Mathiu 4 - Nakaran ut te Jesu Kristo 1902

¹ An loanian ka Nanumun neterir Iesu to nar leluan le nofenofenan te Setan.

² An ramesauganan le nepenian 40 mene le lapin 40, an rememek oatisig.

³ An ierem terofenofen neterua meni ton, Takama ik Neri Wuhgin, ani moma kapiel min uk rapol bred lan.

⁴ Mero neteraram meni, moma, Kamrai, Ieremim to resarikan le bred am mero le nakaran min ransipe le nowa Wuhgin.

⁵ An Setan neterir in muan le nauanu ausim an neterehlau in le nuhiefin nar kamolpen le hnagen nimwa,

⁶ An netereni ton, Takama ik Neri Wuhgin am asgavin ru, mero in ka kamrai, In terepeni to nagelo min tahan lam, An tepales ik le nelimin ilar, Mero in ka moma tenesautinan nelikam le kapiel.

⁷ Iesu netereni ton, moma, Kamrai mun, Tenesofenofenan kam Ieremera taham Wuhgin.

⁸ An Setan neterir mun in muan to touar apam aken ker neteretikun le niko min te ten uk mene navitan tenilar.

⁹ An netereni ton, Naremnar min uk tiapofena kam ik takama tenakam mokwak kam io.

¹⁰ An Iesu netereni ton, Uan isou, Setan, mero in ka kamrai, Ik tenakahwak kam Ieremera taham Wuhgin, an in am karena tenakol atkokun nar ton.

¹¹ An Iaremis neterapas in, an ahm ru, nagelo min netakarua marol atkokun nar ton.

¹² An neterero Jon kenofen neterelelegpen i Kalili.

¹³ An neterapas Nazareth neterua mamarik Kaperneam iwaket to tehr le nepagnemri ten mil Zebiulon mene Naftalai.

¹⁴ Mero in ka moma reknet le nakaran kameni le Aiseia profeta, moma.

¹⁵ Ten Zebiulon mene ten Naftalai, Suatu to tehe, pen le Jordan, Kalili taha nerem Jentail,

¹⁶ Nerem kamaiwata le napinapan Kamaihm hnakakan asul, An nerem kamaiwata le ten mene natipisan le nemisan Hnakakan asul remet to ilar.

¹⁷ Loanepenian ka Iesu netererwowun mametikun mameni, Alelegra, mero in ka niko le neai reknua iwaket.

¹⁸ An neteramaliwak le nikali tehe i Kalili neterahm wus mil kiu ilau pian, Saimon ierem netigen Piter, mene Andru nohran, kamiaukakin nekupun le tehe; mero in ka wusmil kamiaos nam.

¹⁹ An netereni to ilau, Uoatisig in io an tiapol kamilau nikiaus neremim.

²⁰ An ihwe am netikuopas nekupun an muaroupen in.

²¹ An neteraliwak mun neterahm kiu mun ilau pian, Jems neri Zebedi mene Jon nohran, letui niko ihlel remin ilau kamuatik le nekupun tenilau; an neteraunin ilau.

²² An ihwe am netikuopas bot mene remin ilau an muaroupen in.

²³ An Iesu ramavan petum i Kalili min mametikun le nimwa ahwak tenilar, mamausito in nakaran ut le niko, an mamol ut netetan min mene nemisan min le neremim.

²⁴ An nausitoan tahan ramier le ten Siria petum; an netakarpuk marua ton nerem kamaremis min le netetan min mene nemisan min, nerem nanumun tat ramarik le ilar, nerem nikavean rahmo ilar, nerem kamaremis le palsi, an ramol ut ilar.

²⁵ An netakairoupen in nahutopuk min kamasipen i Kalili mene Dekapolis mene Jerusalem mene Judia mene pen le Jordan.