१ साप्मुःन्धुम् 27 - लिम्बुथक्सुबा नु थक्सुबा सुम्हाॽ 1 इस्राइलिहाॽरे़ खुन्छिॽ मिङ्नाःत्—हिम्सयङ् हिम्सयङ्हाॽओबा लाम्लोबाहाॽ हे़क्क्याङ् खुन्छिॽ सुहाङ्युक्पाहाॽनु सोसोरिक्पा हे़न्छिङ् नु किप् थिक्कोबा थक्मोबाहाॽ, इस्राइलि थक्सुबा सुम्हाॽरे़ कुयाःम्बेओ थिबोङ्ङाङ् ने़त्छि लुप्पोबा कुलक् थक्माबा २४,००० मनाहाॽरे़ तङ्बे खाराक् ला थक्मा हाङ्ङिल्ले़ कुलागि पाःल्लोबा याःम्बक् मे़जोगुरो॥ 2 जब्दिएलरे़ कुस्सा यासाबामे़न् थिक्सिगेक्पा लारे़ लागि थिक्सिगेक्पा लक्कोबा लक्पे़न्साबा वये़॥ खुने़ॽ कुलक्को २४,००० मनाहाॽ मे़वये़॥ 3 खुने़ॽ फारेसरे़ कुमुॽइदाङ्सा वये़, हे़क्क्याङ् थिक्सिगेक्पा लारे़ लागि के़रे़क् थक्सुबाहाॽरे़ खुन्छिॽ सुहाङ्युक्पाहाॽओ तुम् लाम्लोबा वये़॥ 4 अहोहि दोदैन् निसिगेक्पा लारे़ लागि खे़न् लक्कोबा लक्पे़न्साबा वये़॥ खुने़ॽ कुलक्कोबा लाम्लोबा मिक्लोते़न् वये़॥ खुने़ॽ कुलक्को २४,००० मनाहाॽ मे़वये़॥ 5 निङ्वाॽफुसाम्बा यहोयादारे़ कुस्सा बनायाहन् सुम्सिगेक्पा लारे़ लागि सुम्सिगेक्पा थक्मोबा वये़॥ हे़क्क्याङ् खुने़ॽ कुलक्को २४,००० मनाहाॽ मे़वये़॥ 6 कङ्ग खे़न् बनायाहःन्ने वये़, खे़न् सुम्बोङ् मुक्के़गुबा मनाहाॽओ खुने़ॽ थिक्पा वये़॥ खुने़ॽ कुस्सा अम्मिजाबादे़न् खे़ल्ले़ कुलक्कोबा लक्पे़न्साबा वये़॥ 7 लिसिगेक्पान्, लिसिगेक्पा लारे़ लागि योआबरे़ कुन्साॽ असाहेले़न् लक्पे़न्साबा वये़॥ खे़न् एगाङ् खुने़ॽ कुस्सा जबदियाहन् वये़॥ खुने़ॽ कुलक्को २४,००० मनाहाॽ मे़वये़॥ 8 ङासिगेक्पान्, ङासिगेक्पा लारे़ लागि यिज्याहि सम्हुते़न् थक्मोबा वये़॥ खुने़ॽ कुलक्को २४,००० मनाहाॽ मे़वये़॥ 9 तुक्सिगेक्पान्, तुक्सिगेक्पा लारे़ लागि तकोबा मना इक्केसरे़ कुस्सा इरान् लक्पे़न्साबा वये़॥ खुने़ॽ कुलक्को २४,००० मनाहाॽ मे़वये़॥ 10 नुसिगेक्पान्, नुसिगेक्पा लारे़ लागि एफ्राइमबा पेलोनि हेलेसे़न् लक्पे़न्साबा वये़॥ खुने़ॽ कुलक्को २४,००० मनाहाॽ मे़वये़॥ 11 ये़त्छिगेक्पान्, ये़त्छिगेक्पा लारे़ लागि जेरहरे़ कुहिम्सयङ्बा हुसाति सिब्बकैन् लक्पे़न्साबा वये़॥ खुने़ॽ कुलक्को २४,००० मनाहाॽ मे़वये़॥ 12 फाङ्सिगेक्पान्, फाङ्सिगेक्पा लारे़ लागि बेन्यामिन अनातोति अबिएजेरे़न् लक्पे़न्साबा वये़॥ खुने़ॽ कुलक्को २४,००० मनाहाॽ मे़वये़॥ 13 थिबोङ्गेक्पान्, थिबोङ्गेक्पा लारे़ लागि जेरहरे़ कुहिम्सयङ्बा नतोपाति महरैन् लक्पे़न्साबा वये़॥ खुने़ॽ कुलक्को २४,००० मनाहाॽ मे़वये़॥ 14 थिबोङ्ङाङ् थिक्सिगेक्पान्, थिबोङ्ङाङ् थिक्सिगेक्पा लारे़ लागि एफ्राइमबा पिरातोनि बनायाहन् लक्पे़न्साबा वये़॥ खुने़ॽ कुलक्को २४,००० मनाहाॽ मे़वये़॥ 15 थिबोङ्ङाङ् निसिगेक्पान्, थिबोङ्ङाङ् निसिगेक्पा लारे़ लागि ओत्निएलरे़ कुहिम्सयङ्बा नतोपाति हेल्दैन् लक्पे़न्साबा वये़॥ खुने़ॽ कुलक्को २४,००० मनाहाॽ मे़वये़रो॥ थाःक्हाॽओबा सुहाङ्युक्पाहाॽ 16 इस्राइलबा सुवाङ्हाॽओबा सुहाङ्युक्पाहाॽ हाबा कन्हाॽए मे़वये़रो— रुबेनरे़ कुधाःक्कोलाम्—जिक्रिरे़ कुस्सा एलिएजरे़न् तुम् सुहाङ्युक्पा वये़॥ सिमियोन थाःक्कोलाम्—माकारे़ कुस्सा सपत्याह, 17 ले़बि थाःक्कोलाम्—कमुएलरे़ कुस्सा हसब्याह, हारुनरे़ कुधाःक्कोलाम्—सादोक, 18 यहुदा थाःक्कोलाम्—दाउदरे़ कुम्भुॽ एलिहु, इस्साखार थाःक्कोलाम्—मिखाएलरे़ कुस्सा ओम्रि, 19 जबुलन थाःक्कोलाम्—ओबदियारे़ कुस्सा यिस्मायाह, नप्तालि थाःक्कोलाम्—अज्रिएलरे़ कुस्सा यरिमोत, 20 एफ्राइम थाःक्कोलाम्—अजज्याहरे़ कुस्सा होसिया, नाम्धा मनस्सेबा कुभ्रे़ःङ् थाःक्कोलाम्—पदायाहरे़ कुस्सा योएल, 21 नाङ्गे़न् मनस्सेबा कुभ्रे़ःङ् थाःक्कोलाम्—जकरियारे़ कुस्सा इद्दो, बेन्यामिन थाःक्कोलाम्—अबनेररे़ कुस्सा यासिएल, 22 दान थाःक्कोलाम्—यरोहामरे़ कुस्सा अज्रेल॥ इस्राइलबा थाःक्हाॽओबा तुम् सुहाङ्युक्पाहाॽ हाबा कन्हाॽए मे़वये़रो॥ 23 दाउदरे़ निबोङ् तङ्बेआङ् योबाहाॽ याम्नाःत्निःत् मे़जोगुसिन्, थेआङ्भे़ल्ले़ यहवे दाङ्बे़ल्ले़ इस्राइलिहाॽ ताङ्साङ्बोबा खेःम्सिक्पाहाॽ कुइसिक् यरिक् चोगुङ्सिङ्ॽ फाॽआङ् माङ्हुप् चोगुआङ् वये़॥ 24 सरुयाहरे़ कुस्सा योआबरे़ ये़म्बित्छाहाॽ याम्नाःत्निःत् चोःक्मा हेःक्तुसिआङ् वये़, कर खुने़ॽ खे़न् याःम्बक्किन् चोःक्मा मे़सुरुन्॥ थेआङ्भे़ल्ले़ इस्राइलओ निङ्वाॽफुमाङ्ङिल्ले़ कुसाक्के़न्निन् चुक्ते़, हे़क्क्याङ् कन् याम्नाःत्निःत्ते़न् दाउद हाङ्ङिल्ले़ कुसाप्मुःन्धुम्मो मे़न्छाप्तुन्लो॥ हाङ् याङ्साकुन्धे युक्साबाहाॽ 25 हाङ्ङिल्ले़ कुधाःङ्हाॽ अदिएलरे़ कुस्सा अज्मावेतरे़ कुलक्पे़न्नो वये़॥ पाङ्जुम्हाॽओबा, ये़क्यक्हाॽओ, पाङ्भेॽहाॽओबा नु यक्हाॽओबा थाःङ्हाॽ उज्जियाहरे़ कुस्सा जोनाथनरे़ कुलक्पे़न्नो वये़॥ 26 लाजेॽओ इक्के़मबाहाॽ कलुबरे़ कुस्सा एस्रिरे़ कुलक्पे़न्नो मे़वये़॥ 27 चे़ल्ले़क्सेॽ इक्ताप्हाॽ रामाबा सिमिरे़ कुलक्पे़न्नो ने़स्से़॥ चे़ल्ले़क्सेॽ सेजःङ्वा युङ्मा थाःङ्हाॽरे़ लागि चे़ल्ले़क्सेॽ के़धोःक्पा कुजाॽहाॽ सेपेमबा जब्दिरे़ कुलक्पे़न्नो वये़॥ 28 नाम्धा पिसाङ्बा उःक्चम्जम्बादे़न्नो के़युङ्बा पे़ःङ्वालिःत्छेॽ नु पःत्छेॽहाॽ ओगे़मे़प्पा के़जोःक्पा गेदेरबा बाल-हानाने़न् वये़॥ पे़ःङ्वालिःत्छेॽ निःङ्गेॽ युङ्मा थाःङ्ङिन् योआसरे़ कुलक्पे़न्नो वये़॥ 29 सारोनओ चागे़राम्बा पित्हाॽ सारोनबा सित्रैरे़ कुलक्पे़न्नो मे़वये़॥ ने़ने़बादे़न्नो पित्हाॽ अदलैरे़ कुस्सा साफातरे़ कुलक्पे़न्नो मे़वये़॥ 30 उमेहाॽ इस्माएलि ओबिलरे़ कुलक्पे़न्नो मे़वये़॥ अदङ्हाॽ मेरोनोति येहदयाहरे़ कुलक्पे़न्नो मे़वये़॥ 31 मे़ल्लुक् मे़ःन्दाहाॽ हग्रि याजिजरे़ कुलक्पे़न्नो मे़वये़॥ दाउद हाङ्ङिल्ले़ आप्फेक् कुयाङ्सा कुन्धेहाॽ आम्भा कन् सुहाङ्युक्पाहाॽरे़ खुन्छिॽ लक्पे़न्नो वये़रो॥ दाउदरे़ आप्फेक् कुसुजासाबाहाॽ 32 दाउदरे़ कुम्भङा जोनाथने़न् लत्छा सुजासाबा, सिक्कुम्साबा नु साप्ला के़साप्पा वये़॥ हक्मोनिरे़ कुस्सा यहिएले़न् हाङ्ङिल्ले़ कुस्साहाॽ ओगे़मे़प्पा के़जोःक्पा वये़॥ 33 अहितोपेले़न् हाङ्ङिल्ले़ कुसुजादाङ्बा वये़॥ अरकि हुसैःन् हाङ्ङिल्ले़ कुन्देःङ्बा वये़॥ 34 अहितोपेलरे़ कुएगाङ् बनायाहरे़ कुस्सा यहोयादान् नु अबियाथारे़न् सुजासाबा पोःक्खे़सि॥ हे़क्क्याङ् योआबे़ङ्ग हाङ्थक्मोबा पोःक्खे़रो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.