Леви 23 - Пак Калам

Кишдин йикъакай ва суваррикай

¹ Реббиди Мусадиз лагьана:

² «Исраилдин рухвайрив хабар агакьара: „Реббиди тайинарнавай суварар гьа ихьтинбур я. Куьне абур пак йикъар яз малумарда. Ингье За тайинарнавай суварар.

³ Ругуд юкъуз кӀвалаха, амма ирид лагьай югъ – Киш, ял ягъунин югъ, пак тир кӀватӀ жедай югъ. Гьина куьн ацукьнаватӀани, гьич са жуьредин кӀвалахни ийимир: им Реббидин Киш я“».

Песагь ва ТӀили фарин сувар

⁴ Реббиди давамарна: «Ингье Реббиди тайинарнавай, куьн вири пак тир санал кӀватӀ хьун патал тайин тир вахтунда малумардай суварар.

⁵ Сад лагьай вацран цӀукьуд лагьай юкъуз рагъдан хьайила, – Реббидин Песагь.

⁶ Гьа и вацран цӀувад лагьай югъни – ТӀили фарин сувар, Реббидин сувар. Ирид юкъуз тӀили фу неъ.

⁷ Сад лагьай юкъуз пак тир кӀватӀ хьун кьиле твах. Гьич са кӀвалахни ийимир.

⁸ Ирид юкъуз Реббидиз кудай къурбанд гъваш. Ирид лагьай юкъуз пак тир кӀватӀ хьун кьиле твах. Са жуьредин кӀвалахни ийимир».

Сифте цуьлуьн сувар

⁹ Реббиди Мусадиз лагьана:

¹⁰ «Исраилдин рухваяр хабардар ая: „Куьн За квез гузвай а уьлкведиз атайла, ва ана гвен гуьн къачурла, бегьердин сифте цуьл хахамдин кьилив гъваш,

¹¹ ада а цуьл куь патай тир турус къурбанд хьиз, Реббидин вилик зурзурдайвал. Хахамди цуьл мукьув гвай Кишдилай кьулухъ къвезвай юкъуз зурзуррай.

¹² Цуьл зурзурдай юкъуз куьне Реббидиз кунуг яз са йис хьанвай, рехне квачир кӀел къурбанд авун лазим я.

¹³ Лазим тир фан къурбандди и чӀавуз зейтундин чӀем какадарнавай гъуьруьн эфадин цӀудай кьве пай тешкилун лазим я. Им Реббидиз кудай къурбанд, Адаз хуш ни галай гум я. Чехирдин къурбанддин кьадарди гьиндин кьуд пай тешкилун герек я.

¹⁴ Куьне куь Аллагьдиз садакьа гудай йикъалди я фу, я чранвай техил, я таза тир тварар немир. Им, куьн гьина ацукьнаваз хьайитӀани, квез несилдилай несилдалди кьилиз акъуддай къалурнавай даиман къайдаяр я“».

Гьафтейрин сувар

¹⁵ Реббиди давамарна: «И Кишдилай кьулухъ къвезвай йикъалай, цуьл зурзун-къурбанддин йикъалай, ирид ацӀай гьафте гьисаба.

¹⁶ ЯхцӀурни цӀуд лагьай юкъуз, ирид лагьай Кишдилай кьулухъ къвезвай юкъуз, Реббидиз цӀийи бегьердин гъуьруькай тир фан къурбанд це.

¹⁷ Гьар санай зурзурун патал кьве фу гъваш; гьар садаз эфадин цӀудай кьве пай къуьлуьн гъуьр харж авуна кӀанда. Абур гъвар квай тинидикай чрана кӀанда. Им Ребби патал бегьердин сифте нетижайрин садакьа я.

¹⁸ Фахъ галаз санал куьне са йис хьанвай, рехне квачир ирид кӀел, са жунгав ва кьве гьер къурбанд авун лазим я; им Реббидиз гудай, лазим тир фан къурбанд ва чехирдин къурбандни галай кунуг жеда, – Реббидиз кудай къурбанд, Адаз хуш ни галай гум.

¹⁹ ГьакӀни гунагьдай къурбанд яз са кьун къурбанд ая ва суварин къурбанд яз са йис хьанвай кьве кӀел.

²⁰ Хахамди абур, и кьве кӀел, бегьердин сифте нетижайрикай авунвай фан къурбандни галаз, Реббидин вилик ийизвай зурзун-къурбандар яз, абур зурзуррай. Абур Реббидин пак тир затӀар я; абур хахамдиз талукь я.

²¹ И югъ кӀватӀ жедай пакди яз малумара; гьич са кӀвалахни ийимир. Им, куьне гьина уьмуьр тухуз хьайитӀани, квез несилдилай несилдалди кьилиз акъуддай къалурнавай даиман къайда я.

²² Жуван чилел гвен гуьдайла, никӀин лап къерехдал кьван къвемир ва гвен куьтягь хьайила, кьилер кӀватӀ хъийимир. Абур кесибдиз ва я масанай атана ацукьнавайдаз тур. Зун, Ребби, куь Аллагь я».

Къаргъуйрин сувар

²³ Реббиди Мусадиз лагьана:

²⁴ «Исраилдин рухвайрив агакьара: „Ирид лагьай вацран сад лагьай югъ куьн патал ял ягъунин югъ хьунухь лазим я, пак тир кӀватӀ жедай югъ, адан гьакъиндай къаргъуйрин сесери хабар гурай.

²⁵ Гьич са кӀвалахни ийимир, Реббидиз кудай къурбандар гъваш“».

Гунагьрилай гъил къахчудай югъ

²⁶ Реббиди Мусадиз лагьана:

²⁷ «Ирид лагьай вацран цӀуд лагьай югъ Гъил къахчунин югъ я. И югъ куьн патал кӀватӀ жедай пакди хьунухь лазим я; сивер хуьх ва Реббидиз кудай къурбандар гъваш.

²⁸ И юкъуз гьич са жуьредин кӀвалахарни ийимир, гьикӀ лагьайтӀа им Реббидин, куь Аллагьдин вилик, квелай гъил къахчунин серенжем кьиле фидай Гъил къахчунин югъ я.

²⁹ Вичи и юкъуз сивер хуьн тавур гьар са кас вичин халкьдикай хкудна гадарда.

³⁰ И юкъуз кӀвалахдай гьар сад За тергда ва ам вичин халкьдин жергейрай акъатда.

³¹ И юкъуз гьич са кӀвалахни ийимир – им квез къалурнавай даиман къайда я, куьне гьина уьмуьр тухвайтӀани, ам несилдилай несилдалди кьиле твах.

³² Куьн патал им бегьем ацӀай Кишдин ял ягъунин югъ хьунухь лазим я; сивер хуьх. И вацран кӀуьд лагьай йикъан нянилай къведай няналди куьне ял ягъун лазим я».

Кумайрин сувар

³³ Реббиди Мусадиз лагьана:

³⁴ «Исраилдин рухваяр хабардар ая: „Гьар ирид лагьай вацран цӀувад лагьай югъ – Кумайрин сувар, ирид юкъуз давам жезвай Реббидин сувар я.

³⁵ Адан сад лагьай югъ кӀватӀ жедай пакди я; гьич са кӀвалахни ийимир.

³⁶ Ирид юкъуз Реббидиз кудай къурбандар гъваш. Муьжуьд лагьай югъ – куьн патал кӀватӀ жедай пакди я; Реббидиз кудай къурбандар гъваш. Им сувар агалзавай югъ я, и юкъуз гьич са кӀвалахни ийимир.

³⁷ Реббиди тайинарнавай суварар гьа ихьтинбур я. Куьне абур пак йикъар яз малумарда ва Реббидиз кудай къурбандар гъида: кунугар ва фан къурбандар, суварин ва чехирдин къурбандар, и юкъуз адет тирвал.

³⁸ Вири ибур – Кишдин юкъуз Реббидиз ийизвай савкьватрилай ва куьне Реббидиз гъизвай куь пишкешрилай, ва вяддин ва вири гуьгьуьл-къурбандрилай алава яз.

³⁹ Ирид лагьай вацран цӀувад лагьай юкъуз, куьне бегьер къахчурла, Реббидин сувар кьиле твах – ам ирид юкъуз давам хьана кӀанда. Сад лагьай югъ куьн паталди ял ядайди ва муьжуьд лагьай югъ – ял ядайди хьурай.

⁴⁰ Сад лагьай юкъуз багъдин тарарин виридалайни хъсан майваяр, хумравдин таран пешер, къалин пеш гъидай тарарин ва цӀвелин тарцин хилер къачу ва Реббидин, куь Аллагьдин вилик ирид юкъуз шадвилер кьиле твах.

⁴¹ Реббидин и сувар ирид йикъан вахтунда гьар йисуз кьиле твах. Им квез къалурнавай даиман къайда я, несилдилай несилдалди и сувар ирид лагьай вацра кьиле твах.

^42-43 Ирид юкъуз кумайра уьмуьр твах: куь вири несилриз За Исраилдин рухваяр Мисридай ахкъудай чӀавуз кумайра динж авурди чир жедайвал, Исраил уьлкведин чкадин вири агьалийри и йикъара кумайра уьмуьр тухурай. Зун Ребби, куь Аллагь я“».

⁴⁴ Мусадини Реббиди тайинарнавай суварар Исраилдин рухвайриз малумарна.