽ, हे़क्क्याङ् हाङ्ङिन् नु खुने़ॽ कुस्साहाॽरे़न् के़रे़क् याङ्साकुन्धे नु पित्हाॽ ओमे़प्मा लक्पे़न् सुहाङ्युक्पाहाॽ, हाङ्हिम्मोबा सुहाङ्युक्पाहाॽ, के़दम्मा सुम्बोधासाबा ये़म्बित्छाहाॽ नु के़रे़क् मुक्के़गुबा के़दम्बा के़दम्बा थक्लिहाङ्हाॽ सुप्सुसि॥ 2 खे़ब्याङ् दाउद हाङ्ङिन् थःप्पे़त् ये़म्सिङ्ङाङ् मे़त्तुसि, “आम्भुॽ आन्साॽ नु आमनासे, आङ्गाॽ आबाःन्निन् खे़प्से़म्मे़ॽओ॥ यहवे दाङ्बे़ल्ले़ कुमाङ्हुप् सन्दोक्किल्ले़ लागि लत्छा नाःम्सिङ्मादे़न्, आनिॽ निङ्वाॽफुमाङ्ङिल्ले़ कुलाङ् तोॽभेःत्ते़ल्ले़ लागि लत्छा हिम् चोःक्मारे़ लागि आङ्गाॽ आनिङ्वाॽओ इःत्तुङ्ङाङ् वयाङ्, हे़क्क्याङ् आङ्गाॽ खे़न् चोःक्मारे़ लागि यारिप्पाङ् चोगुङ्॥ 3 कर निङ्वाॽफुमाङ्ङिल्ले़ आङ्गाॽ अक्खे मे़त्ताङ्, ‘आङ्गाॽ आमिङ्ले़ लागि खे़ने़ॽ हिम् के़न्जोगुन्ॽ, थेआङ्भे़ल्ले़ खे़ने़ॽ थङ् के़जोःक्पा मनाने़, हे़क्क्याङ् खे़ने़ॽ माक्खिसिवा के़से़सुआङ् वाॽ॥’ 4 “हे़क्केसाङ् यहवे दाङ्बा इस्राइलबा निङ्वाॽफुमाङ्ङिल्ले़ आङ्गाॽ आम्बारे़ के़रे़क् कुहिम्सयङ्ङोलाम् आभे़ल्ले़साङ् सदादिङ्ले़ लागि इस्राइलओ हाङ् पोङ्मारे़ लागि आङ्गाॽ सेगाङ्॥ खुने़ॽ लाम्लोबा चोःक्मारे़ लागि यहुदान् सेगु, हे़क्क्याङ् यहुदाःल्ले़ कुहिम्सयङ्लाम् आङ्गाॽ आम्बारे़ कुहिम्सङ्ङिन् सेगु॥ आङ्गाॽ आम्बारे़ कुस्साहाॽओलाम् खुने़ॽ के़रे़क् इस्राइलओ आङ्गाॽए हाङ्चोःक्मा खुने़ॽ नुबा इःत्तु॥ 5 इस्राइलओ युक् चोःक्मारे़ लागि यहवे दाङ्बे़ल्ले़ यरिक् ये़म्बित्छासाहाॽ पिराङ्साङ् इस्राइल सम्धाङ् यहवे दाङ्बे़ल्ले़ कुहाङ्जुम्मोबा हाङ्युक्नाओ युङ्मारे़ लागि खुने़ॽ सोलोमने़न् सेगुआङ् वाॽ॥ 6 खुने़ॽ आङ्गाॽ मे़त्ताङ्, ‘खे़ने़ॽ के़स्सा सोलोमनरे़ए आङ्गाॽ आहिम्मिन् नु आलक्खुम्हाॽ चोगुॽ॥ थेआङ्भे़ल्ले़ आङ्गाॽ खे़न् आस्सा पोङ्मारे़ लागि सेगुङ्ङाङ् वाॽ हे़क्क्याङ् आङ्गाॽ खुने़ॽ कुम्बा पोङ्ङा॥ 7 आल्लो खुने़ॽ इःत्तु नाःत्तुबा कुइसिक् खे़ल्ले़ आङ्गाॽ आइङ्जाङ्हाॽ नु आधिम्हाॽ थधप् मे़ल्लॽए इःत्तु नाःत्तुने़भग्र, आङ्गाॽ खुने़ॽ कुहाङ्जुम्मिन् सदादिङ्ले़ लागि योधो मे़ल्लॽमनाबा चोगुङ्ॽ॥’ 8 “कल्ले़चोगुल्ले़ खिनिॽ कन् नुबा लाजेन् चक्मे़ल्लॽए युक्मा सुक्ते़म्मे़ॽ, हे़क्क्याङ् खे़न् खिनिॽ पानुदिङ् पालाम्बाबा याङ्साकुन्धे कुइसिक् खिनिॽ एगाङ् आभे़ल्ले़साङ् खिनिॽ थिन्दाङ् सायोबोराहाॽ पिमा के़सुक्तुम्सिम्ल फाॽआङ् के़रे़क् इस्राइल नु यहवे दाङ्बे़ल्ले़ कुसङ्जुम्भोबा मनाहाॽरे़ खुन्छिॽ तगि नु आनिॽ निङ्वाॽफुमाङ्ङिल्ले़ खे़प्सुर सिङ्सिङ् ये़क्ये़क्काङ् यहवे दाङ्बा खिनिॽ निङ्वाॽफुमाङ्ङिल्ले़ के़रे़क् कुइङ्जाङ्हाॽ इःत्ते़म् नाःत्ते़म्मे़ॽ फाॽआङ् आङ्गाॽ खिनिॽ के़रे़क् इङ्जाङ् पिनिङ्ॽ॥” 9 “हे़क्क्याङ् खे़ने़ॽ सोलोमन आङ्गाॽ आस्साःल्ले़ग, खे़ने़ॽ के़म्बारे़ कुनिङ्वाॽमाङ्ङिन् आप्फेक् के़निङ्वाॽफुमाङ् इःत्ते़ॽ, हे़क्क्याङ् के़रे़क् के़सिक्कुम् निङ्वाॽ नु के़निङ्वाॽ तामा निङ्वाॽरे़ खुने़ॽ कुमाङ्सेवा चोगे़ॽ॥ थेआङ्भे़ल्ले़ यहवे दाङ्बे़ल्ले़ के़रे़क् सिक्कुम्दिङ् निङ्वाॽहाॽ साॽरुॽ हे़क्क्याङ् मनारे़ के़रे़क् चोःक्मा निङ्वाॽ मे़जोगुबा नु मे़इःत्तुबा चइःत् पाःन्हाॽ निङ्वाॽ खोसुॽ॥ खे़ने़ॽ खुने़ॽ के़गोत्तुने़भग्र खुने़ॽ के़घोसुॽ, कर खुने़ॽ के़ले़रुने़भग्र खुने़ॽ सदादिङ्ले़ लागि खे़ने़ॽ के़नाॽ॥ 10 कल्ले़चोगुल्ले़ निङ्वाॽ हे़त्छिङ्ङे़ॽ, निङ्वाॽफुमाङ्ङिल्ले़ खुने़ॽ कुसेसेदे़न्निल्ले़ लागि लत्छा हिम् चोःक्मारे़ लागि खे़ने़ॽए के़सेगे़आङ् वाॽ॥ थधप् मे़ल्लॽए वये़ॽ, हे़क्क्याङ् खे़न् याःम्बक्किन् चोगे़ॽ॥” 11 खे़ब्याङ् दाउदरे़ कुस्सा सोलोमने़न् माङ्हिम्मोबा आःम्भोॽ नु खे़प्मोबा हिम्हाॽ, थाःङ्हाॽ, थाःङ्समा याक्फाङ्हाॽ, सिगाङ्बा याक्फाङ्हाॽ हे़क्क्याङ् लायोलाम् ले़प्मि नाःक्मादे़न्नो चोःक्मा के़बोङ्बा याःम्बक्हाॽ पिरु॥ 12 याम्साम्मिल्ले़ खुने़ॽ कुनिङ्वाॽओ युक्खुबा कन् के़रे़क् चइःत् पाःन्हाॽ हे़क्के खुने़ॽ यहवे दाङ्बे़ल्ले़ कुहिम्मोबा लक्खुम्हाॽ नु के़रे़क् पिसाङ्बा याक्फाङ्हाॽ, निङ्वाॽफुमाङ्ङिल्ले़ कुहिम्मोबा थाःङ्हाॽ हे़क्क्याङ् मे़दोन्दुबा हुक्वा युङ्दे़न् थाःङ्हाॽरे़ लागि चोःक्मा के़बोङ्बा याःम्बक्हाॽ सोलोमने़न् पिरु॥ 13 निङ्वाॽफुसाम्बाहाॽ नु ले़बिहाॽरे़ खुन्छिॽ सुम्हाॽरे़ लागि हे़क्क्याङ् यहवे दाङ्बे़ल्ले़ कुहिम्मोबा माङ्से़वाओ चोःक्मा के़बोङ्बा के़रे़क् याःम्बक् नु यहवे दाङ्बे़ल्ले़ कुहिम्मो याङ्मनाबा के़रे़क् खप्प्याहाॽरे़ लागि इङ्जाङ्हाॽ खुने़ॽ पिरु॥ 14 वेॽ वेॽ माङ्से़वा याःम्बक्को याङ्मनाबा के़रे़क् साम्म्याङ् खप्प्या सामाहाॽरे़ लागि साम्म्याङ् थाङ्माहाॽ, हे़क्क्याङ् के़रे़क् युप्पा खप्प्या सामाहाॽरे़ लागि युप्पा थाङ्माहाॽ खुने़ॽ निःन्धो चोगु पिरु॥ 15 खुने़ॽ साम्म्याङ् छक्कङ्हाॽ नु खे़ल्ले़ कुहाःम्माहाॽरे़ लागि छक्कङ्हाॽ हे़क्क्याङ् युप्पा सेमियुङ्दे़न् थक्मा याङ्मारे़ लागि चाहा के़जोःक्पा कुइसिक् सेमिहाॽ नु सेमियुङ्दे़न्हाॽ चाहाबा के़जोःक्पा यारिक् निःन्धो चोगु पिरु॥ 16 सिदुङ्जभाओबा खरे़ःङ् थक्मे चप्ते़न्ले़ लागि साम्म्याङ्, हे़क्क्याङ् युप्पा चप्ते़न्हाॽरे़ लागि युप्पा खुने़ॽ निःन्धो चोगु पिरु, 17 खुने़ॽ सुम्जुलिहाॽ, सामाक्खिॽ साङ्मा छे़ःङ्ग्याहाॽ नु फङ्नाहाॽ हे़क्क्याङ् लक्चुहाॽरे़ लागि साम्म्याङ् सामा थप्मे साम्म्याङ्, युप्पा सामा थप्मे युप्पा थाङ्मा खम्भ्याङ् के़रे़क् साम्म्याङ् नु युप्पा सामाहाॽरे़ लागि चाहा के़जोःक्पा साम्म्याङ् युप्पा खुने़ॽ निःन्धो चोगु पिरु॥ 18 सुक्पा हाःम्मा साङ्ते़रे़ःङ्ङिल्ले़ लागिआङ् इसेःङ्बा साम्म्याङ् थाङ्मारे़ लागि खुने़ॽ निःन्धो चोगु पिरु॥ अन्लाधाःल्ले़ लागि, इग्र कुलाप्हाॽ हप्फे़ के़भे़बाआङ् यहवे दाङ्बे़ल्ले़ कुमाङ्हुप् सन्दोक्किन् के़धेःक्पा साम्म्याङ् करुबहाॽरे़ लागिआङ् खुने़ॽ चोःक्मा के़बोङ्बा चइःत् पाःन्हाॽ पिरु॥ 19 दाउदरे़ मे़त्तु, “कन्हाॽ के़रे़क् यहवे दाङ्बे़ल्ले़ए कुहुक्किल्ले़ साप्तुबा चोःक्मा के़बोङ्बा याःम्बक्लो, हे़क्क्याङ् कल्ले़ लागि के़रे़क् चुजुक्सा याःम्बक्हाॽ खुने़ॽ आङ्गाॽ कुसिङ् निःप्मारे़ लागि पिराङ्बारो॥” 20 दाउदरे़ कुस्सा सोलोमने़न् अक्खेआङ् मे़त्तु, “के़धुम्बा नु हाङ्हाङ् के़लॽबा पोःक्खे़ॽ हे़क्क्याङ् कन् याःम्बक्किन् चोगे़ॽ॥ मे़गिसे़न्ने़ॽ हे़क्क्याङ् के़निङ्साङ् मे़बुगे़न्ने़ॽ, थेआङ्भे़ल्ले़ यहवे दाङ्बा निङ्वाॽफुमाङ्, आङ्गाॽ आनिङ्वाॽफुमाङ्ङिन् खे़ने़ॽनु वाॽ॥ यहवे दाङ्बे़ल्ले़ कुहिम्मोबा कुमाङ्सेवा याःम्बक्किल्ले़ लागि के़रे़क् चाहा के़जोःक्पा याःक्बक्हाॽ खे़ने़ॽ मे़न्जोक् मे़न्छुःत्ते थारिक् खुने़ॽ के़न्नाॽने़न् हे़क्क्याङ् लाप्पाङ् के़म्भुने़न्॥ 21 यहवे दाङ्बे़ल्ले़ कुहिम्मोबा के़रे़क् माङ्से़वा याःम्बक् चोःक्मारे़ लागि निङ्वाॽफुसाम्बाहाॽ नु ले़बिबा मनासुम्हाॽ यारिप् मे़वाॽ॥ खे़ने़ॽ के़रे़क् के़याःम्बक्को के़निङ्वाॽ कुइसिक् आत्तिन् याःम्बक्किन्छाङ् चोःक्मारे़ लागि के़रे़क् चोबेगुहाॽलाम् खे़ने़ॽ कुभाॽ के़घोसुॽ॥ हे़क्क्याङ् सुहाङ्युक्पाहाॽ नु के़रे़क् मनाहाॽरे़ खे़ने़ॽ मुरा के़मे़त्तुसिबाओ याःम्बक् मे़गुरो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.