Mark 4 - Nakaran ut te Jesu Kristo 1902

¹ An netererwowun mun mametikun le nikali tehe. An nahuto puk aken netakarhwafugen ton, an netereukepen le bot, mamowata le tehe. An nahuto petum netakailil ibat le nikali tehe.

² An neterametikun ilar le nar min ribor le hnoa nakaran min, an netereni to ilar le netikunan tahan,

³ Aiteleg in; Aihm ru, ierem ravusus rier to nususan.

⁴ An le nususan nevin neteresas pen le nikali suatu, an nemenuk netakarua markinita.

⁵ An nevin neteresas pen le nemapten kapiel ribor lan, iken resosan nemapten ribor iken. An ihwe am revia mero in ka resosan nemapten ipai iken.

⁶ An mit neteret, an neterauke; an mero in ka nukin rika, reknimer.

⁷ An nevin neteresas pen le neki nul kasik, an nul kasik neterevia muhwakamkamun, an resowean in nowan.

⁸ An nevin neteresas pen le nemapten ut, neterowa in nowan, ramibor mamol nahuto, neterowa in nowa, ker 30 mene ker 60 mene ker 100.

⁹ An netereni, Ierem ramos nepagtelegen moma tererou, pas rerou.

¹⁰ An in ramarik pusen am, an nerem kamairoupen ilar nerem katilum katilum mekiu netakaihrapuk ton le hnoa nakaran.

¹¹ An netereni to ilar, Kenofena kam kamiar nowa iakis le niko te Wuhgin, mero nerem ilua naremnar kamol kam ilar le hnoa nakaran,

¹² Moma takaihm le nahman, mero tesaihman; an takairou le nerouan, mero tesarhinatinan, mama tesalelegan mun an kaposita tehwaga tat tenilar.

¹³ An netereni to ilar, Nakasarhinatinan hnoa nakaran uk? An tenakaituarhinatin hnoa nakaran min?

¹⁴ Ierem ravusus, in ravusus nakaran.

¹⁵ An ilar uk nerem le nikali suatu, iken kavusus nakaran iken, an takama kenairou, ihwe am Setan rakava mosita nakaran kamusus le ilar.

¹⁶ An rolmok lan ilar uk nerem kamusus le nemapten kapiel ribor lan nerem kairou nakaran, an ihwe am karos le nagienan.

¹⁷ An kasarosan nukin le nekin ilar, mero kamairik tahman am, an takama nahmean terua wa niehma to nakaran ihwe am kamaipitetel.

¹⁸ An nevin mun nerem kamusus le neki nul kasik, ilar uk nerem kamairou nakaran.

¹⁹ An kagnagen te ten uk mene neiwean te nauta mene nolkeikeian nar pusen min nevin rua muhwakamkamun nakaran, an retiktik nowean.

²⁰ An ilar uk nerem kamusus le nemapten ut, nerem kamairou nakaran, an kamaros, an kamarowa in nowan ker 30, mene ker 60, mene ker 100.

²¹ An netereni to ilar, moma, Lamp kenos kava moma takahlau lahau le nevigenar, wa lahau le tultul, resolan moma takahlau le neliki nisia?

²² Mero in ka resolan moma nar ker kametkauigen mero moma taposiatou le hnakakan; an resolan moma nar ker kamol maniwan mero moma terua le hninatinan.

²³ Takama ieremim ker ramos nepagtelegen moma tererou, pas rerou.

²⁴ An netereni to ilar, Aihmena nar nakamairou; le nahmaukeran kamiar nakamaihmauker lan tepahmauker lan kam kamiar, an tapofena mun kam kamiar.

²⁵ Mero in ka ierem ramos nar, kapofen kam in; an ierem resosan, kaposita ton nar mun ramos.

²⁶ An netereni, Niko te Wuhgin rolkoma ierem ravusus nowa nik le nemapten.

²⁷ An rapul an mait lapin mene le nian, an nowanik terevia an mibor, in retiktik am moma retol.

²⁸ Nemapten ramowa atu in nowan, paupan rol numalin, an mopol nevilegen an neteraugin nisen ret le korn.

²⁹ An takama nowa nik termerua, ihwe am terhalipen nau iko, mero in ka nemeruean reknua.

³⁰ An netereni, Takani le niko te Wuhgin moma rolkoma neta? Wa takani le hnoa nakaran ierem petuan?

³¹ In rolkoma kurkur i mastard, ierem kavusus le nemapten iresuas le wiker min kamusus le nemapten,

³² Mero takama kenusus revia an repibor aken le nik wasuas min, an neterol nelimin min ribor, an nemenuk le neai takaiwatatigan ratipis to ilar.

³³ An le hnoa nakaran min ribor rol mok lan neterameni nakaran to ilar, kama ilar kaisanen to nerouan.

³⁴ An remesenian nar ker to ilar mero in am le hnoa nakaran, mero rameni nubalaki nakaran min to tan ieremim min ilar pusen am.

³⁵ An nian ka lehnaiu reknua netereni to ilar, Pas karuan le televinpen.

³⁶ An netakaipas nahuto, netakarhin am maka lan le bot, an bot nevin mun ilar min.

³⁷ An nemetag asul neterail, an peau remraker mua makavan le bot, an bot rakamet.

³⁸ An in atu ramakamel le haf mamapul mameluga; an netakasig in, mamani ton, Ietikun, ik neseniapkisan moma takaremis?

³⁹ An neterait, neterenhiau nemetag, netereni to tehe, Pas ra, maskiukiuan. An nemetag neteram, an neteremelinu aken.

⁴⁰ An netereni to ilar, Nakamarigen tona? Nemesarosan nuparhienan towe mene?

⁴¹ An netakamarigen le naginan asul, an netakani to ilar min, Mero pehe uk moma memetag mene tehe kamiaol nowan?