Mathiu 25 - Nakaran ut te Jesu Kristo 1902

¹ Loanian ka niko le neai tapol kama neberawasuas katilum katilum karos lamp tenilar marier moma takamail tosig ieroe.

² An katilum le ilar kamasailbakauan, an katilum le ilar kamailbakau.

³ Mero in ka ierem min kamasailbakauan karos lamp tenilar mesarosan nihin nar to ilar.

⁴ Mero ierem min kamailbakau netakaros nihin nar le nevige nar tenilar le lamp tenilar.

⁵ An ieroe ramemarik tahman, an ilar min netakamaipul ivuk an maipul aken.

⁶ An lapin lalukin nakaran ker netakaro, Ahm ru, ieroe, arua mamail tosig in.

⁷ An neberawasuas min ka netakairmig mamarol ut lamp min tenilar.

⁸ Mero ierem min kamasailbakauan netakani to ierem min kamailbakau, Arofa kam kamar nihin nar ker temiar, mero in ka lamp min temar reknapus.

⁹ Mero ierem min kamailbakau netakairam mamani, Mero resaukeran in kamar mene kamiar, mero aruan to nerem kamaiurai in maros nemrin temiar ker.

¹⁰ An netakaruan moma takaros nemrin. An ieroe neterua an ierem min kenarol ita tenilar netakaruan ilar min in to nauganan te neroean, an tapin kahmarigin.

¹¹ An netakaiuatisig marua ilar neberawasuas mun ka, mamani, Ieremera, Ieremera, atita to kamar.

¹² Mero neteraram meni, Nuparhien tiakani to kamiar, io iakatiktik kamiar.

¹³ Mero in ka arit, mero in ka nakatiktik nian ka mene aur ka.

¹⁴ Mero in ka rolkoma ieremim ker ravan le ten pusen ker, neteraunin nolatkokun nar tahan an neterofen kam ilar naremnar min tahan.

¹⁵ An neterofen talent katilum kam ker, an kiu kam ker mun, an karena kam ker mun, rolkoma nesanenan pusen pusen min tenilar ramofen am ilar, an neteruan le ten pusen ker.

¹⁶ An ihwe am ierem ramos talent katilum neteruan mamaurai, in an neteros mun katilum.

¹⁷ Rol mok lan ierem ramos kiu neteros mun kiu.

¹⁸ Mero ierem ramos karena neteruan neteril nemapten an merenum moni te ieremera tahan.

¹⁹ An nian ker isou aken ieremera taha nolatkokun nar ka neterua moma terero ilar.

²⁰ An ierem ramos talent katilum neterua neteros mun talent katilum, meni, Ieremera, ik namoa kam io talent katilum; ahm ru, iamos mun talent katilum mun le ilar.

²¹ Ieremera tahan netereni ton, Ravit, ik iolatkokun ut nar parhien, ik nemesanen le nar noanevin an io tiapol ik nakaremera le nar ribor. Ua le nagienan te Ieremera taham.

²² An ierem ramos talent kiu neterua netereni, Ieremera, namofa kam io talent kiu; ahm ru, iamos mun talent kiu mun le ilau.

²³ Ieremera tahan netereni ton, Ravit, ik iolatkokun ut nar parhien; ik nemesanen le nar noanevin an io tiapol ik nakaremera le nar ribor. Ua le nagienan te ieremera taham.

²⁴ An ierem ramos talent karena neterua meni, Ieremera, iakhinatin ik moma ik ierem iakio, tenakowai nowa nik nemesawan an muhwa fugen ierem nemeseklinan.

²⁵ An iakamagnin ik muan merenum talent taham le nemapten. Ahm ru, os taham nar.

²⁶ An tahan ieremera neteraram menipen ton, Ik iolatkokun tat nar mene ailufwa, ik nakhinatin moma tiakowai nowa nik iemasawan muhwafugen ierem iemeseklinan?

²⁷ Ramavit tonik moma tenakos moni tahak muan to nerem kamailipun moni, an io tiakua mos mun nar tahak mene nemrin.

²⁸ Mero arevita talent ton marofen kam ierem ramos talent katilum katilum.

²⁹ Mero in ka ierem ramos nar kapofen nar kam in an terepos asul, mero ierem teresosan nar, nar tahan kapevita ton.

³⁰ An tenakailakpen in iolatkokun tat nar le napinapan ilua. Iken nasakan mene nikisan nelutil.

³¹ An to nian ka Neri Ieremim terepua le navitan tahan, ilar nagelo min petum tahan, loanian ka terepowata le nar kamowata lan te navitan tahan.

³² An teparhwafugen pen ton neremim petum, an terepoti le ilar min rolkoma ierem ramasig ship teroti ship min le nani min.

³³ An terehlau ship min le nelimin matu, mene nani min le nelimin mul.

³⁴ An Ieremera terepeni to nerem kamailil pen le matu, Arua, nerem keikei te Tata, maros niko kenolita kam kamiar le nerwowunan te ten uk.

³⁵ Mero in ka iemakamek an nemarofa nauganan kam io, iemamowawa an nemarofa nu kam io, io ierem pusupus an nemarir io,

³⁶ iememai puiapuia am an nemarviu io, iemakamis an nemarua maretpa in io, iemakamel le nimwa iakis an nemarua tonio.

³⁷ An neremim ut tepairam ton loanian ka, mani, Ieremera, loanian peten iemaihm ik nememek an iemarofena nauganan kam ik, wa nemowawa an iemarofina nu kam ik?

³⁸ Loanian peten iemaihm ik ierem pusupus an iemarir ik, wa nemai puiapuia am an iemarviu ik?

³⁹ An loanian peten iemaihm ik nemakamis wa nemakamel le nimwa iakis an iemarua tonik?

⁴⁰ An Ieremera tereparam meni pen to ilar, Nuparhien tiakani to kamiar, mero in ka nemarol nar uk to ierem resuas aken le piak min uk, nemarol tonio.

⁴¹ An loanian ka terepeni to nerem kamailil le nelimin mul, Aruan isou tonio, kamiar nerem nakatat aken, le nekam lilen kamol to Iaremis mene nagelo min tahan:

⁴² mero in ka iememek an nemesarofean nauganan kam io, iemowawa an nemesarofean nu kam io:

⁴³ io ierem pusupus an nemesariran io, iememai puiapuia am an nemesarviuan io, iemakamis an iemakamel le nimwa iakis an nemesaruean maihm io.

⁴⁴ An loanian ka ilar mun tepairam mani, Ieremera, loanian peten iemaihm ik nememek wa nemowawa wa ierem pusupus wa namemai puiapuia am wa nemakamis wa nemakamel le nimwa iakis an iemesarol atkokun an nar tonik?

⁴⁵ An tereparam to ilar, meni, Nuparhien tiakani to kamiar, mero in ka nemesarolan nar uk to ierem resuas aken ker uk nemesarolan tonio.

⁴⁶ An ilar uk teparuan le netetan lilen, mero neremim ut le nemihwan lilen.