Mark 14 - Nakaran ut te Jesu Kristo 1902

¹ An oatisig le nian kiu nauganan te Napitean mene bred leven rika lan. An neremera le nuhwasigenan mene nerem kamatikun netakamaitkoigen mama takatuarhiapatin maniwan in marhwapnin,

² Mero in ka netakani, Resolan moma le nauganan moma nakaran teresiboran le nahuto.

³ An neteramarik Bethani le nimwa taha Saimon, wus ramakamis le leprosi, neteramowata to nauganan, an beravin ker neterua ramos boks kamol le alabaster le nihinar le spaiknard nemrin ribor aken; neterhwate nevigenar neteruipen le tenkapa.

⁴ Mero nevin niehma neteretik ilar min, mama, Retol kametaken nihinar mok lan?

⁵ Mero in ka remeruk takaurai in nihinar uk mos nemrin ribor lan le peni 300, an kofen kam navantat.

⁶ An netakamarol niehma kam in. Mero Iesu netereni, Arpas in, retol nakamarol nalkutan kam in? Ramol nar ut lak.

⁷ Mero in ka navantat kamairik to kamiar le nian min, an takama nakarolkeikei remeruk to kamiar moma tenakaisitu le ilar, mero nesarosan io le nian min.

⁸ In ramol nar ramesanen ton; reknaupan mol kaluk kam nubalakok to nerenumaran.

⁹ An nuparhien tiakani to kamiar, iken min petum nakaran ut tepausito in iken le ten min petum, tepeni mun iken nar in ramol moma neki til terakahmo in.

¹⁰ An Judas Iskariot, ker le ilar katilum katilum mekiu, neteruan to neremera le nuhwasigenan, moma teraurai in kam ilar.

¹¹ An netakairou netakaigien, netakani mama takarofen mani kam in, an neteretkoigen nian ut to nauraipenan in.

¹² An le nian iraupan le nauganan taha bred leven rika lan, nian kamarhwasigen Napitean, tan ieremim min netakani ton, Iken petuan nakama tiakaruan iken mamarhwalh nelimi nar mama tenekin Napitean?

¹³ An neterhalita tan ieremim mil kiu mameni to ilau, Iavan lauanu an ieremim ker terepail tosig in kamilau ramos nevigenar le nu; uaroupen in;

¹⁴ An iken teruan imwa iken, uani to ieremera le nimwa ka, Ietikun rameni, Nowa nimwa tahak petuan iken tiakakin Napitean iken, kamar tak ieremim min.

¹⁵ An in atu terefhinhin to kamiar nowa nimwa asul iles naremnar min lan kenolita, an nakamiahwalh nelimi nar tetar iken.

¹⁶ An tan ieremim mil netikiaier miava lauanu mamuahm kama rameni to ilau, an netakamiahwalh nelimi Napitean.

¹⁷ An neterapinap an neterua ilar nerem katilum katilum mekiu.

¹⁸ An ilar netakaiwata namarugan, an Iesu netereni, Nuparhien tiakani to kamiar, ker le kamiar terepaurai io ierem ramaugan kamlau min.

¹⁹ Netakarwowun mamaisak mamani ton, ilar karena kiten, Io wa?

²⁰ An netereni to ilar, Ker le nerem katilum katilum mekiu, ierem iamuel was le nevigenar.

²¹ Mero in ka Neri Ieremim rakavan nolkoma kamrai lan; mero awe to ieremim ka ierem Neri Ieremim tepaurai lan. Repavit to ieremim ka kapasuaihan.

²² An ilar kamemarugan ena an neteros bred, netereni vivi, netererkahl mamofen kam ilar mameni, Aros, in uk nubalakok.

²³ An neteros nevige kap netereni vivi, neterofen kam ilar, an ilar min netakaramnum.

²⁴ An netereni to ilar, In uk nitak le nimtatin vi, kinvi to neremim rapus.

²⁵ Nuparhien tiakani to kamiar, tiepesamnuman mun nowa vain meroatis nian ka tiapamnum irvi le niko taha Wuhgin.

²⁶ An netakaini nabuk marier maruan le Towar Oliv min.

²⁷ An Iesu netereni to ilar, Kamiar muka tenepaipitetel; mero in ka kamrai, Tiafho ierem ramasig sip, an sip min kapos arir.

²⁸ Mero oatisig le nermigan mun tahak tiapaupan in kamiar muan Kalili.

²⁹ Mero Piter netereni ton, Takama ilar muka tepaipitetel mero resolan moma io.

³⁰ An Iesu netereni ton, Nuparhien tiakani tonik, moma nian uk towe lapin uk aupan in menuk terepakaka mau kiu, nepapnin io mau kisil.

³¹ Mero neterameni ausikausik, Takama tiakakeikei memis tonik to tiesepapninan ik. An ilar etahun netakani am maka.

³² An netakarua iken ker netigen Kethsemane, netereni to tan ieremim min, Aiwata ikenuk an to tiapohwak.

³³ An neterir Piter mene Jems mene Jon ilar min, an netererwowun mamasakepuk an nekin mahmapuk.

³⁴ An netereni to ilar, Nekiuk ramahmapuk meroatis le nemisan, amairik uk mamarit.

³⁵ An neteruan mun tahman, an neteram le nemapten, an neteramohwak moma takama remeruk nian terua muan mapas in.

³⁶ An netereni, Aba, Tata, naremnar min remeruk tonik, osita nevigenar uk tonio; mero resolan moma nar io iakolkeikei mero nar ik nakolkeikei.

³⁷ An neterua mahm ihlel kahmaipul, an netereni to Piter, Saimon, nakamapul? Nesesanenan to naitan aur karena?

³⁸ Halit mahmeihwak hmama teneshaluanan le nofenofenan. Nanumamhiel rolkeikei mero nubalakamhiel rapou.

³⁹ An neteruan mun mohwak, mameni am nakaran karena.

⁴⁰ An neterelelegpa mun mahm ihlel kahmaipul, mero in ka nemrin ihlel repukam, an khatiktik am nar takhairam ton.

⁴¹ An neterua mau kisil mameni to ihlel, Haipul ena, hmaimig; reknibor; aur reknua; Haihm ru, Neri Ieremim kenauraipen le nelimi noletat.

⁴² Hairmig, pas karuan; haihm ru, ierem teraurai io reknua iwaket.

⁴³ An ihwe am ramamakar ena an Judas neterua, ker le nerem katilum katilum mekiu, an nahuto puk kamairoupen in le nau apahm mene nim, kamasipen le neremera le nuhwasigenan mene nerem kamatikun mene nerem asul.

⁴⁴ An ierem ramaurai in ramamofen nimtatin kam ilar mameni. Ierem tiakapaih hnulin in un. Arhiapatin hmahma marir maruan.

⁴⁵ An neterua an ihwe am neteruan etuatu ton, mameni, Ieremera. An neterapaih hnulin.

⁴⁶ An netakaihlaupen nelimin ilar lan mamarhiapatin in.

⁴⁷ An ker le nerem kamailil iwaket neterevi nau apahm, neterho iolatkokun nar te ieremera le nuhwasigenan, mamerai ita numatelegen.

⁴⁸ An Iesu neteraram meni to ilar, Kamiar nakarua tonio kama to iakihla le nau apahm mene nim to nehiapatinan io.

⁴⁹ Le nian min iemarik to kamiar le nimwa ahwak mametikun, an nemesarhiapatinan io; mero nar uk kenol moma naremnar min kamrai le nawowa tapol petum.

⁵⁰ An ilar min petum netakaipas in mamaikam.

⁵¹ An temalua ker netereroupen in, ramelkauh in napen tuan le nubalakin am, an netakarhiapatin in,

⁵² An neterapas kalkauh maipuiapuia am makam.

⁵³ Netakarir Iesu marua to ieremera le nuhwasigenan, an ilar muka neremera le nuhwasigenan mene nerem kamatikun mene nerem asul netakarhwafugen.

⁵⁴ An Piter neteramoatisig in isou aken mua le nimwa te ieremera le nuhwasigenan. Neterawomata ilar nolatkokun nar mameroukam le nekam.

⁵⁵ An neremera le nuhwasigenan mene nerem asul min netakamaitkoigen nausitoan le Iesu to nuhwapninan, an netesaihman.

⁵⁶ Mero in ka neremim rapus kamani am neiwean lan, mero kasanian nar karena.

⁵⁷ An nevin netakailil mamani neiwean lan mamani,

⁵⁸ Kamar iemairou in rameni, Io tiafhwate nimwa ahwak uk kamol le nelimitil, an le nian kisil tiapol mun ker ierem kamesolan le nelimitil.

⁵⁹ An rol mok lan ilar mun kamesanian nar karena.

⁶⁰ An ieremera le nuhwasigenan neterail ilukan, netererhapuk to Iesu, mameni, Nesaraman meni nar ker? Neta neremim uk kamani Iam?

⁶¹ Mero neterapnapen am mesaraman nar ker. Ieremera le nuhwasigenan netererhapuk mun ton, mameni ton, Ik Kristo Neri Ierem Keikei?

⁶² An Iesu netereni, Io parhien, an tenepaihm Neri Ieremim rakamowata le nelimin matu te nesanenan makava le napua le neai.

⁶³ An ieremera le nuhwasigenan neterhapu nar rakava lan mameni, Retol takaitkoigen mun nerem takani nar lan?

⁶⁴ Neiknairou nakartetan kam Wuhgin? Nekimiar rakahmo neta? An ilar muka netakani, mama, Ramol tehwaga tat to nemisan.

⁶⁵ An nevin netakarwowun mamaighpen in, mamarviu nemrin, mamarep, mamani ton, Atikun. An nolatkokun nar netakarep autauta marir

⁶⁶ An Piter ramemarik lahau le nematan nimwa, an ker le neberewasuas min taha ieremera le nuhwasigenan neterua,

⁶⁷ An neterahm Piter rameroukam, neteramahmena in netereni, An ik mun nemamuavan kamilau Iesu le Nasareth.

⁶⁸ Mero neterapun mameni, Iakatiktik meshinatinan nar nakameni. An neterier ilua le nausilau. An menuk neterakaka.

⁶⁹ An beresuas neterahm, netererwowun mameni mun to nerem kamailil iwaket, In uk mun ker le ilar.

⁷⁰ Mero neterapun mun. An resolan moma ruhu mun, nerem kamailil iwaket netakani to Piter, Nuparhien ik ker le ilar, mero in ka ik ierem Kalili.

⁷¹ Mero netererwowun mametat mamepawa, moma, Iakatiktik am ieremim uk nakamani in.

⁷² An ihwe am menuk neterakaka mau kiu; an Piter nekin neterakahmo nakaran Iesu rameni ton, moma, Aupan in menuk terakaka mau kiu, ik nepapnin io mau kisil. An nekin neterakahmo neteramasak.