Леви 21 - Пак Калам

Хахамар патал къайдаяр ва суварин йикъарган ( 21–25 кьилер) Диндин къайдаяр кьиле тухудайла хахамрин михьивиликай

¹ Реббиди Мусадиз лагьана: «Хахамар, Гьарунан рухваяр хабардар ая: „Хахамди,

² лап мукьва ксар: диде, буба, хва, руш, стха

³ ва я вах, вичин кӀвале уьмуьр тухузвай, гъуьлуьз тефенвай руш квачиз, – кьенвай касдин мукьув атуналди, вич чиркин авуна виже къведач.

⁴ Ада вич маса мукьвабур патал кьацӀурун ва чиркин авун лазим туш.

⁵ Хахамри кьилел алай чӀарар тун тавурай, чурудин къерех атӀун тавурай, чпи чпел кьацӀар тавурай.

⁶ Абур чпин Аллагьдин пак инсанар хьунухь лазим я. Чпин Аллагьдин тӀвар кьацӀур тавурай. Абуру Реббидиз кудай къурбандар, чпин Аллагьдиз суьрсет гъизва, гьавиляй абур пак хьана кӀанда.

⁷ Абур чпин Аллагьдин пак ксар я, гьавиляй абуру вичи вич маса гузвай ва я беябур хьанвай паб къачуна жедач, чара хьанвайди къахчуна кӀандач.

⁸ Вичи Реббидин къурбангандал, вичин Аллагь патал суьрсет гъизвай хахамдин паквилиз гьуьрмет ая. Ам вун патал пакди хьуй, гьикӀ лагьайтӀа Зун, Ребби, куь паквилин чешме, пак я.

⁹ Хахамдин руша вичи вич явавилералди кьацӀурайтӀа, ада буба кьацӀурзава; а руш цӀай яна кун лазим я.

¹⁰ Хахам, вичин стхайрин арада чӀехиди, вичин кьилел гуьцӀунин чӀем эличнавайди, вич хахамвилиз акъуднавайди ва пак тир партал алукӀдай ихтияр авайди, – ам чӀарар чкӀанваз къекъвена кӀандач, ва вичел алай парталар къазунун виже къведач.

¹¹ Ам мейит алай чкадал фена жедач, – гьатта бубадин ва дидедин хатурдайни ада вич чиркин авун лазим туш –

¹² ам и чӀавуз ибадатханадай экъечӀна жедач. Ада вичин Аллагьдин ибадатхана кьацӀурна кӀандач, гьикӀ лагьайтӀа адал шерик авунин лишан – адан Аллагьдин патай тир гуьцӀдай чӀем, – ала. Зун Ребби я.

¹³ Адаз паб яз анжах руш къачудай ихтияр ава.

¹⁴ Ада хендедадал, чара хьанвай, беябур хьанвай я тушни маса къачузвай паб къахчуна жедач; адавай анжах вичин тухумдай тир рушвал гумайди паб яз къачуз жеда.

¹⁵ Ада вичин эвледар, вичин тухум кьацӀурун лазим туш, вучиз лагьайтӀа Зун Ребби, адан паквилин чешме я“».

¹⁶ Реббиди Мусадиз лагьана:

¹⁷ «Гьарун хабардар ая: „Адан эвледрикай гьич садавайни, гьич са несилдани, адан бедендик рехне кватӀа, вичин Аллагьдин къурбангандал суьрсет гъиз жедач.

¹⁸ Бедендик рехне квай гьич садавайни садакьаяр гуз жедач: я буьркьуьдавай, я кьецӀидавай, я чин какурдавай, я са кӀвач кьецӀидавай, я са гъил чӀурудавай,

¹⁹ я вичин кӀвач ва я гъил ханвайдавай,

²⁰ я кӀулацавай, я пунукьавай, я вилел цуьк алай касдивай, я вичик гачал ва кьурай хамар алатзавай касдивай, я пхьин хирер квайдавай, я какайриз зарар хьанвай касдивай.

²¹ Гьарунан вичин бедендик рехне квай гьич са эвледдини Реббидиз кудай къурбандар гъун лазим туш. Рехне квайда вичин Аллагьдин къурбангандал суьрсет гъун лазим туш.

²² Адавай вичин Аллагьдин гьам паквилерин паквал тир, гьам пак тир, тӀуьн нез жеда,

²³ амма ам пердедин патав атана ва къурбангандив мукьув хьана жедач. Адак рехне ква. Зи ибадатхана кьацӀур тавурай. ГьикӀ лагьайтӀа Зун, Ребби, абурун паквилин чешме я“».

²⁴ Мусади идан гьакъиндай Гьарун, адан рухваяр ва Исраилдин вири рухваяр хабардар авуна.