Mark 13 - Nakaran ut te Jesu Kristo 1902

¹ An neterier le nimwa ahwak, tan ieremim min ker netereni ton, Ietikun, arup le kapiel asul min mene nimwa asul min.

² An Iesu netereni ton, nakamahm nimwa asul min uk? Tepespasan ikenuk kapiel rowatatin kapiel mero tepelakhiau petum in.

³ An neteramowata le Towar Oliv min etuatu to nimwa ahwak, an Piter mene Jems mene Jon mene Andru netakaihrapuk pusen ton,

⁴ Ani ru to kamar moma tohnan nar min uk tapol? An neta nimtatin lan takama nar min uk iwaket tapol petum?

⁵ An Iesu netererwowun mameni to ilar, Amairouena kamiar moma ieremim ker tereseuhiatinan kamiar;

⁶ Neremim rapus teparua le netigok mamani mama, Io ka in; an tepareuhiatin nevin.

⁷ An takama tenepairou neluakenan mene nausitoan in neluakenan, asarigenan. Naremnar min uk takaikeikei marua, mero resolan moma nian oatisig reknua.

⁸ Mero in ka nahuto terepermig to nahuto, an niko terepermig to niko, an mig rapavan le ten nevin; an rapoumus; nar min uk nerwowunan nahmean min.

⁹ Mero amairouena kamiar; teparofen kamiar kam nerem asul; an kafho kamiar le nimwa ahwak min; tene pailil le nemri nerem asul mene neremera tonio to nausitoan to ilar.

¹⁰ An nakaran ut terakeikei kaupan kausito in kam nahuto min.

¹¹ An takama teparir kamiar mamarofen kamiar; tenesarigenan mama neta tenepani; mero nar kenofena kam kamiar le nian ka tenakani, mero in ka resolan moma kamiar tenakaikar mero Nanumun Ausim.

¹² An ieremim ker terepofen pian to nemisan, an remin terepofen nerin, an nererin tepairmig to remin mene inen ilar an teparhwapnin ilar.

¹³ An neremim petum tepaimakin kamiar to netigok, mero ierem repail tumutum to nuhiefin in tapos miuh.

¹⁴ An takama tenakaihm nahwohwean le nelikunan ramail iken resevitan iken, ierem terahwin pas rhinatin, le nian ka pas nerem le Judia kaikam maret le towar min,

¹⁵ An ierem letui nimwa pas resatitean muan imwa moma terosita nar le nimwa tahan.

¹⁶ An ierem le neki nasuman pas reslelegpean mun to nosan napen tahan.

¹⁷ Mero awe to neberan kamasinen mene neberan kamaimaih ilar le nian min ka.

¹⁸ An aihwak mama tepesolan le nian te nerapan.

¹⁹ Nian min ka tapol nahwohwean ierem kasolan maka lan le nerwowunan naremnar min Wuhgin ramol meroatis le nian uk towe mene, an tepesolan mun maka lan.

²⁰ An takama Ieremera repesolan nian rerparup ieremim ker tepesosmiuhan; mero to neremim kenahmpen ilar, ierem min ramahmpen ilar, ramol nian rerparup.

²¹ An le nian ka takama ieremim ker tereni to kamiar, Ahm ru, in uk Kristo, Ahm ru, iken, tenesanian nuparhienan lan.

²² Mero in ka Kristo aiwa tepairmig mene profeta aiwa min, an teparofen nimtatin min mene narepuk min mama takareuhiatin nerem kenahmpen ilar, takama remeruk.

²³ Mero kamiar amairou ena kamiar. Iaknaupan meni nar min to kamiar.

²⁴ Mero nian ka oatisig le nahwohwean ka mit repapinap, an mouk terepesofenan hnakakan tahan.

²⁵ An mahau min tepeisas le neai an nesanenan min ierem min le neai tepaisiouh.

²⁶ An le nian ka tepaihm Neri Ieremim rakava le napua le nesanenan asul mene nevitan.

²⁷ An le nian ka terefhalita agelo min, an terefhwafugen nerem kenahmpen ilar le nemetag kuer le nuhiefi ten meroatis le nuhiefi neai.

²⁸ Mero to nihm arhinatin hnoa nakaran; takama nelimin rikenmeruk mamol numalin, nakarhinatin mama telesa iwaket.

²⁹ Rol mok lan kamiar mun takama tenakaihm naremnar min uk kamol, nakarhinatin mama in iwaket le nausilua.

³⁰ Nuparhien tiakani to kamiar moma nepsen neremim uk teresikean meroatis naremnar min uk tapol.

³¹ Neai mene nemapten tepiaka, mero nakaran min tahak teresikean.

³² Mero ieremim ker reshinatinan nian ka wa aur ka, an agelo min le neai katiktik, mene Nerin, mero in am Remin.

³³ Amairouena kamiar mamarit mameihwak, mero in ka nesarhinatinan mama nian petuan.

³⁴ In rolkoma ierem ramarik le ten pusen an mapas tahan nimwa, an mofen nesanenan kam nolatkokun nar tahan, mameriatin karena kiten le work tahan, mameni to ierem ramail le nukulu moma terait.

³⁵ Mero in ka tenakamarit, mero in ka nesarhinatinan mama Ieremera le nimwa terua nahan, lehnaiu wa lapin lalukan, wa menuk terakaka, wa lakapnipin.

³⁶ Moma teresuean hwaihwai am mahm kamiar nakamaipul.

³⁷ An nar iakameni to kamiar iakameni to neremim petum, tenakamarit.