Кьурумда 36 - Пак Калам

Рушариз ирс атунин къайдадин алава къанунар

¹ Чпин тухум Юсуфан эвледрилай арадал атанвай Манашедин тайифадай тир Магьиран хва Гилеадан тухумдин сихилрин кьиле авайбур атана Мусадив ва Исраилдин тухумрин кьилер тир регьберрив рахана.

² Абуру лагьана: «Чи агъадиз Исраилдин рухвайриз чилер ирс яз чипинай паюн къалуруналди, Реббиди ваз чи мирес Целафгьадан ирс адан рушарив вахкун эмир авуна.

³ Амма абур Исраилдин маса тайифайриз гъуьлуьз фейитӀа, абурун ирс чи бубайрин ирсиникай хкудна ва папар жедай тайифадин ирсиник кухтада. Идакди чал гьалтай ирсинин са пай къакъудда.

⁴ Исраилдин рухваяр патал элкъвей йисарин йис алукьайла, и пайни рушарикай папар жедай тайифадин ирсиник кухтада ва абурун ирс чи бубайрин тайифадин ирсиникай хкудда».

⁵ И чӀавуз Реббидин гафуналди Мусади Исраилдин рухвайриз ихьтин эмир авуна: «Юсуфан эвледрин тайифади лугьузвайвал дуьз я.

⁶ Реббиди Целафгьадан рушарин гьакъиндай ихьтин эмир ийизва: абурувай чпиз низ кӀандатӀани гъуьлуьз физ жеда, амма анжах абурун бубайрин тухум акатзавай тайифадин къене.

⁷ Исраилда ирс тир белгенар са тайифадилай маса тайифадал гьалтун лазим туш. Исраилдин рухвайрикай гьар сада вичел бубайрилай гьалтай тайифадин ирс вичивди кьурай.

⁸ Исраилдин рухваяр чпин бубайрин ирсинин иесияр хьун патал, Исраилдин гьар са тайифада чпихъ ирс тир белгенар авай рушар чпин бубайрин тайифадик акатзавай тухумдин къене гъуьлуьз фирай.

⁹ Ирс са тайифадилай маса тайифадал гьалтун лазим туш. Исраилдин гьар са тайифади чпел ирс яз гьалтнавай а чил чпивди кьурай».

¹⁰ Целафгьадан рушари Реббиди Мусадиз гьикӀ эмир ганайтӀа, гьакӀ авуна.

¹¹ Магьла, Тирца, Гьагла, Милка ва Нуа, Целафгьадан рушар, чпин имидин рухвайриз гъуьлуьз фена.

¹² Абур Юсуфан хва Манашедин эвледрин тухумрин къене гъуьлуьз фена, ва абурун ирс абурун бубадин сихил акатзавай тайифадин кӀвачихъ галамукьна.

¹³ Реббиди Магьабдин дуьзенра, Ярдандин патарив, Еригьандин къаншарда Мусадин мецелай Исраилдин рухвайриз гайи эмирар ва къайдаяр гьа ихьтинбур я.