२ तीमोथी 4 - ल्होमीॱसुङ्रप्की केच्च्य ॱस्येत् ॱस्येप्प झ्यीत् गोगेन् १-५ 1 मी ॱसोम्बु धङ् ॱस्यीनर घयेत्ल ठीम् च्यो़त्तु झ्यो़ङ्गेन् ख्रीष्ट् येशु, खोङ् रोरङ्गी ज्यागक् धङ् को़न्ज्योक् पङ्दु स्यक्न रङ्ल ङ हीन्दुक् सीन्न ॱङक्केन् हीनो। 2 ॱसुङ्रप्की केच्च्य ॱस्येत् ॱस्येप्प झ्यीज्यीत्। धी़जो़त्ल ॱमत् तय, छीगङ् ॱस्यो़त् छ्योक् झ्यीन दो़च्च्यीत्। ङङ्रीन् झ्यीन ॱलोप्स ज्योप्च्यीत्। लप्स्य तोङ्ज्यीत्। ङीब तो़न्न ॱरोङ्ज्यीत्। ॱलोप्स्यीक् टो़च्च्यीत्। 3 तीङ्लागी धी़ल हीन्दुक् झ्यीबे मी युङ्गेन् बेत्। धक्पर् च्येम्मे ॱलोप्सल मीत् नेङ्गेन्, रोरङ्सोल ग ग युङे धेत्मो़ल पीबे चयेलम घयेत् ॱयोप्केन् बेत्। 4 हुबे दीम्बे केच्च्य दी फङ्नी, मीत् दीम्बे यो़च्चो़क्की केच्च्य घयेत्ल ॱसीम्ब ॱस्योर्न नेन्दु डोगेन् बेत्। 5 हुब डस्सी मेम्ब, रङ्ल गदुक् घन्ड झ्युङ्न अक्, ॱसीम् च्यङ्जो़त् झ्यीन दो़च्च्यीत्। गुर् थेक्प झ्यीज्यीत्। केच्च्य ॱनेम्बु ॱस्यो़च्च्येमे ले दी झ्यीन रङ्गी गेल्ल यो़प्पे को़न्ज्योक्की स्यप्च्यी़गी ले दी डुब झ्यीज्यीत्। पावल्की रोरङ् ॱस्यीये ढीक्ल ॱस्येप्प ६-८ 6 ङ ॱनी ह ॱरोक् छ्यो़प्पल पुगेन्दङ् छ्येत्मीत् डोये धी़ ॱलीस्सोङ्। 7 ङे घङ् खे खे झ्यीन ज्युक्री चीय दी ज्युक्तक् च्येत् छरेन्। ङे छ्य स्यक्पे लम्ल तेम्बोक्म झ्यीन युङेन्। 8 ह ठीम्बो़न् ढङ्बु चोव ज्यीन्दक् झ्यो़म्बे ङीङ्गी यङ्ल मी ढङ्बुल थोप्केन्, थोप् छ्यीम्मी़ स्यमुङ् दी खोङ्गी ङे ढीक्ल इगीन स्यक्न यो़क्केन् बेत्। ॱनी ङल छ्युवक् मेम्ब, हुगो खोङ् इगीनी मल्ल झ्यो़म्बल रीगो झ्यीन गुक्केन् कुरीक्ल थोप्केन् बेत्। 9 रङ् ङ च्येल्ल ज्योक्सी झ्यीन युङ् छुब झ्यी। 10 डेमास् हुगो ॱनी जम्बुलीङ् ङो़ल ॱसीम् ॱस्योर्न, ङ ॱलो़ तङ्न थीस्सलोनीकाल टप्सोङ्। ॱनी क्रेसेन्स् गलातील धङ् तीतस् दाल्मातीया लुङ्बल टप्सोङ्। 11 ॱनी हीन ङदङ् दल लुकारङ् यो़त्। रङ् युङे यङ्ल ङल हीदु दगुल फेम्ब युङ्ज्येल स्योल्ल मर्कुस् ठीक्न ॱस्योक्। 12 टैकीकस् ङे हुदु एफीसस्ल तङेनो। 13 ॱनी त्रोआस् सार्की कार्पस्की खीम्दु स्यक्पे ङे ली़ज्ये छ्यी घो़ दी, पीज्य घयेत् दी धङ् गो़स्योल पाबोक्ल ढीबे यीगी बुरीम घयेत् दी स्योल्ल खुर्लेत्। 14 सङ् सोव अलेक्जेन्डर्की ङल लेम्म गज्येन् आक्सी झ्यीज्युङ्। हुगी ले घयेक्की लेन् दी चोव ज्यीन्दक्की च्यो़गेन् बेत्। 15 हुगो च्येन्नी रङ् अङ् जीम्न दो़च्च्यीत्। हुगी ङीक्की केच्च्य ॱस्येप्पल दो़न्दो़त् ड झ्यीज्युङ्। 16 ङल गोम ठीम् च्यो़प्पे यङ्ल ॱसु उक् ङे दगुल देत्न तम् लप्रो झ्यीमोङ्। कुरीक्की ङ ॱलो़ तङ्ज्युङ्। हीगी ङीब हीगो हुबल फोक्च्ये मीप्प तोङ्ज्यीत्। 17 हुबे ङल दगु मत् झ्येन अक्, ङे केच्च्य ॱस्येत्न टोम्बे ले हीगो डुप्न हीगो ज्यी़त् ज्यी़त् घयेक्की मी ॱह घोज्ये यो़प्पल चोव ज्यीन्दक्की ङल ॱस्यीक् ॱनङ्न दगु झ्यीज्युङ्। हुदु ॱसेङ्गीदङ् छ्येत्मीक्की खनी ङ छ्यीज्युङ्। 18 हुगो झ्यीनी तीङ्ला ङल आक्पागी ढङ् घन्ड झ्युङ्न अक्, चोव ज्यीन्दक्की ङ हुन्दुक् झ्यीबनी छ्यीन खोङ् रोरङ्गी इगी तेङ् यी़गी ज्यागक्ल तेन्तेन् ठीक्केन् बेत्। खोङ्ल धी़ नम ज्यी़न्दु तो़प्प युङ् युङ युङ्ज्ये यो़प्प स्योक्च्यीत्। आमेन्। स्युक् जोबे छ्यक्सुम् थेमु १९-२२ 19 प्रीस्का, अक्वीला धङ् ओनेसीफरस्की मीजङ्ल ङे छ्यक्सुम् थेमु यो़दो सीन्न ॱस्यो़च्च्यीत्। 20 इरास्तस् कोरीन्थ् सार्तु देत् तङ्सोङ्। त्रोफीमस् नगेन् झ्यीनी, मीलेटस् सार्तु स्यक्पेन्। 21 गी़न् ॱस्यर् ॱस्यर्ले एल्ला रङ् हीदु ढीम्बु युङ् छुब झ्यीज्यीत्। हीनी युबुलस्, पुडेन्स्, लीनस्, कलौडीया धङ् ॱनी हीगी पी़न्ज्या ॱयोङ्म घयेक्की इक् रङ्ल छ्यक्सुम् थेमु यो़दो सीगुगो। 22 चोव ज्यीन्दक् रङ्दङ् मुल रङ्गी ॱसीम्गी दगुल स्युज्ये यो़प्प स्योक्च्यीत्। खीत्रङ् घयेत्ल थुज्यी थोप् थोब युङ्ज्ये यो़प्प स्योक्च्यीत्। |
© 1995 Wycliffe Bible Translators, Inc. and Nepal Bible Society
Wycliffe Bible Translators, Inc.