Mark 15 - Nakaran ut te Jesu Kristo 1902

¹ An ihwe am lakapnipin neremera le nuhwasigenan netakarol nuhwafugenan ilar nerem asul mene nerem kamatikun mene neremera min etahun, an netakalis Iesu marir maruan marofen kam Pailet.

² An Pailet netererhapuk ton, Ik Ieremera te Ju min wa? An neteraram mameni ton, Ik nakameni.

³ An neremera le nuhwasigenan netakameitat in to nar min ribor.

⁴ An Pailet netererhapuk mun ton mameni, Tenesaraman nar ker? Ahm ru, naremnar min kuhu kametitat ik lan.

⁵ Mero Iesu resaraman mun nar ker, an Pailet nanumun neterika ton.

⁶ An le nauganan asul ka ramerisin kam ilar ierem le nimwa iakis ker ierem ilar kameihrapkin.

⁷ An ieremim ker netigen Barabas kamelis ilar nerem kamarol neluakenan, nerem kamahro nar ker le neluakenan.

⁸ An nahuto netakaret marwowun meihrapkin mama terol nar rakamol ena kam ilar.

⁹ An Pailet neteraram to ilar mameni, Nakarolkeikei mama tiakrisin kam kamiar Ieremera te Ju min?

¹⁰ Mero in ka rhinatin moma neremera le nuhwasigenan kenaiuraipen in to nereran.

¹¹ An neremera le nuhwasigenan netakaisulasul nahuto mama trerisin am Barabas kam ilar.

¹² An Pailet neteraram mun mameni to ilar, Mero in ka neta tiapol to ierem nakamani mama Ieremera te Ju min?

¹³ An netakani apahm mun, Uit le nik aluauin.

¹⁴ An Pailet netereni to ilar, Mero in ka neta tehwaga tat ramol? An netakamaisak apahm puk aken mamani, Uit le nik aluauin.

¹⁵ An Pailet rolkeikei moma terol ut neki nahuto netererisin Barabas kam ilar, an neterho Iesu mauraipen to neruitan.

¹⁶ An Soldier min netakarir in maruan imwa le nimwa ierem netigen Pretorian, an netakaiunin afugen soldier min le nahuto ka.

¹⁷ An netakarviu in le nar loulou, netakailel nul kasik malis tenkapa lan.

¹⁸ An netakarwowun mameikar vi kam in, Agien, Ieremera te Ju min.

¹⁹ An netakahro tenkapa le nuig mamaigh in, an netakarenum noulin ilar mameihwak kam in.

²⁰ An netakaiusan petum lan, an netakarosita nar loulou marviu in le napen tahan ena. An netakarir iatou in mama takaruit in.

²¹ An netakarhiapatin ieremim ker Saimon, ierem Sairini ierem remsipen ibat mua makavan, remi Aleksander mene Rufas, moma tereles nik alauin tahan.

²² An netakarir marua iken ker Kolkotha, kameni mok lan le nakaran uk, Ten in nevigkihla.

²³ An netakarofen kam in wain kamol pilpil le mer, mero in rapas.

²⁴ An netakaruit in, an netakaroti nar rameviu in lan, mamaitag nar ton mama karena kiten takaros neta?

²⁵ An aur neterol kisil, an netakaruit in.

²⁶ An nar kametat in ton kamrai lan, Ieremera te Ju min.

²⁷ An netakaruit iakihla kiu ihliel min, ker le nelimin matu mene ker le nelimin mul.

²⁸ An nawowa reknet ierem rameni, An kenahwin in le neki noletat.

²⁹ An nerem karua maipita netakameitat in, mamarutin nemrin ilar kam in, mamani, Eu, ik ierem nakamhwasesan nimwa ahwak mamol le nian kisil.

³⁰ Os miuh atu ik matite le nik aluauin.

³¹ Rol mun mok lan neremera le nuhwasigenan netakaiusan lan to ilar min, ilar nerem kamatikun, mamani, Ramos miuh nerapusen, resesanenan to nosmiuhatuin.

³² Pas Kristo Ieremera te Israel ratite towek le nik aluauin, moma takaihm mamani nuparhienan lan. An ierem mil kameruit ihlel min netakamuatat in.

³³ An aur neterol katilum makarena an napinapan neteratite mapinapusun petum ten meroatis aur katilum mekuer.

³⁴ An aur neterol katilum mekuer an Iesu neterasak le nakarapahman, Eloi, Eloi, Lama Sabakthani, kameni mok le nakaran uk, Tahak Wuhgin, tahak Wuhgin, retol nemapas io.

³⁵ An nevin le nerem kamailil iwaket netakairou netakani, Ahm ru, ramaunin Ilaija.

³⁶ An ker neterai muan marig spanj le vinekar neterol pen le nowa nuig mofen kam in moma teramnum, mameni, Arpas ra, pas kaihm ru mama Ilaija terua mos iau in wa kapa.

³⁷ An Iesu neterasak apahm, neteramighau.

³⁸ An napen le nimwa ahwak khapu mekiu, merwowun iles mua le noukarin.

³⁹ An Sentiurion ierem ramamail iwaket etuatu ton neterahm moma ramasak apahm maka lan mamighau, netereni, Nuparhien ieremim uk Neri Wuhgin.

⁴⁰ An neberavin mun nevin kamaretagpen isou, an le nekin ilar Meri Makdalini mene Meri ine Jems asuas mene Joses mene Salome,

⁴¹ Ierem min kamairoupen in marol atkokun nar ton loanian ka in ramemarik Kalili; an neberavin nevin mun ierem min kamairoupen in maret marua Jerusalem.

⁴² An reknapinap mero in ka nepinean, in ka nian raupan in nian ausim,

⁴³ Josef le Arimathia neterua, ierem asul vi ker, ierem in atu mun rametanin niko te Wuhgin, neteruan mesaginan to Pailet merhapkin nubalaki Iesu.

⁴⁴ An Pailet nanumun neterika ton moma reknemis ita, an neteraunin sentiurion mamehrapuk ton moma reknemis ita.

⁴⁵ An neterhinatin pen to sentiurion, neterofen nubalakin kam Josef.

⁴⁶ An neteros nemri napen tuan ker, neteros iau in, netereviu le napen tuan, an neterehlau in le nepag kamerai le kapiel, an neterhwinpen kapiel le nausilua le nepag.

⁴⁷ An Meri Makdalini mene Meri ine Joses netukuahm iken kamehlau in iken.