JONAH 1 - Masanbo Naga (Re-Edited) Bible (BSI)

Jonah Niu Rapiu Kadin Piumakbo

¹ Naikhat, Rapiu niu Amittai nahpiu Jonah khuga din-e.

² Paniu din-e, “Kadibo namdi Nineveh gase tadlujiu siga lungbam maidung khuga dinkhai bilo; paliu hai dejiukha salo chiubo Iniu sijiu bambo-e.”

³ Chiudi Rapiu khugasu marilura, Jonah niu npui kakilam tadmide. Paniu Joppa lam tadkhai mide, siga Spain lam tadra kambam niubo malee khat daode. Paniu tadrabo phijeng pilujiu malee rampaotu maluang lujiu, Rapiu khugasu mari lujiu Spain lam tadmide

⁴ Chiudi Rapiu niu duipuiga tingkai katanbo langwang khaide, siga tingthung tingkai tanju mibo jengniu maleese pangra kum mide.

⁵ Malee rampaodungse pingchang pingjiu, mai hina para-para khuga nkha khaira khengsude. Sigasu maleese masen bira paliugu maniadung thonpad sude. Chiudi Jonah sira n-hanglam kiulujiu, malee lungga jipting bamme.

⁶ Siga malee rambo munranpi siniu patu daolujiu pakhuga din-e, “Nang dekamjiu jipting bamjiulo? Sulujiu nara khuga nkha khaira khengsulo. Paniu aliuleng manang khaijiu, aliutu kalan khaibo sui-e.”

⁷ Malee rampaodungniu khat-khat khuga dinsude, “Haikumbo kapingbo hai aliu saojengniu daojiulo chiubo taden thonjiu phui mataikhe.” Sichiujiu paliuniu taden thonboga, Jonah zan-ga padde.

⁸ Sijengniu paliuniu pakhuga din-e: “Chiusai tuhoira aliu khuga dinkhailo! Haibo lamga saotu madam khai ralo? Nang haiga nde kambam jiulo? Nang debo dih lamsu wangjiulo? Nang nde jatlo?”

⁹ “Ira Hebrew mai-e,” chiujiu Jonah niu paokakge. “Ira ting-kadih khatdi duipuitu dambo Rapiu, Tingwang tu kahumbo mai-e,”

¹⁰ Rapiu khugasu pah pakkinbo-e chiubo hai Jonah niu paliu khuga dinkhaide. Siga malee rampaodungse pingchang pingmide, sichiujiu pakhuga din-e, “Sise mai kapingbo gu-e!”

¹¹ Tingthung tingkaise tanbi-bi sude, sijengniu pakhuga paliuniu din-e, “Tingthung tingkai haitu khamra aliuniu natu nde kamralo?”

¹² Jonah niu paokakge, “Duipuiga atu thonkhai milo, chiusai haise saojing mine. Naliutu haikumbo tingthung tingkainiu kam kabuak bambo hai adon jengniu-e.”

¹³ Chiudi malee rampaodung siniu paliu laisang khaijiu maleese rampum genlam rampadra matan sude. Chiudi tingthung tingkaise tanbi-bi mijiu paliu tadkhaira hamide.

¹⁴ Sijengniu, paliuniu Rapiu khuga kapjiu kheng sude, “Hey Rapiu yo, hainapiu jengniu aliutu pi shai khai tulo! Rapiu yo, pakhiangna hai nangniu kamkhaibo-e.”

¹⁵ Sichiujiu paliuniu Jonah tu ponlujiu duipuiga thonkhai mide, siga kasuakbose saonuang mide.

¹⁶ Haijengniu malee rampaodungse Rapiu tu pingchang pingmide, sichiujiu paliuniu chara thiujiu patien thiura ladriat thiu sude.

¹⁷ Rapiu gu chamtan niu Jonah tu chakha kadibo khatniu kajong lude, sichiujiu paniu chakha lungga nchun sum, n-nien sum bamkhang sude.