Mathiu 13 - Nakaran ut te Jesu Kristo 1902

¹ Loananian ka Iesu neterier imwa neteramowata le nikali tehe.

² An nahuto puk min netakarhwafugen ton, an neteruan le bot, an nahuto min kamailil le nemaklakel.

³ Neterameni naremnar to ilar le hnoan nakaran, moma, Ahm ru, ierem ravusus rier to nususan.

⁴ An ramusus nevin resas le nikali suatu, an nemenuk karua markinita.

⁵ An nevin resaspen iken kapiel iken, iken resosan nemapten ribor iken, an ihwe am neterevia, mero in ka resolan moma nemapten ipai.

⁶ An mit neteret, an ramkis in, an mero in ka nukin rika riknimer petum.

⁷ An nevin resas le neki nul kasik; an nul kasik ramibor muhwakamkaman.

⁸ An nevin resaspen le nemapten ut, an mowa in nowan, nevin 100, nevin 60, nevin 30.

⁹ Ierem rol nepagtelegen pas rero.

¹⁰ An tan ieremim min netakarua manipen ton, Retol nakakahmo nakaran kam ilar?

¹¹ An neteraram meni, Kenofena kam kamiar moma tenakarhinatin nowa iakis te niko le neai; mero kasofenan kam ilar.

¹² Mero ierem teros tokofen kam in an in teros asul; mero ierem teresosan taposita mun ton nar in ramos.

¹³ An iakahmo nakaran lan kam ilar mero in ka kamaihm mero kasaihman; an kamairo mero kasairoan, mesarhinatinan.

¹⁴ An le ilar reknet le nar Aiseia profeta remeni, moma, Le neroan tenakairo an tenesarhinatinan, An le nahman tenakamaihm an tenesarhinatinan.

¹⁵ Mero in ka neki nerem uk riakis, An nepagtelegen ilar repukam to neroan, An merhwatin nemrin ilar, Mama tesaihman le nemrin ilar, An mesairoan le nepagtelegen ilar, An mesarhinatinan le nekin ilar, An tesalelegan mun, An tiesolutan ilar.

¹⁶ Mero nemramiar keikei, mero in ka ramahm nar, an nepagtelegamiar keikei, mero in ka ramero nar.

¹⁷ Mero in ka nuparhien tiakani to kamiar, profeta min mene neremim ut kamarolkeikei mama takaihm nar nakamaihm, an kamesaihman; an mama takairo nar nakamairo, an kamesairoan.

¹⁸ Mero in ka airo hnoan nakaran te ierem ravusus.

¹⁹ Takama ierem ker terero nakaran le niko meshinatinan, ieremitat rua mosita nar kavusus le nekin. Inuk ierem kavusus le nikali suatu.

²⁰ An ierem kavusus iken kapiel iken, inuk ierem rero nakaran an ihwe am ros magien lan.

²¹ Mero nukin rika le nekin, mero in rarik tahman am; an netetan ker terua wa niehma le nakaran teret an ihwe am terapitetel.

²² An ierem kavusus le neki nul kasik, inuk ierem rero nakaran; an kagnagen le ten mene neweian te nauta ruhwakamkaman nakaran, an resowean in nowan.

²³ An ierem kavusus le nemapten ut, in uk ierem rero nakaran, an ramhinatin; ierem terowa parhien, an mowa in nowan nevin 100, nevin 60, nevin 30.

²⁴ Hnoan nakaran ker mun rameni to ilar, moma, Niko le neai rolkoma ierem rakavusus nowa nik ut le nasuman tahan.

²⁵ Mero neremim kamaipul, tahan tikimir rua mavusus nowa ter le neki nowa hwit, neterakavan.

²⁶ Mero reresin numalin mowa in nowan, an netakaihm ter mun.

²⁷ An nolatkokun nar te ieremim ka netakarua mani ton, Ieremera, ik nemesususan nowa nik ut le nasuman taham? Mero ramos ihia ter?

²⁸ An netereni to ilar, Tikimir ker ramol nar uk. An netakani ton, Mero in ka nakolkeikei kamar moma tiakaruan marevita ilar?

²⁹ Mero netereni, Kapa, mero to nakarevi ter marevipuken hwit mun kam ilar.

³⁰ Pas ilau kiten kuaiwas to nemeruean; an le nian te nemeruean tiapeni to nerem takairai, Paupan tenakarevi ter, an malis nahwin to nuvanakruan; mero tenakarhwafugen hwit le nimwa tahak.

³¹ Netereni mun hnoan nakaran to ilar, moma, Niko le neai rolkoma wiker i mastard iremim ramos musus le nasuman tahan.

³² Ierem iresuas le wiker min, mero terevia iribor le nik wasuas min mapol nik in, an nemenuk le neai takarua maiwata le nelimin.

³³ Netereni mun hunoan nakaran to ilar, Niko le neai rolkoma leven beravin ros metkauigen le nevige nar le flaur, an ruhwasilig flaur petum.

³⁴ An naremnar min uk Iesu rahmo nakaran lan kam nahuto; remeseniaman nar ker to ilar mero hnoan nakaran am.

³⁵ Mero in ka moma reknet le nakaran kameni le profeta, moma, Tiapoag le hnoan nakaran, Tiapeni nar kametkauigen le nerwowunan ten.

³⁶ An neterapas nahuto neteruan imwa, an tan ieremim min netakarua ton, mamani, moma, Ani to kamar nubalaki hnoan nakaran le ter le nasuman.

³⁷ An neteraram meni, Ierem ravusus nowa nik ut Neri Ieremim.

³⁸ An nasuman ten uk; an nowa nik ut ilar nereri niko; an ter nereri ieremitat.

³⁹ An tikimir ierem ramusus ilar Iaremis; an nemeruean naunin nian le ten uk; an nerem takairai nagelo min.

⁴⁰ Mero in ka rolkoma ter kenevita an kenuvanakru le nekam, rolmok lan tapol le naunin nian le ten uk.

⁴¹ Neri Ieremim terefhalipa nagelo min tahan kapaiuiak ita le niko tahan nar min ramol til rapitetel, mene nerem kamarol tehwaga tat.

⁴² An kafhepen ilar le nekam asul, iken nasakan mene nikisan nelutil.

⁴³ An neremim ut kapairoaip kama mit le niko te Remin ilar. Ierem rol nepagtelegen pas rero.

⁴⁴ Niko le neai rolkoma nar ut ker rakamel maniwan le nasuman, an ieremim ker terahm an retkauigen; an le nagienan tahan ruan maurai petum nar rakamos, an mos nemrin nasuman ka.

⁴⁵ Mun niko le neai rolkoma ierem ramaurai rametkoigen perl ut.

⁴⁶ An neterahm ker nemrin ribor, an ravan maurai etahun nar in ramamos, an mos nemrin.

⁴⁷ Mun niko le neai rolkoma nekupun kamausum in le tehe, an kakavus nam pusenpusen min lan.

⁴⁸ An takama reknet kani kariubat le nemaklakel; netakaiwata maiuiak ita iravit le nevige nar, an meilakin ita ieremitat.

⁴⁹ Tapol mok lan le naunin nian le ten uk; nagelo min teparua marosita neremim tat le neki neremim ut.

⁵⁰ An tepeilakpenin ilar le nekam asul, iken nasakan mene nikisan nelutil.

⁵¹ Neknarhinatin nar min uk wa kapa?

⁵² Netakani ton, mama, Ooh, An netereni to ilar, Mero in ka ietikun ierem kenol ieremim te niko le neai terol kama ierem ramos nimwa ierem ramos iatou le nauta tahan irvi mene iroas mene.

⁵³ An Iesu netereni petum hnoan nakaran min uk, neterier iken.

⁵⁴ An neterua imwanena neterametikun ilar le nimwa ahwak tenilar, an netakamaisak mamani, Was uk ramos ihia nalbakauan uk an nesanenan uk?

⁵⁵ Resolan moma neri karpenter uk? Resolan moma inen kama Meri? An pian Jems mene Josef mene Saimon mene Judas.

⁵⁶ An noinen min uk katar min? An wus uk ramos ihia nar min uk?

⁵⁷ Netakamaipitetel lan. Mero Iesu netereni to ilar, Profeta ierem kamsiai in mero resolan kama imwanena wa le tahan nimwa.

⁵⁸ An resolan narpuk ribor iken mero in ka kasanian nuparhienan lan.