I vēstule tessalonikīšim. 3 - Svātī Roksti Jaunais Īstōdejums 1937 (Aloizijs Broks)

III.

¹ Tōpēc mes ilgōk navarējom gaideit un nūlēmem pasakavēt tikai Atenōs.

² un nūsyutejom Timoteju, myusu brōli un Dīva kolpu pi Kristus Evangelija sludynōšonas,

³ lai Jys jyusus pastyprynōtu ticeibā un jyusus pamūdynōtu, lai nivīns, tagadejūs spaidu dēļ, nanūsamaļdeitu. Jyus poši zynot, ka tōdēļ mes asom.

⁴ Jau tūreiz, kad mes pi jums bejom, mes jums īprīkš pasacejom, ka mums jōpōrcīš spaidi. Un jyus zynot, ka tys tai arī nūtyka.

⁵ Tōpēc es vairs navarēju izturēt un nūsyuteju, lai izzynōtu, kai ir ar jyusu ticeibu, vai kārdynōtōjs nav īvedis kārdynōšonā un vai myusu dorbs nav bejis veļteigs.

⁶ Bet tagad Timotejs nu jums ir atgōjis un par jyusu ticeibu un par jyusu mīlesteibu prīceigu ziņu atnesis un mums pastōstejis, ka jyus myusus arvīnu paturat lobā pīmiņā, un ka jyus ilgojitēs myusus redzēt tai pat, kai mes jyusus.

⁷ Brōli, nasaskotūt uz myusu tryukumu un spaidim, mes caur jyusu ticeibu asom īprīcynōti.

⁸ Jo jyus pastōvat ikš Kunga, tad mes atsadzeivynojam.

⁹ Un kai mes varam atmoksōt Dīvam par vysu tū prīcu, kuru mes sova Dīva prīškā jyusu dēļ sajyutam?

¹⁰ Dīn un nakt mes ļūti lyudzam tōs žēlesteibas, lai otkon īraudzeit jyusu vaigu un papyldynōt tū, kas jyusu ticeibai vēļ tryukst.

¹¹ Lai Dīvs, myusu Tāvs un myusu Kungs Jezus (Kristus) pagrīž myusu ceļu uz jums.

¹² Lai Kungs jums dūd augt un palikt bogōtim mīlesteibā vīnam uz ūtru un uz visim (cylvākim) tai, kai mes jyusus mīļojam.

¹³ Lai Jys jyusu sirdis styprynoj, ka jyus byutu nasatraipeiti un svāti Dīva myusu Tāva prīškā, atnōkūt myusu Kungam Jezum Kristum reizē ar visim sovim svātajim. (Amen).