Mathiu 8 - Nakaran ut te Jesu Kristo 1902

¹ An neteratite le touar, an nahuto puk min kairoupen in.

² An ahm ru, neterua ton ierem rakamis le leprosi, neteramohwak kam in meni, moma, Ieremera, takama nakolkeikei nakasanen to nolutan io.

³ An neterhwatuin nelimin miap in meni, moma Iakolkeikei, kenol ut ik. An ihwe am leprosi tahan kenol ut.

⁴ An Iesu neterenipen ton, Ahm ru, tenesenian to ieremim ker, mero uan mhin nubalakam to ierem le nuhwasigenan, mofen nofenan ka Moses rameni, mol hninatinan to ilar.

⁵ An neteruan Kaperneam, an sentiurion ker neterua ton.

⁶ Neteramehrapuk ton meni, moma, Ieremera, iolatkokun nar tahak rakamel imwa makamis le palsi, ramero asul nahmean.

⁷ Netereni ton, tiapuna mol ut in.

⁸ Mero sentiurion neteraram meni, Ieremera, iesavitan moma tenekua le mimwa tahak, mero ani am nakaran an iolatkokun nar tahak kapol ut.

⁹ Mero in ka io mun ierem kamol nowak, soldier min kamarol nowak, an tiakani to ker, moma, Uan, an teruan; an to ker mun, Ua, an in terua; an to iolatkokun nar tahak, Ol nar uk, an in terol.

¹⁰ An Iesu neterero neteramasak, neterameni to nerem kamairoupen in, Nuparhien tiakani to kamiar, iesahman nuparhienan ribor mok lan le nerem Israel.

¹¹ An tiakani to kamiar, neremim ribor tepasipen ibat mene paha an tepaiwata ilar Ebraham mene Aisak mene Jekob le niko le neai.

¹² Mero nereri niko tefhaliatou ilua le napinapan, iken nasaken mene nikisan nelutil.

¹³ An Iesu netereni to Sentiurion, Uan, rolkoma nemeni nuparhienan lan kenol kam ik. An iolatkokun nar kenol ut le aur ka.

¹⁴ An Iesu neterua le nimwa te Piter, neterahm inen nuain rakamel makamis le nelen.

¹⁵ An neteriap nelimin an nelen neterapas in, an neterermig mamol atkokun nar ton.

¹⁶ An lehnaiu reknua an netakarpuk marua ton nerem nanumun tat remarik le ilar, an neterhaliatou nanumun le nakaran, an mol ut petum nerem kamaremis.

¹⁷ Mero in ka moma reknet le nar kameni le Aisea profeta, moma, In ramos netetan min tetar mamos nemisan min tetar.

¹⁸ An Iesu neterahm nahuto ribor rauseluin in, an rameni moma takaruan le ten levinpen.

¹⁹ An ietikun ker neterua meni ton, moma, Ieremera, tiakaroupena ik le noanverin min petum ik tenekuan iken.

²⁰ An Iesu netereni ton, moma, Nihmawa te natipun rarik, an nemenuk le neai karol nimwan ilar, mero Neri Ieremim nihmawa tahan rika terehlaupen tenkapa iken.

²¹ An tan ieremim min ker netereni ton, moma, Ieremera, pas iakaupan muan merenum Tata.

²² Mero Iesu netereni pen ton, Aroupa io; pas nerem kamaremis takarenum nerem takaremis tenilar.

²³ An neteruan le bot an tan ieremim min netakamairoupen in.

²⁴ An ahm ru, nemetag asul neterermig le tehe, an bot remet le tehe, mero in ramamapul.

²⁵ An netakarua ton masig in mamani, mama, Ieremera, os miuh, tiakaimunum.

²⁶ An netereni to ilar, Retol nakamarigin, kamiar nuparhienan temiar resuas? An neterermig menhiau nemetag mene tehe, an neteremelinu asul.

²⁷ An neremim netakamaisak, mama, Ieremim etol an uk, ierem nemetag mene tehe kiaol nowan.

²⁸ An neteruan le neutai tehe le ten te nerem i Kadara, netikiava muail tosig in ieremim mil kiu nanumun tat ramarik le ilau, netikiaier iken kamrenumar iken, kamuabakaru aken, an ieremim ker to resaliwakan le suatu ka.

²⁹ An ahm ru, netikuasak apam, muoma, Netiakuatol ik, Neri Wuhgin? Neknua ietuk moma tenakofa nahmean kam kamlau paupan le nepenian?

³⁰ An isou to ilar numani nepukas ribor kamemarugan.

³¹ An nanumun tat min netakaihrapuk ton mamani, mama, Takama tenakhaliatou kamar, halipen kamar to numani nepukas.

³² An netereni to ilar, Aruan. An netakarier maruan to nepukas, an ahm ru, numani nepukas petum netakari etuatu to nikilhi nar maruan le tehe, maimunum le tehe.

³³ An nerem kamemaiugin ilar netakaikam maruan lauanu, netakani naremnar mene nar kenol le wus mil ka nanumun tat min kamemairik le ilau.

³⁴ An ahm ru, ilar min le nauanu netakarier maivan tosig in Iesu, netakaihm in, netakaihrapuk ton mama terier le ten tenilar.