Леви 3 - Пак Калам

Суварин къурбанд

¹ Са ни ятӀани суварин къурбанд карч алай ири гьайвандикай – жунгавдикай ва я каликай, ийизватӀа, ада, рехнеяр квачир гьайван къачуна, ам Реббидин вилик эциграй.

² Ада къурбанддин кьилел гъилер эциграй ва и къурбанддин мал Гьалтунин Алачухдин вилик тукӀурай, ва Гьарунан эвледар тир хахамри къурбанган вири патарихъай ивидалди хъичинрай.

³ Суварин къурбанддикай Реббидиз кудай къурбанд яз къенерин винел алай пи ва патарив гвай вири пи,

⁴ кьве дуркӀунни ва ятуррин патавай абурал алай пи, ва гьакӀни лекьинал алай гъвечӀи хел вахкун лазим я. Ам дуркӀунрихъ галаз санал акъудна кӀанда.

⁵ Ва Гьарунан эвледри абур вири къурбангандал курай – вич кузвай кӀарасрал алай кунугдихъ галаз санал, – им Реббидиз кудай къурбанд, Адаз хуш ни галай гум жеда.

⁶ Ва са ни ятӀани Реббидиз суварин къурбанд карч алай куьлуь гьайванрикай – диши ва я эркек, ийизватӀа, ада рехнеяр квачир гьайванрикай гъурай.

⁷ Ада гьер къурбанд ийизватӀа, ам Реббидин вилик эциграй,

⁸ адан кьилел гъилер эцигна ва и къурбанд Гьалтунин Алачухдин вилик тукӀурай. Ва Гьарунан эвледри ивидалди къурбанган вири патарихъай хъичинрай.

⁹ Суварин къурбанддикай Реббидиз кудай къурбанд яз пи вахкун герек я: тум вири санлай, лап гьа кьачахъандилай атӀана кӀанда, къенерал алай вири пи ва патарив гвай вири пи,

¹⁰ кьве дуркӀунни абурал ятуррин патавай алай вири пи ва гьакӀни лекьинал алай хел. Ам дуркӀунрихъ галаз санал акъудна кӀанда.

¹¹ Хахамди ибур вири къурбангандал курай – им Реббидиз кудай къурбанд, Ам патал суьрсет я.

¹² Са ни ятӀани кьун къурбанд ийизватӀа, ам Реббидин вилик гъурай,

¹³ адан кьилел гъилер эцигна, ам Гьалтунин Алачухдин вилик тукӀурай. Ва Гьарунан эвледри къурбанган вири патарихъай ивидалди хъичинрай.

^14-15 Реббидиз кудай къурбанд яз къенерал алай пи ва патарив гвай вири пи, кьве дуркӀунни абурал ятуррин патавай алай вири пи ва гьакӀни лекьинал алай гъвечӀи хел вахкун лазим я. Ам дуркӀунрихъ галаз санал акъудна кӀанда.

¹⁶ Хахамди абур вири къурбангандал курай – им Реббидиз кудай къурбанд, Ам патал суьрсет ва Адаз хуш ни галай гум я. Вири пи Реббидинди я.

¹⁷ Ингье квез даиман къалурнавай къайда – ам, куьне гьина уьмуьр тухуз хьайитӀани, несилдилай несилдалди кьиле твах: я пи, я иви немир“».