Mathiu 9 - Nakaran ut te Jesu Kristo 1902

¹ Neteruan le bot meukafugen, an neterua le nauanu tahan.

² An ahm ru, netakaros ieremim ker rakamis le palsi marua ton rakamel le nihmawa; an Iesu neterahm nuparhienan tenilar, netereni to ieremim rakamis le palsi, Neruk, agien, tehwaga tat taham kenosita.

³ An ahm ru, nerem kamatikun nevin netakani le nekin ilar, mama, Wus uk ramakar tat kam Wuhgin.

⁴ An Iesu neterhinatin nar nekin ilar rakahmo netereni, Retol nekimiar rakahmo nar retat le nekimiar?

⁵ Mero in ka irmeruk tokani, Tehwaga tat taham kenosita, wa tokani, Armig maliwak.

⁶ Mero to nakarhinatin Neri Ieremim resanen le ten uk to nositean tehwaga tat (an tereni to ierem rakamis le palsi), Armig mosit nihmawa taham muan le taham nimwa.

⁷ An neterermig muan le nimwa tahan.

⁸ Mero nahuto netakaihm netakamarigen, netakamani vivi Wuhgin ierem terofen nesanenan asul uk kam neremim.

⁹ An Iesu netersipe iken ka makavan, neterahm ieremim netigen Mathiu ramowata le nimwa te nuhwafugenan, an netereni ton, Aroupa io. An neterermig maroupen in.

¹⁰ An neterowata le nauganan imwa, an ahm ru, nerem kamerhwafugen mene nerem kamaroletat ribor karua mamaiwata ilar Iesu mene tan ieremim min.

¹¹ An Farisi min netakaihm netakani to tan ieremim min, Retol Ieremera temiar ramaugan ilar nerem kamerhwafugen mene nerem kamaroletat?

¹² Mero neterero netereni, Nerem kamarmiuh kasarolkeikeian doktor mero nerem kamaremis.

¹³ Mero aruan marhinatin moma kametueni le nar uk, Io iakolkeikei nolkeikeian mero resolan kama nuhwasigenan. Mero in ka iemesuean moma tiakuanin neremim ut mero noletat.

¹⁴ An netakarua ton neremim min te Jon mamani, mama, Retol kamar mene neremim min te Farisi min kamaimek, mero neremim min taham kasaimekan?

¹⁵ An Iesu netereni pen to ilar, Nereri neroean kamaisak loanian ieroe ramarik to ilar min? Mero nepenian terua ieroe kapirita to ilar; kapaimek loanian ka.

¹⁶ An ieremim ker to restilpenan noanverin nar ituga vi le niuh iroas; mero in ka ierem kamtilpen lan terosita mun le niuh an rapol raphapu puk aken.

¹⁷ An neremim kasaruipenan wain vi le nevige nar iroas; mero in ka raphapu nevige nar, an wain repier ita lan, an kapetaken nevige nar; mero takaruipen wain vi le nevige nar vi an ilau min kapuarik ut.

¹⁸ An in ramameni nar uk to ilar, an ieremera ker neterua ton mamohwak kam in meni, moma, Neruk beresuas repemis am uk towek, mero ua mehlaupen nelimam lan, an repemiuh.

¹⁹ An Iesu neterermig maroupen in, ilar tan ieremim min.

²⁰ An ahm ru, beravin ker nitan ramai le nu katilum katilum mekiu neterua le numatan neteriap nuhiefin nar rakava lan.

²¹ Mero in ka netereni le nekin, Rapol moma tiakiap am nar rakava lan, an iapos navitan.

²² Mero Iesu neterhwin mahm in netereni, Neruk, agien; nuparhienan taham kenol ut ik. An beravin ka kenol ut le aur ka.

²³ An Iesu neterua le nimwa te ieremera neterahm neremim kamahro noatetal, an nahuto kameikar ouloul, netereni,

²⁴ Arier, mero in ka beresuas resemisan mero ramapul, netakamailhiapninipus in.

²⁵ Mero kehnaliatou nahuto neterua imwa, neteros nelimin, an beresuas neterermig.

²⁶ An nausitoan tahan neterier le ten min ka.

²⁷ An Iesu netersipe iken makavan, an iemnou kiu netakamuaroupen in netakamuasak apam mamuani, Asitu le kamlau, ik Neri Devid.

²⁸ An neterua imwa an iemnou mil netikiava ton. An Iesu netereni to ilau, nekuani nuparhienan lak muoma iakasanen to nolan nar uk? netukuani ton, muoma, Ooh, Ieremera.

²⁹ An neteriap nemrin ilau, meni, Rolkoma nuparhienan temilau kenol kam kamilau.

³⁰ An nemrin ilau kenatita; an Iesu netereni hmahma to ilau, moma, Tenukuahm muoma ierimim ker tereshinatinan.

³¹ Mero netikiaier muausito in le ten min ka.

³² Netakarier an netakarir marua ton ieremim nekin rika nanumun tat ramarik lan.

³³ An nanumun tat kehnaliatou an ierem nekin rika reknamakar; an nahuto min netakamaisak mamani, mama, Kasahman nar ker rolmok le Israel.

³⁴ Mero Farisi min netakani, Le ieremera te nanumun tat min terhaliatou nanumun tat min.

³⁵ An Iesu ramavan le nihmawa min mene le nauanu min an mametikun le nimwa ahwak min tenilar, mamausito in nakaran ut te niko, an mamol ut neremim le netetan min mene le nemisan min.

³⁶ Mero neterahm nahuto min nekin neteramahma to ilar, mero in ka kamaivan tat an kamairumanin kama ship ierem terasig ilar rika.

³⁷ An netereni to tan ieremim min. Nemai le korn ribor mero nerem takaisum noanevin am.

³⁸ Mero in uk tenakaihwak kam Ieremera te korn moma terhalipa nerem takaisum le korn tahan.