Mark 12 - Nakaran ut te Jesu Kristo 1902

¹ An netererwowun mameni to ilar le hnoa nakaran, Ieremim ker rahmau nasuman le vain, an neteretik napar riko in, an neteril nimil to navitan nowa vain, an neterol nimwa asul ton, an neterofen kam nasum, an neteruan le ten pusen ker.

² An nian vi neterua neterhalipen iolatkokun nar ruan to nasum, moma teros nowa vain to nasum.

³ An netakaros in mamahro mahilita resosan nar.

⁴ An neterhalipen mun iolatkokun nar ker mun ruan to ilar, an netakahro in le tenkapa mamarol naulisan ton.

⁵ An neterhalipen ker mun; an netakarhwapnin in; an nevi mun, netakahro nevin, an netakarhwapnin nevin.

⁶ An karena am remarik ton, nerin keikei, neterhalipen in roatisig aken to ilar mameni, Tepasiai Neruk.

⁷ Mero nasum ka netakani to ilar min, mama, In uk ierem nasuman terepol tahan in, ita pas kahro in, an nasuman terepol tetar in.

⁸ An netakaros marhwapnin in, an netakailakiatou in ilua le nasuman.

⁹ Neta ieremera le nasuman terepol? Terepua nuhwapnin nasum ka, an terepofen nasuman kam nerapusen.

¹⁰ Nemesaihwinan nawowa uk, Kapiel ierem nerem kamarol nimwa kamaipas, in uk kenol ieremera le nikalin.

¹¹ Nar uk remsipe le Ieremera, an ravitipuk le nemritar.

¹² An netakamaitkoigen mama takarhiapatin, mero kamarignin nahuto; mero in ka karhinatin mama rameni hnoa nakaran to ilar. An netakaipas in mamaruan.

¹³ An netakahilipen ton Farisi min nevin mene neremim nevin taha Herod mama takarhiapatin in le nakaran.

¹⁴ An netakarua mamani ton, Ietikun, iakarhinatin mama nakaparhien meseniapkisan ieremim ker, mero in ka nesahmpenan nemri neremim, mero nakametikun suatu te Wuhgin le nuparhienan. Rematu tokofen nar kamosatin kam Sisar wa kapa?

¹⁵ Tiakarofen wa tiesarofenan? Mero neterhinatin neiwean tenilar, netereni to ilar, Retol nakamarofenofen kam io? Aros ru peni marua mama tiakahm.

¹⁶ An netakaros marua. An netereni to ilar, Nanumu fe uk mene neraian? An ilar netakani ton, Taha Sisar.

¹⁷ An Iesu netereni, Arofen kam Sisar nar taha Sisar, marofen kam Wuhgin nar taha Wuhgin. An nanumun ilar neterakamuka ton.

¹⁸ An Sadiusi min netakarua ton, nerem kamani mama nermigan mun le nemisan rika, an netakaihrapuk ton mamani,

¹⁹ Ietikun, Moses remrai kam kamar moma takama pia ieremim ker teremis an mapas tahan beravin an nerin rika, pian terepir beravin ka an moposit nerin to pian.

²⁰ Neremim katilum mekiu nereri ieremim karena; an ierem aupan remir beravin an neteremis, nerin rika.

²¹ An ierem rol kiu neterir in, an neteremis nerin rika. An ierem rol kisil rol mun nar karena.

²² An ilar katilum mekiu, nerin ilar rika. An oatisig aken le ilar min beravin mun neteremis.

²³ Le nermigan mun le nemisan pehe le ilar terol nuain lan? Mero in ka ilar katilum mekiu kamamaros in to nuain ilar.

²⁴ Iesu netereni to ilar, Resolan moma le nar uk kamiar nakamaipitetel mero in ka nakatiktik nawowa mene nesaneanan taha Wuhgin.

²⁵ Mero in ka le nian tepairmig mun le neki nerem kamaremis tesairoean an tepesofenan le neroean; mero takarol kama agelo min le neai.

²⁶ An le nerem kamaremis moma takairmig mun nemesaihwinan le nawowa Moses remrai le nik, moma Wuhgin rameni ton, moma, Io Wuhgin te Ebraham mene Wuhgin te Aisak mene Wuhgin te Jecob.

²⁷ Resolan moma in Wuhgin te nerem kamaremis, mero te nerem kamarmiuh. Nakamatiktik aken nar.

²⁸ Ker le nerem kamatikun neterua, netererou ilar kameihrapuk to ilar min, an neterhinatin moma ramaram vi to ilar, netererhapuk ton, Ierem petuan nowa iraupan le ilar min?

²⁹ Iesu neteraram, Iraupan uk, Airou, Israel, Ieremera in Wuhgin tetar, Ieremera in karena,

³⁰ An tenepolkeikei Ieremera taham Wuhgin le nekim etahun, mene le nemihwan etahun taham, mene le nar min nekim rakahmo, mene nesanenan petum taham.

³¹ An ieroupen uk, Tenepolkeikei tamiel kama ik atu mene. Resolan moma nowa ker mun iribor le ierem mil uk.

³² An ietikun netereni ton, Ravit, Iietikun, nakameni parhien, in am karena an resolan moma ker mun mero in am.

³³ An nolkeikeian in le nekin etahun mene le hninatinan etahun mene le nesanenan petum, mene nolkeikeian taniel kama in atu mene, iravit le nuvanakruan natipun mene nuhwasigenan min etahun.

³⁴ An Iesu netererou moma ramaram ton le nalbakauan, netereni ton, Resolan moma ik isou to niko te Wuhgin. An neremim min kamarigen to nehrapukan mun ton.

³⁵ An Iesu neteraram mameni le netikunan tahan le nimwa ahwak, Retol nerem kamatikun kama Kristo Neri Devid?

³⁶ Devid in atu rameni le Nanumun Ausim, Ieremera rameni to Ieremera tahak, Owata le nelimok matu, meroatis tiapol tikimer min taham lahau le nelikam.

³⁷ Devid in atu rameni moma in Ieremera; an teretua mol nerin lan? An nahuto puk netakairou in le nagienan.

³⁸ An netereni le netikunan tahan, Amairou ena kamiar to nerem kamatikun, nerem karolkeikei nuenan le napen apahm, mene nakarvian imaim,

³⁹ Mene nihmawa aremera le nimwa ahwak, mene nihmawa aremera le nauganan,

⁴⁰ Nerem kamarkinita nimwa te neberan kamemis etag ilar, mameihwak apahm to nahman; ilar uk teparos netetan iribor.

⁴¹ An neteramowata pen etuatu to nar kameihlau nofenan lan, an neterahm nahuto moma kamairuin mani le nar kamehlau nofenan lan. An nevin nauta tenilar ribor kamairuin asul.

⁴² An beravin kamemis etag ker nauta tahan rika neterua, neteraruin nanumu mani asuas aken kiu, ilau kuauker in takeri peni ierem rol kuer.

⁴³ An neteraunin ton tan ieremim min netereni to ilar, Nuparhien tiakani to kamiar moma beran uk kamemis etag in, ierem nauta tahan rika, reknaruin mani iribor le neremim min petum kamairuin mani le nar kamehlau nofenan lan.

⁴⁴ Mero n ka ilar min le nauta asul tenilar kamairuin, mero in le navantetan tahan ramaruin petum naunin mani tahan, petum nar ramarik lan.