Леви 17 - Пак Калам

Ибадатханадилай къеце къурбанд авунинни иви тӀуьн къадагъа

¹ Реббиди Мусадиз лагьана:

² «Гьаруназ, адан рухвайриз ва Исраилдин вири рухвайриз хабар це: „Ингье Реббиди гьихьтин эмир авунватӀа:

³ ‹Исраилвийрикай сада жунгав, гьер ва я кьун

⁴ Гьалтунин Алачухдин сивел гъана ва гьанал, Реббидин Алачухдин вилик, Реббидиз къурбанд ийидай чкадал, абур кундал ва я кундилай къерехда тукӀуртӀа, а иви а касдин тахсир яз гьисабда. Ада иви экъичайвиляй ам вичин халкьдин жергейрикай хкудна гадарда.

⁵ Исраилдин рухвайри алай вахтунда чуьлда тукӀвазвай гьайванар абуру Реббидин кьилив – Гьалтунин Алачухдин сивел, хахамдин патав гъурай, – ва гьанал абур Реббидиз ийизвай суварин къурбанд хьиз тукӀурай.

⁶ Хахамди гьайванрин ивидалди Гьалтунин Алачухдин вилик квай Реббидин къурбанган хъичинрай, пини цӀай яна курай – им Реббидиз хуш ни галай гум жеда.

⁷ Ва мад кьунарин къаматда авай бутриз къурбандар тавурай, абур себеб яз вафа авачирбур тахьурай! Им Исраилдин рухваяр патал эбеди тир къалурнавай къайда я, ам несилдилай несилдалди кьиле тухурай›.

⁸ Абуруз лагь: ‹Исраилдин рухвайрикай ва я абурун арада масанай атана ацукьнавайбурукай сада кунуг, я тушни суварин къурбанд авуртӀа,

⁹ амма ам Реббидиз ийизвай къурбанд жедайвал Гьалтунин Алачухдин сивел тавуртӀа, ахьтин кас вичин халкьдикай хкудна гадарда.

¹⁰ Исраилдин рухвайрикай ва я абурун арада масанай атана ацукьнавайбурукай сада иви гьар жуьреда нез хьайитӀа, За Зи хъел а касдал элкъуьрда, ам вичин халкьдин жергейрикай хкудна гадарда.

¹¹ ГьикӀ лагьайтӀа чан алай затӀунин уьмуьр адан ивида ава. За квел иви, куьне квелай гъил къахчун кьиле тухун патал, къурбангандал гъун тайинарнавай; и иви – уьмуьр я, ам гъил къахчунин себеб жедай кар я.

¹² Гьавиляй За Исраилдин рухвайриз абурукай ва абурун арада масанай атана ацукьнавайбурукай садани иви тӀуьн патал гъилик тавун лазим тирди лагьанай.

¹³ Исраилдин рухвайрикай тир, ва я абурун арада масанай атана ацукьнавайбурукай сада гъуьрче, чеб нез ихтияр авай гьайван ва я къуш жагъурайтӀа, ада иви экъичун ва адан винелай накьвар кӀвахун лазим я.

¹⁴ Иви чан алай гьар са затӀунин уьмуьр я, иви вич гьа гьадан уьмуьр я. За Исраилдин рухвайриз лагьана: чан алай затӀарин иви тӀуьн яз гъилик ийимир, гьикӀ лагьайтӀа чан алай гьар са затӀунин уьмуьр – адан иви я. Ам тӀуьн патал гъилик ийидай гьар вуж хьайитӀани халкьдин арадай акъудна гадарда.

¹⁵ Гьар вуж хьайитӀани – чкадин эгьли ва я масанай атана ацукьнавайди – ада гиликьай гьайвандин ва я вагьши гьайванри кукӀварнавай гьайвандин як тӀуьнатӀа, вичин парталар ва вич чуьхвена кӀанда – ва няналди чиркин яз амукьда, ахпа михьи хъжеда.

¹⁶ Амма ада вичин парталар чуьхуьн тавуртӀа ва эхъуьн тавуртӀа, ам жазадик акатда›“».