Леви 5 - Пак Калам

¹ Инсандик агъадихъ къалурнавай са чӀуру кӀвалахдин гунагь акатнаватӀа: – ада са агьвалатдин шагьид хьана, са вуч ятӀани акуна, я тушни агьвалатдикай са вуч ятӀани чиз, амма, агьвалатдин шагьидриз лянет авунин къурхудалди дуванханадиз эверзавайди ван хьана, за затӀни ахъай тавуна гунагь кар авуна;

² – ам са гьихьтин ятӀани чиркин шейиник, чиркин гьайвандин лешиник, ва я чиркин малдин лешиник, ва я хур галчӀурдай чиркин гьайванрин лешерик хкӀуна ва и кӀвалахдиз фикир ганач, амма чиркин хьанва;

³ – ам чиркин инсандик ва я инсандин гьар гьихьтин хьайитӀани нежесрик хкӀуна ва сифтедай и кар фагьумнач, амма ахпа гъавурда акьуна;

⁴ – ада, кӀандатӀа ам хъсан, кӀандатӀа пис са кар авун патал фагьум тавур, инсанри кьадай хьтин кьинерикай са фагьумни галачир кьин кьуна ва сифтедай им вуч ятӀа гъавурда авачир, амма гуьгъуьнай гъавурда акьуна.

⁵ Гьа икӀ, инсан и чӀуру крарикай сад авуналди тахсир хьанатӀа, ада вичи авунвай гунагь хиве кьурай,

⁶ авур чӀуру кӀвалах эвез хъувун патал Реббидиз къурбанд авурай – суьруьдай хеб ва я цӀегь. ИкӀ хахамди, адан винел гъил къахчунин серенжем кьиле тухуналди, ам гунагьдикай михьи хъийида.

⁷ Адавай хеб къурбанд ийиз жезвачтӀа, вичин гунагьдилай гъил къахчун яз, Реббидиз кьве тӀапӀас ва я кьве лиф гъурай: са къуш – гунагьдай къурбанд яз, муькуьди – кунуг патал.

⁸ Ада абур хахамдиз гъурай, адани сифте гунагьдай къурбанд тир къуш къачуна, кьил галуд тавуна адан гардан атӀурай,

⁹ ва и гунагьдай къурбанддин ивидикай къурбангандин къвалал стӀалар хъичинрай; амай иви къурбангандин кӀаник шутӀкьунна кӀанда. Им гунагьдай къурбанд я.

¹⁰ Кьвед лагьай къушракай къайда тирвал кунуг авуна кӀанда. Гьа икӀ хахамди, ада авунвай гунагьдикай михьи хъувун яз, адан винел гъил къахчунин серенжем кьиле тухуда, ва а касдилай гъил къахчуда.

¹¹ Амма адавай кьве тӀапӀас ва я кьве лиф къурбанд тежез хьайитӀа, вичи авунвай чӀуру кардай эфадин цӀудай са пай къуьлуьн гъуьр гъурай – гунагьдай къурбанд яз. Ада гъуьруьк зейтундин чӀем кутун тавурай ва адан винелай хъсан ни галай шкьакь вегьин тавурай, вучиз лагьайтӀа им гунагьдай къурбанд я.

¹² Ада вичин къурбанд хахамдиз гъурай, адани къурбанддин рикӀел хуьнин пай яз, са гъаб гъуьр къачуна, и гъуьр Реббидиз кудай къурбандрихъ галаз санал, гьабурун винел къурбангандал курай. Им гунагьдай къурбанд я.

¹³ Гьа икӀ хахамди, ада авунвай винидихъ лагьай гунагьрилай гъил къахчун яз, а касдин винел гъил къахчунин серенжем кьиле тухуда, ва а касдилай гъил къахчуда. Амай гъуьр, фан къурбанд адаз гьикӀ жедатӀа, хахамдиз жеда“».

Тахсир хиве кьунин къурбанд

¹⁴ Реббиди Мусадиз лагьана:

¹⁵ «Сада тахсир хьана, Реббидин пак затӀарихъ галаз кьан тийизвай, чпиз чин тийиз, чӀуру кӀвалах авуртӀа, ада эвез хъувун яз, Реббидиз рехне квачир са гьер гъурай, адан къимет, тахсир хиве кьунин къурбанд яз, ибадатханадин шекъелрин гимишдалди тайинарнавайди хьурай.

¹⁶ Ада пак затӀариз гайи зарар эвез хъувурай ва идалай гъейри вадай са пай алава хъувурай ва ам вири хахамдив вахкурай. Хахамди тахсир хиве кьунин къурбанд тир гьер къачуна, а касдин винел гъил къахчунин серенжем кьиле тухурай ва и касдилай гъил къахчуда.

¹⁷ Сада гунагь кар авуртӀа, вичиз чин тийиз Реббидин къадагъайрикай сад чӀур авуртӀа, ва адак гунагь акатайтӀа, ам тахсиркар я ва адаз жаза къвезва,

¹⁸ ада рехне квачир ва дуьз къимет авай са гьер гъана тахсир хиве кьунин къурбанд яз хахамдив вахкурай. Хахамди вичиз чин тийиз чӀуру кӀвалах авур а касдин винел гъил къахчунин серенжем кьиле тухурай, ва а касдилай гъил къахчуда.

¹⁹ Им тахсир хиве кьунин къурбанд я: инсан Реббидин вилик тахсиркар хьана».