१ साप्मुःन्धुम् 20 - लिम्बुदाउदरे़ रब्बा ये़क्यक्किन् हुक्काप् चोगुॽ ( २ सामु १२:२६-३१ ) 1 हाङ्वामा ये़म् पोङ्मा हेःक्ते़ल्ले़ आल्ल हाङ्हाॽ ते़न्धङ् चोःक्से़ मे़बे, खे़ब्याङ् योआबरे़ थक्सुबाहाॽ तेॽरुसिआङ् अम्मोनिहाॽरे़ खुन्छिॽ लाजेॽ खाप्पुथ्यःङ् मे़जोगु, हे़क्क्याङ् रब्बा ये़क्यक्को मे़बेआङ् खे़न् कब्रिङ् किर्गप् मे़गबु॥ कर दाउदे़न् ग यरुसले़ःम्मोए वये़॥ योआबरे़ खे़न् ये़क्यक्किन् खाप्पुथ्यःङ् चोगुआङ् खाम्बुत्त्रा पोगे़र चोगु॥ 2 दाउदरे़ खे़ङ्हाॽरे़ खुन्छिॽ हाङ्ङिल्ले़ कुदिचःन् खुन्छि थे़गेःक्हाॽओलाम् फुन्दु तेॽरु॥ खे़न् मे़धाङ्घुल्ले़ साम्म्याङ् तोरा थिक् योरे़, हे़क्क्याङ् खे़प्मो इमे़ल्लुङ्बा मुधिङ्हाॽआङ् मे़दिःक्खुआङ् पत्छे़॥ खे़न् तिचःन् दाउदरे़ कुधे़गेःक्को मे़घुःक्तु॥ खुने़ॽ खे़न् ये़क्यक्कोलाम् मे़नाप्तुसिबा साॽरिक् यरिक् सामाहाॽ फे़त्तु॥ 3 खुने़ॽ खे़प्मो यक्युङ्बाहाॽ तेॽरुसिआङ् ताङ्आरा नु फे़न्जेॽ हे़क्क्याङ् वेॽ फे़जुम्भे़याहाॽ नु तःन्देॽहाॽरे़ याःम्बक् चोःक्मा पाङ्घुसि॥ दाउदरे़ अम्मोनिहाॽरे़ खुन्छिॽ के़रे़क् ये़क्यक्हाॽओ अक्खेए चोगु॥ खे़न् एगाङ् खुने़ॽ नु के़रे़क् कुमनाहाॽ यरुसले़म मे़नुःक्खे़ मे़भे़रे़रो॥ आजाजाबा हे़क्तङ्बा पलिस्तिहाॽनु ते़न्धङ् ( २ सामु २१:१५-२२ ) 4 कुभा ये़म् एगाङ् गेजेरओ पलिस्तिहाॽनु थङ् पोःक्खे़॥ आम्भा खे़न् ये़म्मो हुसाति सिब्बकैःल्ले़ रपाइहाॽरे़ खुन्छिॽ लत्छा थिन्दाङ् सायोबोरा सिप्पैन् स्ये़रु, हे़क्क्याङ् पलिस्तिहाॽ कुहुक्को मे़ध्ये़॥ 5 पलिस्तिहाॽनु पोःक्खे़बा लत्छा वेॽ थङ्ङो याइररे़ कुस्सा एल्हानानरे़ गातबा गोल्यतरे़ कुन्साॽ लहमिन् स्ये़रु, खे़न् लहमिःल्ले़ कुलाःक्किल्ले़ कुलाःन् थाक् किप्मा सिङ्लःङ्सा याःप्पा चोगे़॥ 6 गातओ पोःक्खे़बा वेॽ थङ्ङो तुक्सि तुक्सि कुहुक्चोक् नु तुक्सि तुक्सि कुलाङ्जोक् के़बप्पा के़रे़क्ले़ निबोङ्ङाङ् लिसि कुहुक्चो कुलाङ्जो के़बप्पा होरु थिक् ओसेःन्धाङ् पोःक्खे़॥ खे़न्नाङ् रफाल्ले़ कुधिन्दाङ् सायोबोरा वये़॥ 7 आल्ल खे़ल्ले़ इस्राइलिहाॽ कुनामे़न्छाॽ मे़त्तुसि, खे़ब्याङ् दाउदरे़ कुम्भुॽ सिमेअरे़ कुस्सा जोनाथने़ल्ले़ खे़न् स्ये़रु॥ 8 कन् होरुहाॽ गातबा रफाःल्ले़ कुधिन्दाङ् सायोबोरा मे़वये़॥ कन्हाॽ खक्पे़त् दाउद नु खुने़ॽ कुमनाहाॽरे़ खुन्छिॽ हुक्लाम् मे़स्ये़रुसिरो॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.