Леви 25 - Пак Калам

Кишдин йис ва элкъвей йисарин йис

¹ Синай дагъдал Реббиди Мусадиз лагьана:

² «Исраилдин рухваяр хабардар ая: „Куьн За квез гузвай чилерал атайла, и чили Реббидин Кишдал амал авуна кӀанда.

³ Ругуд йисуз жуван ник цуз, ругуд йисуз жуван ципицӀ багъда чӀере атӀутӀ ва бегьер къахчу.

⁴ Амма ирид лагьай йисуз чилихъ тамам Кишдин, Реббидин Кишдин секинвал хьуй: жуван никӀе тумар цамир, жуван ципицӀ багъда чӀере атӀумир.

⁵ Жуван сама экъечӀай са затӀни гвемир, жуван атӀана куьруь тавунвай ципицӀ багъда ципицӀар кӀватӀ хъийимир: и йисуз чилихъ тамам секинвал хьуй.

⁶ Кишдин йисуз чили гайи гьар вуч хьайитӀани, квез суьрсет жеда – ваз, ви лукӀаризни къаравушриз, пулунихъ кьунвайбуруз, вахъ галаз уьмуьр тухузвай чара чилин ксариз,

⁷ ви мал-къарадиз ва ви уьлкведин вагьши гьайванриз. Адан бегьерар квез виридаз недайди жеда.

⁸ Кишдин ирид йис гьисабна чара ая – иридра ирид йис. Ва Кишдин ирид йис алатайдалай кьулухъ – яхцӀурни кӀуьд йис –

⁹ къаргъу ягъа: ирид лагьай вацран цӀуд лагьай юкъуз, Гъил къахчунин юкъуз, куь вири уьлкве тирвал къаргъудай сес акъуд.

¹⁰ ЯхцӀурни цӀуд лагьай йис паквилиз акъуд: уьлкведа адан вири агьалияр азад авун малумара. Им куьн патал элкъвей йисарин йис жеда; квекай гьар сад вичин тухумдин чилел, вичин мукьва ксарин кьилив хкведа.

¹¹ ЯхцӀурни цӀуд лагьай йис куьн патал элкъвей йисарин йис хьуй; куьне я цун, я сана вич-вичиз экъечӀай гьич са затӀни гуьн лазим туш, я куь атӀана куьруь тавунвай ципицӀ багълара бегьер кӀватӀ хъувуна кӀандач.

¹² Им элкъвей йисарин йис я, ам куьн патал пакди хьурай: анжах вич-вичиз никӀяй экъечӀай затӀар неъ.

¹³ Элкъвей йисарин и йисуз квекай гьар сад жуван чилел хтурай.

¹⁴ Вуна жувандаз ви мулк маса гузватӀа ва я адан мулк маса къачузватӀа, сада сад алцурмир.

¹⁵ Жувандивай мулкар къачудайла, элкъвей йисарин йисарилай кьулухъ шумуд йис алатнаватӀа гьисаба. Ни ваз вичин мулк маса гузватӀа, адан къимет элкъвей йисарин йис алукьдалди шумуд йис аматӀа, гьабурув кьурди хьурай.

¹⁶ Гьикьван гзаф йисар аматӀа, гьакьван къиметни хкаж жеда, гьикьван тӀимил йисар аматӀа, къиметни гьакьван агъузди жеда, ада ваз бегьеррин кьадар маса гузва эхир.

¹⁷ Жуванди алцурмир, куь Аллагьдихъай кичӀе хьухь. Зун Ребби, куь Аллагь я.

¹⁸ Зи къалурнавай къайдаяр кьилиз акъуд, Зи тагькимар кьиле твах ва и чилел куьне секиндиз уьмуьр тухуда.

¹⁹ Чили бегьер гуда, куьне тухдалди неда ва чилел куьне секиндиз уьмуьр тухуда.

²⁰ Куьне хабар кьада: ‹Чавай я цаз, я бегьер кӀватӀ хъийиз тахьайла, бес чна вуч тӀуьрай?›

²¹ Ругуд лагьай йисуз За квез Зи хийир-дуьа ийида, ва чили пуд йисан бегьер гуда!

²² Муьжуьд лагьай йисуз куьне цада, тӀуьн лагьайтӀа куьгьне бегьердикай ийида: куьне ам, цӀийи бегьер агакьдалди, кӀуьд лагьай йисалди неда.

²³ Чил элкъвен хъийин тийир тегьерда маса гана виже къведач, вучиз лагьайтӀа чил Зиди я, куьн лагьайтӀа, За чпиз чка ганвай масанай атана ацукьнавайбур ва чара чилин ксар хьиз я.

²⁴ Куь вири чилерай куьне тухумдин белгенар пул гана къахчун таъминарун лазим я.

²⁵ Квекай тир касди, кесиб хьана, вичин чилин са пай маса гузватӀа, адан са ивидин лап мукьва касди атана маса ганвай а чка пулунихъ къахчурай.

²⁶ А касдихъ ахьтин мукьва-кьили авачтӀа, амма адахъ вичихъ агьвал хьанваз а маса ганвайди, пул гана элкъвена къахчуз жезватӀа,

²⁷ маса гайи йисалай инихъ алатнавай йисар гьисабрай, муьштеридиз амай йисар эвез хъувунин пул вахкурай – ва вичин чилел элкъвена хтурай.

²⁸ Амма адавай эвез авунин пул гуз жезвачтӀа, маса ганвайди муьштеридив элкъвей йисарин йис алукьдалди гумукьда. Элкъвей йисарин йисуз муьштериди белген вахкуда, ва ам маса гайиди вичин тухумдин чилел хкведа.

²⁹ Сада цал элкъуьрнавай шегьерда авай кӀвал маса гузватӀа, и кӀвал вич маса гайи йикъалай кьулухъ са йисан вахтунда элкъвена пулунихъ къахчуз жеда – вири и вахтунда маса къахчуз хьун мумкин я.

³⁰ Цал элкъуьрнавай шегьерда авай кӀвал са йисан вахтунда элкъвена къахчунвачтӀа, ам элкъуьн авачиз муьштеридинди ва адан эвледринди жеда; ам элкъвей йисарин йисузни вахкудач.

³¹ Амма цал элкъуьр тавунвай хуьрера авай кӀвалер чилин белген яз гьисабзава; абур пулунихъ элкъвена къахчуз жеда, элкъвей йисарин йисуз лагьайтӀа, абур вахкун герек я.

³² Левийрин шегьерра левийриз чпин кӀвалер гьар гьи вахтунда хьайитӀани пул гана къахчудай ихтияр ава,

³³ къахчун тавуртӀа, левийрин шегьерра маса ганвай и кӀвал элкъвей йисарин йисуз вахкун герек я, вучиз лагьайтӀа левийрин шегьерра авай кӀвалер – ибур Исраилдин рухвайрин арада левийрин тайифадин чил я.

³⁴ ГьакӀни абурун шегьеррихъ галай чӀурарни маса гана жедач: ибур левийрин даиман чилер я.

³⁵ Ви халкьдикай сад кесиб хьайитӀа, къекъверагвиле гьатайтӀа, адан гъил яхъ ва жуван кӀвале са пӀипӀ чара ая, ам вахъ галаз масанай атана ацукьнавай ва чара чилин кас хьиз хьурай.

³⁶ Адавай пулунай ва тӀуьнай кьил къачумир; жуван Аллагьдихъай кичӀе хьухь – и касди ви кӀвале уьмуьр тухурай.

³⁷ Адав вугай пулунилай кьил къачумир, суьрсет патал ийизвай харжийрал кьил эцигмир.

³⁸ Зун Ребби, квев Къенан вахкун патал ва куь Аллагь хьун патал куьн Мисридай ахкъудай куь Аллагь я.

³⁹ Квекай тир сад кесиб хьана, ваз лукӀвиле маса гайитӀа, адав лукӀрав хьиз кӀвалахиз тамир.

⁴⁰ Ада кӀвале пулунихъ кьунвайди ва чара чилин кас хьиз уьмуьр тухурай. Ада ви кӀвале элкъвей йисарин йисарал кьван кӀвалахда,

⁴¹ ахпа аяларни галаз ви патавай хъфида – вичин мукьва-кьилийрин патав, вичин тухумдин чилел элкъвена хкведа.

⁴² Исраилвияр За Мисридай ахкъудай Зи лукӀар я; абур лукӀар хьиз маса гана виже къведач.

⁴³ Абур патал залум иеси жемир, жуван Аллагьдихъай кичӀе хьухь.

⁴⁴ Вуна маса къачунвай лукӀар ва къаравушар патарив гвай халкьарикай хьунухь лазим я.

⁴⁵ Квевай гьакӀ куь уьмуьр тухузвай чара чилин ксар, ва куь чилел ханвай абурун хизанарни пулунихъ маса къачуз жеда. Абурукай куьн патал хсуси чилер авуртӀа жеда,

⁴⁶ абур квевай, ирс яз, даим хсусият яз куь аялриз гайитӀа жеда. Абурухъ галаз квевай лукӀарихъ галаз хьиз рафтарвал авуртӀа жеда, амма куь стхайриз, Исраилдин рухвайриз, залум иесияр жемир.

⁴⁷ Ви патав гвай масанай атана ацукьнавайдахъни чара чилин касдихъ агьвал хьана, амма квекай сад тир кас кесиб хьана вичи вич а масанай атанвай касдиз ва я чара чилин касдиз ва я адан тухумдикай тир са масадаз лукӀвиле маса гайитӀа,

⁴⁸ а маса ганвай квекай тир кас пул гана къахчуз жеда. Ам адан стхайрикай садавай,

⁴⁹ имидивай, имидин хцивай ва я мукьва маса касдивай пул гана къахчуз жеда – я тушни, агьвал хьуникди, адавай вич пул гана къахчуз жеда.

⁵⁰ Ада вичин иесидихъ галаз санал маса гайи йикъалай элкъвей йисарин йисаралди шумуд йис алатнаватӀа гьисабрай; адан къимет пулунихъ кьунвайдан мажиб фикирда кьуна, йисарин кьадардилай тайинарна кӀанда.

⁵¹ Пул гана къахчудайла, гьеле гзаф йисар аматӀа, ада вич азад хъувунихъ гьа йисарихъ галаз кьазвай вич маса гайи пулунин кьадардин са пай пул гана кӀанда.

⁵² Элкъвей йисарин йисаралди са тӀимил йисар амаз хьайитӀа, ада къахчудай пулунин кьадар гьа а йисарин кьадардиз килигна акъудрай ва вич азад хъувун патал ам гурай.

⁵³ Иеси патал ам вири вахтунда пул гана кьунвайди хьиз хьун лазим я; иесиди ви вилик адахъ галаз инсаф авачир рафтарвал авуна виже къведач.

⁵⁴ Амма квекай сад тир кас пул гана къахчуз тахьайтӀани, элкъвей йисарин йисуз ам вичин аяларни галаз азад хъжеда.

⁵⁵ ГьикӀ лагьайтӀа, Исраилдин рухваяр Зи лукӀар я. Абур За Мисридай ахкъудай Зи лукӀар я. Зун, Ребби, куь Аллагь я“».