Леви 14 - Пак Калам

Жузамдикай михьи авун

¹ Реббиди Мусадиз лагьана:

^2-3 «Ингье жузам акатна сагъ хъхьанвай инсан михьи хъувун патал вуч авуна кӀандатӀа къалурзавай къанун. Ам кундилай адан вилик экъечӀун лазим тир хахамдин кьилив гъурай. Хахамдиз азарди кьунвайдак квай жузам хкатнавайди жагъайтӀа,

⁴ михьи хъийизвайди патал чан алай михьи кьве къуш, муьтквердин талашар, икьи яру рангунин парчадин са чӀук ва исуп набатат гъун эмир авурай.

⁵ Хахамди къушарикай сад авахьна физвай целди ацӀурнавай хъенчӀин къапунин винел тукӀун эмир авурай,

⁶ ахпани, чан алай къуш къачуна, муьтквердин талашрихъ, икьи яру рангунин парчадихъ ва исуп набататдихъ галаз санал, абур вич авахьна физвай целди ацӀурнавай хъенчӀин къапунин винел тукӀунвай къушран ивидик кярай.

⁷ Иви квай и целди хахамди вич жузамдилай кьулухъ михьи хъийизвай кас ирид гъилера хъичинун лазим я. Ахпа хахамди ам михьи тирди малумаррай. Чан алай къуш лагьайтӀа, хахамди азад авун лазим я.

⁸ Вич михьи хъийизвай касди вичин парталар чуьхуьрай, чӀарар михьиз турай, беден чуьхуьрай ва ам михьи жеда. Идалай кьулухъ адавай кундал хквез жеда, амма мадни ирид юкъуз ам вичин алачухдик экечӀна жедач.

⁹ Ирид лагьай юкъуз ада михьиз чӀарар туна кӀанда – кьил, чуру ва рацӀамар. ЧӀарар михьиз турай, вичин парталар чуьхуьрай, эхъуьрай ва михьи хъжеда.

¹⁰ Муьжуьд лагьай юкъуз ада рехне квачир кьве эркек кӀел ва рехне квачир са йис хьанвай шек, ва фан къурбанд авун патал зейтундин чӀем какадарнавай къуьлуьн гъуьруьн эфадин цӀудай пуд пай ва са лаг зейтундин чӀем къачурай.

¹¹ Михьи хъувунин серенжем кьиле тухузвай хахамди михьи хъийизвайди адан садакьаярни гваз Реббидин вилик акъвазаррай, Гьалтунин Алачухдин сивел.

¹² Хахамди са кӀел къачуна, ам са лаг зейтундин чӀемни галаз тахсир хиве кьунин къурбанд авурай. Ада абур Реббидин вилик зурзун-къурбанд яз зурзуррай.

¹³ КӀел пак тир, гунагьдай къурбандар ва кунугар са пак чкадал тукӀуна кӀанда. Тахсир хиве кьунин къурбанд, гунагьдай къурбанд хьиз, хахамдинди я – им паквилерин пак затӀ я.

¹⁴ Хахамди тахсир хиве кьунин къурбанддин ивидикай къачуна, михьи хъижезвайдан эрчӀи япун кӀвенкӀвевай, эрчӀи гъилин чӀехи тупӀувай ва эрчӀи кӀвачин чӀехи тупӀувай гуьцӀрай.

¹⁵ Хахамди чӀемедикай вичин чапла гъилин мекв хьиз кӀватӀнавай капан юкьвал цурай,

¹⁶ ва, эрчӀи гъилин тӀуб меквез цанвай и чӀемедик кяна, ирид гъилера Реббидин вилик хъичинрай.

¹⁷ Мекве амай чӀемедикай ада михьи хъижезвайдан эрчӀи япун кӀвенкӀвевай, эрчӀи гъилин чӀехи тупӀувай, ва эрчӀи кӀвачин чӀехи тупӀувай гуьцӀрай – тахсир хиве кьунин къурбанддин ивидин винелай.

¹⁸ Мекве амукьай чӀем хахамди михьи хъижезвайдан кьилел иличун лазим я. Гьа икӀ хахамди Реббидин вилик адан винел гъил къахчунин серенжем кьиле тухуда.

¹⁹ Хахамди гунагьдай къурбанд авурай. ИкӀ хахамди а касдин винел, ам чиркерикай михьна, гъил къахчунин серенжем кьиле тухуда. Ахпа кунуг тукӀуна кӀанда,

²⁰ ва хахамди кунуг ва фан къурбанд къурбангандал эциграй. ИкӀ хахамди гъил къахчунин серенжем кьиле тухуда – ва а кас михьи жеда.

²¹ Инсан кесиб ятӀа ва такьат авачтӀа, вич и касдин винел гъил къахчунин серенжем кьиле тухун патал тахсир хиве кьунин къурбанд яз зурзурдай са кӀел ва зейтундин чӀем какадарнавай эфадин цӀудай са пай къуьлуьн гъуьрни са лаг зейтундин чӀем къачурай,

²² ва гьакӀни къуват акакьдай кьве тӀапӀас ва я кьве лиф – са къуш гунагьдай къурбанд яз, муькуьдини кунуг яз.

²³ Ам вич михьи хъувунин муьжуьд лагьай юкъуз вири ибур гваз хахамдин кьилив атурай ва Гьалтунин Алачухдин сивел Реббидин вилик акъвазрай.

²⁴ Хахамди тахсир хиве кьунин къурбанд яз кӀел ва са лаг зейтундин чӀем къачуна абур Реббидин вилик зурзун-къурбанд яз зурзуррай.

²⁵ Ахпа хахамди тахсир хиве кьунин къурбанд яз, кӀел тукӀурай, ва адан ивидикай къачуна, вич михьи хъийизвайдан эрчӀи япун кӀвенкӀвевай, эрчӀи гъилин чӀехи тупӀувай, ва эрчӀи кӀвачин чӀехи тупувай гуьцӀрай.

²⁶ Хахамди зейтундин чӀем вичин мекв хьиз кӀватӀнавай капун юкьвал цурай,

²⁷ ва ирид гъилера Реббидин вилик тупӀалай хъичинрай.

²⁸ Мекве авай чӀемедикай хахамди михьи хъийизвайдан эрчӀи патан япун кӀвенкӀвевай, эрчӀи гъилин чӀехи тупӀувай ва эрчӀи кӀвачин чӀехи тупӀувай гуьцӀна кӀанда – тахсир хиве кьунин къурбанддин ивидин винелай.

²⁹ Мекве амай чӀем хахамди михьи хъийизвайдан кьилел илична кӀанда; икӀ хахамди Реббидин вилик адан винел гъил къахчунин серенжем кьиле тухуда.

³⁰ Ва а касди а къушарикай сад (тӀапӀасар ва я лифер) –

³¹ вичивай гуз жедайди вуч ятӀа, гьам, – гунагьдай къурбанд яз серф авурай, муькуь къуш – фан къурбандни галаз – кунуг яз. ИкӀ хахамди и касдин винел Реббидин вилик гъил къахчунин серенжем кьиле тухуда.

³² Ингье вичик жузам акатай касди, ам кесиб ятӀа, михьи хъувун патал вуч авуна кӀандатӀа къалурзавай къанун».

КӀвалера жедай мурсуникай

³³ Реббиди Мусадизни Гьаруназ лагьана:

³⁴ «Куьн За куь хсусиятда твазвай Къенандин чилерал атайла, ва и чилел алай кӀвалерикай садаз За мурсун зарар гайи чӀавуз,

³⁵ кӀвалин иеси хахамдин кьилив атана лугьурай: „Аквар гьаларай, зи кӀвалел азар пайда хьанва“.

³⁶ Хахамди гьикӀ аватӀа чириз къведалди вилик, кӀвале авай гьич са затӀни чиркин тахьун патал, и кӀвале авай кьван вири затӀар акъудун патал эмир авурай; идалай кьулухъ ам атана кӀвализ килиграй.

³⁷ Адаз цларал алай лекеяр къацу хьтин ва яру хьтин рангунинбур яз, а чкайрал легъвер пайда хьанваз жагъайтӀа,

³⁸ ам гуьрцелдилай къецел элячӀрай ва ирид юкъуз и кӀвал агалрай.

³⁹ Ирид лагьай юкъуз хтана, хахамдиз лекеяр цлар тирвал чкӀанваз акуртӀа,

⁴⁰ ада лекеяр алай къванер кукӀварна хкудна, абур шегьердилай къерехдиз, са чиркин чкадиз акъудун патал эмир авурай.

⁴¹ КӀвалин къенепата вири къудгъунна михьи авуна кӀанда, къудгъуннавай сувагъни шегьердилай къерехда са чиркин чкадал гадарна кӀанда.

⁴² Хкуднавай къванерин чкадал цӀийи къванер эхциграй ва кӀвализ цӀийи кьилелай сувагъар авурай.

⁴³ Къванер кукӀварна хкудайдалай кьулухъ, кӀвални къудгъуна михьи авуна, цӀийи кьилелай сувагъар авурдалай кьулухъни лекеяр мадни кӀвал тирвал чкӀизватӀа,

⁴⁴ хахам атана кихлиграй. Адаз лекеяр чкӀанваз акуртӀа – им и кӀвале зиян гудай мурс ава ва кӀвал чиркин я лагьай чӀал я.

⁴⁵ Ихьтин кӀвал чукӀурун лазим я, къванер, кӀарасар ва сувагъар шегьердилай къерехдиз, са чиркин чкадиз акъудун лазим я.

⁴⁶ Ихьтин кӀвализ, ам агалнавай вахтунда, гьахьай кас няналди чиркин я.

⁴⁷ Ихьтин кӀвале йиф акъудайда вичин парталар чуьхвена кӀанда, ни ана тӀуьртӀа, гьадани вичин парталар чуьхуьн лазим я.

⁴⁸ Амма хахамдиз кӀвализ цӀийи кьилелай сувагъар авурдалай кьулухъ атана, лекеяр мад пайда техжезвайди акуртӀа, ада кӀвал михьи тирди малумарна кӀанда: азар акьалтӀна.

⁴⁹ КӀвал михьи авун патал хахамди кьве къуш, муьтквердин талашар, икьи яру рангунин парчадин чӀук ва исуп набатат къачуна кӀанда.

⁵⁰ Ада къушарикай сад авахьна физвай целди ацӀурнавай хъенчӀин къапунин винел тукӀурай.

^51-52 Ахпа муьтквердин талашар, исуп набатат, икьи яру рангунин парчадин чӀук ва чан алай къуш къачуна, абур авахьна физвай цик какахьнавай тукӀунвай къушран ивидик кягърай – ва кӀвал ирид гъилера хъичинрай. Идалай кьулухъ,

⁵³ ада чан алай къуш шегьердин къерехда чуьлдиз азаддиз ахъайна кӀанда. ИкӀ ада кӀвал патал гъил къахчунин серенжем кьиле тухуда – ва кӀвал михьи хъжеда.

^54-56 Жузам, гачал, парталрал ва цларал жедай мурс хьтин, дакӀунвай чкайрин, руваррин ва лацу лекейрин вири дуьшуьшар хьтинбур патал къанун гьа ихьтинди я – гьа и жуьреда са вуч ятӀани гьи чӀавуз михьи ятӀа, гьи чӀавуз чиркин ятӀа кьил акъудда. Жузамдинни мурсун гьакъиндай къанун гьа ихьтинди я».