Леви 12 - Пак Калам

Аял хайидалай кьулухъ михьивилиз акъудун

¹ Реббиди Мусадиз лагьана:

² «Исраилдин рухвайрив хабар агакьара: „Паб руфунал залан хьана ва адаз хва хьайитӀа, ам ирид юкъуз, вацран кьилер авайла хьиз, чиркин я;

³ муьжуьд лагьай юкъуз куьрпе суьннет авуна кӀанда.

⁴ И папакай хкатзавай иви квай затӀарикай михьи хьун къанни цӀипуд юкъуз давам жеда, ада, вич михьи хьун акьалтӀдалди кӀвале ацукьна, пак тир са куьникни кягъ тавурай ва ибадатханадиз мукьва тахьурай.

⁵ Руш хайиди лагьайтӀа, вацран кьилер авайди хьиз, кьве гьафтеда чиркин жеда; адалай кьулухъ ам хкатзавай иви квай затӀарикай михьи хьун пудкъанни ругуд юкъуз давам жеда.

⁶ Хва ва я руш хайидалай кьулухъ михьи хъхьун акьалтӀайла, ам Гьалтунин Алачухдин сивел атурай ва хахамдив кунуг яз йис хьанвай са кьар ва гунагьдай къурбанд яз са лиф ва я тӀапӀас вугурай.

⁷ Хахамди, ам патал гъил къахчунин серенжем кьиле тухуналди, Реббидиз и къурбандар авурай, ва и чӀавуз ам иви кӀвахьуникай михьи жеда. Им хва ва я руш хайи паб патал къанун я.

⁸ Адавай кьар гъиз жезвачтӀа, кьве тӀапӀас ва я кьве лиф гъурай: са къуш – кунуг, муькуьди – гунагьдай къурбанд яз. Хахамди ам патал гъил къахчунин серенжем кьиле тухурай, и чӀавуз ам михьи жеда“».