Mark 9 - Nakaran ut te Jesu Kristo 1902

¹ An netereni to ilar, Nuparhien tiakani to kamiar, nevin ikenuk le nerem kamailil uk ierem min tepesairouan nemisan meroatis nian tepaihm niko te Wuhgin rua le nesanenan.

² An nian katilum makarena neterua muan an Iesu neteros Piter mene Jems mene Jon, neterir ihlel met muan le towar apahm ilar pusen am; an neterhwapen pusen le nemrin ilar.

³ An nar rakameviu in lan neteramselsel metuan aken, moma ierem ramol napen le nemapten retiktik am nolan retuan maka lan.

⁴ An Ilaija mene Moses netikiaier pen to ihlel, an ilau kamuakar kam Iesu.

⁵ An Piter neteraram meni to Iesu, Ieremera, ravit to katar takamairik uk, an pas tiakhalol nimwa ulul kisil, ker taham mene ker taha Moses mene ker taha Ilaija.

⁶ Mero in ka retiktik am nar ramaram, mero in ka kahmaligen.

⁷ An napua ker neteratite meviu ilar, an nakaran neterier le napua, In uk Neruk ierem keikei, aiteleg kam in.

⁸ An ihwe am netakhaleitait, meshaihman mun nar ker mero Iesu am mene in ka ihlel.

⁹ An netakamaitite le towar, an neterhwag kam ihlel moma teshanian to nar ker nar min kahmaihm, mero le nian Neri Ieremim terepermig mun le neki nerem kamaremis.

¹⁰ An nekin ihlel neterakahmo nakaran ka, netakhaiahrapuk to ihlel min hmama neta nermigan mun le neki nerem kamaremis.

¹¹ An netakhaihrapuk ton mahmani, Nerem kamatikun kama Ilaija terakeikei maupan mua.

¹² An netereni to ihlel, Nuparhien Ilaija teraupan mua, mol ut petum nar; an kametuarai le Neri Ieremim moma tereperou asul nahmean an tepeseniapkisan.

¹³ Mero tiakani to kamiar moma Ilaija reknua, an kenarol mun ton naremnar min karolkeikei, rolkoma kamrai lan.

¹⁴ An netakarua to tan ieremim min, netakaihm nahuto puk kailil elauelau in ilar, mene nerem kamatikun kameihrapuk to ilar.

¹⁵ An ihwe am nahuto petum netakaihm in, an nanumun ilar neterakamuka, an netakarietkin marua ton mameikar vi kam in.

¹⁶ An netererhapuk to ilar, Neta nemeihrapuk to ilar.

¹⁷ An ker le nahuto neteraram ton, Ietikun, iemles neruk mua tonik, nanumun tat ierem retiktik nakaran ramarik lan.

¹⁸ An iken min ramir in iken ramahigin rakamam, an hninoan retkatin metkatin, an ramkis nelun, an mamopou ena; an iemameni to tam ieremim min moma takahiliatou, mero kasaisanenan.

¹⁹ An neteraram to ilar mameni, Kamiar nepsen neremim nuparhienan temiar rika, tohnan tiapamarik to kamiar? Tohnan tiakpas am kamiar? Ir ua tonio.

²⁰ An netakarir marua ton, an neterahm in an ihwe am nanumun tat neterhapu puk in, an neteram le nemapten marpiko mamavan, an hninoan retkatin metkatin.

²¹ An netererhapuk to remin, Nian kuhu nar uk rua ton? An netereni, Le nesuasan tahan.

²² An ian min ramelakpen in le nekam mene le nu moma terhwapnin. Mero takama nakasanen to nolan nar ker asak in kamar masitu le kamar.

²³ An Iesu netereni ton, Takama nakasanen? Naremnar min tapol to ierem tereni nuparhienan lan.

²⁴ Ihwe am remi wusuas neterasak apahm mameni, Tiakani nuparhienan lam. Asitu le nuparhienan apou tahak.

²⁵ An Iesu neterahm nahuto kamari was, neterenhiau nanumun tat mameni ton, Ik nanumun ietiktik nakaran mene ialu, tiakani tonik, ier lan mesuenan mun lan.

²⁶ An neterasak apahm mahmapu puk in mamier lan. An neterol kama ierem reknemis, an neremim min ribor kama in reknemis.

²⁷ Mero Iesu neteros nelimin muit, an neterermig.

²⁸ An neterua imwa an tan ieremim min netakaihrapuk ton ilar pusen am, mama, Retol kamar iesaisanenan to hnaliatouan?

²⁹ An netereni to ilar, Nar mok lan to resieratouan mero in am ka le nahwakan.

³⁰ An netakarier iken ka, netakarua marier Kalili; an resolkeikeian moma nar ker terhinatin.

³¹ Mero in ka rametikun tan ieremim min, an netereni to ilar, Neri Ieremim kenauraipen le nelimi neremim, an teparhwapnin in. An kinhwapnin nian kisil reknua muan terepermig mun.

³² Mero kamesarhinatinan nenian, an kamarigen to nehrapukan in.

³³ An netakarua Kaperneam, an neteramowata imwa neterehrapuk to ilar, Neta nakamani le suatu?

³⁴ Mero netesaikaran, mero in ka kamameikar kam ilar min le suatu mama pehe ierem iribor?

³⁵ An neterowata neteraunin nerem katilum katilum mekiu, netereni to ilar, Takama ieremim ker rolkeikei moma teraupan, in terepol ierem iroatisig aken le ilar min mene iolatkokun nar to lar min.

³⁶ An neteros kova mep rail ilukan le nekin ilar, an neterelesit le nelimin netereni to ilar,

³⁷ Ierem terir kova ker maka lan le netigok in rir io. An ierem terir io resiran io mero ierem rehmalipa io.

³⁸ Jon neteren ton, Ietikun, iemaihm ieremim ker rehmaliatou nanumun tat le netigam; an iameinhiau in mero in ka reseroupean kamar.

³⁹ Mero Iesu netereni, Teneseinhiauan in, mero in ka resolan moma ieremim ker terol narepuk le netigok mamakar tat hwaihwai kam io.

⁴⁰ Mero in ka ierem resoletetan le katar rasitu le katar.

⁴¹ Mero in ka ierem terofena nevigenar le nu kam kamiar to namnuman, mero in ka kamiar neremim taha Kristo min, nuparhien tiakani to kamiar terepeseluean parhien in nemrin.

⁴² An ierem terol rapitetel ker le iresuas min uk kamani nuparhienan lak, repavit ton moma takarupen kapiel asul le nemulkenuan an kapelakiatou in le tamite.

⁴³ An takama nelimam ramol ik nakamapitetel, arakru; ravit tonik tenekuan le nemihwan le nelimam karena, mero retat le neliman kiten mil tenekuan le nekam, nekam lilen.

⁴⁴ Iken silet tenilar resemisan, an kasauninan nekam.

⁴⁵ An takama nelikam ramol ik nakamapitetel, arakru; ravit tonik tenekuan le nemihwan le nelikam karena, mero retat le nelikam kiten mil tepelakpen in ik le nekam.

⁴⁶ Iken silet tenilar resemisan, an kasauninan nekam.

⁴⁷ An takama nemram ramol ik nakapitetel alakin iatou; ravit tonik tenekuan le niko te Wuhgin le nemram karena, mero retat le nemram kiu tepelakpen in ik le nekam.

⁴⁸ Iken silet tenilar resemisan, an kasauninan nekam.

⁴⁹ Mero in ka neremim petum kapaiute le nekam.

⁵⁰ Nigal ravit, mero terama nigal rier lan, tapol ut le neta? Aros nigal le nekimiar mamairik le nemelinuan to kamiar min.