१ साप्मुःन्धुम् 17 - लिम्बुनातानरे़ दाउदे़न् इङ्घङ् मे़त्तु ( २ सामु ७:१-१७ ) 1 दाउदे़न् कुहाङ्हिम्मो युङे़आङ् एगाङ् खुने़ॽ माङ्निङ्वाॽपान् के़बाःप्पा नाताने़न् मे़त्तु, “आङ्गाॽग कप्मो साम्मासिङ्ङिल्ले़ चोःक्मनाबा हिम्मो युङ्ङार वाॽआ, कर यहवे दाङ्बे़ल्ले़ कुमाङ्हुप् सन्दोक्किन् साःङ्गाहिम्मो युङ्मनाआङ् युङ्ॽ॥” 2 नातानरे़ दाउदे़न् मे़त्तु, “आदाङ्बारे़ के़निङ्वाॽओ थे वाॽ हाबाघे़न् चोगे़ॽ, थेआङ्भे़ल्ले़ निङ्वाॽफुमाङ्ङिन् आदाङ्बानु वाॽ॥” 3 कर आम्भा खे़न् से़न्दिक् निङ्वाॽफुमाङ्ङिल्ले़ कुइङ्घङ्ङिन् नातानरे़ॽओ के़रे़— 4 “पेगे़ॽआङ् आङ्गाॽ आसे़वारोबा दाउदे़न् अक्खे मे़त्ते़ॽ, ‘यहवे दाङ्बे़ल्ले़ अक्खे पाःत्तु—आङ्गाॽ आलागि हिम् के़जोःक्पा खे़ने़ॽएग मेःन्॥ 5 इस्राइलिहाॽ मिस्रलाम् थाक्मनासिबा ये़न्नाङ्धो आइन्बा ये़न् थारिक् आङ्गाॽ आभे़ल्ले़आङ् हिम्मो मे़न्युङ्ङे वाॽआ॥ आङ्गाॽ लत्छा साःङ्गाहिम्मोनु वेॽ साःङ्गाहिम्मो थारिक् चत्छिङ्ङार युङाङ्ल थाङाङ्॥ 6 आत्तान् आत्तान् आङ्गाॽ इस्राइलिहाॽनु लाम्दिक् चोगाङ्, आङ्गाॽ आलागि साम्माङसिङ्ङिल्ले़न् हिम् थेआङ् मे़न्जोगुम्बा फाॽआङ् थे खे़ङ्हाॽरे़ खुन्छिॽ लाम्लोबाहाॽ सेःन्दोसुङ्सिङाङ् वये़बि?’ 7 “कल्ले़चोगुल्ले़ आङ्गाॽ आसे़वारोबा दाउदे़न् मे़त्ते़ॽ, ‘मुक्साम्दाङ्बा यहवे दाङ्बे़ल्ले़ अक्खे पाःत्तुॽ—आङ्गाॽ खे़ने़ॽ थक्सा चाराम्दे़न्नोलाम् नु मे़ल्लुक् मे़ःन्दा चाराम्मासि लाम्बा आङ्गाॽ आमना इस्राइलिहाॽरे़ खुन्छिॽ हाङ् पोङ्मारे़ लागि सेःन्ने़॥ 8 खे़ने़ॽ आत्ति आत्ति के़बे आङ्गाॽ खे़ने़ॽनु सोरिक् वयाङ्, हे़क्क्याङ् खे़ने़ॽ के़लाम्मोलाम् के़निङ्मिहाॽ मे़क्खुसिङ्॥ आल्ल आङ्गाॽ खे़ने़ॽ इक्सादिङ् खाम्बेःक्मोबा पयम् यम्बा मनाहाॽ कुइसिक् कुमिङ् के़इङ्बा चोःक्ने़॥ 9 आङ्गाॽ आमना इस्राइलिहाॽरे़ खुन्छिॽ लागि लत्छा ते़न् सेगुङ्ॽ॥ आम्भा खे़प्मो आङ्गाॽ खे़ङ्हाॽ युक्खुङ्सिङ्ॽ हे़क्क्याङ् खे़ङ्हाॽ खुन्छिॽ आप्फेक् लाजेॽओ मे़युङ्॥ आल्लआङ्धो खे़ङ्हाॽ मनाहाॽरे़ याम्मो तुक्खे मे़न्जाःत्तुसिन्॥ 10 आङ्गाॽ उन्छोन् उन्छोन् आमना इस्राइलिहाॽओ खासे़न्लोःम्बाहाॽ युक्तिङ् चोगुङ्सिङ्बा ये़म्माङ्धो कॽयो खे़ङ्हाॽ तुक्खे मे़जाःत्तुसिबा कुइसिक् ताक्के़भे़ॽबा मनाहाॽरे़ खुन्छिॽ याम्मो आभे़ल्ले़आङ् तुक्खे मे़न्जाःत्तुसिन्ॽ॥ आङ्गाॽ खे़ने़ॽ के़रे़क् के़निङ्मिहाॽ के़युक्को तारुङ्सिङ्ॽ॥ “‘आङ्गाॽ यहवे दाङ्बे़ल्ले़ खे़ने़ॽ के़मुॽइदाङ्साहाॽ खे़ने़ॽ हे़क्तङ्बा हाङ् चोगुङ्सिङ्ॽ॥ 11 आल्ल खे़ने़ॽ काप्पोबा के़दुम्माङ् के़मासिङ्ॽ, हे़क्क्याङ् खे़ने़ॽ कुसुधे़बा के़दाक्थे़बाहाॽनु तङ्सिङ्से़ के़बेःक्, खे़ब्याङ् खे़ने़ॽए के़मुॽइदाङ्साहाॽओबा मनाधिक् खे़ने़ॽ के़एगाङ् हाङ्युक् चोःक्मारे़ लागि आङ्गाॽ फोःक्खुङ्ॽ, हे़क्क्याङ् आङ्गाॽ खे़ल्ले़ कुहाङ्जुम्मिन् थधप् मे़ल्लॽमनाबा चोगुङ्ॽ॥ 12 खे़ल्ले़ए आङ्गाॽ आलागि लत्छा हिम् चोगुॽ, हे़क्क्याङ् खे़ल्ले़ कुहाङ्युक्नान् सदादिङ्ले़ लागि थधप् मे़ल्लॽमनाबा चोगुङ्ॽ॥ 13 आङ्गाॽग खे़ल्ले़ पानुदिङ् कुम्बा पोङ्ङा, हे़क्क्याङ् खे़न् आङ्गाॽ आबुगे़न् आस्सा पोङ्ॽ॥ आङ्गाॽ खे़ने़ॽनुःल्ले़ तगि युक् के़जोःक्पोलाम् आङ्गाॽ आमिःम्जिन् याङ्ना नुःक्तुङ्बा हे़क्के आङ्गाॽ खे़न्लाम्बा आङ्गाॽ आमिःम्जिन् आभे़ल्ले़आङ् मे़नुःक्कान्॥ 14 आङ्गाॽ खुने़ॽ आङ्गाॽ आहिम्मिन् नु आङ्गाॽ आहाङ्जुम्मो सदादिङ्ले़ लागि युक्खुङ्ॽ, हे़क्क्याङ् खुने़ॽ कुहाङ्युक्नान् सदादिङ्ले़ लागि थधप् मे़ल्लॽमनाबा पोङ्ॽ॥’” 15 निङ्वाॽफुमाङ्ङिल्ले़ नाताने़न् मे़त्तुबा नु ओसेःन्धाङ् चोगुबा के़रे़क् पाःन्हाॽ खुने़ॽ दाउदे़न् चे़क्तुरो॥ दाउदरे़ कुनुगे़न् पेलि ( २ सामु ७:१८-२९ ) 16 खे़ब्याङ् दाउद हाङ्ङिन् सिगाङ् पेआङ् यहवे दाङ्बे़ल्ले़ कुदगि युङ्सिङ् हे़क्क्याङ् खुने़ॽ अक्खे पाःत्तुरो, “यहवे दाङ्बा निङ्वाॽफुमाङ्ङे, आङ्गाॽ हाःत्ताआङ्बे, हे़क्क्याङ् आङ्गाॽ आहिम्सयङ्ङिन् थे़माआङ् आदाङ्बारे़ आङ्गाॽ कप्मो थारिक् के़गे़त्ताङ्बाबे? 17 हे़क्केसाङ् निङ्वाॽफुमाङ्ङे, आदाङ्बारे़ के़निमो कङ्ग आल्लसाङ् सुःन्लो॥ आदाङ्बारे़ के़माङ्हुप्पिन् के़से़वारोबे़ल्ले़ कुहिम्सयङ्ङो ताःन्दिबा पाःन्निन्ने के़बाःत्तुरो॥ यहवे दाङ्बा निङ्वाॽफुमाङ्ङे, आदाङ्बारे़ आङ्गाॽ यम्बा मनाहाॽ कुइसिक् ओगे़मे़त्ताङ्ङाङ् वाॽ॥ 18 “आदाङ्बारे़ के़से़वारोबा दाउदे़न् के़बिरुबा मिङ्सो इङ्धाङ्ङिल्ले़ लागि आदाङ्बा वेॽ थे मे़प्मा सुक्ने़आङ्बे? आदाङ्बारे़ग खे़ने़ॽ के़से़वारोबे़न् नुरिक् कुसिङ् के़निःत्तुआङ्ङे वाॽ॥ 19 यहवे दाङ्बाए, के़से़वारोबे़ल्ले़ कुलागि नु आदाङ्बारे़ के़निङ्वाॽ कुइसिक् आदाङ्बारे़ कन् के़रे़क् पयम् यम्बा याःम्बक्हाॽ के़जोगुआङ् वाॽ, खम्भ्याङ् कन् पयम् यम्बा माङ्हुप्हाॽ के़मे़त्ताङ्ङाङ् वाॽ॥ 20 “आदाङ्बा हे़क्तङ्बा वेॽ हाःत्ताङ् होप्, यहवे दाङ्बाए, आनिगे ने़भाक्किल्ले़ खे़प्सुम्बे़बा हे़क्के आदाङ्बानुःल्ले़ वेॽ माङ् हाःत्ताङ् होप्॥ 21 हे़क्क्याङ् आदाङ्बारे़ के़मना इस्राइलिहाॽ आत्तिन्हाॽनु तङ्मा सुक्मे़दे़त्ताङ्बे? इक्सादिङ् खाम्बेःक्मो योःग्बालाम् चोःक्युम्भो के़बिरुसिबा इस्राइलिहाॽ हे़क्तङ्बा वेॽ सुवाङ् आत्तिन्हाॽआङ् मे़होप्॥ आदाङ्बारे़ पयम् यम्बा नु किप्मा के़घुबा याःम्बक्हाॽलाम् मिस्र लाजेॽलाम् चोःक्युम्भो के़बिरुसिबा आप्फेक् के़मनाहाॽरे़ खुन्छिॽ तगि मे़न्छाम् सुवाङ्हाॽ के़नाःत्तु के़देसुसिआङ् आप्फेक् लागि मिङ्सो थाङ्सो के़जोगुआङ् वाॽ॥ 22 आदाङ्बारे़ आप्फेक् के़मना इस्राइलिहाॽ सदादिङ्ले़ लागि आप्फेक् के़मना के़जोगुसिआङ् वाॽ॥ आदाङ्बा, यहवे दाङ्बाए, खे़ङ्हाॽरे़ खुन्छिॽ निङ्वाॽफुमाङ् के़बोक्खे़आङ् के़वाॽ॥ 23 “आल्ल यहवे दाङ्बाए, आदाङ्बारे़ के़से़वारोबान् नु खुने़ॽ कुहिम्सयङ्हाॽरे़ लागि आदाङ्बारे़ थे माङ्हुप् के़जोगुआङ् वाॽ खे़न् के़रे़क् ये़म्मिल्ले़ लागि थो यो मे़ल्लॽए वाॽर॥ आदाङ्बारे़ के़बाःत्तुआङ् वाॽबा पाःन्निन् के़त्ते़ॽओ॥ 24 हे़क्केलॽरिक् मिङ्सो धाःङ्सोःन् आभे़ल्ले़साङ् सदादिङ्ले़ लागि यम्बा पोङ्मारे़ लागि खे़न् योधो मे़ल्लॽए वाॽर, हे़क्क्याङ् मनाहाॽरे़ अक्खे मे़बाःत्तुररो, ‘मुक्साम्दाङ्बा यहवे दाङ्बा इस्राइलबा निङ्वाॽफुमाङ्ङिन् इस्राइलरे़ए कुनिङ्वाॽफुमाङ्लो!’ हे़क्क्याङ् आदाङ्बारे़ के़से़वारोबा दाउदरे़ कुहिम्सयङ्ङिन् आदाङ्बारे़ के़दगि थधप् मे़ल्लॽमनाबा पोङ्ॽ॥ 25 “आदाङ्बा आनिङ्वाॽफुमाङ्ङिल्ले़ आङ्गाॽ के़से़वारोबे़ल्ले़ आहिम् चोःक्मारे़ लागि आदाङ्बारे़ के़निङ्वाॽ ओसेःन्धाङ् के़जोगाङ्ङाङ् वाॽ॥ कल्ले़चोगुल्ले़ आदाङ्बारे़ के़से़वारोबे़ल्ले़ आदाङ्बारे़ के़दगि पेलि फाक्मा आःन्छिङ्मा खोसुङ्ङाङ् वाॽ॥ 26 यहवे दाङ्बाए, आदाङ्बाए निङ्वाॽफुमाङ्ने़रो॥ आदाङ्बारे़ के़से़वारोबे़न्नु कन् नुबा पाःन्हाॽ माङ्हुप् के़जोगुआङ् वाॽरो॥ 27 कन् आप्फाल्ले़साङ् आदाङ्बारे़ के़दगि हाबा वाॽर फाॽआङ् के़से़वारोबे़ल्ले़ कुहिम्सयङ्ङिन् हाङ्वागे़न् मुॽइसाम् पिमा आदाङ्बारे़ के़निङ्वाॽ पोःक्खे़॥ थेआङ्भे़ल्ले़ आदाङ्बारे़ए खे़न् हिम्सयङ्ङिन् हाङ्वागे़न् मुॽइसाम् के़बिरुआङ् वाॽ, खे़ब्याङ् खे़न् सदादिङ् आभे़ल्ले़साङ् हाङ्वागे़न् मुॽइसाम् पोङ्लो॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.