MATTHEW 1 - Masanbo Naga (Re-Edited) Bible (BSI)

Jesu Khrista Gu Chavang-chavi

¹ Haise Abraham kiriang, David kaikik thiubo Jesu Khrista gu chavang-chavi lam si-e. Abraham gasu chawang David tangbo kaikik siniu:

^2-6a Abraham, Isaac, Jacob, Judah khatdi pasingnadung; Sigasu Perez nai Zerah (papui siniu Tamar si-e) Hezron, Ram, Aminadab, Nahshon, Salmon, Boaz (papui siniu Rahab si-e) Obed (papui siniu Ruth si-e) Jesse khatdi Chawang David hai-e.

^6b-11 David gasu Israel maidungtu Babylon lam kavangleng puitadbo katang, sibo kaikik siniu: David, Solomon (papuise Uriah nao si-e)., Rehoboam, Abijah, Asa, Jehoshaphat, Jehoram, Uzziah, Jotham, Ahaz, Hezekiah, Manasseh, Amon, Josiah khatdi Jehoiachin nai pasingnadung haisi-e.

^12-16 Babylon lam kavang thiulubo sai gasu Jesu tu manabo katang bambo kaikik siniu: Jehoiachin, Shealtiel, Zerubbabel, Abiud, Eliakim, Azor, Zadok, Achim, Eliud, Eleazar, Mathan, Jacob, sichiujiu Jacob niu Mary kina Joseph tu mana-e, sichiujiu Mary niu Messiah chiujiu kubo Jesu tu mana-e.

¹⁷ Sichiujiu Abraham gasu David tangbo chaken kariu-je-madaikiu-e, khatdi David gasu Babylon lam kavang thiubo katang hai chaken kariu-je-madaikiu-e, sigasu Messiah tu lungbo katang siniu chaken kariu-je- madaikiu-e.

Jesu Khrista tu manabo

¹⁸ Haichiujiu Jesu Khrista manawang-e. Papui Mary haitu Joseph leng chagiang magiangra npao lubo-e, chiudi panaise magiang makbo suangga, pase Masanbo Hiupuina khugasu ngena phungmide chiubo simide.

¹⁹ Joseph hai ka-nchang mai-e, chiudi Mary tu mathiu suangga kam mangam khaini makge; sijengniu mahin paniu chagiang thiura npao lubose phut mira maning mide.

²⁰ Paniu haichiujiu maning bamboga, pamang lamsu Rapiu gu maza siniu patu madu khaijiu din-e, “David kai-kik thiujiu bambo, Joseph yo, Mary tu nanao leng luping mane. Palamra paniu papum ripjiu bambose Masanbo Hiupuina khugasu-e.

²¹ Paniu panah piumai khat mana sune, khatdi nangniu pazanse Jesu chiujiu mathak rabo-e, palamra paniu pamaidungtu paliu nuan gasu kalan khaibi rabo-e.

²² Haidungse Rapiu niu phaimiukakung khuga dinkhai mibose wangtang raleng-e,

²³ “Phuilo, liuchangpui khatniu papum ripjiu panah piumai khat lungsune, sichiujiu pazanse Immanuel chiujiu kune” (parambase Tingwang aliutu maluong bamme).

²⁴ Sijengniu Joseph niu sulujiu, Rapiu gu maza niu dinkhaibo saisuijiu Mary tu maluong lung mide.

²⁵ Sichiudi paniu ngenase lunglu makthen patu nphiuji makge. Sichiujiu Joseph niu pazanse Jesu chiujiu mathak khaide.