Mathiu 2 - Nakaran ut te Jesu Kristo 1902

¹ An loanian ka Iesu remait Bethlehem le ten Judia loanian Herod reremera, ahm ru, nerem kamailbakau kasipen ibat marua Jerusalem, mani,

² Petuan irem kuaih Ieremera taha Ju min? Mero in ka iemaihm mahau tahan ibat, an iakamarua mama tiakaihwak kam in.

³ An ieremera Herod neterero an tipil neterakahmo in mene ilar petum nerem Jerusalem.

⁴ Neterhwafugen pen neremera le nuhwasigenan mene nerem kamatikun te neremim, an netererhapuk pen to ilar moma Kristo kuaih petuan.

⁵ An netakanipen ton, Le Bethlehem le ten Judia; mero in ka kamrai mok lan le profeta,

⁶ An ik, Bethlehem, ten Judia, Nesesuasan le nekin neremera te Juda, Mero in ka resipena lam Ieremera, Ierem terepasig tahak neremim Israel.

⁷ An Herod neteraunin maniwan ilar nerem kamailbakau, neterhinatin pen to ilar nepenian peten mahau remet.

⁸ An neterhalipen ilar le Bethlehem, meni, Aruan, maitkoigen ut kova; ama neknaihm in nakarua mani tonio moma io mun tia puna mohwak kam in.

⁹ An netakairo ieremera ilar netakamaruan; an ahm ru, mahau ka kamaihm ibat neterampaupan in ilar merotis iken wusuas rakamel iken an neteramail.

¹⁰ An netakaihm mahau maigien le nagienan asul aken.

¹¹ An netakarua le nimwa netakaihm kova ilau Meri inen; an netakaram mamehwak kam in; an netakatita karam tenilar mamarofen kam in kold mene silver mene fragkinsense mene mer.

¹² An kameni to ilar le nemelaitan noma takasalelegpenan mun to Herod, an netakalelegpen mun imwan ilar le suatu pusen.

¹³ An netakamaruan, an agelo ker taha Ieremera neterua to Josef le nemelaitan meni, Armig an mir kova mene inen an makam muan Ijipt, an mamarik iken moma tiakani tonik; mero in ka Herod rametkoigen kova moma terhwapnin.

¹⁴ An neterermig mir kova mene inen neteruan Ijipt lapin. An neteramarik iken meroatis nemisan te Herod.

¹⁵ Mero in ka reknet le nakaran Ieremera rameni le profeta, moma, Le Ijipt iemaunin neruk.

¹⁶ An Herod neterahm moma nalbakau kamareuhiatin in, an niehma rametik aken, an neterhalipen neremim moma takarhwaphin petum kova i Bethlehem mene iken min le kova min ka kamaribor le nu kiu mene irwasuas min.

¹⁷ Loanian ka remet le nekaran kameni le Jeremaia profeta moma,

¹⁸ Nakaran kamero le Rema. Nasakan mene nerapan asul, Retsel ramasak to nererin, An teresero ravit an mero in ka kenarika.

¹⁹ An Herod neteremis an ahm ru, agelo ker taha Ieremera neterua to Josef le nemelaitan le ten Ijipt, meni,

²⁰ Armig mir kova mene inen muan le ten Israel, mero in ka nerem kamemaitkoigen kova mama takarhwapnin kenaremis.

²¹ An neterermig mir kova mene inen muan le ten Israel.

²² Mero neterero moma Arkileas remeremera i Judia mavinum le remin Herod, an neteragen to nuanan iken, an kameni ton le nemelaitan neterelegpen le ten i Kalili.

²³ An neterua mamarik le nauanu netigen Nazareth; mero in ka terepet le nakaran kameni le profeta min moma tepeni moma Ierem te Nazareth.