Mathiu 11 - Nakaran ut te Jesu Kristo 1902

¹ An Iesu netereni etahun to tan ieremim min, netersipe iken muan mametikun mamausito le nauanu min.

² An Jon neterero le nimwa iakis nar Iesu ramol min, neterhalipen tan ieremim min meni ton,

³ Ik ierem rakava wa tiakamait‐koigen ierapusen?

⁴ An Iesu neteraram menipen to ilar, Aruan mani to Jon nar nemairo mamaihm.

⁵ Nemnou takaihm mun nar, nerem kamarevi tat takailiwak, nerem kamaremis le leprosi kenol ut ilar, nerem nepagtelegen ilar ralu takairo nar, nerem kenaremis kenos miuh ilar, an nakaran ut keneni to navantat.

⁶ An ierem keikei ierem teresapitetelan lak.

⁷ An nerem uk netakamaruan, an Iesu netererwowun meni to nahuto le Jon, Neta nemamaruan leluan moma tenakaihm? Nuig terkiukiu le nemetag?

⁸ Mero neta nemamaruan moma tenakaihm? Ieremim rameviu in le nar meruk? Ahm ru, nerem kamarviu ilar le nar meruk kamairik le nimwa te neremera.

⁹ Mero retol nemarier? Moma tenakaihm profeta? Oonh, tiakani to kamiar iribor le profeta.

¹⁰ Inuk ierem kamrai lan, Ahm ru, Io iehmalita tahak ieremim le nemram, Ierem terepol ut suatu taham paupan lam.

¹¹ Nuparhien tiakani to kamiar, le neki neremim neberavin takaruaih ilar ker teresetietan kama Jon ierem ramol nebaptisoan; mero ierem iresuas aken le niko le neai iribor lan.

¹² An le nepenian te Jon ierem ramol nebaptisoan meroatis le nian uk towe niko le neai kenos ausik, an neremim ausikausik takaros le nesanenan.

¹³ Mero in ka profeta min mene nowa asul kamatikun mairoatis le Jon.

¹⁴ An takama nakarolkeikei tenakairo, inuk Ilaija ierem terepua.

¹⁵ Ierem ros nepagtelegen moma terero pas rero.

¹⁶ Mero tiakani nerem uk karol kama neta? Karol kama kova min kamaiwata imaim.

¹⁷ Nerem takaiunin tenilariel min mamani, mama, Iakamahil nar to kamiar, mero kamiar nemeseimakoan; iakamaisak mero kamier nesaisakan.

¹⁸ Mero in ka Jon rava mesauganan mesamnuman, an netakani moma nanumun tat ramarik lan.

¹⁹ Neri Ieremim rava mamaugan mamamnum, netakani, Aihm, iauganipuk mene iamnumpuk wain, taniel nerem kamerhwafugen mene noletat. An nalbakauan kehninatin le tahan nolan.

²⁰ An netererwowun mametat nauanu in ramol asul narpuk tahan iken, mero in ka kasalelegan.

²¹ Awe tonik, Korazin! Awe tonik, Bethsaida! Mero in ka takama narpuk kamol le kamilau kapol i Tair mene Saidon to kapialeleg nuhu marviu ilar le nar ausikausik mene kaluk le nemrau.

²² Mero tiakani to kamiar, repavit to Tair mene Saidon le nepenian te nuhwapraian mero reptat to kamilau.

²³ An ik, Kaperneam, teplesit ik le neai? Tenepatite le nekam asul. Mero in ka takama narpuk kamol lam kapol i Sodom in ramemarik to nian uk.

²⁴ Mero tiakani to kamiar, repavit to ten i Sodom le nian te nuhwapraian mero reptat tonik.

²⁵ Loanian ka Iesu neteraram meni, Tiakani vivi ik, Tata, Ieremera le neai ne ten, mero in ka nemetkauigen nar min uk to nalbakau mene nerem kamarhinatin nar an metikun ilar to kova.

²⁶ Oooh, Tata, mero in ka nakolkeikei moklan.

²⁷ Naremnar kamofa kam io le Tata, an ieremim ker to reshinatinan Nerin mero in am Remin; an ieremim ker reshinatinan Remin mero in am Nerin, an ierem Nerin rolkeikei moma teretikun in lan.

²⁸ Arua tonio kamiar muka nerem kamaisum mene nerem kamaros narpukam, an io tiapofena namigan kam kamiar.

²⁹ Arosit tahak kasulia to kamiar, an maros netikunan tonio; mero in ka io iakmeruk mavit le nekiuk; an neparos namigan le nanumamiar.

³⁰ Mero in ka tahak kasulia remeruk, an tahak katipa ralukaluk.