Mark 6 - Nakaran ut te Jesu Kristo 1902

¹ An neterier iken, an neterua imwanena, an tan ieremim min netakamairoupen in.

² An nian ausim neterua, netererwowun mametikun le nimwa ahwak; neremim nevin netakairou netakamaisak ton mamani, mama, Wus uk ramos ihia nar min uk? An neta nalbakauan kenofen kam wus uk, mene nesanenan min uk kamol le nelimin?

³ Resolan moma wus uk karpenter, neri Meri, mene pia Jems mene Joses mene Judas mene Saimon? An resolan moma noinen uk katar min? An netakaipitetel lan.

⁴ An Iesu netereni to ilar, moma, Resolan moma kasaniapkisan profeta mero imwanena mene le neki neraman mene le nimwa tahan.

⁵ An riakis ton moma terol narepuk iken, mero ramehlaupen nelimin le neremim nowanevin kamaremis, mamol ut ilar.

⁶ Neterasak mero in ka nuparhienan tenilar rika. Neterakavan le nauanu iken min mametikun.

⁷ An neteraunin ton tan ieremim min katilum katilum mekiu, an netererwowun mahmaliatou ilar kiu kiten, an neterofen kam ilar nesanenan to nanumun tat min.

⁸ An netereni to ilar moma tesarosan nar ker to suatu, mero kasikin am tesarosan bred wa karam wa mani le katouf.

⁹ Mero takaruan le nelikin ilar kameviu, an, Tenesarviuan kamiar le kot kiu.

¹⁰ An netereni to ilar, Takama iken ker nakaruan le nimwa ker, amairik iken mairoatis nian teneparier iken.

¹¹ An takama nauanu ker resiran kamiar mesairouan kamiar, takama tenakarier iken, ahipel atagatag nemapten lahau le nelikimiar to ilar.

¹² An netakarier mamatikun mama neremim takaleleg.

¹³ An netakahiliatou nanumun tat min nevin, an netakatepi nerem kamaremis nevin le nihinar, mamarol ut ilar.

¹⁴ An ieremera Herod netererou, mero in ka netigen kehninatin, an netereni moma, Jon ierem ramol nebaptisoan reknermig le neki nerem kamaremis, an mero in ka le nar uk nesanenan min uk kamarol nar lan.

¹⁵ Mero nevin netakani mama, In Ilaija; an nevin netakani mama, In profeta kama ker le profeta min.

¹⁶ Mero Herod netererou netereni, Jon ierem iemerakru tenkapa in reknermig.

¹⁷ Mero in ka Herod in atu rehmal ruan mehiapatin Jon kalis kahlau le nimwa iakis, mero in ka le Herodias nuai Filip nohran mero in ka ramir in.

¹⁸ Mero in ka Jon rameni to Herod, moma, Resmatuan tonik moma tenekir nuai nohram.

¹⁹ An Herodias neteramakin Jon, an rolkeikei moma terhwapnin in, an riakis ton.

²⁰ Mero in ka Herod ramagnin Jon mero in ka rhinatin moma in ieremim matu mausim, an neteramahmena in, an metererou in, an nekin neteramol tipil kam in, an netererou in le nagienan.

²¹ An nian ut neterua, an le nian te naitan tahan Herod neterol nauganan to neremera tahan mene neremera le soldier min mene nerem asul le Kalili.

²² An beresuas, neri Herodias, neterua mamako, an neterol ut neki Herod mene nerem kamaiwata ilar min to nauganan. An ieremera netereni to beresuas, Ahrapkinpa tonio nar nakolkeikei an tiapofena kam ik.

²³ An neteros nowanavel ton, Takama tenakahrapkinpa nar ker tonio, tiapofena kam ik, meroatis takeri niko tahak.

²⁴ An neterier mameni to inen, Tiakahrapkinpen neta? An netereni, Tenkapa Jon ierem ramol nebaptisoan.

²⁵ An ihwe am neteruan hwaihwai to ieremera netererhapuk mameni, Iakolkeikei moma towek tenakofa kam io tenkapa Jon, ierem ramol nebaptisoan, le nevigenar.

²⁶ An ieremera nekin neteramahma puk aken, mero in ka le nowanavel min tahan mene nerem kamaiwata ilar min to nauganan, resolkeikeian moma terenhiau in.

²⁷ An ihwe am ieremera neterhalipen soldier ker, netereni ton moma teros tenkapa mua. An neteruan merakru tenkapa le nimwa iakis, an neteros tenkapa mua le nevigenar.

²⁸ An neterofen in kam beresuas, an beresuas neterofen in kam inen.

²⁹ An tan ieremim min netakairou netakarua maros nubalakin, an netakaihlau in le nepag.

³⁰ An apostelo min netakarhwafugen ilar min to Iesu, an netakaiusito in kam in naremnar min ilar kamarol mene nar min alar kamatikun.

³¹ An netereni to ilar, Arua kamiar pusen am to nar leluan maimig tahman iken. Mero in ka neremim ribor kamarua mamaruan, an ilar kasarosan nian resolan moma to nauganan.

³² An netakaruan le bot to nar leluan ilar pusen am.

³³ An neremim netakaihm ilar kamaruan, an nevin netakarhinatin ilar, an netakaribat marhwafugen iken kamasipe le nauanu min, an netakaiupan in ilar marua.

³⁴ An neterier neterahm nahuto ribor, an nekin neterasak in ilar, mero in ka karol kama sip min kasarosan ierem terasig ilar; an netererwowun mametikun ilar le nar min ribor.

³⁵ An neterapinap tan ieremim min netakarua ton mamani, mama, Nar leluan uk, an raknapinap.

³⁶ Halita ra ilar moma takaruan le neki ten mene nauanu iken min uk maros to ilar nemri nar takarkin.

³⁷ Mero neteraram mameni to ilar, Kamiar arofen kam ilar nar takarkin. An netakani ton, Tiakaruan maros nemri bred le peni 200, marofen kam ilar takarkin?

³⁸ An netereni to ilar, Bred kuhu nakaros? Aruan ru maihm. An netakarhinatin netakani, Katilum mene nam kiu.

³⁹ An netereni to ilar moma neremim petum takaiwata le nelin pusen pusen min le numanar mira.

⁴⁰ An netakaiwata le nelin min nevin 100, nevin 50.

⁴¹ An neteros bred katilum mene nam kiu, neteretaget le neai mameni vivi, an netererkahl bred, neterofen kam tan ieremim min moma takarofen kam ilar, an neteroti nam mil le ilar min.

⁴² An ilar petum netakarugan marhepus.

⁴³ Netakaiuiak nemusmusin karam katilum katilum mekiu karet, mene le nam.

⁴⁴ An nerem kamarkin bred ilar neremim aken 5,000.

⁴⁵ Ihwe am neterakeikei kam tan ieremim min moma takaisua le bot, maiupan maruan le televinpen to Bethsaida, mero in terefhaliatou nahuto.

⁴⁶ An neterauietuin ilar, neteruan le towar moma terahwak.

⁴⁷ An lehnaiu neterua an bot ramarik le neluki tehe, an in pusen am le ten.

⁴⁸ An neterahm ilar kamailekutamta le nasuean mero in ka kamatik etuatu nemetag, an le naitan ierem rol kuer lapin neterakava to ilar mamaliwak le tehe, an neterama terapita le ilar;

⁴⁹ Mero netakaihm in ramaliwak le tehe, netakama in nanumutil, an netakamaisak apahm.

⁵⁰ Mero in ka ilar petum kamaihm, an tipil neterakahmo ilar. An ihwe am neterakar pen le ilar, an netereni to ilar, Aigien, Io apa, asarigenan.

⁵¹ Neteret muan to ilar le bot; nemetag neteram; an nanumun ilar neterakamuka aken le ilar min.

⁵² Mero in ka kamesarhinatinan le bred; mero nekin ilar remiakis.

⁵³ An netakareukafugen marua le ten Kenesaret, an netakaihlau us.

⁵⁴ An netakaruat le bot, an ihwe am neremim netakarhinatin in.

⁵⁵ An netakamari akmakam le ten petum ka, an netakarwowun mamarpuk nerem kamaremis le nihmawa marua iken kamairou mama in iken.

⁵⁶ An iken min petum ramakavan iken, le nauanu wa le nauanu asul, wa le ten, ilar kamahituk nerem kamaremis imaim; an netakamaikeikei kam in mama to kariap am nuhiefi nar rakava lan; an nerem kamariap in kenol ut petum ilar.