१ साप्मुःन्धुम् 24 - लिम्बुनिङ्वाॽफुसाम्बाहाॽ मे़बिरुसिबा याःम्बक् 1 हारुनरे़ कुस्साहाॽ मे़से़न्दुसिबा— हारुनरे़ कुस्साहाॽ नादाब, अबिहु, एलाजार नु इतामार मे़वये़॥ 2 कर नादाब नु अबिहुन् खुन्छिॽ पानुदिङ् पान् मासिङ्मानुःल्ले़ तगिए खुन्छिॽ ये़म्बिछासा मे़न्वाॽए माने़सि॥ कल्ले़चोगुल्ले़ एलाजार नु इतामाररे़ निङ्वाॽफुसाम्बा याःम्बक् चोगे़सु॥ 3 दाउदरे़ एलाजाररे़ कुमुॽइदाङ्सा सादोके़न् नु इतामाररे़ कुधिन्दाङ् सायोबोरा अहिमेलेके़न् सुजापान् नाःक्तुसिआङ् खे़ङ्हाॽरे़ खुन्छिॽ आप्फेक् आप्फेक् लक्पे़न् कुइसिक् याःम्बक् चोःक्मारे़ लागि कुलुप् कुलुप् चोगुसि॥ 4 इतामारे़ल्ले़ कुमुॽइदाङ्साहाॽनुःल्ले़ एलाजाररे़ कुमुॽइदाङ्साहाॽरे़ यरिक् लाम्लोबाहाॽ मे़गत्तुसि॥ खे़ल्ले़चोगुल्ले़ एलाजाररे़ कुहिम्सयङ्हाॽ १६ लाम्लोबाहाॽओ कुलुप् मे़से़न्दुसिआङ् वये़ कर इतामाररे़ कुहिम्सयङ्हाॽ ८ लाम्लोबाहाॽओ कुलुप् मे़से़न्दुसिआङ् वये़॥ 5 खे़ङ्हाॽरे़ खे़ङ्हाॽ लुम्मो तॽयाःन्सोन् मे़गे़सुआङ् एःक्पएःक् मे़न्जोःक्सिङ्ङे कुलुप् कुलुप् मे़जोगुसि, थेआङ्भे़ल्ले़ एलाजार नु इतामार ने़प्माङ्ले़ खुन्छिॽ मुॽइदाङ्साहाॽओ सेसेदे़न्नोबा सुहाङ्युक्पाहाॽ नु निङ्वाॽफुमाङ्ङिल्ले़ कुसुहाङ्युक्पाहाॽ मे़वये़॥ 6 तॽयाःन्सोन् के़मा याःम्बक्किन्नाङ् एलाजार नु इतामाररे़ खुन्छिॽ साहाॽरे़ पाःल्लोबा मे़जोगु॥ खे़न् एगाङ् खे़ङ्हाॽरे़ खुन्छिॽ मिङ्ङिन् नु याःम्बक्हाॽ लत्छा ले़बि सुहाङ्मिबा नतनेलरे़ कुस्सा समायाहःल्ले़ साप्तु॥ हाङ्, हाङ्ङिल्ले़ कुसुहाङ्युक्पाहाॽ, निङ्वाॽफुसाम्बा सादोक, अबियाथाररे़ कुस्सा अहिमेलेक, ले़बि हिम्सयङ् नु निङ्वाॽफुसाम्बा हिम्सयङ्ङोबा तुम् लाम्लोबाहाॽ के़रे़क् तोःन्दि मे़युङे़॥ 7 थिक्सिगेक्पा तॽयाःन्सोन्ने़न् यहोयारिबरे़ कुमिङ्ङो, निसिगेक्पान् यदायाहरे़ कुमिङ्ङो, 8 सुम्सिगेक्पान् हारिमरे़ कुमिङ्ङो, लिसिगेक्पान् सोरिमरे़ कुमिङ्ङो, 9 ङासिगेक्पान् मल्कियाहरे़ कुमिङ्ङो, तुक्सिगेक्पान् मियामिनरे़ कुमिङ्ङो, 10 नुसिगेक्पान् हक्कोसरे़ कुमिङ्ङो, ये़त्छिगेक्पान् अबियारे़ कुमिङ्ङो, 11 फाङ्सिगेक्पान् येसुअरे़ कुमिङ्ङो, थिबोङ्गेक्पान् सकन्याहरे़ कुमिङ्ङो, 12 थिबोङ्ङाङ् थिक्सिगेक्पान् एल्यासिबरे़ कुमिङ्ङो, थिबोङ्ङाङ् निसिगेक्पान् याकिमरे़ कुमिङ्ङो, 13 थिबोङ्ङाङ् सुम्सिगेक्पान् हुप्पारे़ कुमिङ्ङो, थिबोङ्ङाङ् लिसिगेक्पान् येसेबाबरे़ कुमिङ्ङो, 14 थिबोङ्ङाङ् ङासिगेक्पान् बिल्गारे़ कुमिङ्ङो, थिबोङ्ङाङ् तुक्सिगेक्पान् इम्मेररे़ कुमिङ्ङो, 15 थिबोङ्ङाङ् नुसिगेक्पान् हेजिररे़ कुमिङ्ङो, थिबोङ्ङाङ् ये़त्छिगेक्पान् हप्पिसेसरे़ कुमिङ्ङो, 16 थिबोङ्ङाङ् फाङ्सिगेक्पान् पतहियाहरे़ कुमिङ्ङो, निबोङ्गेक्पान् यहेजकेलरे़ कुमिङ्ङो, 17 निबोङ्ङाङ् थिक्सिगेक्पान् याकिनरे़ कुमिङ्ङो, निबोङ्ङाङ् निसिगेक्पान् गमुएलरे़ कुमिङ्ङो, 18 निबोङ्ङाङ् सुम्सिगेक्पान् दलायाहरे़ कुमिङ्ङो नु निबोङ्ङाङ् लिसिगेक्पान् माज्याहरे़ कुमिङ्ङो थ्ये़रो॥ 19 खे़ङ्हाॽरे़ खुन्छिॽ पाधे़बा हारुनरे़ कन् इङ्जाङ्ङिन् यहवे दाङ्बा इस्राइलबा निङ्वाॽफुमाङ्लाम् खोसुआङ् वये़॥ खुने़ॽ निःन्धो चोगुबा कन् थिम्हाॽ कुइसिक् आल्ल खे़ङ्हाॽ यहवे दाङ्बे़ल्ले़ कुहिम्मो खुन्छिॽ माङ्से़वा चोःक्से़ मे़बेःल्ले़ खे़ङ्हाॽरे़ खुन्छिॽ याःम्बक् हाबा कन्हाॽ वये़रो॥ के़नम्बा ले़बिहाॽ 20 ले़बिःल्ले़ वेॽ के़नम्बा कुमुॽइदाङ्साहाॽलाम्— अम्रामरे़ कुस्साहाॽलाम्—सुबाएल, सुबाएलरे़ कुस्साहाॽलाम्—येहदयाह॥ 21 रहब्याहरे़ कुस्साहाॽ— यिसियाह, खुने़ॽ रहब्याहरे़ कुस्साहाॽओ तुम्बा वये़॥ 22 यिसहार थाःक्कोबा सलोमोत, सलोमोतरे़ कुस्साहाॽ—यहत॥ 23 हेब्रोनरे़ कुस्साहाॽ—यरियाहन् तुम्बा, निसिगेक्पान् अमर्याह, सुम्सिगेक्पान् यहासेल, लिसिगेक्पान् यकमाम॥ 24 उज्जिएलरे़ कुस्साहाॽ—मिका, मिकारे़ कुस्साहाॽलाम्—सामिर॥ 25 मिकारे़ कुन्साॽ—यिस्याह, यिस्याहरे़ कुस्साहाॽलाम्—जकरिया॥ 26 मरारिरे़ कुस्साहाॽ—महलि नु मुसि॥ याजियाहरे़ कुस्सा—बनो॥ 27 मरारिरे़ कुस्साहाॽ— यजियाहलाम्—बनो, सोहम, जक्कुर नु इब्रि॥ 28 महलिलाम्—एलाजार, खे़ल्ले़ कुस्सा ये़म्बित्छा हाःत्ताङ् मे़होःप्ते़॥ 29 किसलाम्—किसरे़ कुस्सा— यरहमेल॥ 30 हे़क्क्याङ् मुसिरे़ कुस्साहाॽ—महलि, एदेर नु यरिमोत॥ ले़बिहाॽ खुन्छिॽ आप्फेक् आप्फेक् हिम्सयङ् कुइसिक् हाबा कन्हाॽए मे़वये़॥ 31 हाङ् दाउद, सादोक, अहिमेलेक हे़क्क्याङ् निङ्वाॽफुसाम्बा नु ले़बिहाॽरे़ खुन्छिॽ लाम्लोबाहाॽ तगि खे़ङ्हाॽरे़ खुन्छिॽ काॽइ हारुनरे़ कुमुॽइदाङ्साहाॽरे़ मे़जोगुबा कुइसिक् कन्हाॽरे़आङ् तॽयाःन्सोन् मे़गे़सुरो॥ तुम्बा फुॽनुसाॽहाॽरे़ खुन्छिॽ हिम्सयङ्हाॽ पाःक्पा फुॽनुसाॽहाॽरे़ खुन्छिॽ हिम्सयङ्हाॽ कुइसिक् नुरिक् मे़मे़त्तुसि॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.