Mark 8 - Nakaran ut te Jesu Kristo 1902

¹ Loanian ka nahuto ramibor mun, an kasarosan nar takarkin, an neteraunin ton tan ieremim min, netereni to ilar.

² Nekiuk rasakin nahuto mero in ka kenamairik tonio nian kisil, an kasarosan nar takarkin.

³ An takama tiakhalita ilar kaimek to nar imwan ilar, tepaipou le suatu; an nevin le ilar kamasipen isou.

⁴ An tan ieremim min netakairam ton, Ieremim ker teretuaugan neremim uk le bred ikenuk leluan?

⁵ An netererhapuk to ilar, Bred kuhu to kamiar? An netakani, Katilum mekiu.

⁶ An netereni to nahuto moma takaiwata le nemapten: an neteros bred katilum mekiu, mameni vivi, netererkahl, mamofen kam tan ieremim min moma takarofen, an netakarofen kam nahuto.

⁷ An kamaros mun nam asuas nevin, an neterakar vi kam ilar, netereni moma takarofen mun ilar.

⁸ An netakarugan marhepus, an netakaruaipen mun nemusmusin min ierem min rowau le karam katilum mekiu.

⁹ An ilar kama 4,000, an neterhalita ilar.

¹⁰ An ihwe am neteruan le bot ilar tan ieremim min neterua le ten Dalmanutha.

¹¹ An Farisi min netakarier marua, an netakarwowun mameihrapuk ton, an netakaihrapkinpen ton nimtatin le neai, mamarofenofen kam in.

¹² An neteramigalhipuk le nanumun mameni, Retol nepsen neremim uk kameihrapkin nimtatin? Nuparhien tiakani to kamiar, nimtatin tepesofenan kam nepsen neremim uk.

¹³ An neterapas ilar, neteruan mun le bot, muan le televinpen.

¹⁴ An kamailuin nosan bred, an kasarosan to ilar min le bot, mero in am karena.

¹⁵ An neterhwag kam ilar mameni, Aihmena, amairouena kamiar to leven taha Farisi min mene leven taha Herod.

¹⁶ An netakaikar kam ilar min, mero in ka kamesarosan bred.

¹⁷ An neterhinatin netereni to ilar, Retol nakameikar mero in ka nesarosan bred? Kamiar nakamatiktikena mesarhinatinan? Neknarol nekimiar riakis?

¹⁸ Nemaros nemramiar mesaihman? An nemaros nepagtelegemiar mesairouan? An nekimiar reshoan?

¹⁹ Loanian ka iemerkahl bred katilum le neremim 5,000, karam kuhu remet le nemusmusin nemaiuiak? Netakani ton, Katilum katilum mekiu.

²⁰ An loanian iemerkahl bred katilum mekiu le neremim 4,000, karam kuhu remet le nemusmusin nemaiuiak? Netakani ton, Katilum mekiu.

²¹ An netereni to ilar, Nesarhinatinan towe mene?

²² An netakarua Bethsaida. An netakarir ierem nemrin rou marua ton, mamaikeikei kam in mama teriap.

²³ An neteros nelimi ierem nemrin rou neterir iatou le nauanu; neteragh le nemrin, mamehlau nelimin lan, netererhapuk ton, Nakamahm nar wa?

²⁴ An neteretaget mameni, Iakamahm neremim, mero in ka iakamahm ilar kama nik min kamailiwak.

²⁵ An neterehlau mun nelimin le nemrin, an neteramahm ena, an kenol ut, an neterahm naremnar min hrakak.

²⁶ An neterhalipen rakavan imwan, mameni, Tenesuenan lauanu.

²⁷ An Iesu neterier, ilar tan ieremim min, maruan le nauanu min Sesaria Filipai. An le suatu netererhapuk to tan ieremim min, maruan le nauanu min Sesaria Filipai. An le suatu netererhapuk to tan ieremim min mameni to ilar, Neremim kama io fe?

²⁸ An netakani ton, mamani, Jon ierem ramol nebaptisoan, an nevin kama Ilaija, mero nevin kama ker le profeta min.

²⁹ An netererhapuk to ilar, Mero kamiar nakama Io fe? Piter neteraram mameni ton, Ik Kristo.

³⁰ An neterenhiau ilar moma tesanian in to nar ker.

³¹ An netererwowun mametikun ilar moma, Neri Ieremim terakeikei merou nahmean min ribor, an kapas le nerem asul mene neremera le nuhwasigenan mene nerem kamatikkun, an kuhwapnin, an mermig mun le nian ierem rol kisil.

³² An netereni apu nakaran ka. An Piter neteros in netererwowun mamenhiau in.

³³ Mero neterhwin neterahm tan ieremim min, neterenhiau Piter, mameni, Ua muan le nematak, Setan, mero in ka nekim reshoan nar taha Wuhgin, mero nar taha neremim.

³⁴ An neteraunin ton nahuto, ilar tan ieremim min, netereni to ilar, Takama ieremim ker rolkeikei moma teroatisig in io, pas rapas tehwaga tahan, an mosit nik aluauin tahan, an meroupa io.

³⁵ Mero in ka ierem rama teros miuh atu in, terepetaken atu in, mero ierem teretaken nemihwan tahan tonio mene to nakaran ut, terepos miuh in.

³⁶ Mero in ka ravit to neta to ieremim ker terama teros petum ten uk mepetaken nemihwan tahan?

³⁷ Mero in ka neta ieremim terofen mos nemri nemihwan in tahan?

³⁸ Mero in ka ierem terepaulis in io mene nakaran tahak le nepsen neremim ouloul mene retat uk, Neri Ieremim terepaulis in mun in le nian terepua le nevitan taha Remin mene agelo ausim min.