Mark 16 - Nakaran ut te Jesu Kristo 1902

¹ An nian ausim neterua muan, Meri Makdalini mene Meri ine Jems mene Salome netakhalos nemri nar nemieuan ravit hmama takhatepi lan.

² An lakapnipin aken le nian aupan le nahwakan ka netakhalua to nepag mit reknet.

³ An netakhani to ihlel min, Pehe terhwinita kapiel le nausilua te nepag to katel?

⁴ An netakhaletagpen hmaihm kapiel kinhwinita, mero in ka ribor aken.

⁵ An netakhalua imwa le nepag, netakhaihm temalua ker ramowata le neutain matu kameviu le napen tuan, an nanumun ihlel neterakamuka.

⁶ An netereni to ihlel, Pas nanumamhiel teresikean, nakahmaitkoigen Iesu le Nasareth ierem kamaruit; reknermig mun; in rikok; haihm ru iken kameihlau in iken.

⁷ Mero haluan mahmani to tan ieremim min mene Piter hmama repaupan in kamiar muan Kalili; tenepaihm in iken rolkoma rameni to kamiar.

⁸ An netakhalier mahmaikamita to nepag, mero in ka nesiouhan neteros ihlel, an nanumun ihlel neterika; an neteshanian nar ker to ieremim, mero in ka kahmaligen.

⁹ An Iesu neterermig lakapnipin le nian aupan le nahwakan, neteraupan mier to Meri Makdalini ierem ramamelhiatou nanumun tat katilum mekiu lan.

¹⁰ An neteruan meni to ilar, merem kamamaruan ilar min, nekin ilar ramahma mamaisak.

¹¹ An ilar netakairou mama remiuh mamier ton, an netakamani neiwean lan.

¹² An mun ka neterier to kiu le ilar mohwapen pusen ker, kamualiwak mamiavan ibat.

¹³ An ilau netikiavan mamuani to nevin, an netesanian mun nuparhienan le ilau.

¹⁴ An mun ka neterier to ilar nerem katilum katilum makarena kamamaiwata to nauganan, an neterametat ilar mero in ka kamesanian nuparhienan lan an nekin ilar remikis, mero in ka kamesanian nuperhienan le nerem kamaihm in reknermig.

¹⁵ An netereni to ilar, Aruan le ten min petum mamaiusito in nakaran ut kam neremim min petum.

¹⁶ Ierem tereni nuparhienan lan mos nebaptisoan tapos miuh; mero ierem tereni neiwean lan tapeni netetan ton.

¹⁷ An nimtatin min uk tepaiuatisig in nerem takani nuparhienan lan, le netigok tefhaliatou nanumun tat min, an tepeikar le nakatan vi,

¹⁸ An teparosit tagalua min; an takama takaramnum nar ekona ker terepesetakenan ilar; an tepeihlaupen nelimin ilar le nerem kamaremis an teparmiuh.

¹⁹ An Ieremera Iesu reknakar ita kam ilar, an kamosit in le neai, an neterowata le nelimin matu te Wuhgin.

²⁰ An ilar netakarier mamatikun le ten min, an Ieremera ramasitu le ilar, mamol asanen nakaran le nimtatin min kamaiuatisig. Amen.